लुका 1 - आठपहरियाआनि पान्चा पागारि थियोफिलास 1 आनि पान्चा पागारि थियोफिलास, जोम् याप्मिचिङा आनि माझाङि लिमाहिडागा रिङ्चि ओछेप्टुएसुए॥ 2 हिट्नागा लिसागा सोब्बे रिङ्चि बारेङि उटुम् नुङ् येसु उनिसुगा ओखेम्सुगा हिट्नुङ् नाङाना बारेङि डोक् नुना खाबोर पारचार काचोक्बाचिङा आन्याँ याप्मिलोडैसे॥ 3-4 हिट्नुङ् आङा चा नागा सोब्बे रिङ्चि उटुम्लाम्मा कोलुङे हिट्नुङ् ना जोम् याप्मिचिङा उमाट्टुना हिट्नुङ् खान्ङा आखेम्सुना ना छेम्बाना रिङ् ए पिक्सा खान्ङा चा ठाहा टोगु नुङ् सोब्बे रिङ्चि ओछेक्छेक् चोक्सा खान्लाउङ्सा छेप्टुएसुङे॥ बाप्टिस्मा कापि युहान्ना पोङ्ना रिङ् 5 याहुदिया छेट्राङि हेरोद हाङ्बाङा सासान् चोगुना बेला आबिया पुजारि छुम्माङिना ठिबाङ् जाकारिया निङ् ओखेङ्सुना पुजारि डाना॥ ओपाङ्डाङ्मा एलिसिबा चा हारुन पुङ्लाङिना पुजारिङा उइछा डाना॥ 6 जाकारिया हिट्नुङ् एलिसिबा इप्पाङ् डोक् माङ्हाङ् ओटोकानाङि आड्डिक् धारमोति डाचिगा, हिट्नुङ् माङ्हाङ्ङाना ख्वाप्पा आग्याँचि हिट्नुङ् धारमाबिधिङिगा रिङ् मिमुन्ने खेम्सा उन्ङा लोडुचि गाड्डे डोक् नुलोक् वासाचे॥ 7 टरो नागाचिगा उन्चि छाचिउम्बाक् उलिनेट्नि॥ पोङ्भोने एलिसिबाम्बाक् छालुट्मा मेन्झेमा डाना हिट्नुङ् इप्पाङ् डोक् पासिङ्-मासिङ् लिसाइसाचिगा॥ 8 ठिक् लेम्बा जाकारिया उन्चि छुम्माङिगा पुजारिचि माङ्ठानाङि टोॽवा ओचोगुएट्टुना बेला जाकारियाङा चा पुजारि टोॽवा चोक्सा माङ्हाङ्ङाना सेवा चोगुएट्टुना॥ 9 हिट्नुङ् पुजारिचिगा चालान् चाल्ति गाड्डे माङ्ठाना भिट्रा धुपा हाप्मा खाप्मा लोङ्सा जाकारिया चिठ्ठा ओठेन्डुङ् ओसेगुए॥ 10 हिट्नुङ् जाकारियाङा धुपा हाट्टुना बेला याहुदिचिगा माङ्ठाना भारा जोम् याप्मिचि उछुमाउङ् बिन्टि चोक्सा उयुङाइसागा॥ 11 हिट्ना बेला डोक् जाकारिया सोरि माङ्हाङ्ङाना ठिबाङ् माङ्हाङ् रिङ् काउग्बा धुपा हाप्माना ठानाङाना उछुप्टाङ्लेङ् येबैसाना ठेट्टे॥ 12 हिट्नुङ् जाकारियाङा माङ्हाङ् रिङ् काउग्बा निसुनामे आड्डिक् टुक्लोक् किट्टाउङ् फाङ् लिसे॥ 13 टरो माङ्हाङ् रिङ् काउग्बाङा उन् लोडुए, “हाउ जाकारिया खान् किट्नेन्, हाट्ले खान्ङा आचोगुना बिन्टि माङ्हाङ्ङा खेम्सुएसुए॥ कापाङ्डाङ्मा एलिसिबाङा ठिबाङ् छा मापोङ्युबियुक्॥ हिट्नुङ् ना ओओङाना उनिङ् युहान्ना खेङ्सुबिडु॥ 14 हिट्ना बेला खान्चि चाप् टामाङा हारका आलिचिचि॥ हिट्नुङ् ना ओओ पोङ्युङ् जोम् याप्मिचिगा चा उन्चि चाप् टायुक्॥ 15 पोङ्भोने ना ओओ माङ्हाङ् ओनाभाक्ङि माङ्ठेना लियुक्, नाङा काइले चा आङ्गुरङाना इङा हिट्नुङ् आरु इमालिङ् ठुङुन्ना॥ हिट्नुङ् उन् पोङ्नामे सेङ्सेङ्ना हाङ्साङा इप्टुटु॥ 16 हिट्नुङ् उन्ङा जोम् इस्राइलि याप्मिचिगा निङ्ग्वा माङ्हाङ् डाङ्बालेङ् नोक्टुबिडुचिचि॥ 17 हिट्नुङ् पाबाचिगा निङ्ग्वा उन्चि छाचिलेङ् नोक्टुबिडुचिचि हिट्नुङ् टेम्मा ओटेन्निगा याप्मिचि माङ्हाङ्ङि ओटेन्लोक् चोगुचिचि॥ हिट्नुङ् उन्ङा टाङ्बालोङ्सा उनिङ्ग्वा टासुचिगा याप्मिचि टेयार चोक्मा लोङ्सा टाङ्बाङाना ओटोक्माङ्ङि एलिया ओलोडुना माङ्काटा याप्मि गाड्डे डोक् सेङ्सेङ्ना हाङ्सा हिट्नुङ् साक्तिङि उन् खाट्युक्॥” 18 हिट्नुङ् जाकारियाङा माङ्हाङ् रिङ् काउग्बा लोडुए, “खोड्डे पाराउङ् आङा ना रिङ् ठाहा टोगुङ्टुङ्ना टे? आङाम्टे पासिङ् लिसेसाङे हिट्नुङ् आटालिमाङ् चा मासिङ् लिमा हिडे॥” 19 माङ्हाङ् रिङ् काउग्बाङा जाकारिया लोडुए, “आङा माङ्हाङ् ओटोक्माङ्ङि येप्ङाना माङ्हाङ् रिङ् काउग्बा गाब्रिएल ए॥ उन्ङा डोक् खान्लोङ्सा नुना खाबोर खेम्मेप्मा लोङ्सा आङा याङ्पाङ्साना॥ 20 हाट्ले खेम्सु, आङा लोनाना रिङ् ठिक्का ओबेलाङि डोक् लियुक्॥ टरो आङा लोनाना रिङ् खान्ङा बिस्वास आचोग्वाट्टुन्, हिड्डेउङ् खान्ङाना काइछा मिलिए सोम्मा खान् पाक्चा चेक्मा आहिनिलोक् आलियुक्॥” 21 याप्मिचिङा पोङ् ना जाकारिया माङ्ठाना भिट्रा आबेला चोगेना पिक्सा डोङ् ओठोङ्डाउङ् भारा ओहाङ्सुएट्टुना॥ 22 हिट्नुङ् जाकारिया माङ्ठानालाम् भारा होन्डे टरो उन् चेक्मा हिनेट्नि, हिट्नुङ् उमुक् वान्डुबिडुचे॥ हिट्नुङ् याप्मिचिङा माङ्ठानाङि निमापुमा टोगुएना रैछो नुङ् उन्चि निङ्ग्वाङि उमिट्टे॥ 23 जाकारियाङा माङ्ठानाङि माङ्हाङ्ङाना सेवा चोक्माना ओपालो लाट्टाउङ् ओपाङ्ङि नोक्टे॥ 24 हिट्नुङ् चिपा हान्डेङ्बाक् ओटालिमाङ् एलिसिबा पोङ्ना लिसे हिट्नुङ् हिट्ना बेलालाम्मा एलिसिबा लेम्बोक् माइना टेप्मा खोनि चा मिखाट्ने ओपाङ्ङि डोक् युङे॥ 25 एलिसिबाङा माट्टुए, “माङ्हाङ्ङा आङा जोम् लुक्मा याङ्टुक्टाउङ् घुवार याङ्फाडेसे, हाट्ले याप्मिचिङा छा मालेना पिक्सा लोमाजामाना लाम्बो छोप्टैसे॥” येसु पोङ्ना रिङ् 26-27 ना एलिसिबा पोङ्ना ङा माइना लिसाना बेला माङ्हाङ्ङा माङ्हाङ् रिङ् काउग्बा गाब्रिएल गालिल छेट्राङाना नासारात ओलोडुना खालाङ्गाङि युङ्ना ठिबाङ् कायेप्मा मारियाम मेन्झेमाङि पाङ्सुए॥ ना मेन्झेमाङाना भ्या लिना रिङ् दाउद हाङ्ङाना पुङ्लाङि पोङ्साना योसेफ ओलोडुना याप्मिलोक् रिङ् उफुडुएसुना॥ 28 हिट्नुङ् माङ्हाङ् रिङ् काउग्बाङा मारियाम लोडुए, “बाबा, मारियाम, खान्उम्टे माङ्हाङ्ङा उनिङ्ग्वाङि मायुङ्सेसे, माङ्हाङ् खान्लोक् वाहेट्॥” 29 माङ्हाङ् रिङ् काउग्बाङाना उरिङ् खेम्सुङ् मारियाम डोङ् ठोङ्डाउङ् खोड्डे पाराना बाबा रैछो टे पिक्सा उनिङ्ग्वाङि मिट्टे॥ 30 हिट्नुङ् माङ्हाङ् रिङ् काउग्बाङा लोडुए, “मारियाम, खान् किट्नेन्, माङ्हाङ्ङा खान् आड्डिक् उनिङ्ग्वा माटाडैइसे॥ 31 हाट्ले खेम्सु, खान्ङा माभोक् आखुयुटु हिट्नुङ् ठिबाङ् ओओ आपोङ्सुटु॥ हिट्ना ओओङा उनिङ् येसु मेट्टुबिडु॥ 32 उन् माङ्ठेना लियुक् हिट्नुङ् सोब्बे नुङ्ना माङ्ठेना माङ्हाङ् छा पिक्सा ओलोडुटु॥ हिट्नुङ् उन्लोङ्सा माङ्हाङ् डाङ्बाङा उटुबाठेबा दाउद गाड्डे डोक् हाङ्बा चोगुटु॥ 33 हिट्नुङ् उन्ङा इस्राइलि छोङ्चिङि सोरोक् सासान् चोगुचिचि॥ उन्ङा सासान् चोगुना उमुलुक् खोना बेला चा छोप्निना॥” 34 ना रिङ् खेम्सुङ् मारियामङा माङ्हाङ् रिङ् काउग्बा सिलाप्टुए, “आङाम्टे भ्या लिनिङ्गेट्निङ्ना कायेप्मा मेन्झेमा लिसाङे॥ ना रिङ् खोड्डेउङ् लियुक्ना टे?” 35 हिट्नुङ् माङ्हाङ् रिङ् काउग्बाङा लोडुए, “खान् उठुङ्ङि माङ्हाङ्ङाना सेङ्सेङ्ना हाङ्सा ठायुउङ्युक् हिट्नुङ् सोब्बे नुङ्ना माङ्ठेना माङ्हाङ्ङाना साक्तिङा माटेप्युक्॥ हिट्नुङ् हिट्ना पोङ्साना सेङ्सेङ्ना ओओ माङ्हाङ् छा नुङ् ओलोडुटु॥ 36 नाहि खेम्सु, कानातेदार एलिसिबा मासिङ् लिसा चा माभोक् खुयुएसुए॥ याप्मिचिङा ओओचि उलिनिगा पिक्सा ओलोडु चा एलिसिबाङा माभोक् खुयुना ङा माइना टेप्मा लिमा हिडे॥ 37 पोङ्भोने माङ्हाङ्ङा चोक्मा हिडुन्ना टोॽवा पाक्चा वाइना॥” 38 हिट्नुङ् मारियामङा लोडुए, “लियुक्, आङाम्टे माङ्हाङ्ङाना ओटोॽवा काचोक्बा खाट्टियुना पिच्छा, खान्ङा आमाट्टु गाड्डे डोक् उलियाक्॥” हिट्नुङ्ना माङ्हाङ् रिङ् काउग्बा हिट्नालाम्मा खाडे॥ मारियाम एलिसिबा टुब्सिङा खाडाना 39 हिट्नुङ् हान्डेङ्म्बाक् मारियाम एला एला याहुदिया छेट्राङि ठिक् झोन्झोबोङिना युक्ताम्ङि खाडे॥ 40 हिट्नुङ् मारियाम जाकारियाङाना ओपाङ्ङि खाडाउङ् ओनातेदार एलिसिबा स्या मेट्टुए॥ 41 मारियामङा एलिसिबा स्या मेट्टुना खेम्सुनामे ओफोक्ङि लिसाना ओओ सोङ्डे॥ हिट्नुङ् एलिसिबा सेङ्सेङ्ना हाङ्साङा इप्टुए, 42 हिट्नुङ् ठेना ओसोरा चोगुङ् माट्टुए, “मारियाम खान् सोब्बे मेन्झेमाचि माड्डे माङ्हाङ्ङा जोम् आसिक् मापिडैसे, हिट्नुङ् खान्लाम् पोङ्ना ओओ चा माङ्हाङ्ङा आसिक् पिडुएसुए॥ 43 आम्टेप्मा ठेना आङा मान इज्जत टोगुङे पोङ्भोने आटाङ्बा उमा डोक् आङा टुब्सिङा टाए॥ 44 हाट्ले खेम्सु, मारियाम खान्ङा आङा बाबा आचोगाङ्ना खेम्सुङ्नामे आफोक्ङि लिसाना ओओ ओचाप् टायाउङ् सोङ्डे॥ 45 मारियाम, खान् माङ्हाङ्ङा जोम् आसिक् मापिडैसे, पोङ्भोने खान्ङा माङ्हाङ्ङा मालोडाना रिङ्चि सोब्बे ना आचोलाङि डोक् युयुक् नुङ् बिस्वास आचोगुए॥” मारियामङाना छाम्लो 46 मारियाम नाड्डे छाम्लोसे, “आनिङ्ग्वाङा माङ्हाङ्ङाना उनिङ् नुना माट्टुटु, 47 आङा काहिङ्मेप्बा डाङ्बा माङ्हाङ्ङि आहाङ्साङा इकि मोज्जा माट्टुटु॥ 48 पोङ्भोने आङा गाड्डेना खाट्टियुना ओटोॽवा काचोक्बा मेच्छेमालोङ्सा याङ्मिट्टाइसे, हाट्ले नुङ् सोब्बे याप्मिचिङा आङा आसिक् टोगुना मेच्छेमा याङ्ओलोयुक्, 49 पोङ्भोने उन्बाक् आड्डिक् बोल्लेउ माङ्हाङ् लियुक्, ठेना उन्ङाना ओटोॽवा आङा याङ्चोगाबिडैसे॥ उनिङ्म्बाक् सेङ्सेङ्ना ए॥ 50 उन् मान् काचोक्बा याप्मिचिङि ओदाया टाला-टाला सोम्मा लियुक्॥ 51 उन्ङा आड्डिक् बोल्लेउ उमुक्ङाना टोॽवा चोगुएसुए, हिट्नुङ् उन्ङा उन्चि निङ्ग्वाङि ठेलोक् काचोक्बाचि चेम्बेलेङ् चोगुएसुचे॥ 52 उन्ङा उन्चि निङ्ग्वाङि ठेलोक् काचोक्बा सासाक्चिगा आधिकार नाप्टुएसुचे, टरो उन्चि निङ्ग्वाङि खाट्टियुना उमिट्गा टो-टो चोन्डुएसुचे॥ 53 हिट्नुङ् उन्चि साॽवागा याप्मिचिलोङ्सा माङ्हाङ्ङा नुगा नुगा थोक्चि पिडुएसुचे, टरो जोम् माक्फेन्सुबेन् ओकाप्टुगालोङ्सा पाक्चा माले पाङ्सुएसुचे॥ 54-55 माङ्हाङ्ङा आनिगा टुबाठेबाचिलोक् माङ्हुप् चोगुए हिट्नुङ् ओटोॽवा काचोक्बा इस्राइलि याप्मिचि घुवार फाडुएसुचे, हिट्नुङ् उन्ङा आब्राहाम लोक् ख्वाप्पा उपुङ्लाचि लुक्माटुक्मा मुन्डुन्गेट्टुन्चिन्गा॥” 56 हिट्ना बेला मारियाम सुम्बोक् माइना टेप्मा ओनातेदार एलिसिबालोक् युङे हिट्नुङ् ओपाङ्ङि नोक्टे॥ बाप्टिस्मा कापि युहान्ना पोङ्साना 57 एलिसिबाङाना छाडाङ्मा लिमाना बेला लिसे, हिट्नुङ् उन्ङा ठिबाङ् येम्बेछा ओओ पोङ्सुए॥ 58 हिट्नुङ् माङ्हाङ्ङा उन्लोङ्सा ठेना लुक्मा टुक्टुना रिङ् ओटाक्लुङ्चि हिट्नुङ् ओपाङ्ङिगा याप्मिचिङा ठाहा ओटोगुङ् उन्लोक् हारका उलिसे॥ 59 हिट्नुङ् ओओ पोङ्साउङ् साङ् लेम्बाङि ओओङाना खाताना चोक्मा उछुमे॥ नागा याप्मिचिङा ओओ उनिङ् उप्पा उनिङ् जाकारिया डोक् युङ्मा ओकोलुए॥ 60 टरो एलिसिबाङा लोडुचे, “हिट्नाडे माखाक्, ना ओओङाना उनिङ् युहान्ना युङ्माबिमा कोन्युक्॥” 61 हिट्नागाँ एलिसिबा ओलोडुए, “खानिगा खालाक्ङि नाड्डे पारागा निङ् ओखेङ्सुगा याप्मिचि साक्चा ओवाइगा॥” 62 हिड्डे लिसाउङ् हिट्नागाङा ओओ उनिङ् पाक् युङ्माना नुङ् आमिट्टुएसुएना टे पिक्सा ओओ उप्पा जाकारिया इसारा चोक्सा उसिलाप्टुए॥ 63 हिट्नुङ् जाकारियाङा ठिक् छेप्माना पाटि नाक्टुचिउङ् “नाङा उनिङ् युहान्ना डोक् युङ्मा कोन्युक्” पिक्सा छेप्टुबिडुचे॥ हिट्नुङ् ना रिङ् उनिसुङ् सोब्बे याप्मिचि डोङ् ओठोङ्डे॥ 64 हिट्ना बेला डोक् जाकारिया पाइला गाड्डे डोक् चेक्माहिना लिसे हिट्नुङ् माङ्हाङ् उनिङ् चोम्मा ठालाँ चोगुए॥ 65 नागा सोब्बे रिङ्चि लिसानाङा सोब्बे ओटाक्लुङ्चि डोङ् ओठोङ्डे हिट्नुङ् आड्डिक् टुक्लोक् उकिट्टे॥ हिट्नुङ् ना रिङ् याहुदिया छेट्राङाना युक्ताम् टेप् छिन्डे॥ 66 ना रिङ् काखेम्बा सोब्बे याप्मिचिङा “ना ओओ ठेयुङ् खोड्डेना ठेना टोॽवा काचोक्बा याप्मि लियुक्ना होला टे?” पिक्सा उन्चि निङ्ग्वाङि उमिट्टे॥ पोङ्भोने माङ्हाङ्ङा ओबोल् डोक् उन्ङि ठेन्डुबिडुएसुए॥ जाकारियाङा माङ्हाङ् उनिङ् चोन्डुना 67 युहान्नाङाना उप्पा जाकारिया सेङ्सेङ्ना हाङ्साङा इप्टुङ् माङ्हाङ्लाम्माना रिङ् माट्टुए, 68 “इस्राएलि याप्मिचिगा माङ्हाङ् डाङ्बाङाना उनिङ् टो-टो उलियाक्, पोङ्भोने ओयाप्मिचि घुवार फासिङा उङ्से हिट्नुङ् उन्ङा उन्चि साट्टुरलाम्मा साम्डुचे॥ 69 उन्ङाना सेवाक् दाउद उपुङ्लालाम्मा ठिबाङ् आड्डिक् बोल्लेउ काहिङ्मेप्बा डाङ्बा आनि लोङ्सा आपाङ्साबिडैसे॥ 70-71 आच्छो बेला डोक् माङ्काटा सेङ्सेङ्ना याप्मिलोक् माङ्हुप् चोगुए, हाट्ले आनि साट्टुरङाना उमुक्लाम्मा, हिट्नुङ् चिम्मा काफुट् उन्चि मुक्लाम्मा चा आहिङ्मेट्युक्॥ 72 उन्ङा आनि टुबाठेबाचिलोङ्सा लुक्मा टुक्माना रिङ् निमेट्मा लोङ्सा हिट्नुङ् उन्चिलोक् रेक्टुना सेङ्सेङ्ना माङ्हुप् युमालोङ्सा नाड्डेना टोॽवा आनि सोरि चोगुएसुए॥ 73 हिट्ना बाचा माङ्हाङ्ङा आनि टुबाठेबा आब्राहामलोक् चोगुएसुना, 74 हिट्नुङ् हिट्ना माङ्हुप् आनि साट्टुरचि मुक्लाम्मा होम्मा उहिडि, 75 हिट्नुङ् आनि मिकिट्ङे ओटोकानाङि, आनि चोलाटेप् सोजो हिट्नुङ् माहामा ओसेवा चोक्मा उहिडुम्मा नुङ् लिसाना ए॥ 76 हाउ आइछा, खान् सोब्बे नुङ्ना माङ्ठेना माङ्हाङ्ङाना माङ्काटा मालोयुक्॥ पोङ्भोने खान् टाङ्बाङाना लाम्बो चोक्सिङा आगाडि डोक् आखाॽयुक्॥ 77 हिट्नुङ् याप्मिचि उन्चि पापलाम्मा खोड्डे पारिक् छेमा ओटोगुङ् उहिङ्युग्गा हिट्ना रिङ् लोसिङा खान् आखाॽयुक्॥ 78 पोङ्भोने आनि माङ्हाङ् लुक्मा काटुक् हिट्नुङ् मायालु ए॥ हिट्नुङ् टोनालोग्लाम्मा खिरिस्टलाउङ्सा भ्यानिक् छेना नाम्ङा ओलाप्को गाड्डे डोक् आनि उठुङ्ङि आपाङ्युबियुक्॥ 79 हिट्नुङ् माङ्डुम्बारिक् डुम्ङि कायुङ्बा हिट्नुङ् उसियालाबागा सोरि ना नाम्ङाना ओलाप्को ओम्युक्, हिट्नुङ् उन्ङा आनि हाङ्हाङ्ङाना लाम्बोङि आलाम्बेॽयुक्॥” 80 हिट्नुङ् ओओ युहान्ना ओयेम्ङि पोसा खाडे॥ ओहाङ्साङि चा बोल्लेउ लिसा खाडे॥ हिट्नुङ् इस्राएलि याप्मिचिङि मिहोन्ने सोम्मा याप्मिचि उयुङ्निना डेन्ङि युङायाक्टे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.