लुका 2 - आठपहरियायेसु पोङ्साना ( मात्ति १:१८-२५ ) 1 हिट्ना लेम्बा रोमि देसङिना हाङ्बा कैसार आगास्टसङा उमुलुक् भोरिगा ख्वाप्पा याप्मिचिङा सारकारङि निङ् छेप्मा डोक् कोन्युक् पिक्सा माट्टुए॥ 2 ना पाइलाना खेप् निङ् छेप्माना रिङ् होन्डानाङा सिरिया छेट्राङि कुरेनियस ठेना हाकिमङा सासान् चोगुएट्टुना॥ 3 सोब्बे याप्मिचि उन्चि निङ् छेप्माउङ्सा रोमि हाङ्बाङा लोडुचि गाड्डे आ-आप्पे युक्ताम्ङि ओखाडे॥ 4 हिट्ना बेला योसेफम्बाक् गालिल छेट्राङाना नासारात ओलोडुना खालाङ्गाङि युङाना डाना॥ हिट्नुङ् उन् युङाना युक्ताम्लाम्मा दाउद हाङ्ङाना उटुबाठेबा याहुदिया छेट्राङाना बेथलेहेम युक्ताम्ङि खाडे॥ पोङ्भोने योसेफम्बाक् दाउद हाङ्बा पुङ्लाङाना छालेट् लिसे॥ हिड्डे लिसाउङ् उनिङ् छेप्सिङा बेथलेहेम युक्ताम्ङि उन् खाडे॥ 5 योसेफङाना भ्याबारि चोक्माना रिङ् लिसानाङा लोइबा ठेन्डुना मारियाम चा खाट्टुङ् एक्केउ खाडाचे॥ हिट्ना बेला मारियाम पोङ्ना लिसेसाना॥ 6 हिट्नुङ् हिट्नागाचि बेथलेहेम युक्ताम्ङि वासाचिनाङा डोक् मारियामङाना छाडाङ्मा लिमाना बेला टाए॥ 7 मारियामङा हिट्नि डोक् तुम्सामिङ् येम्बेछा छा पोङ्सुए, हिट्नुङ्ना हिट्ना ओओ सिम्बेलेॽवाङा रिगुङ् खोङ्डाङ्ङि इम्मेट्टोए॥ पोङ्भोने हिट्ना बेला उन्चिङा याम्बा-नायाम्बा खोनाइ चा बास युङ्माना डेन् चा टुब्च्वाच्चुन्॥ माङ्हाङ् रिङ् काउग्बा हिट्नुङ् ठुँबा कापुबाचि 8 बेथलेहेम युक्ताम्ङाना भारा चाउरिङि ठुँबा कापुचि ठुँबा कोसा युसा उयुङासागा॥ 9 हिट्ना बेला माङ्हाङ् रिङ् काउग्बा उन्चि टोकाना सोरि टाए॥ हिट्नुङ् माङ्हाङ्ङाना ओम्ना ओसाङ् हिट्नागा याम्बा-नायाम्बा सोब्बेलेङ् ओम्से॥ ना उनिसुङ् ठुँबा कापुचि पिलिम् पिलिम् ओयोक्टालोक् उकिट्टे॥ 10 टरो माङ्हाङ् रिङ् काउग्बाङा हिट्नागा लोडुचे, “खानि किट्नेनिन्, पोङ्भोने हाट्ले आङा खानि ख्वाप्पा याप्मिचिलाउङ्सा आड्डिक् चाप् टाना रिङ् काप्टुङ् खानि टोकानाइ होन्डाउङ् टाएसाङे॥ 11 खेम्सानुम्, हाट्ले दाउद हाङ्बा पोङ्साना बेथलेहेम युक्ताम्ङि खानिलोङ्सा ठिबाङ् काहिङ्मेप्बा डाङ्बा पोङ्सेसे॥ उन् डोक् खिरिस्ट लियुक्॥ 12 खानिङा ओओम्बाक् सिम्बेलेॽवाङा उरिगुङ् खोङ्डाङ्ङि उइमेट्टुना आनिसुम्टुम् हिट्नुङ् ना रिङ्लाम्मा डोक् खानिङा उन् मिसेन् आनिसुम्टुम्॥” 13 हिट्ना पाकालोक् माङ्जोम् ना जोम् माङ्हाङ् रिङ् काउग्बाचि चा हिट्नि ओठेट्टाउङ् माङ्हाङ्ङाना उनिङ् चोन्सा, पोए-पोए लोसा हिट्नागाङा नाड्डेना छाम्लोमा ओठाक्टुए, 14 “सोब्बे नुङ्ना उठुइ टोनालोग्ङि आयुङ्ना माङ्हाङ्ङाना निङ् टो-टो उलियाक्, हिट्नुङ् उन्ङा निङ्ग्वा टाडुचिगा ना नाराङिगा याप्मिचिङा हाङ्हाङ् निङ्ग्वा ओटोगुयाक्टुवाक्॥” 15 हिट्नुङ् माङ्हाङ् रिङ् काउग्बाचि टोनालोग्लेङ् ओनोक्टा ओखाडाउङ् ठुँबा कापुबाचि उमुन्डुप्टाउङ् उपिगे, “हाट्ले, माङ्हाङ्ङा आलोडा गाड्डे बेथलेहेम युक्ताम्ङि पाक् लिसेना टे पुसिङा खाड्याक्॥” 16 हिट्नुङ् हिट्नागा एला एला पिन्सा बेथलेहेम युक्ताम्ङि ओखाडे॥ हिट्नि मारियाम, योसेफ हिट्नुङ् ओओम्बाक् खोङ्डाङ्ङि उइमेट्टुएसुना हिट्नागाङा उनिसुए॥ 17 हिट्नुङ् ठुँबा कापुबाचिङा ओओङाना रिङ् माङ्हाङ् रिङ् काउग्बाचिङा ओमाट्टुना ख्वाप्पा याप्मिचि ओखेम्मेट्टुचे॥ 18 ना रिङ् ओखेम्सुङ् ख्वाप्पा याप्मिचि डोङ् ओठोङ्डे॥ 19 टरो मारियामङा नागा सोब्बे रिङ् उनिङ्ग्वाङि डोक् युङ्सुयाक्टुए॥ 20 हिट्नुङ् ठुँबा कापुबाचिङा माङ्हाङ् रिङ् काउग्बाचिङा उमाट्टुना रिङ् गाड्डे ओखेम्सुनाँ हिट्नुङ् उनिसुनाँ माङ्हाङ्ङाना माहिमा हिट्नुङ् उनिङ् चोन्सा हिट्नागा ओनोक्टे॥ ओओङाना निङ् येसु खेङ्बालाक् 21 ओओ पोङ्साउङ् साङ् लेम्बा टासुनाँ इस्राएलि छोङ्चिगा धारमाबिधिङि छेप्टाना चालान् गाड्डे हिट्ना ओओङाना खाताना ओचोगुङ् येसु उनिङ् ओमेट्टुबिडुए॥ ना निङ्उम्बाक् मारियामङा छा खुमा नुङ्ना आगाडि डोक् माङ्हाङ् रिङ् काउग्बाङा येसु निङ् खेङ्सानुम् पिक्सा लोडुएसुचिगा॥ माङ्ठानाङि येसु ओटाडुना 22 मोसाङा छेप्टुना धारमाबिधि चालान् गाड्डे हिट्नागा चोख्याँ लिमाना बेला युमा हिडाउङ् येसुङा उमा हिट्नुङ् उप्पाङा ओओ यरुसलेमङिना माङ्ठानाङि माङ्हाङ्लोङ्सा पिमाडिमा चोक्ङा आप्टाचुए॥ 23 पोङ्भोने माङ्हाङ् डाङ्बाङिना धारमाबिधिङि नाड्डे छेप्टेसे, “पाइले पोङ्साना सोब्बे याप्मिचिगा तुम्सामिङ् येम्बेछा माङ्हाङ्लोङ्सा साम्मा कोन्युक्॥” 24 हिड्डे पारिक् माङ्हाङ् डाङ्बा धारमाबिधिङि छेप्टि गाड्डे, “ठिक् जोर लाप्टाङ्गेॽवा आथाबा ठिक् जोर ढुकुरङाना उइछाचि माङ्हाङ्ङि भोक् पिमा ओआबे॥” 25 हिट्ना बेला सिमियोन ओलोडुना याप्मि यरुसलेमङि युङाना॥ उन् माङ्हाङ्ङाना रिङ् टेन्ना याप्मि डाना हिट्नुङ् माङ्हाङ्ङाना सेवा चोगाना॥ उन्ङा इस्राएलि छोङ्चिगा काहिङ्मेप्बा डाङ्बाङाना लाम्बो पुयेट्टुना हिट्नुङ् माङ्हाङ्ङाना सेङ्सेङ्ना हाङ्सा उन्लोक् युङासाना॥ 26 माङ्हाङ् डाङ्बाङा पाङ्सुना खिरिस्ट मिनिए आसिनिना पिक्सा आसेन्डोक् ना याप्मि सेङ्सेङ्ना हाङ्साङा ठाहा पिडुएसुना॥ 27 हिट्नुङ् सिमियोन सेङ्सेङ्ना हाङ्साङा ठाहा पिडुङ् माङ्ठानाङि खाडे॥ हिट्ना बेला डोक् मारियाम हिट्नुङ् योसेफ चा धारमाबिधिङि छेप्टाना रिङ् चोक्माउङ्सा माङ्ठानाङि ओओ येसु पिमाडिमा चोक्ङा टायाचे॥ 28 हिट्नुङ् सिमियोनङा हिट्ना ओओ उमुक्ङि काप्टुङ् माङ्हाङ् उनिङ् चोन्सा नाड्डे पिगे, 29 “माङ्हाङ् डाङ्बा, खान्ङा आङालोक् माङ्हुप् आचोगुना रिङ् युदैसे, हाट्ले आङा कासेवाक्ङाना ओचेट्नुलोक् आसोक्मा उखाॽयाक्॥ 30-31 पोङ्भोने खान्ङा डोक् ख्वाप्पा छोङ्बा याप्मिचिङा मिसेन् उनिसु नुङ् आपाङ्सुना काहिङ्मेप्बा डाङ्बा आप्पे आमिक्ङा डोक् निसुएसुङे॥ 32 उन् डोक् पानिछोङ्बा याप्मिचिलोङ्सा कालाम्बोङि लाम्टिमाउङ्सा कानिमेप्बा व्हाङ् लियुक् हिट्नुङ् उन्लाम्मा डोक् काछालेट् इस्राएलि छोङ्चिगा माहिमा लियुक्॥” 33 सिमियोनङा ओओङाना बारेङि माट्टुनाँ मारियाम हिट्नुङ् योसेफ डोङ् ठोङ्डाचे॥ 34 हिट्नुङ् सिमियोनङा उन्चि आसिक् पिडुचिउङ् ओओ उमा मारियाम लोडुए, “हाट्ले ना ओओलाम्मा जोम् इस्राएलि छोङ्चि ओमेग्याक् नुङ् हिट्नुङ् नुलोक् लिमाना लोङ्सा माङ्हाङ्ङा ना ओओ सेगुएसे॥ उन् डोक् माङ्हाङ्ङाना निमेट्मेमाना चिन्ना लियुक् हिट्नुङ् जोम् याप्मिचि ओओ बिरोधङि ओचेक्युक्॥ 35 हिड्डेउङ् याप्मिचिङा उन्चि निङ्ग्वाङिगा रिङ् ठाहा ओटोगुटु॥ हिट्नुङ् खान्ङाना कानिङ्ग्वाम्बाक् यान्ना चेप्साङा रोक्टि गाड्डे याङ्छामाङा टुक्युक्॥” 36 हिट्ना बेला ठिबाङ् मासिङ् हान्ना ओलोडुना मेन्झेमा माङ्ठानाङि सेवा चोक्सा युङासाना॥ ना मेच्छेमा आसेर पुङ्लाङिना फानुएल याप्मिङाना उइछा डाना हिट्नुङ् माङ्काटा मेन्झेमा डाना॥ उन् भ्या लिसाउङ् सि बारखा टेप्मा ओयेम्बेछालोक् एक्केयु युङाचे टरो उन् लाङ्मेप्मा लिसे॥ 37 हिट्नुङ् उन्ङा हिट्ना बेला चौरासि बारखा टेप्मा टासुएसुना॥ उन्ङा खोना बेला चा माङ्ठाना नाडुव्ट्टुन्ना, उन् उपासा हिट्नुङ् बिन्टि चोक्सा लेन्सेन् माङ्ठानाङि माङ्हाङ्ङाना सेवा चोक्सा युङायाक्टाना॥ 38 हिट्ना बेला डोक् हिट्ना योसेफ हिट्नुङ् मारियाम सोरि आबाउङ् माङ्हाङ् उनिङ् चोन्डुए हिट्नुङ् यरुसलेम खालाङ्गाङिगा इस्राएलि याप्मिचिगा छुट्काराङाना लाम्बो ओहाङ्सुएटुगा ख्वाप्पा याप्मिचिलाउङ्सा येसुङाना रिङ् लोडुचे॥ 39 माङ्हाङ् डाङ्बाङाना धारमाबिधिङि छेप्टाना गाड्डे चोक्मा उहिडुङ्, योसेफ, मारियाम हिट्नुङ् ओओ येसुलोक् उन्चिना गालिल छेट्राङाना नासारात खालाङ्गाङि ओनोक्टे॥ 40 हिट्ना बेला ओओ पोसा, बोल्लेउ लिसा हिट्नुङ् ओठोनाङि पोसा खाडे॥ हिट्नुङ् माङ्हाङ्ङा ओओ आसिक् पिडुयाक्टुए॥ ओओ येसु माङ्ठानाङि 41 सालिने येसुङाना उप्पा-उमा छुट्कारा चाडा मानाँ चोक्ङा यरुसलेम खालाङ्गाङि खाडाचिगा॥ 42 ओओ येसु ठिइप्पोक् बारखा टासुना बेला उन्चि चालान् चाल्ति गाड्डे येसुलोक् चाडा मानाँ चोक्ङा ओखाडे॥ 43 चाडा मानाँ चोक्मा उहिडुङ् उन्चि पाङ्लेङ् ओनोक्टानाँ ओओ येसुम्बाक् यरुसलेम खालाङ्गाङि डोक् वासे॥ टरो हिट्ना रिङ् उप्पा-उमाङा ठाहा टोक्चुवाट्च्चुन्॥ 44 पोङ्भोने उप्पा-उमाङा यरुसलेम खालाङ्गाङि उखाडागा याप्मिचिलोक् आप्युगेट् नुङ् मिट्टाचिउङ् उन्चि हिट्ना लेम्बाभोरि लाम्टियाचे, टरो युसाना पाका लिसानाँ येसु निच्वाट्चुन्, हिट्नुङ् उन्चि उम्भु-उन्झाचि हिट्नुङ् ओसाइबाचिलोक् खाडे नुङ् कोलाचुए॥ 45 टरो खोनाइ चा टुब्चुव्ट्चुन् नुङ् इप्पाङ् डोक् येसु कोन्सिङा यरुसलेम खालाङ्गाङि डोक् नोक्टाचे॥ 46 हिट्नुङ् सुम्बोक् लेम्बा एङ्स्वालेङ् एडोक् येसु माङ्ठानाङि टुबाचुए॥ येसुम्बाक् धारमाबिधि काहिसिक्बाचिलोक् युङाउङ् उन्चि रिङ् खेम्सा हिट्नुङ् सिलाप्सा युङेसाना॥ 47 हिट्नि उछुमागा याप्मिचिङा येसुङाना ओठोना उनिसुनाँ हिट्नुङ् उन्ङा माट्टुना रिङ् ओखेम्सुङ् ख्वाप्पा याप्मिचि डोङ् ओठोङ्डे॥ 48 हिट्नुङ् उप्पा-उमाङा हिट्नि येसु निसाचुङ् उन्चि डोङ् ठोङ्डाचे॥ हिट्ना बेला मारियामङा सिलाप्टुए, “आइछा, आन्च्याँ पोङ् खान्ङा याङ्छामा याप्मि आचाट्टेना? पुयुबु, काप्पा हिट्नुङ् आङा खान् कोन्नालोक् कोन्नालोक् होगोप् लिसैसाचिङे॥” 49 येसुङा उप्पा-उमा लोडुचे, “आङा खान्चिङा कोम्मा कोन्निना, पोङ्भोने आङा आप्पा ओपाङ्ङि युङ्मा कोन्युक् नुङ् खान्चिङा ठाहा टोक्मा कोन्युक्॥” 50 टरो हिट्ना रिङ् हिट्नागाचिङा बुजा चोक्च्वाट्चुन्॥ 51 हिट्नुङ्ना येसु उप्पा-उमालोक् नासारात खालाङ्गालेङ् नोक्टे, हिट्नुङ् येसुङा उप्पा-उमाङा लोडुना रिङ् खेम्सा युङायाक्टे॥ उमाङाम्बाक् नागा सोब्बे रिङ्चि मिमुन्ने उनिङ्ग्वाङि डोक् युङ्सुए॥ 52 येसु ओठोनाङि, ओयेम्ङि पोसा खाडे॥ माङ्हाङ् हिट्नुङ् याप्मिचि येसुलोक् उन्चि चाप् टाए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.