हिब्रु 8 - आठपहरियाखिरिस्ट आनि सानिङ्डाङ्बा 1 आन्याँ माप्मा कोलुम्माना मुलि रिङ्म्बाक् ना डोक् ए, आनिलोक् नाड्डेना सानिङ्डाङ्बा वाहेट्, उन् टोनालोग्ङि आड्डिक् बोल्लेउ माङ्हाङ्ङाना सिङासान्ङाना छुप्टाङ् उमुक्लेङ् युङेसे॥ 2 उन्ङा टोनालोग्ङि आड्डिक् सेङ्सेङ्ना डेन्ङि पुजारिङाना सेवा चोगुटु, हिट्ना सेङ्सेङ्ना डेन्उम्टे याप्मिङा ओचोगुना माखाक्, टरो टाङ्बा आप्पेङा चोगुना ए॥ 3 सोब्बे सानिङ्डाङ्बाचि भेटि हिट्नुङ् भोक् ठाङ्माउङ्सा नियुक्टा उलियुक्॥ हिट्नाड्डेउङ् आनि सानिङ्डाङ्बालोक् भोक् ठाङ्मा लाउङ्सा पालोवालो थोक्उम् लिमा डोक् कोलाना डाना॥ 4 उन् ना नाराङि डोक् लिसायाक्टानाम्बे पुजारि लिनेट्नि बे, पोङ्भोने धारमाबिधिङा माट्टु गाड्डे भेटि उठाङ्सुगा पुजारिचिम् नेहि पाइलेलाम्मा डोक् ओवाहेट्॥ 5 हिट्नागाँ सेवा ओचोगुना ठोङ्उम् टोनालोग्ङिना छेम्बाना सेङ्सेङ्ना ठोङ्ङिना सिको हिट्नुङ् रिमेट् एडोक् ए॥ पोङ्भोने मोसाङा सेङ्सेङ्ना पाल चोक्मा कोलुनाँ माङ्हाङ्ङा नाड्डे लोडुए, “आङा खान् झोन्झोबाङि निमेट्ना गाड्डे डोक् सोब्बे थोक् चोगु॥” 6 टरो हाट्ले येसुङा टोगुना सेवा हिट्नागा पाइलेगा पुजारिचिगा टोॽवा नुङ्ना चा माङ्ठेना॥ हिट्नाडेउङ् माङ्हाङ् लोक् याप्मिचि माझाङि उन्ङा चोगुना सेङ्सेङ्ना माङ्हुप् पाइलेना नुङ्ना चा ओचेट्नुना, पोङ्भोने ना ओछोङ्ग्वाट् माङ्हुप् आड्डिक् ओचेट्नुना चामारसिङालाम्मा उटुम् लियुक्॥ 7 हिट्डेउङ् पाइलेना बाचा फाट्टुर मालेना लिसानाम्बे आरको बाचा चाहाब् लिनेट्नि बे॥ 8 टरो माङ्हाङ्ङा ओयाप्मिचिङि फाट्टुर टुबुङ् लोडुचे, “टाङ्बाङा माट्टुटु, खेम्सानुम्, बेला टायुगेट्, आङा इस्राएलि याप्मिचि हिट्नुङ् याहुदाङिगा याप्मिचिलोक् ठिक् ओछोङ्ग्वाट् माङ्हुप् चोगुङ्टुङ्॥ 9 ना चामारसिङा उन्चि टुबाठेबाचिलोक् आङा रेक्टुङ्ना माङ्हुप् गाड्डेना लिनिना॥ हिट्ना बेला आङा उन्चि मुक्ङि लाबुङ्चिउङ् मिस्रा देसलाम्मा हिट्नागा होट्टुङ्चिङे॥ टाङ्बाङा माट्टुटु, हिट्नागाँ आङा रेक्टुङ्ना चामारसिङा पालान् डोक् ओचोग्वाट्टुन्, हिट्नाड्डेउङ् आङा चा हिट्नागा यान्दा चोक्मा डोक् नाडुङ्चिङे॥ 10 टाङ्बा पिक्युक्, हाट्ले नुङ् इस्राइलि याप्मिचिलोक् ना ओछोङ्ग्वाट् माङ्हुप् रेक्टुङ्टुङ्, आङा हिट्नागा आङाना धारमाबिधि बुजा चोक्मा काहिबा चोगुङ्चिङ्चिङ्, हिट्नुङ् आङाना धारमाबिधि पालान् चोक्माना निङ्ग्वा पिडुङ्चिङ्चिङ्, आङा हिट्नागाँगा माङ्हाङ् लिङा, हिट्नुङ् हिट्नागाम्बाक् आयाप्मिचि उलियुक्॥ 11 हाट्ले नुङ् ‘माङ्हाङ् टाङ्बा मिसेन् निसानुम्’ पिक्सा खोना याप्मिङा चा उन्चि टाक्लुङ्चि आथाबा उन्चि भुम्भु-झान्झाचि लाउङ्सा हिसिक्मा कोन्निना, पोङ्भोने ओखाट्टिउगा हिट्नुङ् ओठेगा सोब्बेङा आङा मिसेन् याङ्उनिङा॥ 12 पोङ्भोने आङा हिट्नागाँ ओचोगुना भेन्ना टोॽवा छेमा चोगुङ्बिडुङ्चिङ्चिङ्, हिट्नुङ् हिट्नागाँगा पाप आङा खोना बेला चा मिट्निङ्ना॥” 13 जब माङ्हाङ्ङा ना माङ्हुप् “ओछोङ्ग्वाट्” नुङ् माट्टुए, टब पाइलेना चामारसिङाम्बाक् आधिकार मालेना चोगुए, हिट्नुङ् जुन् रिङ् आधिकार मालेना लियुक् हिट्नुङ् काम लाहाब् लिनिना लियुक्, हिट्ना हिट्डेना एला डोक् मायुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.