हिब्रु 11 - आठपहरियाबिस्वासङाना बारे 1 हाट्ले बिस्वासम्बाक् आसा चोगुम्ना रिङ्ङि ढुक्का लिमा हिट्नुङ् निनिम्गेट्निम्ना रिङ्ङि छेम्बा भोरोसा चोग्मा ए॥ 2 आच्छोङिगा याप्मिचिङा माङ्हाङ्ङि बिस्वास ओचोगुङ् डोक् हिट्नागा माङ्हाङ्ङा उनिङ्ग्वा टासुचे॥ 3 माङ्हाङ् उरिङ्ङा डोक् ख्वाप्पा थोक् सिरिस्टि उलिसे नुङ् बिस्वासलाम्मा आनि ठाहा टोगुम्टुम्॥ हाट्ले आनि निसुम्गा खोना चा थोक्चि पाइले डोक् लिसागा थोक्लाम्मा उलिनेट्नि नुङ् आनि बिस्वास चोगुम्टुम्॥ 4 हाबिलङा माङ्हाङ्ङि बिस्वास चोगुनाँ उन्ङा उम्भु कायिनङाना नुङ्ना ओचेट्नुना भोक् ठाङ्सुए॥ बिस्वासलाम्मा डोक् माङ्हाङ् ओटोकानाङि हाबिल धारमोति लिसे हिट्नुङ् उन्ङा ठाङ्सुना भोक् माङ्हाङ्ङा उनिङ्ग्वा टासुए॥ हिट्नुङ् हाबिल सियाडाचा उन्ङा चोगुना बिस्वासलाम्मा हाट्ले चा माङ्हाङ्ङि भोरोसा चोक्माना बारेङि सिकाँ आचोक्युक्॥ 5 बिस्वास चोगुङ् डोक् हानोक सिनेट्नि, माङ्हाङ्ङा उहिङ्ग्वाट् डोक् फोगुङ् टोनालोग् खाट्टुए, हिट्नुङ् खोनाँ चा उन् टुब्मा उहिडुवाट्टुन्॥ हानोक टोनालोग्ङि फोक्मा खाप्मा पाइले उन्ङा माङ्हाङ् खुसि चोगुना रिङ् धारमाछाप्लाङि छेप्टेसे॥ 6 बिस्वास माले खोनाङा चा माङ्हाङ् खुसि चोक्मा उहिडुन्ना, पोङ्भोने कोइ याप्मि माङ्हाङ् सोरि खाट्मा कोन्युक् भोने हिट्नाङा उन् माङ्हाङ् ए नुङ् बिस्वास चोक्मा कोन्युक्, हिट्नुङ् जुन्ङा माङ्हाङ् ओकोलुटु हिट्नागा उन्ङा इनाम पिडुचिचि नुङ् चा हिट्नागाँ बिस्वास चोक्मा कोन्युक्॥ 7 बिस्वास चोगुङ् डोक् नोआङा ओजाहानचि चुवाङाना ओभोललाम्मा बाचाँ चोक्मा लाउङ्सा ठेना चुवाखोङ्डाङ् चोगुए॥ हिट्नुङ् नोआङा पाइले काइले चा लिनिगेट्निना रिङ् हाट्ले हान्डेङ् लियुक् नुङ् ओछेक्छेक् काचोक्बा माङ्हाङ्ङा लोडु गाड्डे उन् वासे॥ उन्ङा चोगुना बिस्वासङा डोक् हिट्ना बेला नाराङिगा ख्वाप्पा याप्मिचिङा गाल्ति ओचोगुए नुङ् पारमान् पिडुचे, हिट्नुङ् हिट्ना बिस्वासलाम्मा नोआ धारमोति याप्मि लिसे॥ 8 बिस्वास चोगुङ् डोक् आब्राहामङा माङ्हाङ्ङा लोडुना रिङ् खेम्सुए, हिट्नुङ् माङ्हाङ्ङा छेम्डुङ् उन्ङा चामारसिङा चोगुना देस पिनाँ पिक्सा लोडुना देसङि आब्राहाम खाडे॥ आब्राहामङा खोनि खाट्माना पाक्चा ठाहा मिटोक्ङे डोक् उन् युङ्ना देस पोक्टुढोङ् खाडे॥ 9 हिट्नुङ् बिस्वासङि डोक् माङ्हाङ्ङा चामारसिङा चोगुना देसङि आब्राहाम खाडे, हिट्नुङ् पारदेसि याप्मि गाड्डे डोक् तिरपालङाना पाङ् चोगुङ् युङे॥ हिट्नाडेडोक् माङ्हाङ्ङा इसाहाक् लोक् उइछा याकुब चा हिट्ना हाकङाना चामारसिङा चोगुचे हिट्नुङ् हिट्नागाचिङा चा पालङाना पाङ् चोगाचुङ् युङाचे॥ 10 पोङ्भोने आब्राहामङाम्टे माङ्हाङ् आप्पेङा योजाना चोगुङ् चोगुना सोरोक् लियुयाक्ना खालाङ्गा गोलो हाङ्सुएट्टुना॥ 11 आब्राहाम ओटालिमाङ् सारा आड्डिक् मासिङ् हिट्नुङ् छालुट्मा लिसा चा बिस्वासलाम्मा डोक् छा पोङ्मा काहिबा लिसे॥ पोङ्भोने साराङा चामारसिङा काचोक्बा माङ्हाङ् बिस्वासिलो नुङ् ठाहा टोगुएसुना॥ 12 हिट्नाडेउङ् पासिङ् लासाउङ् सियालाबेसाना ठिबाङ् याप्मिलाम्मा टाङ्साङ्ङिगा चोक्चिङ्गेट्चि टेप्मा डोक् याप्मा हिट्नुङ् सामुन्दराङिना खाम्सेरेक् गाड्डे ङेमा हिनिम्लोक् उपुङ्लाचि उलिसे॥ 13 नागा सोब्बे याप्मिचिङा माङ्हाङ्ङि बिस्वास ओचोगुङ् डोक् उसिए, टरो माङ्हाङ्ङा पिमा लाउङ्सा चोगुना चामारसिङा हिट्नागाँ ओटोग्वाट्टुन्॥ टरो चा हिट्नागाँ माङ्हाङ्ङा चोगुएसुना चामारसिङा लाप्माङ्लाम्मा उनिसुङ् हारका उलिसे॥ हिट्नुङ् हिट्नागाँ आप्पेलाउङ्सा ना नाराङि लाम्बोङि ओलाम्टियागोन्गा हिट्नुङ् भारागा याप्मिचि नुङ् बुजा ओचोगुए॥ 14 हिट्नुङ् नाड्डे रिङ् ओचेक्गा याप्मिचिङाम्टे आप्पे उन्चि देस ओकोलुएट्टु नुङ् रिङ् पारचिन्दा ठाहा लियुक्॥ 15 हिट्नुङ् हिट्नागाँ ओनाडुढोना पाइलेना देस उमिट्टुयाक्टुना बे, हिट्नागा फेरि हिट्नि नोक्मा खाप्मा उहिडे बे॥ 16 टरो हिट्नागा याप्मिचिङाम्टे आझै ओचेट्नुना देस खाप्माना निङ्ग्वा ओचोगुए, हिट्नाम्बाक् टोनालोग् ए॥ हिट्नाड्डेउङ् हिट्नागा याप्मिचिगा माङ्हाङ् नुङ् लोमा चा माङ्हाङ् मोन्निसिनिना, पोङ्भोने उन्ङा हिट्नागा लोङ्सा ठिक् खालाङ्गा टेयार चोगुबिडुएसुचे॥ 17-18 माङ्हाङ्ङा आब्राहामङाना उनिङ्ग्वा कोलुना बेला बिस्वासलाम्मा डोक् आब्राहामङा उइछा इसाहाक भोक् ठाङ्मा टेयार चोगुए॥ माङ्हाङ्ङा आब्राहामलाउङ्सा “काइछा इसाहाकलाम्मा एडोक् काछालेट्चि उलियुक्” नुङ् चामारसिङा चोगु चा उन्ङा ठिबाङ् एना उइछा भोक् ठाङ्माउङ्सा उनिङ्ग्वा चोगुए॥ 19 माङ्हाङ्ङा उसियागा फेरि उहिङ्ग्वाट् चोक्मा हिडुचिचि नुङ् आब्राहामङा बिस्वास चोगुए॥ हिट्नुङ् छेम्बा डोक् आब्राहामङा उइछा इसाहाक सिमालाम्मा उहिङ्ग्वाट् चोगि गाड्डे डोक् फेरि टोगुए॥ 20 बिस्वासलाम्मा डोक् इसाहाकङा उइछाचि याकुब लोक् एसाब हान्डेङ् लिना रिङ् लाउङ्सा आसिक् पिडुचे॥ 21 बिस्वासलाम्मा डोक् याकुबङा उसिमा बेला चा योसेफङाना इप्पाङ् उइछाचि आसिक् पिडुचे, हिट्नुङ् उन् लाहुरिक्ङाना साराङि किन्डाउङ् माङ्हाङ् माङ्ध्यान् चोगुए॥ 22 हिट्नुङ् बिस्वासङाना भोरङि डोक् योसेफङा उसिमा बेला इस्राएलि याप्मिचि मिस्रा देस ओपोक्टुढोङ् भारा ओखाट्युक् नुङ् लोडुचे, हिट्नुङ् उन्ङाना ओसारुॽवा चा उन्चिलोक् डोक् खाट्टानुम् नुङ् लोडुचे॥ 23 बिस्वासङाना भोरङि डोक् मोसा उप्पा-उमाङा पोङ्सानाँ सुम्बोक् माइना सोम्मा ठोबाचुङ् युङ्साचुए, पोङ्भोने हिट्नागाचिङा मोसा आड्डिक् ओचेट्नुना निसाचुए, हिट्नुङ् हिट्नागाचिङा हाङ्बाङा माट्टुना रिङ् चा खोक्मा किट्चुव्च्चुन्॥ 24 मोसा ठाङ्बेन् लिसाउङ् बिस्वासङाना भोरङि डोक् हाङ्बा फारोङाना मेन्झेमाङाना उइछाङाना छा लोमा टेन्नेट्नि॥ 25 उन्ङा पापलाम्मा टाना छोप्मोङ् धारि सुखा टोग्मा नुङ्ना माङ्हाङ् ओयाप्मिचिलोक् एक्के याङ्छामा आङ्मा डोक् उनिङ्ग्वा टाए॥ 26 हिट्नुङ् मिस्रा देसङिना माक्फेन्सुबेन् नुङ्ना खिरिस्ट लाउङ्सा याङ्छामा आङ्मा डोक् उन्ङा ठेना रिङ् नुङ् ठाहा टोगुए, पोङ्भोने उन्ङाम्टे हान्डेङ् टोक्माना इनामङि उनिङ्ग्वा चोगुएसुना॥ 27 बिस्वासङाना भोरङि डोक् मोसाङा मिस्रा देस पोक्टुङ् खाडे हिट्नुङ् हाङ्बाङाना ओयाक् काडा चा यान्दा डोक् चोग्वाट्टुन्॥ हिट्नुङ् ठेट्निना माङ्हाङ् निसु गाड्डे चोगाउङ् उन् एङ्स्वा नोक्नेट्नि॥ 28 बिस्वासङाना भोरङि डोक् मोसाङा इस्राएलि याप्मिचि छुट्कारा चाडा मानाँ चोक्मा आग्याँ पिडुचे, हिट्नुङ् हिट्नागाँ ढुवारिक्ङि हेलिक् उहिसुए॥ हिट्नुङ् याङ्कासेट् दुतङा इस्राइलिचिगा टुम्सामि छाचि ओसेडुन्चिन् नुङ् मोसाङा हिड्डे चोगुए॥ 29 बिस्वासङाना भोरङि डोक् चोबाना डेन्ङि ओलाम्टियाउङ् इस्राइलि याप्मिचिङा लाल सामुन्दरा ओखोक्टुए॥ हिट्नाडेडोक् मिस्रा देसङिगा याप्मिचिङा लाल सामुन्दरा खोक्मा ओकोलुनाँ उलुमाउङ् उसिए॥ 30 बिस्वासङाना भोरङि डोक् इस्राइलि याप्मिचि सि लेम्बा सोम्मा यारिहो खालाङ्गाङिना पारखाल याम्बा-नाआम्बा उरिसानाँ हिट्निगा पारखाल ओहोडे॥ 31 राहाब वालाफेडुमा मेन्झेमा लिसाउङ् चा बिस्वासङाना भोरङि डोक् माङ्हाङ् बिस्वास ओचोगुन्गा याप्मिचिलोक् जाखाम् लिनेट्नि॥ माङ्हाङ्ङा हिट्ना बाचाँ चोगुए, पोङ्भोने हिट्नाङा हिट्नि खालाङ्गाङि मिच्छो चोक्सिङा ओखाडागा इस्राएलि याप्मिचि स्वागाट् चोगुचे॥ 32 हाट्ले आरु याप्मा रिङ् आङा पाक् माट्टुङ्ना टे? हिट्नुङ् गिदोन, बाराक, सिमसोन, यिप्ता, दाउद, सामुएल लोक् माङ्काटाचिगा बिसाएङि माट्मा भ्याबा डोक् लिनिना॥ 33 हिट्नागाँ बिस्वासलाम्मा डोक् जोम् रिङ् ओचोगुए॥ हिट्नागाँ आरु देसचि ओमेट्टुचे, हिट्नुङ् धारमिक्ताङाना टोॽवा ओचोगुए॥ माङ्हाङ्ङा चामारसिङा चोगुएसुना थोक्चि चा ओटोगुए, हिट्नुङ् हिट्नागाँ ओचोगुना बिस्वासङा डोक् हिट्नागा किबाचिङा चा पाक्चा ओचोग्वाट्टुन्चिन्॥ 34 हिट्नागा मिङाना ओसाङ्ङा पाक्चा उलिनेट्नि, कोइ याप्मिचिङा चेप्साङा सेप्मा ओकोलुचि चा हिट्नागा हिट्नालाम्मा भागाँ उलिसे॥ कोइ निम्छारो उलिसा चा हिट्नागाँ साक्ति ओटोगुए॥ हिट्नागा खेमाबुङ्माङि आँटि उलिसाउङ् उन्चि साट्टुरचि ओमेट्टुचे॥ 35 बिस्वासङाना भोरङि डोक् मेच्छाचिङा उसियाडागा उन्चि याप्मिचि फेरि उहिङ्ग्वाट् ओटोगुचे॥ हिट्नुङ् आरु इम्टेप्माम्बाक् याङ्छामा ओआङ्डुए, हिट्नुङ् खानिङा छुट्कारा आटोगुम्टुम् ओलोडुचि चा हिट्ना रिङ् ओखेम्स्वाट्टुन्, टरो माङ्हाङ्ङा हिट्नागा आड्डिक् ओचेट्नुना चोला पिडुचिचि नुङ् बिस्वास ओचोगुए॥ 36 याप्मिचिङा आरुम्बाक् ओलोडुजोचे हिट्नुङ् कोरराङा ओलेम्सुचे, हिट्नुङ् हिट्नागा ओरेक्टुचिउङ् खाम्बाङ्ङि ओठेन्डुचे॥ 37 हिट्नुङ् कोइम्बाक् लिङ्गेॽवाङा ओलेप्टुचिउङ् ओसेडुचे, कोइम्बाक् आराङा ओहेगुचिउङ् ओसेडुचे, हिट्नुङ् कोइम्बाक् चेप्साङा ओचेप्टु ओसेडुचे॥ हिट्नागा पाक्चा वानिगा उलिसे हिट्नुङ् ठुँबा लोक् मेरबाचि ओहोॽवा उरिगुङ् उन्चि येम् ओटेप्टुए, हिट्नुङ् याङ्छामा ओटोगुङ् योम्बो-टोम्बो ओलाम्टियागोन्डे॥ 38 नागा याप्मिचि लाउङ्सा ना ओचाफेन्ना नाराङि युङ्मा खान्डुव्ट्टुन्चिन्॥ हिट्नुङ् हिट्नागा पाक्चा वानेट्निना डेन्, याक्ठेरेक्लेङ् ओवासे, हिट्नुङ् गुफा हिट्नुङ् लुम्भुवालेङ् ओखाडाउङ् उयुङे॥ 39 हिट्नागाँ ओचोगुना बिस्वासङा डोक् माङ्हाङ्ङाना हिट्नागालोक् ओचाप् टाए॥ टरो चा माङ्हाङ्ङा चामारसिङा चोगुना थोक् हिट्नागा खोनाङा चा ओटोग्वाट्टुन्॥ 40 पोङ्भोने माङ्हाङ्ङा आनि लाउङ्सा आझा ओचेट्नु योजाना चोगुएसुना॥ हिट्नागा चा आनिलोक् डोक् सिद्दा उलियाक् नुङ् माङ्हाङ्ङाना उनिङ्ग्वा डाना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.