हिब्रु 5 - आठपहरिया1 माङ्हाङ्ङा खोना चा सानिङ्डाङ्बा याप्मिचि माड्डेलाम्मा डोक् सेगुचिचि, हिट्नुङ् उन्ङा हिट्नागा याप्मिचिगा सेवा चोक्मा नियुक्ता चोगुचिचि॥ हिट्नुङ् याप्मिचिङा उन्चि पाप छेमा ओटोगुवाक् नुङ् हिट्नाङा भेटि हिट्नुङ् भोक् ठाङ्सुबिडुचिचि॥ 2 सानिङ्डाङ्बाङा पाक्चा उनिसुन्गा याप्मिचि हिट्नुङ् ओचाफेन्ना टोॽवा चोगुएट्टुम्मा नुङ् ठाहा ओटोगुन्गा लाउङ्सा नाम्रा लियुङ् दाया चोक्मा हिडुचिचि, पोङ्भोने उन् आप्पे चा याप्मि ए, उन्ङा चा गाल्ति चोक्मा हिडुटु॥ 3 नाड्डेउङ् आरु याप्मिचिगा पापङाना लोङ्सा एडोक् माखाक्, टरो आप्पे उन्ङाना पाप लोङ्सा चा भोक् उन्ङा ठाङ्मा कोन्युक्॥ 4 खोनाङा चा आप्पे सानिङ्डाङ्बा लियुङ् मान् चोक्मा हिडुन्ना॥ माङ्हाङ्ङा हारुन छेम्डुङ् सानिङ्डाङ्बा सेगु गाड्डे डोक् उन्ङा आरु सानिङ्डाङ्बा लिमा छेम्डुटु हिट्नुङ् सेगुटु॥ 5 नाड्डेउङ् खिरिस्टङा चा सानिङ्डाङ्बा लिमा आप्पेलाउङ्सा मान् कोलोवाट्टुन्॥ टरो माङ्हाङ् आप्पेङा उन् सेगुए हिट्नुङ् लोडुए, “खान् आइछा ए, आङा काप्पा लिसैसाङे॥” 6 हिट्नुङ् आरको डेन्ङि माङ्हाङ्ङा माट्टुटु, “खान् माल्किसेदेक गाड्डे डोक् सोरोक् आलियुयाक्ना पुजारि ए॥” 7 येसु ना नाराङि येम्ङि वासानाँ उन् सिइनालाम्मा बाचाँ चोक्मा काहिबा माङ्हाङ्ङि आड्डिक् राट्टाउङ् हाप्सा मिॽवा ठेन्डुङ् बिन्टि ठाङ्सुए॥ पोङ्भोने उन्ङा उनिङ्ग्वालाम्मा डोक् माङ्हाङ् माङ्ध्यान् चोगुए, हिट्नुङ् माङ्हाङ्ङा उन्ङाना बिन्टि खेम्सुए॥ 8 उन् माङ्हाङ् छा लिसाउङ् चा उन्ङा आङ्डुना याङ्छामालाम्मा उन्ङा माङ्हाङ्ङाना आग्याँ पालान् चोक्मा सिकाँ लिसे॥ 9 हिट्नुङ् येसुङा सोब्बे खाले याङ्छामा आङ्डुङ् पुरो सुद्दो लिसाउङ्, उन्ङाना आग्याँ पालान् ओचोगुगा सोब्बे लाउङ्सा उन् लाट्निना मुक्टिङाना उपुन् लिसे॥ 10 हिट्नुङ् माङ्हाङ्ङा डोक् उन् माल्किसेदेक गाड्डे डोक् सानिङ्डाङ्बा चोगुए॥ बिस्वास्ङि पोमाना बारे 11 ना बारेङि माप्माना रिङ् जोम् युङ्ग्वा॥ टरो ना रिङ् माप्मा टुगेसे, पोङ्भोने खानि निङ्ग्वा डोक् डोम्-डोम् लिसेसे॥ 12 छेम्बा डोक्, ना बेला सोम्मा टे खानि आरु काहिसिक्बा लिमा हिमाना, टरो आझै चा खानि आरु कोइङा माङ्हाङ्ङाना खाबोर बारेङि पाइले ठाहा टोक्माना रिङ् डोक् हिसिक्मा कोलेसे॥ खानिम्टे चामा चामाना ओसाट्टोङि नुनु ठुङुना ओओ गाड्डेना एडोक् आलिसेसेए॥ 13 नुनु एडोक् ठुङुना याप्मि आझै ओओ डोक् लियुक्, हिट्नुङ् हिट्नाङा ओचेट्नुना लोक् ओचाफेन्ना रिङ् बुजा चोक्मा हिडुन्ना॥ 14 टरो खाक्ना चामाउम्टे हुरकाङा उलिसागा याप्मिचि लोङ्सा ए॥ हिट्नागाँउम्टे ओचेट्नुना लोक् ओचाफेन्ना रिङ् साम्मा उहिडुटु, पोङ्भोने हिट्नागाँ हिट्डे चोक्मा सोरोक् ओचोगुयाक्टुङ् आप्पेलाउङ्सा तालिम उपिडुएसुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.