लुका 3 - आठपहरियाबाप्टिस कापि युहान्नाङाना खाबोर ( मात्ति ३:१-१२ ; मारकुस १:१-८ ; युहान्ना १:१९-२८ ) 1 कैसार तिबेरिअस ओलोडुनाँ सासान् चोगुना पोन्धरा बारखा टासुएसुना॥ हिट्ना बेला पान्तियास पिलातास ओलोडुना याप्मि याहुदिया छेट्राङाना हाकिम डाना॥ हेरोद एन्टिपासङा गालिल छेट्राङि सासान् चोगुए हिट्नुङ् उन्झा फिलिपङा इतुरिया हिट्नुङ् तारखोनितिस इलाकाङि सासान् चोगुए॥ लुसानियास ओलोडुना याप्मिङा आबिलेने छेट्राङि सासान् चोगुए॥ 2 हिट्ना बेलाना सानिङ्डाङ्बा हान्नास हिट्नुङ् कैयाफा डागाचि॥ हिट्ना बेला माङ्हाङ् जाकारिया उइछा युहान्नालोक् चेक्टे, उन् साक्चा उयुङ्निना डेन्ङि युङाना॥ 3 युहान्नाङा यारदान होङ्ङाना याम्बा-नायाम्बालेङ्ङाना छेट्राङि खाडाउङ् याप्मिचि नाड्डे लोडुचे, “पाप छेमा टोक्माउङ्सा काएल्-काबु लिसानि हिट्नुङ् बाप्टिस्मा चोगानि॥” 4 नाड्डे पारा माङ्काटा यासैयाङा धारमाछाप्लाङि छेप्टाना रिङ् युडे– “खेम्सानुम्, साक्चा उयुङ्निना डेन्ङि ठिबाङ् याप्मि टाराङ्-टाराङ् राट्सा पिग्येट्, ‘टाङ्बाङाना लाम्बो टेयार चोगानुम्, उन् लाम्टिना लाम्बो नुलोक् पेमाडान् चोगानुम्॥ 5 ख्वाप्पा होङ्सोङ् फुक्मा कोन्युक्, झोन्झोबा हिट्नुङ् झोन्झोन्बाचि नेम्नेम् चोक्मा कोन्युक्, गेङ् गेङ्गा लाम्बोचि पेमाडान् चोक्मा कोन्युक् हिट्नुङ् घेट्रेक्गा लाम्बोचि टोङ्मा कोन्युक्॥ 6 हिट्नुङ् माङ्हाङ्ङा याप्मिचि उहिङ्ग्वाट् चोगुचिगा टोॽवा सोब्बेङा उनिसुटु॥’” 7 जोम् याप्मिचि युहान्नाङि बाप्टिस्मा चोक्ङा ओटाए॥ टरो युहान्नाङा लोडुचे, “हाउ बिखालु ओप्पु गाड्डे दुस्टा याप्मिचिगा छालेट्चि, माङ्हाङ्लाम्मा ठाना उकुन्जिरिक्वालाम्मा पिम्माप्मा लोङ्सा खानि साङा माहिसिक्टेगा? 8 छेम्बा डोक्, खानिङा आ-आप्पे आचोगुम्गा पापलाम्मा काएल्-काबु आलिसिगा भोने, हिट्नाड्डे गाड्डे डोक् चोगानि॥ टरो ‘आन्याँम्टे आब्राहामङाना ओछालेट्चि गोलो टे’ पिक्सा माङ्हाङ् उपुन्जिरिॽवालाम्मा होम्मा हिडिटिङा नुङ् मिट्नेनिन्॥ आङा खानि लोनाँनि, माङ्हाङ्ङा नागा लुङ्गेॽवालाम्मा चा आब्राहाम ओछालेट्चि चोग्मा हिडुटु॥ 9 हाट्ले डोक् सिङ् उभुङ्मा ओजाराङि माङ्हाङ्ङा न्याएङाना फेन्डिक्ङा ठोग्मा टेयार चोगुएसुए॥ हिट्डेउङ् ओचेट्नुलोक् टुल्फुल ओकेङुन्गा सोब्बे सिङ् उभुङ्माचि ओटाङुचिउङ् मिङि ओठेन्डुचिचि॥” 10 याप्मिचिङा युहान्ना उसिलाप्टुए, “हिट्नाडे भोने आन्याँ पाक् चोग्याँगा टे?” 11 युहान्नाङा हिट्नागा नाड्डे लोडुचे, “खानि साक् साक्लोक् इ-इप्पोक् भोटो युङ्ग्वा भोने, ठिक् भोटो ओवानिगालाउङ्सा पिडानुम् हिट्नुङ् चामागा ठुङ्मागा युङ्गालोक्, पाक्चा ओवानिगालोङ्सा पिडानुम्चिम्॥” 12 हिट्नुङ् सारकारलोङ्सा तिरो काफोक्बाचि चा चुवाङि बाप्टिस्मा चोक्माउङ्सा ओटाए हिट्नुङ् युहान्ना उसिलाप्टुए, “हाउ काहिसिक्बा, आन्याँम्बाक् पाक् चोक्मा कोन्युक्ना टे?” 13 हिट्नागा युहान्नाङा लोडुचे, “तिरो फोक्माउङ्सा मालोडिगा नुङ्ना जोम् ओफाबा फोक्नेनुम्॥” 14 उपिङ्बाचिङा चा उसिलाप्टुए, “आन्याँम्बाक् पाक् चोक्मा कोन्युक्ना?” युहान्नाङा हिट्नागा लोडुचे, “याप्मिचिङा निङ्ग्वा मिटाए मिटाए, ओचोगुन्गेट्टुन्गा फाट्टुर लाहाब् चोक्सा ओफाबा लाट्नेनुम्॥ खानिङा आटोगुम्ना निम्याक्ङि डोक् खानि निङ्ग्वा युङ्सानुम्॥” 15 हिट्नुङ् याप्मिचिङा खिरिस्ट ओहाङ्सुएट्टुनाँ हिट्नागाँ युहान्ना डोक् खिरिस्ट इ नुङ् उमिट्टुएट्टुना॥ 16 हिट्ना बेला युहान्नाङा हिट्नागा ख्वाप्पा याप्मिचि लोडुचे, “आङा खानि चुवाङा बाप्टिस्मा पिनाँनि॥ टरो आङा नुङ्ना ठेना ठिबाङ् टायुगेट्, आङाउम्टे उन्ङाना ओलाङ्सुप्ङाना उरिप्मा फेम्माबिमा चा याङ्खान्ना नुना याप्मि माखाक्॥ उन्ङा डोक् खानि सेङ्सेङ्ना हाङ्सा हिट्नुङ् मिङा बाप्टिस्मा मापिडिटि॥ 17 ना बेला, उन्ङा चासोङ् चेङ्मा लाउङ्सा नाङ्गोलोक् उमुक्ङि याङुएसुए॥ उन्ङा ओखाला ओचेट्नुलोक् फेगुटु, हिट्नुङ् चासोङ् चेङ्ढुङ् ढुङ्गुरिङि युङ्सुटु, टरो उभुसुॽवाउम्बाक् खोना बेला चा सिनिना मिङि उडुडिसुटु॥” 18 नाड्डेगा रिङ्चि आरु चा जोम् हिसिक्सा युहान्नाङा नुना खाबोर याप्मिचि खेम्मेट्टुचे॥ 19 हेरोद एन्टिपास सासाक्ङा आप्पे उन्झा ओपाङ्डाङ्मा हेरोदियास भ्या चोगुनाँ हिट्नुङ् हिट्ना सासाक्ङा जोम् आरु चा ओचाफेन्ना टोॽवाचि चोगुनाँ युहान्नाङा ना सासाक् खेमा लाप्टुए॥ 20 हिट्नुङ् हेरोद एन्टिपासङा युहान्ना खाम्बाङ्ङि ठेन्डुङ् हिट्नागा ओचाफेन्गा टोॽवाचिङि आझै ठिक् ओचाफेन्ना टोॽवा चोगुए॥ येसुङा चुवाङि बाप्टिस्मा लाडुना ( मात्ति ३:१३-१७ ; मारकुस १:९-११ ; युहान्ना १:३२-३४ ) 21 ठिक् लेम्बा ख्वाप्पा याप्मिचिङा बाप्टिस्मा ओलाडुएटुनाँ येसुङा चा बाप्टिस्मा लाडुए, हिट्नुङ् उन्ङा बिन्टि चोगुना पाका टोनालोग् ओङ्से॥ 22 हिट्नुङ् सेङ्सेङ्ना हाङ्सा ढुकुरङाना उरुप्ङि येसु उठुइ ठायाउङ् युङे हिट्नुङ् टोनालोग्लाम्मा ठिक् रिङ् मुक्टे, “खान् आङाना आमायालु छा, खान्लोक् आड्डिक् टुक्लोक् आचाप् टाइसे॥” येसुङाना पुङ्लाचि ( मात्ति १:१-१७ ) 23 येसुङा ओसेवाङाना टोॽवा उटुम् चोगुना बेला उन्ङा तिस बारखा टेप्मा टासुएसुना॥ याप्मिचिङा योसेफ येसुङाना उप्पा नुङ् उमिट्टुए, योसेफङाना उप्पा एलि लिसे॥ 24 एलिङाना उप्पा मातात्त, मातात्तङाना उप्पा लेबि, लेबिङाना उप्पा माल्कि, माल्किङाना उप्पा यान्ना, यान्नाङाना उप्पा योसेफ, 25 नाड्डे पाराउङ् योसेफङाना उप्पा मात्ताथियास, मात्ताथियासङाना उप्पा आमोस, आमोसङाना उप्पा नाहुम, नाहुमङाना उप्पा इसालि, इसालिङाना उप्पा नाग्गै, 26 नाग्गैङाना उप्पा माथ, माथङाना उप्पा मात्ताथियास, मात्ताथियासङाना उप्पा सेमैन, सेमैनङाना उप्पा योसेख, योसेखङाना उप्पा योदा, 27 योदाङाना उप्पा योआनान, योआनानङाना उप्पा रेसा, रेसाङाना उप्पा यारुबाबेल, यारुबाबेलङाना उप्पा सालतिएल, सालतिएलङाना उप्पा नेरि, 28 नेरिङाना उप्पा माल्कि, माल्किङाना उप्पा आद्दि, आद्दिङाना उप्पा कोसाम, कोसामङाना उप्पा एलामादम, एलामादमङाना उप्पा एर, 29 एरङाना उप्पा याहोसु, याहोसुङाना उप्पा एलिएजर, एलिएजरङाना उप्पा योरिम, योरिमङाना उप्पा मातात्त, मातात्तङाना उप्पा लेबि, 30 लेबिङाना उप्पा सिमियोन, सिमियोनङाना उप्पा याहुदा, याहुदाङाना उप्पा योसेफ, योसेफङाना उप्पा योनान, योनानङाना उप्पा एल्याकिम, 31 एल्याकिमङाना उप्पा मालेआ, मालेआङाना उप्पा मिन्ना, मिन्नाङाना उप्पा मात्ताथा, मात्ताथाङाना उप्पा नातान, नातानङाना उप्पा दाउद, 32 दाउदङाना उप्पा यिसै, यिसैङाना उप्पा ओबेद, ओबेदङाना उप्पा बोआज, बोआजङाना उप्पा साल्मोन, साल्मोनङाना उप्पा नाहासोन, 33 नाहासोनङाना उप्पा आम्मिनादाब, आम्मिनादाबङाना उप्पा आराम, आरामङाना उप्पा हेस्रोन, हेस्रोनङाना उप्पा फारेस, फारेसङाना उप्पा याहुदा, 34 याहुदाङाना उप्पा याकुब, याकुबङाना उप्पा इसाहाक, इसाहाकङाना उप्पा आब्राहाम, आब्राहाम उप्पा तेराह, तेराहङाना उप्पा नाहोर, 35 नाहोरङाना उप्पा सारुग, सारुगङाना उप्पा राउ, राउङाना उप्पा पेलेग, पेलेगङाना उप्पा एबेर, एबेरङाना उप्पा सेलाह, 36 सेलाहङाना उप्पा केनान, केनानङाना उप्पा आरपाछेद, आरपाछेदङाना उप्पा सेम, सेमङाना उप्पा नोआ, नोआङाना उप्पा लेमेख, 37 लेमेखङाना उप्पा मातुसेलाह, मातुसेलाहङाना उप्पा हानोक, हानोकङाना उप्पा येरेद, येरेदङाना उप्पा माहालालेल, माहालालेलङाना उप्पा केनान, 38 केनानङाना उप्पा एनोस, एनोसङाना उप्पा सेत, सेतङाना उप्पा आदाम हिट्नुङ् आदामम्बाक् माङ्हाङ्ङाना उइछा लिसे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.