हिब्रु 9 - आठपहरियानारा हिट्नुङ् टोनालोग्ङि चोक्माना माङ्ध्यान् 1 पाइलेना माङ्हुप्ङि माङ्हाङ्ङा माङ्ध्यान् चोक्माना नियाम इस्राइलि याप्मिचि पिडुचे, हिट्नुङ् माङ्ध्यान् चोक्माना ठिक् सेङ्सेङ्ना डेन् चा नाराङि डाना॥ 2 हिट्नागाँ ठिक् माङ्हाङ् माङ्ध्यान् चोक्माना सेङ्सेङ्ना पाल ओचोगुए, हिट्नि आगाडिना कोठाङि कुपिदानि, टेबुल हिट्नुङ् माङ्हाङ्ङि ठाङ्माउङ्सा चालेप्पा चा उयुङ्सेसुगा॥ हिट्ना डेन्बाक् सेङ्सेङ्ना ठोङ् ओलोडुए॥ 3 हिट्नुङ् हिट्ना भिट्रा पारदाङा ओहाम्डुङ् आरको कोठा ओचोगेसुना, हिट्ना आड्डिक् सेङ्सेङ्ना डेन् ओलोडुए॥ 4 हिट्नि धुपा हाट्माना साम्मेङ्ङाना बेदि डाना हिट्नुङ् साम्मेङ्ङा उरिगुना माङ्हुप्ङाना बाकास चा डाना॥ हिट्ना बाकास भिट्रा मोन्ना उयुङ्सुना साम्मेङ्ङाना ओयाङ्ढाङ्, उचुपुरुक् होन्डाना हारुनङाना ओलाहुरिक् हिट्नुङ् ठिमेक् आग्याँ छेप्बालाक् इप्पोक् लुङ्गेॽवाङाना पाटि हिट्नि उयुङ्सुएसुचिगा डागा॥ 5 हिट्ना बाकास उठुङ्ङि कारुबचि ओलोडुचिगा ओम्सागा माङ्हाङ् रिङ् काउक्बाचि ओयेबेसागा, हिट्नागाँगा उन्चि लाप्टाङ्ङा पाप छेमा चोक्माना डेन् ओटेप्टेसुना॥ टरो हाट्ले नागा रिङ् बारेङि सोब्बे ठिक्-ठिक् चोक्सा माट्मा हिनिम्ना॥ 6 हाट्ले सोब्बे थोक् टेयार लिसाउङ् पुजारिचि सोरोक् उन्चि बिधि बिदान्ता चोक्मा पालङाना पाइलेना कोठाङि ओखाडागा डागा॥ 7 टरो भिट्रा आड्डिक् सेङ्सेङ्ना डेन्ङिम्बाक् सानिङ्डाङ्बा सालङि ठिक् खेप् एडोक् लिग्मा टोगुना डाना॥ उन्ङा सोरोक् हिट्ना हेलिक् आप्पे उन्ङाना पाप लोक् याप्मिचिङा ठाहा मिटोक्ङे ओचोगुना पापलाम्मा छेमा टोक्मा ठाङ्सुना डाना॥ 8 हिट्नुङ् सेङ्सेङ्ना हाङ्साङा नागा सोब्बे बिधिलाम्मा पाइलेना पाल लियुयाक्लोक् सोम्मा भिट्रालेङ्ना आड्डिक् सेङ्सेङ्ना डेन्ङि खाट्माना लाम्बो ओङ्निना नुङ् याप्मिचि निमेट्टुचे॥ 9 नाउम्टे ना बेला लाउङ्सा नामुना एडोक्॥ माङ्हाङ्लाउङ्सा पुजारिचिङा ओठाङ्सुगा भेटि हिट्नुङ् भोक् ठाङ्सुम्ना रिङ्ङा माङ्ध्यान् काचोक्बाङाना उनिङ्ग्वा चोखो चोक्मा हिडुन्ना नुङ् ना रिङ्ङा पारचिन्दा चोगुटु॥ 10 हिट्नागाम् खालि चामा-ठुङ्मागा हिट्नुङ् पारिक् पारिक् पाराँ वासिमाउङ् चोख्याँ लिमाना नियामचि एडोक् ए॥ माङ्हाङ्ङा सोब्बे थोक् ओछोङ्ग्वाट् मिचोक्ङे सोम्मा हिट्नागाम् खालि ना येम्ङि पालान् चोक्मागा बिधिचि एडोक् उलियुक्॥ 11 टरो खिरिस्टउम्टे हाट्ले आनिलोक् लिसागा सोब्बे ओचेट्नुना रिङ्चिगा सानिङ्डाङ्बा लिसाउङ् टाए॥ उन् माङ्ठेना हिट्नुङ् आड्डिक् चोखो पालङि लिगे, हिट्नाम्बाक् याप्मिचिङा ओचोगुना चा माखाक् हिट्नुङ् ना नाराङि सिरिस्टि लिसाना थोक् चा माखाक्॥ 12 उन् आड्डिक् सेङ्सेङ्ना डेन्ङि बोका हिट्नुङ् बाछा भोक् ओठाङ्सुना हेलिक् याङुङ् खाट्नेट्नि, टरो आप्पे उन्ङाना ओहेलिक् खाट्टुङ् सोरोक् लोङ्सा एक्के खेप् खाडे॥ हिट्डेउङ् उन्ङा सोरोक् लाउङ्सा आनि लाट्निना चोला आपिडे॥ 13 मोसाङाना धारमाबिधि गाड्डे आसुद्दो याप्मिचि बोका लोक् साँढेङाना ओहेलिक् हिट्नुङ् कोरालि बाछा उडुना ठाबुट्ङा छारकाँ ओचोगुचिउङ् सुद्दो उलिसागा डागा॥ 14 हाट्ले खिरिस्टङाना ओहेलिक्ङि हिट्ना नुङ्ना चा आड्डिक् बोल्लेउ ए हिट्नुङ् नाङा आनि निङ्ग्वा आनिना ओचाफेन्ना टोॽवालाम्मा सुद्दो चोक्मा हिडुटु, हिट्डेउङ् आनि उहिङ्ग्वाट् माङ्हाङ्ङाना सेवा चोक्मा हिडुम्टुम्॥ पोङ्भोने उन्ङा लाट्निना हाङ्साङाना बोल्लाम्मा आप्पेलाउङ्सा फाट्टुर मालेना भोक् लिसाउङ् माङ्हाङ्ङि ठाङ्सुए॥ 15 नाड्डेउङ् माङ्हाङ्ङा चामारसिङा चोगुना सोरोक् लियुयाक्ना आसिक् ओटोगुवाक् नुङ् उन्ङा छेम्डुचिगा लाउङ्सा खिरिस्टम्बाक् ओछोङ्ग्वाट् माङ्हुप् काटोङ्बा ए, पोङ्भोने पाइलेना माङ्हुप् आझै लिसाना बेला याप्मिचिङा ओचोगुना पापलाम्मा छुट्कारा पिमाउङ्सा उन् सिए॥ 16 पोङ्भोने कोइ याप्मिङा आङा सिङाउङ् एडोक् आङाना आमाक्फेन्सुबेन् साङा टोगुटुना नुङ् तामासुक् छेप्टुटु भोने, हिट्ना छेप्टुना तामासुक् उन् सियुङ् एडोक् साँचो ठार्याँ लियुक्॥ 17 पोङ्भोने हिट्ना याप्मि उहिङ्ग्वाट् वायुलोक् सोम्मा उन्ङा छेप्टुना तामासुक् छेम्बा डोक् ठार्याँ लिनिना, टरो उन् सियुङ् एडोक् साँचो ठार्याँ लियुक्॥ 18 हिट्नाडेउङ् पाइलेना माङ्हुप् चा जिवाट् ओहेलिक् भोक् मिठाङ्ङे सोम्मा पाक्का लिनेट्नि॥ 19 जब मोसाङा धारमाबिधि बारेङि ख्वाप्पा आग्याँचि याप्मिचि खेम्मेट्टुचे, तब उन्ङा हिसाप ओलोडुना सिङ् उभुङ्माङाना ओहागेप्पा हिट्नुङ् फाना उन् चुवाङि मिसाङा ओचोगुना बाछा लोक् बोकाङाना ओहेलिक्ङि लुमुङ् धारमाछाप्लाङि हिट्नुङ् ख्वाप्पा याप्मिचिङि हिसुए॥ 20 उन्ङा नाड्डे लोडुचे, “माङ्हाङ्ङा खानिङा आग्याँ पालान् चोक्मा कोन्युक् नुङ् मालोडिना माङ्हुप्ङाना हेलिक् ना डोक् ए॥” 21 हिट्नाडेडोक् मोसाङा सेङ्सेङ्ना पाल हिट्नुङ् माङ्ध्यान् चोक्माउङ्सा चाहाब् लिगा सोब्बे थोक्ङि हेलिक् हिसुए॥ 22 छेम्बा डोक्, धारमाबिधिङा माट्टु गाड्डे भोक् ठाङ्बालाक् हेलिक्ङा कारिब् कारिब् सोब्बे थोक् चोख्याँ चोगुटु, हिट्नुङ् हेलिक्ङाना भोक् मिठाङ्ङे पाप छेमा लिमा हिनिना॥ खिरिस्टङाना भोक्ङा पाप टुगुटु 23 टोनालोग्ङि उलिसागा नाक्काल ओचोगुचिगा रिङ्चिउम् जिवाट्चिगा भोक् ठाङ्माउङ् चोख्याँ चोक्माकोन्डे भोने, टोनालोग्ङिगा डोक् रिङ् लाउङ्साम्टे झान् हिट्ना नुङ्ना चा ओचेट्नुना भोक् ठाङ्मा चाहाब् लिसाना डाना॥ 24 पोङ्भोने खिरिस्टउम्टे याप्मिङा ओचोगुना सेङ्सेङ्ना डेन्ङि लिग्नेट्नि, हिट्नाम्बाक् छेम्बाना सेङ्सेङ्ना डेन्ङाना सिको एडोक् डाना, हाट्ले उन् उम्टे आनि घुवार फामाउङ्सा टोनालोग्ङि माङ्हाङ् ओटोकाना सोरि खाडेसे॥ 25 इस्राएलिचिगा सानिङ्डाङ्बा जिवाट्चिगा हेलिक् खाट्टुङ् सालिन्ने सोब्बे नुङ्ना सेङ्सेङ्ना डेन्ङि लिगाना डाना॥ टरो येसुउम्टे छोप्पोङ् छोप्पोङ् आप्पेलाउङ्सा भोक् ठाङ्मा टोनालोग् खाट्नेट्नि॥ 26 उन्ङा आप्पेलाउङ्सा सालिन्ने भोक् ठाङ्मा कोलानाम्बे, ना नारा सिरिस्टि लिसाना बेला नुङ्ङा डोक् उन्ङा याप्मा खेप् याङ्छामा आङ्मा कोन्डे बे॥ टरो ना आखेरि बेला खिरिस्ट सोरोक् लोङ्सा एक्कै खेप् उङ्से हिट्नुङ् याप्मिचि पापलाम्मा छुट्कारा पिमाचि लाउङ्सा उन्ङा आप्पेलाउङ्सा भोक् ठाङ्सुए॥ 27 सोब्बे याप्मिचि एक्खेप् सिमा डोक् कोन्युक्, हिट्नुङ् उसियुङ् माङ्हाङ्ङा हिट्नागा न्याए चोगुचिचि॥ 28 हिट्नाडेडोक् सोब्बे याप्मिचिगा पाप टुग्माउङ्सा खिरिस्ट आप्पे ठिक्ए खेप् भोक् लिसे॥ हिट्नुङ् जब खिरिस्ट दोस्रो खेप् उङ्युक्, हिट्ना बेला याप्मिचिगा पाप टुग्मा माखाक्, टरो ओलाम्भो उपुयुङ् उयुङेसागा याप्मिचि बाचाँ चोक्माउङ्सा उङ्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.