युहान्ना 6 - आठपहरियायेसुङा लेम्बोक् हाजार याप्मिचि खुवाबा चोगुचिगा ( मात्ति १४:१३-२१ ; मारकुस ६:३०-४४ ; लुका ९:१०-१७ ) 1 हिट्नुङ्ना येसु गालिल ताल खोक्टुङ् याहाँपारा खाडे॥ (हिट्ना ताल तिबेरियासङाना ताल चा ओलोडुना॥) 2 हिट्नुङ् ठिक् ठेना याप्मिचिगा खिमेयाङ्मे उन् ओएङ्-ओएङ् ओफेने, पोङ्भोने उन्ङा उटुगागा याप्मिचि नुमानिङ् चोगुचिगा डोङ् ठोङ्डिना टोॽवा हिट्नागाँ उनिसुएसुगा डागा॥ 3 हिट्नुङ् येसु झोन्झोबाङि खाडे, हिट्नुङ् ओचेलाचिलोक् हिट्नि युङे॥ 4 हिट्ना बेला याहुदिचिगा छुट्कारा चाडा टाया लाबेसाना॥ 5 टब येसुङा याम्बा-नायाम्बा पुयुनाँ ठिक् ठेना याप्मिचिगा खिमेयाङ्मे उन्लेङ् ओआबागेट्टागा निसुचिउङ् उन्ङा फिलिप लोडुए, “नागा याप्मिचि खुवाबा चोक्मा आन्याँ खोनिलाम्मा चालेप्पा इनुमुङ् टाप्मा हिडुम्टुम्माना टे?” 6 ना रिङ् येसुङा फिलिपङाना उनिङ्ग्वा कोम्मा लोङ्सा लोडुना डाना, पोङ्भोने उन्ङा जे चोक्मा इट्टेएसुना, हिट्ना रिङ् उन्ङा ठाहा टोगुएसुना॥ 7 फिलिपङा लोडुए, “नाहि उलिसागा ख्वाप्पा याप्मिचि चिप्चिप् एरोक् चालेप्पा पिडुम्चिम्मे भोने चा इप्पोक् साए रुपाक् राङ्ङा इनुम्ना चालेपाङा चा हिट्नागा युडुन्चिन्गा॥” 8 ओचेलाचि माड्डेङि ठिबाङ् सिमोन पाटरुसङा उन्झा आन्दरियासङा लोडुए, 9 “नेहि ठिबाङ् पिच्छा वाहेट्, हिट्नालोक् लेम्बोक् गोटा जाउङाना चालेप्पा लोक् इप्पोक् ङासा युङ्ग्वा, टरो नाट्टेप् औधि जोम् याप्मिचि नाट्टेप्माङा एडोक् खोनाइ युडुचिचिगा टे?” 10 येसुङा चेलाचि लोडुचे, “सोब्बे याप्मिचि युङानि लोडानुम्चिम्॥” हिट्ना डेन् घाँसा एरोक् लिसाना ठोङ् डाना हिट्नुङ् याप्मिचि हिट्निरोक् उयुङे॥ हिट्नि येम्बिछा याप्मिचि एडोक् लेम्बोक् हाजार टेप्मा ओवासेट्टागा॥ 11 येसुङा हिट्ना लेम्बोक् गोटा चालेप्पा कोबुङ् माङ्हाङ् पोए-पोए ठाङ्सुए, हिट्नुङ् हिट्नि उयुङागा याप्मिचि लोङ्सा ओचेलाचि हाम्मा मेट्टुचे, ङासा चा हिट्ना पारिक् डोक् हाम्मा मेट्टुचे॥ हिट्नुङ् याप्मिचिङा चामा उहिडुलोक् ओचोए॥ 12 हिट्नुङ् हिट्नागाँ फोक् उलिसालोक् ओचोङ् येसुङा ओचेलाचि लोडुचे, “मोन्डागा खोजेमोजे छुम्सानुम्, खाट्टिप्मा चा खेरो टिनेनुम्॥” 13 काचाबाचिङा ओचोङ् मोन्डागा जाउङाना लेम्बोक् चालेप्पाङाना ओखान्डा ओखान्डि हिट्नागाँ ओकोबुङ् बारो डालि उइप्टुए॥ 14 जब उन्ङा चोगुना ना डोङ् ठोङ्डिना चिन्ना उनिसुए हिट्नुङ् हिट्नागा याप्मिचिङा ओमाट्टुए, “छेम्बा डोक्, नाराङि टाना माङ्काटा उन् डोक् ए॥” 15 हाट्ले हिट्नागा याप्मिचिङा उन् उलाबु ओखाट्टुङ् जाबारजास्ति हाङ्बा चोक्मा ओकोलुएट्टुना रिङ् ठाहा टोगुङ् येसु फेरि ओएकेले झोन्झोबालेङ् खाडे॥ येसु चुवा उठुङ् उठुङ् लाम्टियाना ( मात्ति १४:२२-३३ ; मारकुस ६:४५-५२ ) 16 नाम् कुडाउङ् येसु ओचेलाचि तालङाना ओफेरोलेङ् ओखाडे॥ 17 हिट्ना बेला नाम् कुडेइसाना, हिट्नुङ् येसु भोनेम्टे हाट्ले चा हिट्नागा सोरि खाट्निगेट्निना डाना॥ हिट्नुङ् हिट्नागा नाउङि ओठाङाउङ् ताल याहाँपारा काफारनाहुम युक्तामलेङ् ओफेने॥ 18 हुन्डारि आड्डिक् टुक्लोक् फेन्डानाँ तालङिना चुवा ओभेट्लेॽवा कोब्मा ठालाँ चोगुए॥ 19 चेलाचि लेम्बोक् आथाबा ङा किलो मिटार टेप्मा नाउ ख्याबा ओचोगुङ् ओखाप्मा उहिडैसागा॥ हिट्ना बेला हिट्नागाँ येसु चुवा उठुङ्ङि लाम्टिसा नाउलेङ् आबागेट्टाना उनिसुए, हिट्नुङ् हिट्नागा आड्डिक् टुक्लोक् उकिट्टे॥ 20 टरो येसुङा हिट्ना बेला डोक् हिट्नागा नाड्डे लोडुचे, “आङा डोक्, किट्नेनिन्॥” 21 नाड्डे ओखेम्सुङ् हिट्नागा हारका उलिसाउङ् येसु नाउङि ओठाङ्सुए, हिट्नुङ् हिट्ना बेला डोक् नाउ हिट्नागा ओखाडागेट्गा डेन्ङि टासुए॥ 22 हान्डेङ्लेङ् ताल याहाँपारा उलिसागा याप्मिचिगा खिमेयाङ्मेङा चेलाचिङा ठिक् एरोक् नाउ ओखाट्टुङ् ओखाडेगा रैछो नुङ् उनिसुए, हिट्नुङ् हिट्नागाँ येसु हिट्नागालोक् खाट्नेट्निना रैछो नुङ् ठाहा ओटोगुए॥ 23 टाङ्बाङा पोए-पोए ठाङ्सुङ् याप्मिचि चालेप्पा चामा पिडुचिगा डेन् सोरि तिबेरियास खालाङ्गालाम्मा आरु नाउचि चा होन्डा ओटाए॥ 24 याप्मिचिगा खिमेयाङ्मेङा येसु लोक् ओचेलाचि हिट्नि खोनाइ चा ओवानेट्निगा ठाहा ओटोगुङ् हिट्निगा नाउङि ओठाङाउङ् काफारनाहुम युक्टाम्लेङ् येसु कोन्ना हिट्नागा ओखाडे॥ येसु चोला आपिना चालेप्पा ए 25 हिट्नागाँ येसु तालङाना आरको छेउलेङ् उटुबुङ् उन् उसिलाप्टुए, “काहिसिक्बा, खान् खोना बेला नाहि आबेना?” 26 येसुङा हिट्नागा लोडुचे, “छेम्बा डोक्, आङा खानि लोनाँनि, आङा चोगुङ्ना डोङ् ठोङ्डिना चिन्ना आनिसुमुङ् माखाक्, टरो खानिङा फोक् इप्टालोक् चालेप्पा चामा आटोगुमुङ् आङा आकोलेट्टिङा॥ 27 जाखाम् लिना चामा-ठुङ्मागा टोग्मालोङ्सा टोॽवा चोक्नेनुम्, टरो खोना बेला चा लाट्निना चोला आपिना चामा-ठुङ्मागा टोग्मालोङ्सा टोॽवा चोगानुम्॥ ना खोना बेला चा लाट्निना चोला आपिना चालेप्पा याप्मि छाङा खानि मापिडिटि, पोङ्भोने ना रिङ् लोङ्सा डोक् माङ्हाङ् पाबाङा उन् आधिकार पिडुएसुए॥” 28 हिट्नुङ् हिट्नागाँ उसिलाप्टुए, “माङ्हाङ्ङा उनिङ्ग्वा टासुना टोॽवा चोक्मा लोङ्सा आन्याँ पाक् चोक्मा कोन्युक्ना?” 29 येसुङा हिट्नागा लोडुचे, “माङ्हाङ्ङा पाङ्सुना बिस्वास चोगानुम्, ना डोक् उन्ङा निङ्ग्वा टासुना टोॽवा ए॥” 30 हिट्नाड्डेउङ् हिट्नागाँ उन् ओलोडुए, “हाट्ले खान्ङा खोड्डे पारिक्ना चिन्ना याप्मि आनिमेट्युक्ना, हिट्डेउङ् पुयुमाउङ् खान् बिस्वास चोक्नाना? खोलो, खोड्डे पारिक्ना टोॽवा आचोगुटुना? 31 आनि टुबाठेबाचिङा साक्चा उयुङ्निना डेन्ङि मोन्ना ओचोए, धारमाछाप्लाङि नाड्डे छेप्टेसे, ‘उन्ङा हिट्नागालाउङ्सा टोनालोग्लाम्मा चालेप्पा चामा पिडुचे॥’” 32 येसुङा हिट्नागा लोडुचे, “छेम्बा डोक्, आङा खानि लोनाँनि, मोसाङा खानि टोनालोग्लाम्मा चालेप्पा मापिडिगा माखाक्, टरो आङाना पाबाङा गोलो खानि टोनालोग्लाम्मा छेम्बाना चालेप्पा मापिडिटि॥ 33 पोङ्भोने माङ्हाङ्ङा आपिना चालेप्पाम्बाक् हिट्ना डोक्, जुन् टोनालोग्लाम्मा उङ्युङ् नाराङिगा याप्मिचि खोना बेला चा लाट्निना चोला पिडुचिचि॥” 34 हिट्नागाँ उन् ओलोडुए, “काहिसिक्बा, हिट्ना चालेप्पा आन्याँ सोरोक् याप्मिपिडा॥” 35 येसुङा हिट्नागा लोडुचे, “चोला कापिबा चालेप्पा आङा डोक्॥ आङा सोरि ओटागा उन्चि साक्वानिगा, हिट्नुङ् आङा बिस्वास काचोक्बा खोना बेला चा ओवेप्माङा सिनिना॥ 36 टरो आङा खानि लोमाहिनैनाने, खानिङा आङा याङ्आनिसिएसिङे, हिट्नुङ् चा खानिङा बिस्वास आचोगिन्नागा॥ 37 आङाना पाबाङा आङा जिम्मा याङ्पिडाङ्ना टेप्मा सोब्बे आङा सोरि ओटायुक्, हिट्नुङ् आङा हिट्नागा खोना बेला चा इन्कार चोक्निङ्चिङ्गा॥ 38 पोङ्भोने आङा आप्पे आनिङ्ग्वाङिना रिङ् युमा टोनालोग्लाम्मा उङ्साङ्ना माखाक्, टरो आङा याङ्पाङ्साना माङ्हाङ्ङाना उनिङ्ग्वा युमाउङ्सा उङ्साङ्ना॥ 39 हिट्नुङ् आङा कापाङ्बाङाना उनिङ्ग्वाम्बाक् उन्ङा जिम्मा याङ्पिडाङ्ना टेप्मा खोना चा आङा ओमानिङ् चा, टरो हिट्नागा आखेरि लेम्बाङि उहिङ्ग्वाट् चोगुङ्चिङ् नुङ् ए॥ 40 पोङ्भोने आङाना पाबाङाना उनिङ्ग्वाम्बाक् छा मिसेन् कानिबा हिट्नुङ् उन्ङि बिस्वास काचोक्बा ख्वाप्पाङा खोना बेला चा लाट्निना चोला ओटोगुवाक् नुङ् ए॥ हिट्नुङ् आङा हिट्नागा आखेरि लेम्बाङि उहिङ्ग्वाट् चोगुङ्चिङ्चिङ्॥” 41 येसुङा “टोनालोग्लाम्मा ठाया उङ्साङ्ना चालेप्पा आङा डोक्” पिक्सा माट्टुनाँ याहुदिचि उबिरुद्दाङि गिन्गिन् चोक्मा ठालाँ ओचोगुए॥ 42 हिट्नागाँ ओमाट्टुए, “पाक् ना योसेफङाना उइछा, येसु माखाइ टे? नाङाना उप्पा लोक् उमा आनि मिसेन् निसुम्चिम्गा टे॥ हाट्ले नाङा खोड्डेउङ् ‘आङा टोनालोग्लाम्मा उङ्साङ्ना’ पिक्युग्ना?” 43 येसुङा हिट्नागा लोडुचे, “खानि आप्पे-आप्पे आङाना बिरुद्दाङि गिन्गिन् चोक्नेनिन्॥ 44 आङा याङ्पाङ्साना पाबाङा आङि आप्माना निङ्ग्वा पिडुवाट्टुन्चिन् भोने, खोना चा आङा सोरि टामा उहिनिगा॥ हिट्नुङ् आङा सोरि ओटागा टेप्मा आखेरि लेम्बाङि उहिङ्ग्वाट् चोगुङ्चिङ्चिङ्॥ 45 धारमाछाप्लाङि माङ्काटाचिङा नाड्डे ओछेप्टुएसुए, ‘माङ्हाङ्ङा डोक् सोब्बे याप्मिचि हिसिक्टुचिचि॥’ नाड्डेउङ् जुन्ङा माङ्हाङ् पाबा खेम्सुटु हिट्नुङ् उन्लाम्मा सिकाँ लियुक् हिट्नागा सोब्बे आङि ओटायुक्॥ 46 खोनाङा चा पाबा उनिसुन्गेट्टुन्ना॥ माङ्हाङ्लाम्मा उङ्सानाँ एरोक् पाबा निसुएसुए॥ 47 “छेम्बा डोक्, आङा खानि लोनाँनि, जुन्ङा बिस्वास चोगुटु हिट्नालोक् खोना बेला चा लाट्निना चोला युङ्ग्वा॥ 48 चोला कापिबा चालेप्पा आङा डोक्॥ 49 खानि टुबाठेबाचिङा खोना चा उयुङ्निगा डेन्ङि मोन्ना ओचोए, टरो चा हिट्नागा उसिए॥ 50 टरो टोनालोग्लाम्मा ठाया उङ्साना चालेप्पा ना डोक्, जुन्ङा ना चोटु हिट्ना खोना बेला चा सिनिना॥ 51 टोनालोग्लाम्मा ठाया उङ्साना उहिङ्ग्वाट् चालेप्पा आङा डोक्॥ कोइङा ना चालेप्पा चोए भोने हिट्ना सोरोक् हिङ्युक्॥ हिट्नुङ् ना चालेप्पा आङाना आयेम् ए, नाउम्बाक् नाराङिगा याप्मिचिङा चोला ओटोगु नुङ् पिडुङ्चिङ्चिङ्॥” 52 ना रिङ् ओखेम्सुङ् याहुदिचि उन्चि उन्चिङि बादबिबाद चोक्मा ठालाँ ओचोगे॥ हिट्नुङ् हिट्नागा उपिगे, “ना याप्मिङा खोड्डेउङ् ओयेम् आनि चामा पिमा आहियुक्ना टे?” 53 येसुङा हिट्नागा लोडुचे, “छेम्बा डोक् आङा खानि लोनाँनि, खानिङा याप्मि छाङाना ओयेम् आचानेएट्निम्, हिट्नुङ् ओहेलिक् आठुङ्नेएट्निम् भोने, खानिङि खोना बेला चा लाट्निना चोला लिनिना॥ 54 टरो जुन्ङा आङाना आयेम् चोटु हिट्नुङ् आङाना आहेलिक् ठुङुटु हिट्नालोक् खोना बेला चा लाट्निना चोला लियुक्, हिट्नुङ् आखेरि लेम्बाङि आङा हिट्ना उहिङ्ग्वाट् चोगुङ्टुङ्॥ 55 पोङ्भोने आङाना आयेम् छेम्बारोक् चामा थोक्, हिट्नुङ् आहेलिक् छेम्बारोक् ठुङ्मा थोक् ए॥ 56 जुन्ङा आङाना आयेम् चोटु हिट्नुङ् आङाना आहेलिक् ठुङुटु हिट्नाम्बाक् आङि लियुक्, हिट्नुङ् आङा उन्ङि युङ्ङा॥ 57 उहिङ्ग्वाट् माङ्हाङ् पाबाङा आङा याङ्पाङ्से, हिट्नुङ् उन्ङा चोगुनाँ आङा हिङ्ङा॥ हिट्नाडेडोक् जुन्ङा आङा याङ्चायुक् हिट्ना आङा चोगुङ्नाँ हिङ्युक्॥ 58 टोनालोग्लाम्मा उङ्साना चालेप्पा खानि टुबाठेबाचिङा ओचोना चालेप्पा गाड्डेना माखाक्, जुन् हिट्नागाँ ओचोए हिट्नुङ् उसिए॥ टरो ना चालेप्पा जुन् याप्मिङा चोटु हिट्ना सोरोक् हिङ्युक्॥” 59 येसुङा नागा रिङ् काफारनाहुम्ङिना याहुदिचिगा छुम्मापाङ्ङि हिसिक्टुचिनाँ माट्टुना डाना॥ लाट्निना चोला बारे 60 नागा रिङ् ओखेम्सुङ् ओचेलाचि माड्डे याप्माङा उन् ओलोडुए, “ना हिसिक्माउम् बिस्वास चोक्मा औधि टुक्ना, खोनाङा ओखेम्सुटुना?” 61 ओचेलाचिङा ना बारेङि गिन्गिन् ओचोगेट्टागा ठाहा टोगुङ् येसुङा हिट्नागा लोडुचे, “पाक् ना रिङ्ङा खानि निङ्ग्वा टुक्युक्नि? 62 हिड्नाड्डे भोने याप्मि छा पाइले उन् लिसाना ठोङ्ङि टो ठाङाउङ् नोक्टा खाडाना आनिसुम्मे भोने खानि खोड्डे आमिट्टिटिगा? 63 माङ्हाङ्ङाना ओहाङ्साङा याप्मिचि लोङ्सा चोला पिडुचिचि॥ याप्मि आप्पेङाम्बाक् चोला पिमा हिडुन्ना॥ आङा खानि ना रिङ्उम्बाक् माङ्हाङ्ङाना ओहाङ्सालाम्मा लोनानिगा ए, जुन्ङा चोला आपियुक्॥ 64 टरो खानि माड्डे आम्टेप्माङा आङा बिस्वास डोक् आचोगिन्नागा॥” येसुङा खोना खोनाङा बिस्वास ओचोगुन्गा हिट्नुङ् उन् धोका कापिबा साइना नुङ् उन्ङा उटुम्लाम्मा डोक् ठाहा टोगुनाँ नाड्डेना रिङ् माट्टुए॥ 65 हिट्नुङ्ना येसुङा हिट्नागा फेरि लोडुचे, “हिड्नाड्डेउङ् आङा खानि लोनानिगा, आङाना पाबाङा आङि टामा निङ्ग्वा मिपिए सोम्मा खोना चा आङा सोरि टामा उहिनिगा॥” 66 हिट्ना बेलालाम्मा ओचेलाचि माड्डे याप्माङा उन्लोक् खाप्मा ओनाडुए॥ 67 येसुङा हिट्नागा बारो जाना ओचेलाचि सिलाप्टुचे, “पाक् खानि चा आङा याङ्आपोक्टिङाउङ् आखाडिटिगि?” 68 हिट्नुङ् सिमोन पाटरुसङा लोडुए, “हाउ टाङ्बा, आन्याँ साक्ङि खाप्माना? खोना बेला चा लाट्निना चोला आपिना रिङ्उम्टे खान्लोक् युङ्ग्वा॥ 69 हिट्नुङ् खान् माङ्हाङ्ङा मापाङ्साना सेङ्सेङ्ना याप्मि नुङ् ठाहा टोगुमुङ् बिस्वास चोगुएसुम्मे॥” 70 येसुङा हिट्नागा लोडुचे, “पाक् आङा आप्पे डोक् खानि बारो जाना सेग्नानिगा माखाइ टे? टरो खानि माड्डेङि ठिबाङ्उम् दियाबालास डोक्॥” 71 उन्ङा ना रिङ् सिमोन इस्कारियोतङाना उइछा याहुदाङाना बारेङि माट्टुना डाना, पोङ्भोने बारो जाना चेलाचि माड्डे ठिबाङ् लिसाउङ् चा हिट्नाङा उन् धोका पिमा इट्टुलाबुना डाना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.