हिब्रु 13 - आठपहरियाआखेरिङिना आरति 1 खानि बिस्वासि भुम्भु-झान्झाचि हिट्नुङ् नाना-झान्झाचि आलिसिनाँ ठिबाङ्ङा आरको माया चोग्गा चोक् चोगायाक्टानि॥ 2 खानि पाङ्ङि ओटागा याप्मिचि स्वागाट् चोक्मा मुन्नेनुम्, पोङ्भोने नाड्डे ओचोगुङ् डोक् कोइ-कोइङा ठाहा डोक् मिटोक्ङे माङ्हाङ् रिङ् काउग्बाचि चा स्वागाट् ओचोगुचे॥ 3 खानि आप्पे चा खाम्बाङ्ङि आठाइउङ् याङ्छामा आङ्डुम् गाड्डे खाम्बाङ्ङि ओठायागा याप्मिचि घुवार फाडानुम्चिम्, हिट्नुङ् खानि आप्पेङा याङ्छामा आङ्डुम् गाड्डे याङ्छामा ओटोगुगा लाउङ्सा घुवार फाडानुम्चिम्॥ 4 सोब्बेङा भ्याउम्बाक् मान् चोक्मा कोन्युक्, हिट्नुङ् ओयेम्बेछा लोक् ओमेच्छाङा उन्चि उन्चिङि बिस्वासिलो लिमा कोन्युक्, पोङ्भोने वालाफेडुबाचि हिट्नुङ् इम्मेप्माजामा टोॽवा काचोक्चि माङ्हाङ्ङा साजाए पिडुचिचि॥ 5 माक्फेन्सुबेन् कामाँ चोक्मा एडोक् खानि टोम्जिरिॽवा लिनेनिन्, खानिलोक् लिसागा थोक्ङि सोन्तोक् लिसानि, पोङ्भोने माङ्हाङ् नाड्डे पिग्युक्, “आङा खानि खोना बेला चा पोक्नेनिन्गा, हिट्नुङ् आङा खानि खोना बेला चा नानेनिन्गा॥” 6 हिट्नाडेउङ् आन्याँ मिकिट्ङे नाड्डे माट्मा हिडुम्टुम्मा, “टाङ्बाङा डोक् आङा घुवार याङ्फायुक्, हिट्नुङ् आङा खोना बेला चा किट्निङ्ना॥ याप्मिचिङा आङा पाक्चा चोक्मा उहिनिङ्गा॥” 7 माङ्हाङ् उरिङ् काहिसिक्बा ओठेडोङ्चि खानिङा यान्दा चोगानुम्चिम्॥ हिट्नागा उहिङ्ग्वाट् उलिसाना बेला हिट्नागाँ ओचोगुगा ओचेट्नुगा टोॽवा बारेङि मिट्टानुम्, हिट्नुङ् हिट्नागाँ ओचोगुना बिस्वास गाड्डे डोक् खानिङा चा चोक्मा कोन्युक्॥ 8 येसु खिरिस्ट आसेन्, हाट्ले हिट्नुङ् सोरोक् एकसामान ए, उन् खोना बेला चा फेराँ लिनिना॥ 9 खाले-खाले ओछोङ्ग्वाट् हिसिक्माङा छेम्बाना रिङ्लाम्मा गालात लाम्बोलेङ् माखाट्टिन्चा॥ पोङ्भोने चामा-ठुङ्मागा रिङ्ङा आनि निङ्ग्वा बोल्लेउ चोगुन्ना, टरो माङ्हाङ्ङाना मायादायाङा एडोक् आनि निङ्ग्वा बोल्लेउ चोगुटु॥ चामा-ठुङ्मागा थोक्ङाना नियाम पालान् ओचोगुगा लाउङ्सा फाइदा लिनिगेट्निना॥ 10 आनिना ठिक् बेदि युङ्ग्वा॥ हिट्ना सेङ्सेङ्ना पालङि माङ्ध्यान् ओचोग्गा पुजारिचिङाम्बाक् हिट्नि ओठाङ्सुगा थोक् चामाना आधिकार वाइना॥ 11 इस्राएलि सानिङ्डाङ्बाङा माङ्सेङ्सेङ्ना डेन्ङि जिवाट्चि ओहेलिक् खाट्टुङ् हिट्ना हेलिक्म्बाक् पाप लाउङ्सा ठाङ्सुटु॥ टरो जिवाट्चिगा ओयेम्बाक् याप्मि उयुङ्गा खालाङ्गालाम्मा भारा ओखाट्टुङ् मिङि उटुनुटु॥ 12 हिट्नाडेउङ् येसुङा चा आप्पे ओहेलिक्ङा याप्मिचि पापलाम्मा चोखो चोक्मा यरुसलेम खालाङ्गा भारा ओयेम् भोक् पिडुए॥ 13 नाड्डेउङ् आनि चा यरुसलेम खालाङ्गा भारा उन् सोरि खाडि, हिट्नुङ् उन्ङा आङ्डुना ओचाफेम्मा आनि चा आङ्डुम्॥ 14 पोङ्भोने ना नाराङि सोरोक् लियुयाक्ना युङ्माना आनि लोङ्सा खालाङ्गा वाइना, टरो आनिम्टे हान्डेङ् टाना खालाङ्गा पुयुएट्टुम्॥ 15 हिड्डेउङ् येसुङाना उनिङ्लाम्मा आनि यासिङा सोरोक् माङ्हाङ् उनिङ् चोन्डुम्, हिट्नाम्बाक् उन्लाउङ्सा ठाङ्सुम्ना आनिना भोक् ए॥ ना निङ् चोम्माम्बाक् आनि यासिङा उन् डोक् टाङ्बा नुङ् लाड्मा ए॥ 16 हाट्ले ठिबाङ्ङा आरको ओचेट्नु चोक्मा हिट्नुङ् खानिलोक् लिसागा थोक् हाम्मा मुन्नेनुम्, पोङ्भोने नाड्डे पारिक्ना भोक् ठाङ्बालाक् थोक्ङि माङ्हाङ्ङाना उनिङ्ग्वा टायुक्॥ 17 खानि ओठेडोङ्चिगा रिङ् खेम्सानुम् हिट्नुङ् उन्चिङा मालोडिगा टोॽवा चोगानुम्॥ उन्चि टोॽवाम्बाक् खानि यान्दा चोक्मा, हिट्नुङ् हिट्नागाँ ओचोगुना टोॽवाङाना लेखाजोखा हिट्नागाँ माङ्हाङ् पिमा कोन्युक्॥ हिट्नुङ् हिट्नागाँगा रिङ् खेम्सानुम् हिड्डेउङ् हिट्नागाँ उन्चि चाप् टासा टोॽवा ओचोगुटु, उन्चि निङ्ग्वा टुक्सा माखाक्॥ हिट्नागा खानिङा याङ्छामा आपिडुम्चिम्मे भोने खानिलाउङ्सा पाक्चा ओचेट्नु लिनिना॥ 18 आन्याँ लाउङ्सा बिन्टि चोगानुम्॥ आन्याँ निङ्ग्वा सेङ्सेङ्ना नुङ् आन्याँलाउङ्सा ठाहा युङ्ग्वा, हिट्नुङ् पाक् नुना हिट्ना रिङ् एडोक् चोक्मा आन्याँ निङ्ग्वा चोगुम्टुम्मा॥ 19 हाट्ले आङा एला डोक् खानि सोरि फेरि आप्मा उहिङा नुङ् बिन्टि याङ्चोगाबिडानि नुङ् खानि आङा आनुरोध चोक्नाँनि॥ आन्तेङिना बिन्टि 20-21 हाट्ले सान्ति आपिना माङ्हाङ्ङा खानि चाहाब् आलिसिगा सोरोक् ओचेट्नुगा थोक् खानि मापिडिटि नुङ् आङा बिन्टि चोगुङ्टुङ्, हिट्नुङ् उन्ङा निङ्ग्वा चोगुना रिङ् खानिङा चोक्मा आहिडुम्टुम्॥ ठुँबाचिगा ठेना गोठाले आनि डाङ्बा येसुलाउङ्सा माङ्हाङ्ङा सियानालाम्मा उहिङ्ग्वाट् फोगुए॥ येसुङाना ओहेलिक्लाम्मा माङ्हाङ्ङा उन् हिट्नुङ् ओयाप्मिचि माझाङि सोरोक् लियुयाक्ना माङ्हुप् उटुम् चोगुए॥ माङ्हाङ् पाक् रिङ्ङा खुसि चोगुटुना हिट्ना रिङ् आनिङि येसु खिरिस्टलाम्मा उन्ङा चोगुटु नुङ् आङा बिन्टि ठाङ्सुङ्टुङ्, हिट्नुङ् खिरिस्टङाना माहिमा जुग-जुग उलियाक्॥ आमेन्॥ 22 आम्भु-आन्झाचि हिट्नुङ् आनो-आन्झाचि, आङा छोट्कारिङि छेप्टुङ्ना ना चिट्ठिङि लिसागा आरतिङागा रिङ् नुलोक् खेम्सानुम् नुङ् आङा आनुरोध चोक्नाँनि॥ 23 हिट्नुङ् आनि झान्झा तिमोथि खाम्बाङ्लाम्मा होम्माहिडे नुङ् ना खाबोर खानि लोनाँनि॥ नेहि उन् एला डोक् टाए भोने खानि सोरि उन् चा आप्टुङुङ् आङा आप्ङा॥ 24 हिट्नि उलिसागा सोब्बे ओठेडोङ्चि हिट्नुङ् बिस्वासिचिलाउङ्सा आङाना बाबा लोडानुम्चिम्॥ इटालिया देसङिगा बिस्वासिचिङा चा खानि बाबा माहाक्टेसिए॥ 25 हिट्नुङ् माङ्हाङ्ङाना मायादाया खानि सोब्बेलोक् उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.