हिब्रु 1 - आठपहरिया1 आच्छो बेला माङ्हाङ् माङ्काटाचिलाम्मा याप्मा खेप् हिट्नुङ् पारिक् पारिक् पाराङा आनि टुबाठेबाचिलोक् चेक्टे॥ 2 टरो ना आखेरि बेला उन् उइछालाम्मा आनिलोक् चेक्टेसे॥ माङ्हाङ्ङा उइछालाम्मा सोब्बे थोक् सिरिस्टि चोगुए, हिट्नुङ् माङ्हाङ्ङा उन् डोक् ख्वाप्पा थोक्ङाना हाकवाला चोगुए॥ 3 माङ्हाङ्ङाना माहिमा उइछाङि ओम्युक् हिट्नुङ् माङ्हाङ् खोड्डेना नुङ् उन्ङि निसुम्टुम्॥ उन्ङा उन्ङाना साक्तिसालि रिङ्ङा डोक् टोनालोग्ङि हिट्नुङ् नाराङिगा ख्वाप्पा थोक् उठुङ्ङि सासान् चोगुटु॥ हिट्नुङ् उन्ङा याप्मिचिगा पाप माफ चोक्मा हिडुङ् उन् टोनालोक्ङि माङ्ठेना माङ्हाङ्ङाना छुप्टाङ् उमुक्लेङ् युङे॥ खिरिस्ट माङ्हाङ् रिङ् काउग्बाचि नुङ्ना चा माङ्ठेना 4 माङ्हाङ्ङा टोनालोग्ङिगा माङ्हाङ् रिङ् काउग्बाचि नुङ्ना चा उइछा माङ्ठेना चोगुए॥ हिट्डेउङ् माङ्हाङ्ङा उन्ङाना उनिङ् माङ्हाङ् रिङ् काउक्बाचिगा नुङ्ना चा टो-टो लिना निङ् पिडुए॥ 5 माङ्हाङ्ङा खोना चा माङ्हाङ् रिङ् काउग्बा “खान् आइछा ए, हाट्ले आङा काप्पा लिसैसाङे” नुङ् लोडुवाट्टुन्चिन्॥ फेरि माङ्हाङ् रिङ् काउग्बाचि माङ्हाङ्ङा नाड्डे चा लोडुवाट्टुन्चिन्, “आङा हिट्नागाँगा पाबा लिङा, हिट्नुङ् हिट्नागा आइछाचि उलियुक्॥” 6 हिट्नुङ् जब माङ्हाङ्ङा आप्पे पाइले पोङ्साना उइछा ना नाराङि पाङ्सुनाँ उन्ङा नाड्डे माट्टुटु, “आङाना ख्वाप्पा माङ्हाङ् रिङ् काउग्बाचिङा उन्ङाना माङ्ध्यान् ओचोगुवाक्॥” 7 हिट्नुङ् माङ्हाङ् रिङ् काउग्बाचिगा बिसाएङि उन्ङा नाड्डे माट्टुटु, “आङाना माङ्हाङ् रिङ् काउग्बाचि आङा हिॽवा गाड्डे डोक् चोगुङ्चिङ्चिङ्, हिट्नुङ् आङाना सेवा काचोक्चि मिङा ओसाङ् गाड्डे डोक् चोगुङ्चिङ्चिङ्॥” 8 टरो उइछाङाना बारेङिम्बाक् उन्ङा नाड्डे माट्टुटु, “हाउ माङ्हाङ्, खान्ङा सोरोक् हिट्नुङ् सोब्बे बेला सासान् आचोगुटु॥ हिट्नुङ् खान्ङा कायाप्मिचि नुलोक् न्याएलोक् सासान् आचोगुचिचि॥ 9 खान्ङा जे छेम्बाना हिट्ना रिङ् निङ्ग्वा आटाडेसुए हिट्नुङ् जे माङ्जोना हिट्ना रिङ् चिम्मा आफुट्टुएसुए॥ नाड्डेउङ् हाउ माङ्हाङ्, कामाङ्हाङ्ङा खान् मासेगाइसे, हिट्नुङ् आरु कासाइबाचि नुङ्ना याप्मा मान्ङाना आनान्दा मापिडेसे॥” 10 उन्ङा फेरि उइछा लोडुटु, “टाङ्बा, खान्ङा उटुम्ङि नाराङाना ओजाग् आठेन्डुए, हिट्नुङ् खान्ङा आप्पे कामुक्ङा डोक् टाङ्साङ् हिट्नुङ् हिट्निगा सोब्बे थोक्चि आचोगुए॥ 11 हिट्नागाउम्टे जाखाम् उलियुक्, टरो खान्बाक् सोरोक् आलियुक्॥ हिट्नागा यामाना लोट्लिङ् गाड्डे डोक् ओसेङ्युङ् ओखाट्युक्॥ 12 खान्ङा हिट्नागा लोट्लिङ् गाड्डे डोक् आरिगुचिचि, हिट्नुङ् हिट्नागा पुरानो लोट्लिङ् गाड्डे डोक् आलेप्टुचिचि, हिट्नुङ् हिट्नागा थोक्चि ओछोङ्ग्वाट् आचोगुचिचि॥ टरो खान्उम्टे खोना बेला चा फेराँ आलिनिना हिट्नुङ् खान् सोरोक् आहिङ्युक्॥” 13 माङ्हाङ् रिङ् काउग्बाचि खोना चा माङ्हाङ्ङा नाड्डे लोडुवाट्टुन्चिन्, “आङा कासाट्टुरचि कालाङ्घेप्पा उछिक्ङि मिचोक्ए सोम्मा खान् आछुप्टाङ्लेङ् डोक् युङा॥” 14 पोङ्भोने माङ्हाङ् रिङ् काउक्बाचिम् माङ्हाङ्ङाना टोॽवा काचोक् हाङ्साचि एडोक् ए॥ उन्ङा डोक् हिट्नागा मुक्टि ओटोगुगा लाउङ्सा घुवार फामा पाङ्सुचिचि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.