लुका 18 - आठपहरियालाङ्लेप्मा हिट्नुङ् न्याएधिसङाना मुन्डुम् 1 ठिक् लेम्बा येसुङा ओचेलाचि सोरोक् बिन्टि ओचोगुयाक्टुवाक् हिट्नुङ् उन्चि निङ्ग्वा ओसेडुन्चा नुङ् हिसिक्माचि लोङ्सा ठिक् मुन्डुम् लोडुचे, 2 “ठिक् खालाङ्गाङि ठिबाङ् माङ्हाङ्लोक् किट्निना हिट्नुङ् खोना याप्मि चा मान् चोगुन्चिन्गा न्याएधिस डाना॥ 3 हिट्ना खालाङ्गाङि डोक् ठिबाङ् लाङ्लेप्मा चा वासेट्टाना॥ हिट्ना छुप्लुक् छुप्लुक् न्याएधिसङि ‘आङालोक् खेमा काकोन्बा माझै न्याए याप्मिचोगाबिडा’ पिक्सा टायायाक्टाना डाना॥ 4 हिट्नाँ इम्टेप्मा खेप् सोम्मा लाङ्लेप्माङाना उरिङ् खेम्स्वाट्टुन्, टरो हान्डेङ् उनिङ्ग्वाङि मिट्टे, ‘छेम्बा डोक् आङा माङ्हाङ्लोक् चा किट्निङ्ना हिट्नुङ् याप्मिचि चा मान् चोक्निङ्चिङ्गा, 5 टरोचा ना मेन्झेमाङा आङा आड्डिक् याङ्छामा याङ्चाट्टानाँ नाङाना न्याए चोगुङ्बिडुङ्टुङ्॥ हिड्डे चोक्नेट्निङ् भोने ना छुप्लुक् छुप्लुक् आप्युङ् आड्डिक् झिझो याङ्मेट्युक्॥’” 6 हिट्नुङ् येसु डाङ्बाङा लोडुचे, “हिट्ना आधारमोति न्याएधिसङा माट्टुना रिङ्लाम्मा सिकाँ लिसानि॥ 7 पाक् माङ्हाङ्ङा सेगुचिगा ओयाप्मिचि लेन्सेन् बिन्टि ओचोगायाक्टे भोने, छेम्बा डोक् उन्ङा ओयाप्मिचि घुवार फाडुन्चिन्गै टे? उन् ओयाप्मिचि घुवार फासिङा ढिलो चोक्निना॥ 8 आङा खानि लोनाँनि, माङ्हाङ्ङा एला डोक् ओयाप्मिचिगा न्याए चोगुबिडुचिचि॥ टरो याप्मि छा टाना बेला ना नाराङि याप्मिचिङा माङ्हाङ्ङि बिस्वास काचोग्बाचि उन्ङा टुबुचिचिगि टे?” फारिसि याप्मि हिट्नुङ् तिरो काफोग्बाङाना मुन्डुम् 9 हिट्नुङ् येसुङा आङा एडोक् धारमोति कापिग्बाचि हिट्नुङ् आरु ओचाफेन्गा याप्मिचि ओलोडुचिगा लोङ्सा ना मुन्डुम् लोडुचे, 10 “इप्पाङ् याप्मिचि बिन्टि चोक्सिङा माङ्ठानाङि खाडाचे॥ हिट्नागाचिङि ठिबाङ्म्बाक् फारिसि याप्मि हिट्नुङ् आरकोम्बाक् तिरो काफोक्बा डाचिगा॥ 11 हिट्ना फारिसि याप्मि आल्लाका येबाउङ् नाड्डे पिक्सा बिन्टि चोक्मा ठालाँ चोगुए, ‘आमाङ्हाङ्, आङा कानिङ् चोन्डुङ्टुङ्, पोङ्भोने आङा आरु याप्मिचि गाड्डे लोभि, याप्मिचि चिम्मा काफुट्, इम्मेप्माजामा टोॽवा काचोक्बा हिट्नुङ् ना तिरो काफोग्बा याप्मि गाड्डेना माखाक्॥ 12 आङा हाप्टाङि इप्पोक् खेप् उपासा युङ्ङाना हिट्नुङ् आङा कामाचोगुङ्ना दस भागालाम्मा साम्डुङ् ठिक् ओभागा कासेवा लोङ्सा टाडुङ्ना॥’ 13 “टरो हिट्ना तिरो काफोग्बाम्बाक् या येबाउङ् टोनालोग्लेङ् चा उमिक् मिफोक्ङे, सानिङ्ग्वा लोसाउङ् ओसाडुमारिक् ठुप्सा पिगे, ‘हाउ आमाङ्हाङ्, आङा पापि याप्मि लुक्मा याङ्टुक्टा!’ 14 आङा खानि लोनाँनि, फारिसि याप्मिम्बाक् माखाक्, टरो ना तिरो काफोग्बाम्बाक् माङ्हाङ् ओनाभाक्ङि धारमोति लिसाउङ् ओपाङ्ङि खाडे॥ पोङ्भोने आप्पे ठेलोक् काचोक्बाचि माङ्हाङ्ङा खाट्टिउगा चोगुचिचि हिट्नुङ् जुन्ङा खाट्टिना ए पिग्युक् हिट्नागा उन्ङा ठेलोक् चोगुचिचि॥” येसुङा खाटिटिगा पिच्छाचि आसिक् पिडुचिचि ( मात्ति १९:१३-१५ ; मारकुस १०:१३-१६ ) 15 ठिक् लेम्बा आम्टेप्मा याप्मिचिङा उन्चि छाचिङि येसुङा उमुक् युङ्सुङ् आसिक् उपिडुच्याक् नुङ् ओआप्टुचे॥ टरो चेलाचिङा हिट्ना उनिसुङ् हिट्नागा खेमा ओलाप्टुचे॥ 16 टरो येसुङा पिच्छाचि छेम्डुचिउङ् ओचेलाचि लोडुचे, “नागा पिच्छाचि आङि आप्मा पिडानुम्चिम्, हिट्नागा छाक्नेनुम्चिम्, पोङ्भोने माङ्हाङ् उमुलुक् नागा पिच्छाचि गाड्डे उलिगा याप्मिचिगा लोङ्सा लियुक्॥ 17 छेम्बा डोक् आङा खानि लोनाँनि, नागा खाटिटियुगा पिच्छाचि गाड्डे सोझो निङ्ग्वाङि माङ्हाङ् उमुलुक् जुन्ङा लाडुन्ना हिट्ना खोना बेला चा हिट्नि लिग्मा टोगुन्ना॥” वागाठागा याप्मि हिट्नुङ् माङ्हाङ् उमुलुक् ( मात्ति १९:१६-३० ; मारकुस १०:१७-३१ ) 18 हिट्नि ठिबाङ् याहुदिचिगा ओठेडोङ् आबाउङ् येसु सिलाप्टुए, “हाउ काहिसिक्बा, खान् नुना याप्मि, आङा पाक् चोगुङ्ना लाट्निना चोला टुबुङ्टुङ्ना टे?” 19 येसुङा हिट्ना लोडुए, “खान्ङा पोङ् आङा नुना याप्मि याङ्आलोङाना? माङ्हाङ् माले साक्चा नुना वाइना॥ 20 खान्ङा माङ्हाङ्ङाना आग्याँचिउम् ठाहा आटोगुटुनि, ‘खान्ङा इम्मेप्माजामा टोॽवा चोक्मा लिनिना, याप्मिचि सेप्मा लिनिना, याङ्खुट्मा लिनिना, माङ्जो चेक्मा लिनिना, हिट्नुङ् पाबा-मामा मान् चोगुचि॥’” 21 हिट्ना याप्मिङा माट्टुए, “नागा सोब्बे आग्याँचिउम् आङा ठाङ्बेन् लिसाउङ् नुङ् डोक् टेन्सा चोगुएट्टुङ्॥” 22 हिट्डेना रिङ् खेम्सुङ् येसुङा हिट्ना लोडुए, “खान्ङा आझै ठिक् टोॽवा चोक्माना युङ्ग्वा, खान्लोक् युङ्ग्वागा ख्वाप्पा माक्फेन्सुबेन् छोङ्सुङ् पाक्चा ओवानिगा लोङ्सा ओफाबा हान्डुबिडुचि हिट्नुङ् खान्ङा टोनालोग्ङि माक्फेन्सुबेन् आटोगुटु हिट्नुङ् आबा, आचेला लिसा॥” 23 ना रिङ् खेम्सुङ् हिट्नाङाना आड्डिक् उनिङ्ग्वा टुगे, पोङ्भोने हिट्ना आड्डिक् वागाठागा याप्मि डाना॥ 24 येसुङा हिट्ना पुयुङ् लोडुए, “वागाठागा याप्मि लोङ्सा माङ्हाङ् उमुलुक्ङि लिग्मा आड्डिक् टुक्ना॥ 25 छेम्बा डोक् वागाठागा याप्मि माङ्हाङ् उमुलुक्ङि लिक्मा नुङ्ना उँटा छोमेट् उनाभुक्लाम्मा लिग्मा टुक्निना॥” 26 हिट्नुङ् ना रिङ् काखेम्बाचिङा येसु उसिलाप्टुए, “हिट्डे भोने साक्ङाम्बाक् मुक्टि टोगुटुना टे?” 27 उन्ङा लोडुचे, “याप्मिचिङा चोक्मा उहिडुन्गा रिङ् माङ्हाङ्ङा चोक्मा हिडुटु॥” 28 हिट्नुङ् पाटरुसङा लोडुए, “नाहि खेम्सु टे, आन्याँलोक् युङागा ख्वाप्पा रिङ्चि नाडुमुङ् आन्याँ काचेला लिसेसिङे॥” 29 येसुङा ओचेलाचि लोडुचे, “छेम्बा डोक् आङा खानि लोनाँनि, माङ्हाङ् उमुलुक् लोङ्सा जुन्ङा ओपाङ्ठाङ्, उप्पा-उमा, उम्भु-उन्झा, ओटालिमाङ् आथाबा उइछाचि नाडुटु, 30 माङ्हाङ्ङा हिट्नालोङ्सा ना नाराङि चा नागा रिङ् नुङ्ना चा जोम् पिडुटु, हिट्नुङ् टोनालोग्ङि चा लाट्निना चोला टोगुटु॥” येसुङा उन् सिना बारेङि माट्टुना ( मात्ति २०:१७-१९ ; मारकुस १०:३२-३४ ) 31 येसुङा ओचेलाचि आरकोलेङ् खाट्टुचिउङ् लोडुचे, “नाहि खेम्सानुम्, आनि यरुसलेमलेङ् खाडिगेट्टि॥ माङ्काटाचिङा याप्मि छाङाना बारेङि ओछेप्टुना ख्वाप्पा रिङ्चि हिट्नि युयुग्॥ 32 याप्मिचिङा याप्मि छा पानिछोङ्बाचि मुक्ङि उपिडुटु, हिट्नुङ् हिट्नागाँ खिजेक्पा ओचाट्टुटु, ओचाफेन्ना चाट्ला ओमेट्टुटु, ठ्या ओठोक्टुटु, कोररा लाहाब् ओचोगुटु, हिट्नुङ् ओसेडुटु॥ 33 टरो सुम्बोक् लेम्बा याप्मि छा सियानालाम्मा फेरि उहिङ्ग्वाट् लियुङ् कोब्युक्॥” 34 टरो ओचेलाचिङा नागा रिङ्चि ठिक् चा बुजा चोग्मा उहिडुवाट्टुन्, पोङ्भोने ना रिङ्ङाना उटुप् हिट्नागालाम्मा ठोबाइसाना॥ हिट्नुङ् ओचेलाचिङा उन्ङा पाक्ङाना बारेङि माट्टुएना ठाहा डोक् टोक्मा उहिडुवाट्टुन्॥ येसुङा याङ्कानिनिबा कानाक्बा नुमानिङ् चोगुना ( मात्ति २०:२९-३४ ; मारकुस १०:४६-५२ ) 35 येसु यारिहो ओलोडुना खालाङ्गा नेट्टाङ् टासुना बेला हिट्नि ठिबाङ् याङ्कानिनिबा याप्मि लाम्बोङि याङ्नाक्सा युङासाना॥ 36 जोम् याप्मिचिगा खिमेयाङ्मे याङ्कानिनिबाङा ओछेउ उलिसाउङ् ओखाॽयुगेट् नुङ् हिट्नाँ खेम्सुङ् “पाक् लियुगेट्ना?” पिक्सा याप्मिचि सिलाप्टुचे॥ 37 याप्मिचिङा हिट्ना ओलोडुए, “नासारात खालाङ्गाङिना येसु नाहिलाम्मा खाॽयुगेट्॥” 38 हिट्ना रिङ् खेम्सुङ् हिट्ना नाड्डे पिक्सा टुक्लोक् राट्टे, “हाउ दाउद पुङ्लाङिना येसु, आङा लुक्मा याङ्टुक्टा!” 39 हिट्ना बेला येसुलोक् ओखाडागेट्टागा याप्मिचिङा “मिचेक्ङे, स्वाग् युङा” पिक्सा खेमा ओलाप्टुए॥ टरो हिट्ना झान् टुक्लोक् राट्टाउङ् पिगे, “हाउ दाउद हाङ् पुङ्लाङिना येसु, लुक्मा याङ्टुक्टा!” 40 हिट्नुङ् हिट्ना याप्मि राट्टाना येसुङा खेम्सुङ् उन् येबे हिट्नुङ् “नाहि हिट्ना आप्टानुम्” पिक्सा याप्मिचि लोडुचे॥ हिट्नुङ् याप्मिचिङा हिट्ना येसु सोरि ओआप्टुङ् उन्ङा हिट्ना सिलाप्टुए, 41 “खान्लोङ्सा आङा पाक् चोगुङ्ना नुङ् खान् आमिट्युक्ना?” हिट्नाङा माट्टुए, “आडाङ्बा, आङा याङ्उनिसुङ्॥” 42 येसुङा लोडुए, “याङ्निसु, हाट्ले खान्ङा आनिसुए, पोङ्भोने खान्ङा आङि बिस्वास आचोगुए॥” 43 हिट्ना बेला डोक् हिट्नाँ निसुए हिट्नुङ् माङ्हाङ्ङाना उनिङ् चोन्सा येसुङा ओएङ्-ओएङ् खाडे॥ ना लिसाना रिङ् सोब्बे याप्मिचिङा उनिसुङ् माङ्हाङ्ङाना उनिङ् ओचोन्डुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.