याकुब 4 - आठपहरियामाङ्हाङ् नेहेटाङ् खाप्मा 1 खानि माझाङि खेमाबुङ्मा लोक् चुङ्माना रिङ् खोनालाम्मा होन्युक्ना? पाक् नागा ख्वाप्पा थोक्चि खानि निङ्ग्वा भिट्रा चुङ्ना ओचाफेन्ना निङ्ग्वालाम्मा होन्निनै टे? 2 खानिङा पालोवालो टोक्माना निङ्ग्वा आचोगुम्टुम्, टरो आटुप्निम्ना, हिट्डेउङ् हिट्ना टोग्मालाउङ्सा खानि सेट्गा-सेट् आचाइटि॥ हिट्नुङ् हिट्नागा टोक्माउङ्सा आड्डिक् निङ्ग्वा आचोगुम्टुम्, हिट्नुङ् हिट्नागा आटोक्नेएट्निम् भोने खानि आखेइटि हिट्नुङ् आचुङिटि॥ खानिङा आकोलुम्गा थोक्चि खानिङा आटोक्निम्ना, पोङ्भोने खानिङा माङ्हाङ् आनाक्निम्ना॥ 3 खानिङा माङ्हाङ् आनाक्टुम्टुम् टरो आटोक्निम्ना, पोङ्भोने खानिगा नाक्माना पारा डोक् ओचाफेन्ना, हिट्नुङ् खानिङा खालि खानि निङ्ग्वाङिगा रिङ् युमा एरोक् माङ्हाङ् आनाक्टुम्ना॥ 4 हाउ इम्मेप्माजामा टोॽवा काचोक् याप्मिचि, नाराङिगा थोक् माया काचोक्बा याप्मि माङ्हाङ्ङाना ओसाट्टुर लियुक् नुङ् खानिलोङ्सा ठाहा वाइना इ? नाड्डेउङ् नाराङिगा थोक् माया काचोक् याप्मिङा माङ्हाङ् ओसाट्टुर चोगुटु॥ 5 “माङ्हाङ्ङा आनिङि आयुङ्साबिडाना हाङ्सा लोङ्सा उन्ङाना टुक्लोक् ओरेक् काड्युक्” नुङ् धारमाछाप्लाङि छेप्बालाक् रिङ् खेडोक्ना नुङ् मिट्नेनिन्॥ 6 टरो उन्ङा आनि आड्डिक् याप्मा मायादाया आपियुक्॥ धारमाछाप्लाङि नाड्डे छेप्टेसे, “माङ्हाङ्ङा ओठेयुजागा याप्मिचि बिरोध चोगुचिचि, टरो मेयोक् उलिगा मायादाया चोगुचिचि॥” 7 हिड्नाड्डेउङ् आप्पेलोङ्सा माङ्हाङ्ङाना काबुङि युङ्सानुम्॥ सैतानङाना बिरोध चोगानुम् हिट्नुङ् हिट्ना खानि मानाडिउङ् पिन्युखाट्युक्॥ 8 खानि माङ्हाङ्ङाना नेहेटाङ् टायानि हिट्नुङ् माङ्हाङ् चा खानि नेहेटाङ् टायुक्॥ हाउ कायाङ्छाबा याप्मिचि, खानि मुक् वासिडानुम् सेङ्सेङ् चोगानुम्॥ हाउ इप्पोक्लेङ् निङ्ग्वा कापि याप्मिचि, खानि निङ्ग्वा सेङ्सेङ् चोगानुम्॥ 9 खानि निङ्ग्वा एगानुम्, हाबानि हिट्नुङ् सानिङ्ग्वा लोसानि॥ रेप्मा नाडानुमुङ् निङ्ग्वा सागु लोसानि, हिट्नुङ् खानि हारका याङ्छामाङि बाद्लि उलियाक्॥ 10 टाङ्बा सोरि आप्पेलोङ्सा मेयोक् लिसानि हिट्नुङ् उन्ङा खानि मान् मापिडिउङ् टो-टो माचोगिटि॥ आरुङाना न्याए चोक्नेनुम् 11 भुम्बु-झान्झाचि हिट्नुङ् नाना-झान्झाचि, ठिबाङ्ङा आरकोङाना बिरुद्दाङि ओचाफेम्मा रिङ् माट्नेनुम्॥ आप्पे बिस्वासि भुम्भु-झान्झाङाना बिरुद्दाङि ओचाफेम्मा रिङ् चेक्ना याप्मि आथाबा आप्पे बिस्वासि भुम्भु-झान्झा न्याए काचोक् याप्मिङा धारमाबिधिङाना बिरुद्दाङि चेक्युक् हिट्नुङ् धारमाबिधि न्याए चोगुटु॥ खान्ङा धारमाबिधि न्याए आचोगुटु भोने, खान् ना रिङ् काटेन्बा माखाक् टरो ना रिङ्ङाना न्याए काचोक्बा आलियुक्॥ 12 माङ्हाङ् एडोक् धारमाबिधि कापिबा हिट्नुङ् न्याए काचोक्बा उन् एरोक् ए॥ उन्ङा एडोक् याप्मिचि हिङ्मा हिट्नुङ् जाखाम् चोक्मा हिडुचिचि॥ खान् आप्पेलोङ्सा पाक् आमिट्युक्ना हिट्नुङ् काटाक्लुङ्चि न्याए आचोगुचिचिगा? ठेलोक् काचोक् बिरुद्दाङि ओछेक्छेक् 13 “हामो हान्डेङ् आनि आरको खालाङ्गालेङ् खाडि हिट्नुङ् हिट्नि ठिक् बारखा टेप्मा युङिउङ् बेपार चोगि हिट्नुङ् ओफाबा कामाँ चोगुम्” नुङ् आपिगिगा खानिङा आङा याङ्खेम्सानि॥ 14 हान्डेङ् पाक् लियुक्ना नुङ् खानिङा ठाहा आटोक्निम्ना॥ खानि चोला पाक् गाड्डेना? खानिउम् छोप्पोङ् ठेट्ना हिट्नुङ् मायुएट्ना ओहाक्सा गाड्डेगा डोक् ए॥ 15 खानिङा नाड्डेना रिङ्उम्टे माप्मा कोले, “माङ्हाङ्ङा उनिङ्ग्वा लिसे भोने, आनि हिङिटि हिट्नुङ् नागा रिङ् चोगुम्टुम् आथाबा हिट्नागा रिङ् चोगुम्टुम्॥” 16 टरो खानि नाड्डे आचोगिन्गेट्टिन्गा, खानिङा आप्पे योजाना आचोगुमुङ् ठेलोक् आचोगेएट्टि॥ ना पारा ठेलोक् चोक्मा उचाफेम्मा ए॥ 17 हिट्डेउङ् जुन्ङा ओचेट्नु चोक्मा कोन्युक् नुङ् ठाहा टोगुङ् चा हिड्नाड्डे चोक्निना भोने, हिट्नाङा पाप चोगुटु॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.