हिब्रु 7 - आठपहरियापुजारि माल्किसेदेक 1 माल्किसेदेकउम्बाक् सालेम खालाङ्गाङिना हाङ्बा हिट्नुङ् सोब्बे नुङ्ना माङ्ठेना माङ्हाङ्ङाना पुजारि डाना॥ आब्राहामङा हाङ्बाचि लडाइङि मेट्टुचिउङ् नोक्टागेट्टानाँ माल्किसेदेकङा उन् टुबुङ् आसिक् पिडुए॥ 2 आब्राहामङा लडाइङि मेट्टुचिउङ् टाडुगा सोब्बे थोक्ङाना दासांस माल्किसेदेक पिडुए॥ माल्किसेदेक उनिङ्ङाना उटुप्बाक् “धारमोति हाङ्बा” हिट्नुङ् सालेमङिना हाङ्बाङाना उटुप्बाक् “हाङ्हाङ्ङाना हाङ्बा” नुङ् लियुक्॥ 3 साङा चा माल्किसेदेकङाना उप्पा-उमा हिट्नुङ् उटुबाठेबाचि बारेङि ठाहा ओटोगुन्ना॥ हिट्नुङ् उन् पोङ्साना रिङ् हिट्नुङ् सियाना रिङ् चा खोनाङा चा ठाहा ओटोगुन्ना॥ टरो माङ्हाङ् छा गाड्डे डोक् उन् सोरोक् डोक् पुजारि लियुयाक्युक्॥ 4 हाट्ले मिट्टानुम् टे, ना माल्किसेदेक इम्टेप्मा ठेना याप्मि डाना॥ आनि टुबाठेबा आब्राहाम ठेना लिसा चा उन्ङा लडाइङि मेट्टुचिउङ् टाडुगा थोक्ङागा दासांस उन् पिडुए॥ 5 हाट्ले याहुदि याप्मिचिङा उन्चिङा कामाँ ओचोगुनालाम्मा दासांस लेबि पुङ्लाङिगा पुजारिचि पिमा डोक् कोन्युक् नुङ् धारमाबिधिङा माट्टेसुए॥ हिट्नागा सोब्बे आब्राहामङाना उपुङ्लाचि उलि चा पुजारिचिङा आप्पे उन्चि नातेदारलाम्मा दासांस ओफोगुटु॥ 6 टरो ना माल्किसेदेक याप्मि लेबि पुङ्लाङिना माखाक् नुङ् चा आब्राहामलाम्मा दासांस लाडुए, हिट्नुङ् माङ्हाङ्ङाना माङ्हुप् टोगुना आब्राहाम आसिक् पिडुए॥ 7 ओखाट्टिउगाँ ओठेगा याप्मिलाम्मा आसिक् ओटोगुटु नुङ् रिङ् सोब्बे लाउङ्सा ठाहा युङ्ग्वा॥ 8 उसियुङ् ओखाट्गा पुजारिचिङाउम् दासांस ओटोगुए, टरो माल्किसेदेक हिट्नागा नुङ्ना चा ठेना ए, पोङ्भोने उन् सोरोक् उहिङ्ग्वाट् वाहेट् नुङ् धारमाछाप्लाङा माट्टुटु॥ 9 लेबि पुङ्लाङिगा पुजारिचिङा याप्मिचिलाम्मा दासांस ओलाडुए, हिट्डेउङ् आब्राहामङा दासांस माल्किसेदेक पिडुनाँ, लेबिचिङा चा उन् दासांस उपिडुए नुङ् माप्मा हिडुम्टुम्॥ 10 पोङ्भोने आब्राहामङा माल्किसेदेक दासांस पिडुना बेला लेबि पोङ्निगेट्निना डाना, टरो हान्डेङ् हिट्ना आब्राहामङाना उइछा लिसे॥ 11 हाट्ले हारुनङाना पुङ्लालाम्मा लेबिचिङा पुजारिङाना टोॽवा चोक्माना आधिकार ओटोगुए, हिट्नुङ् पुजारिचिङाना टोॽवाङाना आधारङि डोक् इस्राइलि याप्मिचि माङ्हाङ्ङा धारमाबिधि पिडुचे॥ हाट्ले लेबि पुजारिङाना टोॽवा काचोक्बाचिङा सोब्बे रिङ् चोखो चोक्मा हिडुवाट्टुन्, हिट्डेउङ् हारुनङा ओछालेट्चिलाम्मा माखाक् टरो माल्किसेदेक पुजारि गाड्डेना आरको पुजारि चाहाब् लिसे॥ 12 हिट्नाड्डेउङ् आरको खाले पुजारि टाए भोने धारमाबिधि चा फेराँ चोक्मा कोन्युक्॥ 13 आन्याँ माट्टुम्माना पुजारिङाना बारेम्बाक् लेबि पुङ्लाङिना माखाक्, टरो उन्बाक् आरको पुङ्लालाम्माना ए॥ हिट्नुङ् ना पुङ्लाङिगा याप्मिचिलाम्मा खोनाङा चा पुजारि उलिसाउङ् टोॽवा ओचोगुन्गेट्टुन्ना॥ 14 आनि टाङ्बा याहुदाङाना पुङ्लालाम्मा पोङ्साना नुङ् सोब्बे लाउङ्सा ठाहा युङ्ग्वा, टरो मोसाङा ना याहुदा पुङ्लालाम्मा पुजारि उलियुक् नुङ् काइले चा माट्टुवाट्टुन्॥ येसु माल्किसेदेक पुजारि गाड्डेना डोक् 15 हाट्ले माल्किसेदेक पुजारि गाड्डेना आरको पुजारि टायाउङ् ना नियाम फेराँ लिसाना रिङ् पारचिन्दा युङ्ग्वा॥ 16 हिट्नुङ् उन् लेबिचिगा पुङ्लालाम्मा पुजारि लिमा कोन्डाना नुङ् धारमाबिधिङा माट्टु गाड्डे उन् पुजारि लिसाना माखाक्, टरो खोना बेला चा जाखाम् लिनिना चोलाङाना बोल्लाम्मा उन् पुजारि लिसाना॥ 17 पोङ्भोने धारमाछाप्लाङि नाड्डे छेप्टेसे, “खान् माल्किसेदेक गाड्डे सोरोक् लाउङ्सा पुजारि आलियुक्॥” 18-19 मोसाङा छेप्टुना धारमाबिधिङा खोना याप्मि चा माङ्हाङ् ओटोकानाङि चोखो चोक्मा हिडुवाट्टुन्॥ हिट्ना पाक्चा चोक्मा हिडुन्ना हिट्नुङ् काम लाहाब् लिनिना लिसे॥ हिट्डेउङ् माङ्हाङ्ङा हिट्ना होट्टुडिसुए॥ टरो हाट्ले माङ्हाङ्ङा आनि आड्डिक् ओचेट्नुना आसा आपिडेसे, हिट्नुङ् ना आसालाम्मा आनि माङ्हाङ् सोरि खाप्मा हिडिटि॥ 20-21 माङ्हाङ्ङा येसु पुजारि चोगुनाँ चामारसिङा चोउङ् चोगुए, टरो आरु पुजारि चोगुचिनाँ चामारसिङा चोवाट्टुन्॥ हिट्नुङ् येसुङाना बारेङि माङ्हाङ्ङा नाड्डे माट्टुटु, “आङा माङ्हाङ् डाङ्बाङा चामारसिङा चोगुङ्टुङ्, ‘खान् सोरोक् लाउङ्सा पुजारि आलियुक्’ हिट्नुङ् ना चामारसिङा आङा काइले चा एग्निङ्ना॥” 22 ना चामारसिङा चोगुनाँ पुरानो चामारसिङा नुङ्ना ओछोङ्ग्वाट् चामारसिङा नुना नुङ् येसुङा आनि निधो आपियुक्॥ 23 आरको खोड्डेना रिङ् भोने पाइले पुजारिचि जोम् ओडागा, पोङ्भोने हिट्नागा उसियाउङ् ओखाडे हिट्नुङ् उन्चि टोॽवा सोरोक् डोक् चोक्मा उहिडुवाट्टुन्॥ 24 टरो येसु काइले चा सिनिना, हिट्डेउङ् उन् सोरोक् लाउङ्सा पुजारि लियुक्॥ 25 हिट्नाड्डेउङ् येसुङि बिस्वास ओचोगुङ् माङ्हाङ् सोरि ओखाट्गा याप्मिचि उन्ङा सोरोक् लाउङ्सा बाचाँ चोक्मा हिडुचिचि, पोङ्भोने हिट्नागा लाउङ्सा माङ्हाङ्ङि बिन्टि चोक्माबिमा उन् सोरोक् उहिङ्ग्वाट् वाहेट्॥ 26 येसुम्बाक् आनि लाउङ्सा चाहाब् लिना सानिङ्डाङ्बा ए॥ उन् सेङ्सेङ्ना, फाट्टुर मालेना, चोखो ए, हिट्नुङ् उन्ङा पाप चोग्वाट्टुन्॥ माङ्हाङ्ङा उन् सोब्बे नुङ्ना टो टोनालोग्ङि युङ्सुए॥ 27 येसुङा आरु सानिङ्डाङ्बाचि गाड्डे आप्पे उन्ङाना पाप छेमा लाउङ्सा हिट्नुङ् आरु याप्मिचिगा पाप लाउङ्सा लेन्सेन् भोक् ठाङ्मायाक्मा कोन्निना॥ पोङ्भोने उन्ङा सोब्बे याप्मिचिगा पाप लाउङ्सा एक्के खेप् आप्पे लाउङ्सा उन्ङा भोक् ठाङ्सुए॥ 28 धारमाबिधिङा गाल्ति चोक्मा उहिडुगा याप्मिचि सानिङ्डाङ्बा लिमा सेगुचे, टरो धारमाबिधि नुङ्ना एङ्स्वा टाएना चामारसिङाङा माङ्हाङ् आप्पेङा उइछा सानिङ्डाङ्बा लिमा सेगुए॥ हिड्डेप्मा एडोक् माखाक्, उन् सोरोक् चोखो सानिङ्डाङ्बा लियुयाक्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.