हिब्रु 4 - आठपहरिया1 हिट्नाड्डेउङ् आनि आझै चा माङ्हाङ्ङाना आराम चोक्माना डेन्ङि लिग्मा हिडिटि नुङ् उन्ङाना बाचाङा माट्टुटु॥ नाड्डेउङ् ओछेक्छेक् चोगि, हिट्नुङ् हिट्ना आराम चोक्माना डेन्ङि लिग्मा ओटोगुन्गा खानि माड्डे साक्चा लिनेनिन्॥ 2 युङ्माना डेन् बारेङि नुना खाबोर आनि खेम्सुम् गाड्डे डोक् आनि टुबाठेबाचिङा चा ओखेम्सुए॥ टरो हिट्नागाँ ओखेम्सुना रिङ् हिट्नागा लाउङ्सा खेडोक् लिसे, पोङ्भोने हिट्नागाँ हिट्ना रिङ् बिस्वास ओचोगुवाट्टुन् हिट्नुङ् हिट्नागा आरुङा बिस्वास ओचोगुना रिङ्ङि ओटोङे॥ 3 हाट्ले आनि बिस्वास काचोक्बाचि एडोक् हिट्ना युङ्माना डेन्ङि लिग्मा टोगुम्टुम्॥ माङ्हाङ्ङा हिट्नागा बिस्वास ओचोग्वाट्टुन्गा लाउङ्सा नाड्डे लोडुचे, “नाड्डेउङ् आयाक्लेडाउङ् चामारसिङा चाङुङ् माट्टुङे, ‘हिट्नागा खोना बेला चा आङाना युङ्माना ठोङ्ङि लिग्मा ओटोगुन्ना’॥” माङ्हाङ्ङा नारा सिरिस्टि चोगुना बेला डोक् उन्ङाना युङ्माना डेन् चोक्मा हिडु चा उन्ङा हिट्डे माट्टुए॥ 4 धारमाछाप्लाङि ठिक् ठोङ्ङि सि लेम्बाङाना बारेङि नाड्डे छेप्टेसे, “माङ्हाङ्ङा सोब्बे टोॽवा चोक्मा हिडुङ् सि लेम्बा आराम चोगे॥” 5 फेरि चा आरको ठोङ्ङि नाड्डे चा छेप्टेसे, “आङाना युङ्माना ठोङ्ङि हिट्नागा खोना बेला चा लिग्मा ओटोगुन्ना॥” 6 पाइले युङ्माना डेन् बारेङि नुना खाबोर ओखेम्सुगा याप्मिचिङा लिग्मा ओटोग्वाट्टुन्, पोङ्भोने हिट्नागाँ माङ्हाङ्ङाना रिङ् ओखेम्स्वाट्टुन्॥ टरो आझै माङ्हाङ्ङाना युङ्माना डेन्ङि आरु याप्मिचिङा लिग्मा ओटोगुटु॥ 7 हिट्नाड्डेउङ् माङ्हाङ्ङा उन्ङाना युङ्माना ठोङ्ङि लिग्मा लाउङ्सा आरको बेला नुङ् माट्टुए, हिट्ना बेलाम्बाक् हाट्ले ए॥ याप्मा बारखा एङ्स्वा माङ्हाङ्ङा दाउद हाङ्लाउङ्सा पाइले माप्बालाक् रिङ् फेरि लोमा मेट्टुए, “हाट्ले खानिङा माङ्हाङ्ङा ओसोर आखेम्सुम्मे भोने, खानि निङ्ग्वा रेक्नेनुम्” 8 पोङ्भोने याहोसुङा इस्राएलि याप्मिचि युङ्माना ठोङ्ङि खाट्टुचिनाँ बे माङ्हाङ्ङा आरको युङ्माना लेम्बा आझै टायुक् नुङ् रिङ् डोक् माट्टुवाट्टुन् बे॥ 9 हिट्डेउङ् माङ्हाङ्ङा सि लेम्बा आराम चोगा गाड्डे डोक् आराम चोक्माना बेला उन्ङि बिस्वास काचोक्चि लाउङ्सा आझै टामा युङ्ग्वा॥ 10 माङ्हाङ्ङा ओटोॽवा चोक्मा हिडुङ् आराम चोगा गाड्डे डोक् माङ्हाङ्ङाना आराम चोक्माना डेन्ङि उलिग्गाङा चा उन्चि टोॽवालाम्मा आराम ओचोगुटु॥ 11 कोइङा माङ्हाङ्ङा लोडुना रिङ् खेम्सुन्ना भोने, हिट्ना माङ्हाङ्ङाना आराम चोक्मा ठोङ्ङि उलिग्नेट्निगा इस्राइलि याप्मिचि गाड्डे डोक् लियुक्, हिट्नाड्डेउङ् आनि हिट्ना युङ्माना डेन्ङि लिग्मा आड्डिक् निङ्ग्वा चोगुम्॥ 12 पोङ्भोने माङ्हाङ् उरिङ् उहिङ्ग्वाट् हिट्नुङ् साक्तिसालि ए, हिट्नुङ् ना इप्पोक्लेङ् ओधार लिसाना चेप्सा नुङ्ना चा आड्डिक् यान्ना ए॥ चेप्साङा याप्मिङाना उमिकिलिक्चि हिट्नुङ् उसारुॽवाङाना उछि फाडु गाड्डे डोक्, ना रिङ्ङा भिट्रा ठेट्निना हिट्ना याप्मिङाना ओसोक्मा हिट्नुङ् हाङ्साङाना ओभागा फाडुटु, हिट्नुङ् याप्मिङाना उनिङ्ग्वाङिना रिङ् लोक् पाक् चोक्मा मिट्टुटुना हिट्ना चा जाँच चोगुटु॥ 13 माङ्हाङ्ङा सिरिस्टि चोगुगा ख्वाप्पा थोक् उन्ङा पारचिन्दा निसुटु॥ ओटोकानाङि सोब्बे रिङ् पारचिन्दा युङ्ग्वा हिट्नुङ् टेप्निगेट्निना॥ हिट्नुङ् आनि चोगुम्ना सोब्बे टोॽवाङाना हिसाब उन् डोक् पिमा कोन्युक्॥ येसु आनिना सानिङ्डाङ्बा 14 हाट्ले आनि चोगुम्ना बिस्वासङि आझै डोरो लिसिउङ् युङि, पोङ्भोने टोनालोग्ङि खाडाजाना माङ्हाङ् छा येसु डोक् आनिना माङ्ठेना सानिङ्डाङ्बा ए॥ 15 आनिना सानिङ्डाङ्बाङा आनिना काम्जोरि ठाहा टोगुटु, पोङ्भोने आनि गाड्डे डोक् उन् याप्मा रिङ्ङि वारिक्ङि ठाए, टरो उन्ङा पाप चोग्वाट्टुन्॥ 16 हिड्डेउङ् आनि आँटि लिसिउङ् मायादायालोक् सासान् काचोक् माङ्हाङ् युङ्ना ठोङ्ङि खाडि॥ हिट्नि आनि आभोरङि ठाइना बेला मायादाया हिट्नुङ् किरपा टोगुम्टुम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.