याकुब 1 - आठपहरिया1 माङ्हाङ् हिट्नुङ् टाङ्बा येसु खिरिस्टङाना सेवाक् आङा याकुबलाम्मा सोब्बेलेङ् चेम्बेलेङ् उछिन्डाउङ् उयुङागा माङ्हाङ्ङागा सोब्बे ओयाप्मिचि लाउङ्सा ना चिट्ठि छेप्टुएट्टुङ्॥ खानि सोब्बेलाउङ्सा आङाना बाबा ए॥ बिस्वास हिट्नुङ् ठोना 2 आम्भु-आन्झाचि हिट्नुङ् आनो-आन्झाचि, खानिङि पारिक् पारिक्ङागा याङ्छामा ओटाचा हारकाङाना रिङ् ए नुङ् मिट्टानुम्॥ 3 पोङ्भोने खानि बिस्वासङाना निङ्ग्वा छिक्माना रिङ्ङा खानिना आङ्माना बोल् पोयुक् नुङ् खानिङा ठाहा आटोगुएसुम्मे॥ 4 टरो खानिङा सोब्बे थोक् आङ्माउङ्सा सिकाँ लिमा कोन्युक्, हिट्डेउङ् खानिलाउङ्सा खोना रिङ् चा चाहाब् मिलेङे खानि सोब्बे थोक्ङि बोल्लेउ आलिसिटि॥ 5 खानि माड्डेङि खोनालाउङ्सा ठोना चाहाब् लिसाइसे भोने, खेमा मिलाप्मे उनिङ्ग्वालाम्मा डोक् कापिबा माङ्हाङ्लोक् हिट्नाङा ओनाक्टुवाक्, हिट्नुङ् उन्ङा हिट्ना पिडुटु॥ 6 टरो हिट्नाङा खोट्टेप्मा चा साङ्का मिचोक्ङे बिस्वास चोगुङ् माङ्हाङ्लोक् नाक्मा कोन्युक्॥ साङ्का काचोक् याप्मिम्बाक् हिॽवाङा वान्डुना सामुन्दराङिना चुवा ओभेट्लेॽवा गाड्डेना डोक् लियुक्॥ 7 हिट्नाडेगा याप्मिङा टाङ्बालाम्मा पालोवालो टोगुङ्टुङ् नुङ् उमिट्टुन् चा॥ 8 पोङ्भोने माङ्हाङ् हिट्नुङ् नारालेङ् निङ्ग्वा कापिबा याप्मिङाना चाट्ला एक्के ठोङ् लिनिना॥ पाक्चा मिलिमा हिट्नुङ् माक्फेन्सुबेन् 9 पाक्चा मालेगा बिस्वासिचि, जब खानि माङ्हाङ्ङा टो माफोगिनाँ आड्डिक् हारका लिसानि॥ 10 हिट्नुङ् वागाठागाम्बाक् पाक्चा वानिना बेला हारका लिमा कोन्युक्, पोङ्भोने हिट्नाउम्टे जाङ्गालि फुङ् गाड्डेना डोक् लेम्युङ् खाट्युक्॥ 11 जब टुक्लोक् नाम्छेयुक् टब फुङ् उभुङ्मा डोक् चोप्युङ् सियुक्॥ हिट्नुङ् ओफेट् ठायुङ् हिट्नाङाना ओसोभा डोक् खाट्युक्॥ हिट्नाड्डे डोक् वागाठागा याप्मि चा आप्पे ओटोॽवा चोगुगेट्टुलोक् डोक् ओचोला चा जाखाम् लियुङ् खाट्युक्॥ 12 निङ्ग्वा छिक्मा टानाँ आङ्मा काहिबा याप्मिम्बाक् माङ्हाङ्ङा आसिक् पिडुटु॥ हिट्नुङ्ना माङ्हाङ्ङा उन् माया काचोक्चि लाउङ्सा पिडुङ्चिङ्चिङ् नुङ् उन्ङा माङ्हुप् चोगुना चोलाङाना मुकुट् डोक् याङ्छामा काआङ्बा याप्मिङा टोगुटु॥ 13 कोइङा निङ्ग्वा छिक्माङि ठाना बेला “माङ्हाङ्ङा आङा जाँच याङ्चोगाङे” नुङ् ओमाट्टुन् चा॥ पोङ्भोने खोना चा ओचाफेम्मा रिङ्लाम्मा माङ्हाङ् निङ्ग्वा छिमाङि ठानिना, हिट्नुङ् उन्ङा आप्पे चा खोना याप्मिङाना चा निङ्ग्वा छिक्टुन्ना॥ 14 टरो याप्मि आप्पे डोक् ओचाफेम्मा निङ्ग्वाङा इप्टुङ् निङ्ग्वा छिक्माङि ठायुक्॥ 15 हिड्नाड्डेउङ् नाड्डेना ओचाफेम्मा निङ्ग्वाङा याप्मिङाना उनिङ्ग्वा इप्टुङ् पाप पोङ्युक्॥ हिट्ना पाप डोक् पोयुङ् याप्मि सिमा कोन्ना लियुक्॥ 16 आमायालु आम्भु-आन्झाचि हिट्नुङ् आनो-आन्झाचि, खानिङा आप्पेलाउङ्सा धोका पिनेनुम्॥ 17 ख्वाप्पा नुगा हिट्नुङ् सिद्दा थोक्चि टाङ्साङ्ङिगा ख्वाप्पा व्हाङ् काचोक्बा आनि माङ्हाङ् पाबालाम्मा टायुक्॥ उन् खोना बेला चा फेरबादाल लिनिना, उन् फेराँ लिना रिमेट् गाड्डेना माखाक्॥ 18 उन्ङा सिरिस्टि चोगुचिगा थोक्चि माड्डे आनि सोब्बे नुङ्ना चाहाब् लिसिगा लिमा उहिडियाक् नुङ् छेम्बाना रिङ्लाम्मा उन्ङाना उनिङ्ग्वाङा डोक् आनि ओछालेट् चोक्माना निङ्ग्वा चोगुए॥ खेम्मा हिट्नुङ् चोक्मा 19 आमायालु आम्भु-आझान्झाचि हिट्नुङ् आनो-आन्झाचि, ना रिङ् खानिङा मिट्टायाक्टानुम्॥ सोब्बे याप्मि खेम्मा ओचाप्पाङ्, चेक्मा एला चोक्निना हिट्नुङ् ओरेक् काड्युएट्ना लिमा लिनिना॥ 20 पोङ्भोने याप्मिङाना ओयाग्लेडे भोने, हिट्नाँ माङ्हाङ्ङा निङ्ग्वा टासुना धारमिक्ताङाना टोॽवा चोक्मा हिडुन्ना॥ 21 हिड्नाड्डेउङ् सोब्बे नाड्डेगा ओचाफेन्गा हिट्नुङ् ओभेन्गा चाट्ला नाडानुम्, हिट्नुङ् मेयोक् लिसानिउङ् खानि निङ्ग्वाङि युङ्बालाक् माङ्हाङ् उरिङ् लाडानुम्, पोङ्भोने ना रिङ्ङा डोक् खानि जोगाँ चोक्मा माहिडिटि॥ 22 टरो रिङ् पालान् काचोक्बा लिसानि, काखेम्बा एरोक् आलिसिउङ् आप्पेलाउङ्सा धोका पिनेनुम्॥ 23 रिङ् काखेम्बा टरो रिङ् पालान् चोक्निनाम्बाक् आइनाङि ओनाभाक् पुयुना याप्मि गाड्डेना डोक् लियुक्॥ 24 हिट्नाङा आप्पेलाउङ्सा आइनाङि पुयुटु हिट्नुङ् खाट्युएट्युक्, हिट्नुङ् हिट्नाङा उन् खोड्डेना डाना नुङ् हिट्ना बेला डोक् मुन्डुएट्टुटु॥ 25 टरो खोना याप्मिङा छुट्कारा आपिना हिट्ना नुना आग्याँङि निङ्ग्वा पिडुटु हिट्नुङ् पालान् चोगुटु, हिट्नुङ् हिट्ना खेम्सुङ् मुन्डुएट्टुन्ना टरो हिट्ना गाड्डे टोॽवा चोगुटु भोने, हिट्नाङा चोगुना ओटोॽवाङि माङ्हाङ्ङा आसिक् पिडुटु॥ 26 कोइ याप्मिङा आङा धारमोति नुङ् मिट्टुटु, टरो ओलेक्फाम्बाक् काबुङि युङ्सुन्ना, हिट्नुङ् आप्पे उनिङ्ग्वा धोका पिडुटु भोने उन्ङा चोगुना धारमाकारमा बिथाइना लियुक्॥ 27 माङ्हाङ् पाबाङाना ओटोकानाङि उनिङ्ग्वा टाना छेम्बाना टोॽवाम्बाक् याङ्छामाङि ओठायागा लाङ्लेप्माचि हिट्नुङ् पाबा-मामा मालेगा ओयाङ्छाडागा पिच्छाचि पुमा, हिट्नुङ् आनि आसुद्दो आचोक्ना नाराङि लिसागा ओचाफेम्मा रिङ्लाम्मा लाप्माङ् युङ्मा ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.