हिब्रु 12 - आठपहरियायेसुङाना सिको चोक्मा कोन्युक् 1 हिट्नाडेउङ् नाट्टेप् औधि बिस्वासङाना साँचि कापिबा याप्मिचिगा ठेना खिमेयाङ्मेङा आकुप्टा गाड्डे, हाट्ले आनि लाम्बोङि ओटागा बाधाचि हिट्नुङ् आबान्गा पाप लेप्टुम्, हिट्नुङ् माङ्हाङ्ङा आनि सोरि आयुङ्साबिडाना दौड नुलोक् पिन्डि॥ 2 हाट्ले आनि बिस्वास उटुम् काचोक् हिट्नुङ् पुरो काचोक् येसु पुयुम्॥ उन्ङा उन् सोरि युङ्बालाक् आनान्दा लाउङ्सा खाप्चेङिना याङ्छामा आङ्डुए हिट्नुङ् हिट्नालाम्मा टाना मोम्मासिमाना रिङ् पाक्चा ठानाँ चोग्वाट्टुन्, हिट्नुङ् हाट्ले माङ्हाङ्ङाना सिङासान् उछुप्टाङ्लेङ् आदारङाना ठोङ्ङि युङेसे॥ 3 पापि याप्मिचिगा जोम् ओभेन्गा टोॽवाचि आङ्डुना येसु मिट्टानुम्, हिट्डेउङ् खानि निङ्ग्वा भेन्निना हिट्नुङ् खानि निङ्ग्वा आसेट्निम्ना॥ 4 पोङ्भोने खानि पापङाना बिरुद्दाङि टोॽवा आचोगेट्टुम्, टरो हिट्ना टोॽवाङा खानि सिमा डोक् कोन्लोक् आलिसिन्गेट्टिन्गा॥ 5 माङ्हाङ्ङा आप्पे ओछालेट्चि गाड्डे डोक् उन्ङा खानि मालोडिगा उत्साहङाना रिङ् मुन्नेनुम्॥ उन्ङा माट्टुए, “हाउ आइछा, टाङ्बाङा खान् साधाँ माचोक्ना रिङ्ङि निङ्ग्वा पिडु, हिट्नुङ् खेमा मालाप्नाँ कानिङ्ग्वा उटुक्नि चा, 6 पोङ्भोने टाङ्बाङा माया चोगुचिगा लाउङ्सा खेमा लाप्टुचिचि चा, हिट्नुङ् उइछाचि नुङ् काप्टुचिगा ख्वाप्पा लाउङ्सा उन्ङा साजाए चा पिडुचिचि॥” 7 साधाँ लिमा लाउङ्सा डोक् खानिङा याङ्छामा आङ्डानुम्॥ माङ्हाङ्ङा खानि आप्पे ओछालेट्चि गाड्डे डोक् चाट्ला मामेट्टिटि॥ पोङ्भोने खोनाम्बाक् पाबाङा उइछा साधाँ चोगुन्ना टे? 8 माङ्हाङ्ङा आप्पे ओछालेट्चि गाड्डे खानि साधाँ माचोगिन्गेट्टिन्गा भोने खानि उन्ङाना ओछालेट्चि माखाक्, टरो आरकोङाना डोक् ओछालेट्चि ए॥ 9 नाराङिगा आनि पाबाचिङा आनि साधाँ आचोक्नाँउम् उन्चि मान् चोगुम्चिम्चिम् भोने, हाट्ले मिट्टानुम्, लाट्निना चोला टोक्माउङ्सा टोनालोग्ङिना आनि पाबाङा साधाँ आचोक्नाँ इम्टेप्मा औधि मान् चोक्मा कोन्युक्ना? 10 पोङ्भोने नाराङिगा आनि पाबाचिङा उन्चि लाउङ्सा जुन् रिङ् माहामा लोयुक् हिट्ना रिङ्ङा इम्टेप्मा बेला सोम्मा साधाँ आचोक्युक्, टरो माङ्हाङ्ङा उन् गाड्डे डोक् सेङ्सेङ्ना उलिसियाक् नुङ् आनिना ओचेट्नुना लाउङ्सा उन्ङा आनि साधाँ आचोक्युक्॥ 11 साधाँ लिमाना रिङ् उटुम्ङि टुक्ना लियुक् हिट्नुङ् निङ्ग्वा टाना लिनिना, टरो साधाँ लिमाना रिङ् पालान् काचोक् याप्मि, हान्डेङ् धारमोति लियुङ् युङ्युक् हिट्नुङ् हाङ्हाङ्ङाना चोला टोगुटु॥ 12 हिट्नाडेउङ् फेटुलो लिसागा मुक् बोल्लेउ चोगानुमुङ् फोगानुम्, हिट्नुङ् ओयोग्गा खानि टुम्बुड्चि बोल्लेउ चोगानुमुङ् येप्टानुम्॥ 13 खानि याम्बो-टोम्बो मिचोक्ङे सोजो लाम्बो लाम्टियानि, हिट्डेउङ् फेटुलोचि हिटनुङ् ओखेट्लेङ्बाचि ओकोनिगा, टरो बोल्लेउ उलियुक्॥ माङ्हाङ्ङा आलोडाना रिङ् चोक्मा कोन्युक् 14 खानि सोब्बे याप्मिचिलोक् हाङ्हाङ् युङ्माना कोसिस चोगानि हिट्नुङ् चोखो लिसानि, पोङ्भोने सेङ्सेङ् मिलिङे साक्ङा चा टाङ्बा निमा उहिडुन्ना॥ 15 माङ्हाङ्ङाना ओमायादायालाम्मा साक्चा लाट्माङ् उलिनि चा नुङ् ठिबाङ्ङा आरको यान्दा चोग्गा चोक् चोगानि॥ निङ्ग्वा टुक्ना रिङ्ङा चुङ्माना रिङ् उलिनि चा, हिट्नुङ् हिट्ना बिखालु गाड्डेना निङ्ग्वा टुक्ना रिङ्ङा आरु आसुद्दो ओचोगुन्चा॥ 16 खोना चा वालाफेडुबा टोॽवा काचोक्बा आथाबा एसाब गाड्डेना आधारमोति याप्मि लिनेनिन्, हिट्ना एसाबङा एक छाक् चामाङि टुम्सामि छा लिसानाँ टोगुना उन्ङाना हाक डोक् छोङ्सुए॥ 17 खानिलाउङ्सा ठाहा युङ्ग्वा, एङ्स्वा उन्ङा उप्पालाम्मा आसिक् टोग्मा इम्टेप्मा इट्टुए, टरो टोगुवाट्टुन्॥ हिट्नाङा उन्ङा छोङ्सुना आधिकार हाप्सा टाक्मा कोलुचा फेरि टोक्मा हिडुवाट्टुन्॥ 18 खानि पुमा हिडुम्ना हिट्नुङ् खोट्मा हिडुम्ना सिनै झोन्झोबा सोरि आखाडिन्गेट्टिन्गा, हिट्नुङ् खानि मिङाना ओलाप्को ठेट्ना, माक्ठोम् खिमेमाङा टेप्टुना, माक्ठोम् डुम्बारिक् डुम् लिसाना हिट्नुङ् हिॽवा हुन्डारि लिसायाक्टाना ठोङ्चि आखाडिन्गेट्टिन्गा॥ 19 हिट्नुङ् टुक्लोक् ओटेनुना धुटुरिबा हिट्नुङ् ठिक् ठेना सोर मुक्टाना सोरि आखाडिन्गेट्टिन्गा॥ हिट्ना ठेना सोर मुक्टाना ओखेम्सुङ् याप्मिचिङा हिट्नाडे पाराना सोर फेरि हिट्नागालोक् ओचेक्नेयाक् नुङ् बिन्टि ओठाङ्सुए॥ 20 पोङ्भोने जिवाट्ङा चा हिट्ना झोन्झोबा खोट्टुए भोने लुङ्गेॽवाङा लेप्टानुमुङ् सेडानुम् नुङ् माङ्हाङ्ङा पिडुचिगा आग्याँ हिट्नागाँ आङ्मा उहिडुवाट्टुन्॥ 21 हिट्नुङ् हिट्ना आड्डिक् किट्माडुङ् रिङ् निसुनाँ मोसाङा “आङा किट्टाङाउङ् पिलिम् पिलिम् योक्ङेट्ना” पिक्सा माट्टुए॥ 22 टरो खानिम्टे सियोन झोन्झोबा हिट्ना यरुसलेम खालाङ्गाङि आटाइसे, हिट्नाउम् टोनालोग्ङि युङ्ग्वा॥ खानिम्टे उहिङ्ग्वाट् माङ्हाङ्ङाना खालाङ्गाङि आटाइसे, हिट्ना आड्डिक् जोम् माङ्हाङ् रिङ् काउग्बाचि उयुङ्ना डेन्, हिट्नि हिट्नागा उछुमाउङ् हारका लिसा उन्ङाना उनिङ् ओचोन्डुएट्टु॥ 23 खानि टोनालोग्ङि निङ् छेप्बालाक् टुम्सामि छाचिगा छुम्माङि आटाइसे॥ खानि सोब्बे याप्मिचि न्याए काचोक्बा माङ्हाङ्ङि, हिट्नुङ् चोखो चोक्बालाक् धारमोति याप्मिचिगा छुम्माङि आटाइसे॥ 24 खानिम्टे माङ्हाङ् लोक् याप्मिचि माझाङि ओछोङ्ग्वाट् माङ्हुप् कारेक्बा येसु सोरि ओटाइसे, हिट्नुङ् खानि हाबिलङाना ओहेलिक् नुङ्ना चा आझै ओचेट्नुना रिङ् चामारसिङा चोगुना येसुङाना ओहेलिक् सोरि आटाइसे॥ 25 ओछेक्छेक् चोगानि, खानिलोक् चेक्येट्ना उरिङ् खेम्मा इन्कार चोक्नेनुम्॥ पोङ्भोने नाराङि खाबोर कालो मोसाङा माङ्हाङ् उरिङ् इस्राइलि याप्मिचि लोडुचिनाँ खेम्मा इन्कार काचोक्चि साजाए पिडुचे भोने, हाट्ले आनिलोक् टोनालोग्लाम्मा चेक्ना माङ्हाङ् उरिङ् खेम्नेट्निम् भोने आनि चा साजाए टोगुम्टुम्॥ 26 माङ्हाङ् सिनाइ झोन्झोबाङि चेक्टानाँ ओसोरङा नारा डोक् वान्डे, टरो हाट्ले उन्ङा नाड्डे पिक्सा चामारसिङा चोगुएसुए, “आझै एक् खेप् आङा नारा एडोक् माखाक्, टरो टोनालोग् धारि चा वान्डुङ्टुङ्॥” 27 हाट्ले “आझै एक् खेप्” नुङ् माट्बालाक् रिङ्ङा सिरिस्टि उलिसागा थोक्चि ओवान्युक् हिट्नुङ् जाखाम् उलियुक् नुङ् ठाहा लियुक्, टरो वाम्मा हिनिम्गा थोक्चि एडोक् उलियुक्॥ 28 हिट्नाडेउङ् वाम्मा हिनिम्ना मुलुक् टोगुम्ना माङ्हाङ् पोए-पोए ठाङ्सुम्, हिट्नुङ् माङ्हाङ् आड्डिक् मान् हिट्नुङ् किट्सा उन्ङा निङ्ग्वा चोगु गाड्डे डोक् उन्ङाना माङ्ध्यान् चोगुम्॥ 29 पोङ्भोने आनि माङ्हाङ्म्टे जाखाम् आचोक्ना मि गाड्डेना ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.