हिब्रु 6 - आठपहरिया1 नाड्डेउङ् खिरिस्टङाना बारेङि उटुम्ङिगा हिसिक्माचि एडोक् फेरि फेरि रिङ् चोगिन्चा, टरो हाङ्साङि बोल्लेउ आचोक्ना हिसिक्मालेङ् लाहाब् लिसि॥ हाट्ले आनिम्टे ओचाफेन्ना टोॽवाचिलाम्मा काएल्-काबु लिमाना रिङ् हिट्नुङ् माङ्हाङ्ङि बिस्वास चोक्माना रिङ् फेरि फेरि चोग्निम्चा॥ 2 हिट्डेडोक् खाले-खाले बाप्टिस्मा बारे सिकाँ लिमाना रिङ्, याप्मिचि उठुङ्ङि मुक् युङ्माना बारेङि हिट्नुङ् उसियागा उहिङ्ग्वाट् उलियुङ् ओकोब्गा रिङ्ङि हिट्नुङ् आखेरिङिना न्याए बारेङि फेरि फेरि रिङ् चोक्निम्चा॥ 3 हाट्ले माङ्हाङ्ङा निङ्ग्वा चोगुए भोने नागा पाइलेगा रिङ्चि नुङ्ना चा आगाडि आनि खाप्मा हिडिटि॥ 4-6 जुन् याप्मिङा पाइले डोक् सात्याताङाना व्हाङ् निसेसुए, हिट्नुङ् टोनालोग्ङिना बारदान हिट्नुङ् सेङ्सेङ्ना हाङ्सा चा टोगेसुए, हिट्नुङ् आड्डिक् नुना माङ्हाङ्ङाना उरिङ् हिट्नुङ् टायुगेट्ना जुगङाना साक्ति बारे ठाहा काटोक्चि बिस्वासलाम्मा ओनोक्टा ओखाडे भोने हिट्नागा फेरि काएल्-काबु लिमा हिट्नुङ् नोक्मा आप्मा साम्भाब् लिनिना, पोङ्भोने हिट्नागाँ ओचोगुना टोॽवाङा माङ्हाङ् छा आरको खेप् खाप्चेङि उछुडुटु हिट्नुङ् सोब्बे याप्मिचि टोकानाङि उन्ङाना ओचाफेम्मा ओचोगुटु॥ 7 वेहेट्ङा स्वाँरा वेक्टुटु, हिट्नुङ् टोॽवालासि काचोक्लाउङ्सा चाहाब् लिना टेप्मा चासोङ् केङुटु, हिट्नुङ् हिट्ना स्वाँरा माङ्हाङ्ङा आसिक् पिडुङ् जोम् केङ्मा मेट्टुटु॥ 8 टरो हिट्ना स्वाँराङा टिउँबा लोक् सिउँडिचि एडोक् केङुए भोने हिट्ना काम लाहाब् लिनिना, हिट्नुङ् माङ्हाङ्ङा हिट्ना स्वाँरा साराप पिडुटु हिट्नुङ् हिट्ना स्वाँरा मिङि उडुडिसुटु॥ 9 आमायालु आम्भु-आन्झाचि हिट्नुङ् आनो-आन्झाचि, आन्याँ खानि बारेङि नाड्डेगा रिङ् माट्टुम्मा चा हाट्ले छेम्बा डोक् खानि टाङ्बालोक् आलाम्टिएट्टिगा रिङ् आन्याँ ठाहा टोगेसुम्मे॥ हिट्ना रिङ्ङा डोक् माङ्हाङ्ङा खानि माहिङे नुङ् आनिमेट्युक्॥ 10 माङ्हाङ् न्याए काचोक्बा ए॥ माङ्हाङ्ङा खानिङा आचोगुम्ना ओचेट्नुना टोॽवा हिट्नुङ् ओयाप्मिचि घुवार आफाडुम्चिम्मुङ् उन् माया पारकाट् आचोगुम्ना रिङ् उन्ङा मुन्डुन्ना॥ खानिङा हाट्ले चा हिट्नागा हिड्डेना सेवा डोक् आचोगेट्टुम्॥ 11 हिट्नुङ् खानि सोब्बेङा आसा आयुङ्सुम्ना रिङ् छेम्बा डोक् टोगुम्टुम्मा नुङ् खानिङा पाइले आचोगुम् गाड्डे डोक् आहिङिलोक् सोम्मा खानि निङ्ग्वालाम्मा डोक् चोगायाक्टानुम् नुङ् आन्याँ निङ्ग्वा युङ्ग्वा॥ 12 हिट्नुङ् खानि आल्छे याप्मिचि लिनेनिन्, टरो माङ्हाङ्ङि बिस्वास काचोक्चि हिट्नुङ् माङ्हाङ् चामारसिङा चोगुना रिङ् ओटोगुन्लोक् धैइरे ओचोगुङ् ओहाङ्सुगा गाड्डे खानि चा लिसानि नुङ् आन्याँ निङ्ग्वा चोगुम्टुम्मा॥ माङ्हाङ्ङाना चामारसिङाङा आसा टाडुटु 13 माङ्हाङ्ङा आब्राहामलोक् चामारसिङा चोगुनाँ उन् नुङ्ना आरु ओठेगा साक्चा ओवानेट्निगाउङ् आप्पे उनिङ्ङि नाड्डे पिक्सा चामारसिङा चोगुए, 14 “छेम्बा डोक् आङा खान् आसिक् पिनाँ, हिट्नुङ् काछालेट्चि जोम् पोनाबिनाँ॥” 15 हिट्नाड्डेउङ् आब्राहामङा धैइरे चोगाउङ् हाङ्सुए, हिट्नुङ् माङ्हाङ्ङा चोगुना चामारसिङा टोगुए॥ 16 कोइ याप्मिङा टोग्नेट्निगा रिङ् टोङ्मा कोलुनाँ हिट्नाङा उन्ङाना नुङ्ना ठेनाङाना उनिङ् लाडुङ् चामारसिङा चोटु॥ 17 हिट्नाड्डेउङ् माङ्हाङ्ङा चोगुना चामारसिङा काइले चा फेराँ लिनिना नुङ् उन्ङाना चामारसिङा काटोक्बाचि पारचिन्दा चोक्मा उन्ङा चा किरे चोए॥ 18 हाट्ले माङ्हाङ्ङा आनि चामारसिङा आपिडे हिट्नुङ् बाचा चा चोगुए, नागाचि इप्पोक् रिङ् फेराँ लिनिना, पोङ्भोने माङ्हाङ् माङ्जो चेक्निना॥ हिट्नाड्डेउङ् आनि उन् सोरि सुराछे टोक्माउङ्सा खाडिगाँ आनि टोकानाङि आयुङ्साबिडाना आसा टोग्माना ठेना आँट् टोगुम्टुम्॥ 19 ना आसाङा आनि चोला बोल्लेउ हिट्नुङ् बिस्वासिलो चोगुटु॥ आनि आसाम्बाक् येसु ए, उन् डोक् टोनालोग्ङिना सेङ्सेङ्ना ठोङ्ङि पारदालाम्मा भिट्रा लिगाउङ् माङ्हाङ् ओटोकानाङि खाडे॥ 20 हिट्नि येसु आनि लाउङ्सा पाइले डोक् खाप्माहिडेसे॥ माल्किसेदेक पुजारि गाड्डे डोक् उन् सोरोक् आनिना सानिङ्डाङ्बा लिसेसे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.