याकुब 5 - आठपहरियावागाठागालोङ्सा ओछेक्छेक् 1 हाट्ले खानि माहाजान याप्मिचि, खेम्सानुम्, खानि उठुङ्ङि टाया लाबाना याङ्छामा मिट्टानुमुङ् खानि हाबानि हिट्नुङ् सानिङ्ग्वा लोसानि॥ 2 खानि माक्फेन्सुबेन्ङि उसुक्टुरुम्बा ठाइसे, हिट्नुङ् खानि लोट्लिङ् फेबाचिङा ओचोएसुए॥ 3 खानिगा साम्मेङ् लोक् रुपाक्ङि उहि ठाइसे॥ हिट्ना उहि डोक् खानि बिरुद्दाङि साँचि लियुक्, हिट्नुङ् मिङा टुना गाड्डे डोक् खानि येम् जाखाम् चोगुटु॥ खानिङा आछुम्सुम्गा माक्फेन्सुबेन् डोक् न्याए चोक्माना लेम्बा खानि बिरुद्दाङि साँचि लियुक्॥ 4 खानि बेङ्सिङि टोॽवा काचोक्चिगा उन्चि निम्याक् खानिङा आपिनिम्गेट्निम्चिम्गा॥ उन्चिगा याङ्छामा खेम्सानुम्, खानि बेङ्सिङि चासोङ् काछुम्बाचिगा पुकारा माङ्बोल्लेउ टाङ्बाङाना उनुभेक्ङि टासुएसुए॥ 5 नाराङि खानि औधि मोज्मोज्जाङि आयुङिएसिए हिट्नुङ् खानिङा जे चोक्मा आमिट्टिए हिट्ना आचोगुएसुम्मे॥ हिट्नुङ् जानावारचि चेप्मा सेप्मा टेयार चोगि गाड्डे खानिङा आप्पे लाउङ्सा पोस्याँ आचोगुएसुम्मे॥ 6 खानि बिरोध डोक् माचोगेट्टिन्गा धारमोति याप्मिचि खानिङा फाट्टुर आलाबुम्चिम्मुङ् आसेडुम्चिम्मे॥ आङ्माना रिङ् हिट्नुङ् बिन्टि 7 हिड्डेउङ् भुम्बु-झान्झाचि हिट्नुङ् नाना-झान्झाचि, टाङ्बा मिटाए सोम्मा हाङ्सा युङानि॥ मिट्टानुम्, टोॽवालासि काचोक् याप्मिचिङा नुगा चासोङ् केङ्माउङ्सा आम्टेप्मा ओहाङ्सुङ् उयुङ्युग्गा॥ हिट्नागाँ हिउद लोक् बारखाङि व्हेट् मिटाए सोम्मा ओहाङ्सुयाक्टुटु॥ 8 खानि चा नाड्डेडोक् हाङ्सा युङानि॥ खानि आसा सेट्नेनुम्, पोङ्भोने टाङ्बा टामाना लेम्बा नेहेट्टाङ् युङ्ग्वा॥ 9 आम्बु-आन्झाचि हिट्नुङ् आनो-आन्झाचि, ठिबाङ्ङा आरकोङाना बिरुद्दाङि गिन्गिन् चेक्नेनिन्॥ हिट्डे आचोगिटि भोने, टाङ्बाङा खानि दोसि नुङ् न्याए माचोगिटि॥ खेम्सानुम्, न्याए काचोक्बा ढुवारिक्ङि डोक् वाहेट्॥ 10 आम्बु-झान्झाचि हिट्नुङ् आनो-आन्झाचि, टाङ्बा उनिङ्ङि काचेक् माङ्काटाचि मिट्टानुम्चिम् हिट्नागाँ खोड्डे पारिक् याङ्छामा ओआङ्डुए हिट्नुङ् स्वाक् हाङ्सा उयुङे॥ 11 हिट्नागा याङ्छामा ओआङ्डुगा याप्मिचिलोङ्सा आनि आड्डिक् मान् पिडुम्चिम्चिम्॥ आयुबङा हाङ्सुना बारेङि खानिङा आखेम्सुएसुम्मे॥ आन्तेङि टाङ्बाङा उन् खोड्डे पारिक् लुक्मा टुक्टुएना हिट्ना रिङ् खानिङा ठाहा आटोगुम्टुम्॥ छेम्बा डोक् टाङ्बा आड्डिक् दाया काचोक् हिट्नुङ् लुक्मा काटुक् ए॥ 12 आम्भु-आन्झाचि हिट्नुङ् आनो-आन्झाचि, सोब्बे नुङ्ना ठेना रिङ्उम्बाक्, टोनालोग्, नारा हिट्नुङ् खोना रिङ्ङाना उनिङ्ङि किरे चानेनिन्॥ हिट्नुङ् छेम्बाना भोने छेम्बा माट्टानुम्, माखाक् भोने माखाक् माट्टानुम्॥ हिट्नाडे आचोगिए भोने माङ्हाङ्ङा खानि फाट्टुर मालाबिन्गा॥ 13 पाक् खानि माड्डे कोइङा याङ्छामा आङ्डुएट्टुनि? उन्ङा बिन्टि ओचोगुवाक्॥ खानिङि कोइ हारका लिसाइसेनि? उन्ङा माङ्हाङ्ङाना उनिङ् टो चोन्सा छाम्लोमा ओठाक्टुवाक्॥ 14 खानि माड्डे कोइ टुग्एट्नि? उन्ङा माङ्पाङ्ङिगा ओठेडोङ्चि ओछेम्डुचियाक्, हिट्नुङ् हिट्नागाँ टाङ्बाङाना उनिङ्ङि क्या ओनेक्टुङ् उन्लोङ्सा बिन्टि ओचोगुबिडुवाक्॥ 15 बिस्वासलोक् चोग्बालाक् बिन्टिङा टुगाना याप्मि नुमानिङ् लियुक्, हिट्नुङ् टाङ्बाङा हिट्ना याप्मि नुमानिङ् चोगुटु॥ हिट्नुङ् उन्ङा पाप चोगेसुए भोने चा टाङ्बाङा माफि पिडुटु॥ 16 नाड्डेउङ् ठिबाङ्ङा आरको सोरि खानि पाप काएल्-काबु चोगानुम्, हिट्नुङ् खानि नुमानिङ् लिमाउङ्सा ठिबाङ्ङा आरकोलोङ्सा बिन्टि ठाङ्सानुम्॥ धारमोति याप्मिङा चोगुना बिन्टि साक्तिसालि लियुक् हिट्नुङ् नाङा ठेना टोॽवा चोक्मा हिडुटु॥ 17 एलिया चा आनि गाड्डेना डोक् चाट्ला लिसाना याप्मि डाना॥ उन्ङा व्हेट् ओटानि चा नुङ् उनिङ्ग्वालाम्मा डोक् बिन्टि चोगुए, हिट्नुङ् सुम्बोक् बारखा ङा माइना सोम्मा हिट्ना देसङि व्हेट् टानेट्नि॥ 18 फेरि उन्ङा बिन्टि चोगुए हिट्नुङ् टाङ्साङ्लाम्मा व्हेट् टाए, हिट्नुङ् नाराङा चासोङ् केङुए॥ 19 आम्भु-आन्झाचि हिट्नुङ् आनो-आन्झाचि, कोइ छेम्बाना रिङ्लाम्मा बान्डाउङ् खाडे भोने, खानिङा उन् नोक्मा आप्मा कोन्युक्॥ 20 हिट्नालोङ्सा ठाहा उलियाक्, जुन्ङा ठिबाङ् कायाङ्छाबा याप्मि ओचाफेन्ना लाम्बोलाम्मा नोक्टुटु भोने हिट्ना याप्मि सिमालाम्मा उन्ङा हिङुटु, हिट्नुङ् हिट्ना याप्मिङाना जोम् पापचि माफि उलियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.