हिब्रु 10 - आठपहरिया1 मोसाङाना धारमाबिधि आप्पेम्बाक् छेम्बाना रिङ् माखाक्, टरो हान्डेङ् टाना छेम्बाना रिङ्ङाना ओझालाक् एडोक् ए॥ हिट्नाड्डेउङ् सालिन्ने धारमाबिधि गाड्डे भोक् ठाङ्बालाक् नाड्डेना भोक्ङा माङ्हाङ् सोरि माङ्ध्यान् चोक्मा ओखाट्गा याप्मिचि सिद्दा चोक्मा हिडुन्चिन्गा॥ 2 हिट्नागाँ ओचोगुना पापलाउङ्सा भोक् ओठाङ्सुना रिङ्लाम्मा माङ्हाङ्ङा हिट्नागाँगा पाप टुगुबिडुचिनाँ बे, हिट्नागाँ उन्चि निङ्ग्वाङि पाप चोगुमे नुङ् उमिट्नेट्नि बे॥ हिट्नुङ् छेम्बा डोक् हिट्नागाँ भोक् ठाङ्मा ओनाडुए बे॥ 3-4 टरो बोका हिट्नुङ् साँढेङाना भोक् ठाङ्बालाक् हेलिक्ङा पाप टुग्मा हिडुन्ना॥ हिट्नागा भोक् ठाङ्बालाक् रिङ्ङा याप्मिचिङा सालिन्ने ओचोगुना पाप एडोक् उमिट्टुटु॥ 5 हिट्नाडेउङ् जब नाराङि खिरिस्ट उङ्से, हिट्नुङ् उन्ङा माङ्हाङ् लोडुए, “खान्ङा जिवाट्चिगा भोक् लोक् भेटि आकोलुव्ट्टुन्, टरो खान्ङा आयेम् भोक् ठाङ्मालाउङ्सा आङा याङ्आपिडेसाङे॥ 6 उबालाक् जिवाट्ङाना भोक् हिट्नुङ् पाप छेमाङाना भोक्ङा खान् खुसि आलिनेट्नि॥ 7 हिड्डेउङ् खिरिस्टङा उन् लोडुए, ‘हाउ माङ्हाङ्, धारमाछाप्लाङि आङाना बारेङि छेप्टि गाड्डे डोक्, कानिङ्ग्वा पुरो चोक्ङा आङा टायाङ्ना ए॥’” 8 खिरिस्टङा पाइले नाड्डे माट्टुए, “खान्ङा जिवाट्चिगा भोक्, भेटि, उबालाक् जिवाट्ङाना भोक् हिट्नुङ् पाप छेमाङाना भोक् निङ्ग्वा आटासुन्ना॥ नाड्डेगा रिङ्ङा काचाप् टानेट्नि॥” उन्ङा हिड्डे माट्टु चा याप्मिचिङा हिट्नागा सोब्बे भोक् ठाङ्मा कोन्युक् नुङ् धारमाबिधिङा माट्टुटु॥ 9 हिट्नुङ् उन्ङा फेरि नाड्डे माट्टुए, “हाउ माङ्हाङ्, कानिङ्ग्वाङिना रिङ् युमाउङ्सा आङा उङ्सेसाङे॥” खिरिस्टङा ओछोङ्ग्वाट् माङ्हुप् उटुम् चोक्मा पाइलेना माङ्हुप् टुगुडिसुए॥ 10 हिट्डेउङ् आनि सेङ्सेङ् लिसेसे, पोङ्भोने येसु खिरिस्टङा ओयेम् भोक् पिडुङ् माङ्हाङ् उनिङ्ग्वा पुरो चोगुए॥ ना रिङ्म्बाक् सोरोक् लाउङ्सा एक् खेप् एडोक् लिसे, फेरि फेरि चाहाब् लिनिना॥ 11 सोरोक् लेम्बा इस्राएलङिगा पुजारिचि माङ्हाङ् सोरि ओयेब्युक् हिट्नुङ् सोरोक् ठिक्ए पारिक्ना भोक् ओठाङ्सुटु॥ टरो नाड्डे पारिक्ना भोक्ङा खोना बेला चा पाप टुग्मा हिडुन्ना॥ 12 टरो खिरिस्टङाउम्टे पाप छेमा लोङ्सा सोरोक् लोङ्सा ठिक्ए भोक् ठाङ्सुए, हिट्नुङ् उन् माङ्हाङ्ङाना उछुप्टाङ् उमुक्लेङ् युङे॥ 13 हिट्नुङ् हिट्ना बेलालाम्मा खिरिस्टङाना ओसाट्टुरचि उलाङ्घेप्पा उछिक्ङि माङ्हाङ्ङा मिचोक्ए सोम्मा उन्ङा हाङ्सुयाक्टुटु॥ 14 पोङ्भोने ना ठिक्ए भोक्ङा पापलाम्मा सेङ्सेङ् उलिसागा माङ्हाङ्ङा सोरोक् लाउङ्सा सिद्दा चोगेसुचे॥ 15 हिट्नुङ् सेङ्सेङ्ना हाङ्साङा चा ना रिङ् छेम्बाना ए नुङ् आनि आलोयुक्॥ माङ्हाङ् रिङ्ङि नाड्डे छेप्टेसे, 16 “हाट्ले टायुगेट्ना बेला आङा आयाप्मिचिलोक् ओछोङ्ग्वाट् माङ्हुप् रेक्टुङ्टुङ्॥ हिट्नाम्बाक् ना ए, आङा हिट्नागा आङाना धारमाबिधि बुजा चोक्मा काहिबा चोगुङ्चिङ्चिङ्, हिट्नुङ् हिट्नागा आङाना धारमाबिधि पालान् चोक्माना निङ्ग्वा पिडुङ्चिङ्चिङ्॥” 17 उन्ङा फेरि चा माट्टुटु, “आङा फेरि हिट्नागाँ ओचोगुना पाप लोक् ओचाफेन्ना टोॽवा खोना बेला चा मिट्निङ्ना॥” 18 हाट्ले माङ्हाङ्ङा नागा ओचाफेन्ना टोॽवा छेमा चोगेसुए, हिट्डेउङ् हाट्लेलाम्मा आरु पाक्चा भोक् ठाङ्मायाप्मा कोन्निना॥ माङ्हाङ्ङि नेट्टाङ् खाप्मा 19 हिड्डेउङ्, हाउ भुम्भु-झान्झाचि लोक् नाना-झान्झाचि, येसुङा ओचोला आनि लाउङ्सा भोक् चोगुनाँ टोनालोग्ङिना आड्डिक् सेङ्सेङ्ना डेन्ङि मिकेट्ङे आनि लिग्मा हिडिटि॥ 20 येसु खिरिस्ट आनि लाउङ्सा सियाउङ् पारदालाम्मा ओछोङ्ग्वाट् चोलाङाना लाम्भो आओङ्सा बिडे॥ हिट्ना पारदाम्बाक् ओयेम् ए॥ 21 हिट्नुङ् उन् आनिना माङ्ठेना सानिङ्डाङ्बा ए, उन्ङा माङ्हाङ् ओयाप्मिचि सासान् चोगुचिचि॥ 22 उन्ङा आनिना ओचाफेन्ना निङ्ग्वा ओहेलिक्ङा सेङ्सेङ् आचोगाबिडेसे हिट्नुङ् आनि येम् सेङ्सेङ्ना चुवाङा आवासिबिडेसे॥ हिट्नाड्डेउङ् छेम्बाना बिस्वास लोक् भोरोसाङि माङ्हाङ् सोरि आनि खाडि॥ 23 आनि युङ्सुम्ना आसा बोल्लेउ लाबुमुङ् युङ्सुम्, पोङ्भोने आनि चामारसिङा काचोक् माङ्हाङ् बिस्वासिलो ए॥ 24 हाट्ले ठिबाङ्ङा आरको माया चोक्माना रिङ् हिट्नुङ् नुना टोॽवा चोक्मा लाउङ्सा खोड्डेउङ् आँट् पिमा हिडुम्चिम्चिम्ना हिट्ना रिङ्ङि निङ्ग्वा चोगुम्॥ 25 आम्टेप्मा बिस्वासिचिगा साङ्गाटिङि खाप्माना चालान् लिनिना, टरो आनिम्बाक् एक्के ठोङ्ङि छुम्मा नानिम्चा॥ टरो टाङ्बा उङ्ना लेम्बा एला टायुगेट् नुङ् ठाहा आटोगुम्नाँ ठिबाङ्ङा आरको आझा आँट् पिडानुम्चिम्॥ 26 आम्भु-आन्झाचि हिट्नुङ् नाना-झान्झाचि, आनि छेम्बाना रिङ् बिसाएङि ठाहा टोगुम्चा जानि जानि पाप चोगुम्टुम् भोने, हिट्ना चोगुम्ना पाप टुक्माना आरको भोक् वाइना॥ 27 टरो नाड्डेगा रिङ् काचोक्बाचिङा किट्सा माङ्हाङ्ङाना साजाए हाङ्मायाक्मा कोन्युक्, पोङ्भोने माङ्हाङ्ङा ओसाट्टुरचि हाट्युयाक्ना मिङाना उभुङ्रोङि ठेन्डुचिउङ् साजाए पिडुचिचि॥ 28 मोसाङा छेप्टुना धारमाबिधि जुन्ङा लाड्मा इन्कार चोगुटु, हिट्नि इप्पाङ् आथाबा सुम्भाङ् याप्मिचिङा उपिडुना साँचि लिसे भोने, हिट्ना माफि मिपिए डोक् याप्मिचिङा ओसेडुटु॥ 29 हाट्ले खानि आप्पेङा निङ्ग्वा रिसानुम् टे, जुन्ङा माङ्हाङ् छा चिम्मा फुट्टुटु, जुन्ङा आनि सेङ्सेङ् आचोक्ना माङ्हुप्ङाना हेलिक्ङाना मान् चोगुन्ना, हिट्नुङ् मायादाया आपिना सेङ्सेङ्ना हाङ्सा इन्कार चोगुटु हिट्नागाँ झान् आड्डिक् टुक्ना साजाए ओटोगुटु॥ 30 पोङ्भोने माङ्हाङ्ङा माट्टुना रिङ् आनि ठाहा टोगुम्टुम्, “बादला लाड्माना टोॽवा आङाना॥ आङा डोक् बादला लाडुङ्टुङ्॥” उन्ङा नाड्डे चा माट्टुए, “माङ्हाङ् डाङ्बाङा डोक् ओयाप्मिचि न्याए चोगुचिचि॥” 31 उहिङ्ग्वाट् माङ्हाङ् उमुक्लाम्मा साजाए टोक्माम्बाक् आड्डिक् किट्माडुङ् रिङ् ए॥ 32 खानिङा पाइले खिरिस्टङाना व्हाङ् आटोगुम्ना बेलाङाना रिङ् मिट्टानुम्॥ खानिङा आड्डिक् टुक्लोक् याङ्छामा आआङ्डुम्चा बिस्वासङि दोरो आलिसिए॥ 33 इम्टेप्मा खेप् याप्मिचिङा सोब्बे सोरि खानि याङ्छामा माचाट्टिए हिट्नुङ् हेला माचोगिए॥ हिट्नुङ् इम्टेप्मा खेप् याङ्छामा ओटोगुगा याप्मिचिलोक् आयुङिए हिट्नुङ् घुवार आफाडुम्चिम्मे॥ 34 छेम्बा डोक्, खानिङा खाम्बाङ्ङि ओठायागा याप्मिचि घुवार आफाडुम्चिम्मे॥ याप्मिचिङा खानिलोक् लिसागा माक्फेन्सुबेन् मानाप्टिनाँ चा खानि निङ्ग्वा टुक्मा ओसाट्टो हारका आलिसिए॥ पोङ्भोने याप्मिचिङा खानिलोक् लिसागा थोक् ओखाट्टु चा खानिलोक् हिट्ना माक्फेन्सुबेन् नुङ्ना चा ओचेट्नुना लाट्निना माक्फेन्सुबेन् युङ्ग्वा नुङ् खानिङा ठाहा आटोगुम्मे॥ 35 हिट्नाड्डेउङ् खानिङा माङ्हाङ्ङि आचोगुम्ना बिस्वास नानेनुम्॥ पोङ्भोने हिट्ना रिङ्ङा खानिङा माङ्ठेना इनाम् आटोगुम्टुम्॥ 36 हाट्ले खानि आङ्मा काहिबा लिमा कोन्युक्, हिट्नुङ् खानिङा माङ्हाङ् उनिङ्ग्वा पुरो चोक्मा आहिडुम्टुम्॥ हिट्नुङ् माङ्हाङ्ङा चोगुना चामारसिङा खानिङा ख्वाप्पा आटोगुम्टुम्॥ 37 धारमाछाप्लाङि नाड्डे छेप्टेसे– “हाट्ले उन् एला डोक् उङ्युगेट्, हिट्नुङ् उन् ढिलो मिचोक्ङे उङ्युक्॥ 38 आङाना धारमोति याप्मिम्बाक् माङ्हाङ्ङि बिस्वास चोगुङ् डोक् हिङ्युक्, टरो हिट्नागा माड्डे कोइ आङालाम्मा नोक्यु खाट्युक् भोने आङा हिट्नालोक् हारका लिनिङ्ना॥” 39 टरो आनिउम् हिट्नागा माङ्हाङ्लाम्मा ओनोक्युङ् जाखाम् उलिगा याप्मिचि गाड्डेगा माखाक्॥ टरो आनिम्टे बिस्वास काचोक् हिट्नुङ् माङ्हाङ्ङा बाचाँ आचोगागा याप्मिचि ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.