गालाति 2 - आठपहरियापावाल लोक् आरु मुलिचेलाचि 1 ठिक् टेम्बोक् बारखा ओएङ्स्वा आङा बारनाबासलोक् फेरि यरुसलेम खाडाङे, हिट्नुङ् तितास चा एक्केउ आङालोक् खाट्टुङे॥ 2 माङ्हाङ्ङा खाडा नुङ् याङ्लोडानाँ आङा हिट्नि खाडाङे, हिट्नुङ् आङा हिट्नि वासाङ्ना बेला हिट्नि ओठेडोङ्चि नुङ् मिसेन् उनिसुचिगा एडोक् टुबुङ्चिङे, हिट्नुङ् आङा पानिछोङ्बाचिलाउङ्सा पारचार चोगुएट्टुङ्ना नुना खाबोर बारेङि हिट्नागा लोडुङ्चिङे॥ हिट्नुङ् आनि हिसिक्माम्बाक् ठिक् एना नुङ् ठाहा ओटोगुवाक् नुङ् आङा निङ्ग्वा चोगुङ्टुङ्, हिड्डेउङ् आङा चोगुङ्ना टोॽवा खेडोक् लिनिना॥ 3 हिट्नुङ् आङाना टोॽवा खेरोक् लिनेट्नि, पोङ्भोने आङालोक् वासाना तितास पानिछोङ्बा याप्मि लिसा चा खोनाङा चा खाताना चोक्मा कोन्युक् नुङ् ओलोडुवाट्टुन्॥ 4 टरो आम्टेप्मा बिस्वासिचि ए नुङ् उपिक्गाङा उन् खाताना चोक्मामेप्मा ओकोलुए॥ हिट्नागा ठाहा मिटोक्ङे आन्याँङि उलिगाउङ् खिरिस्ट येसुलाम्मा टोगुम्माना छुट्काराङाना बारेङि मिच्छो ओचोगुए, हिट्नुङ् आन्याँलाउङ्सा याहुदिचिगा चालान् चाल्ति पालान् चोक्मामेप्मा याप्मिओकोले॥ 5 टरो नुना खाबोरङाना छेम्बाना रिङ् खानिलोक् उलियाक् नुङ् हिट्नागाँ ओहोट्टुना रिङ् छोप्मोङ् धारि चा आन्याँ खेम्नेएट्निम्मा॥ 6 हिट्नुङ् हिट्नागा यरुसलेमङि ओठेडोङ्चि नुङ् मिसेन् उनिसुचिगाँ आङा पारचार चोगुङ्ना रिङ्ङि पाक्चा ओछोङ्ग्वाट् रिङ् ओमाट्टुवाट्टुन्॥ याप्मिचिङा हिट्नागा इम्टेप्मा ओठेगा उमिट्टुचि चा, आङा पाक्चा ठानाँ चोक्निङ्ना, पोङ्भोने माङ्हाङ्ङा खोना चा टो यो चोगुन्चिन्गा॥ 7 टरो माङ्हाङ्ङा पाटरुस याहुदि याप्मिचिङि नुना खाबोर पारचार चोक्माना जिम्मा पिडु गाड्डे डोक् आङा चा पानिछोङ्बाचि नुना खाबोर पारचार चोक्माना जिम्मा याङ्पिडाना रिङ् हिट्नागा ओठेडोङ्चि याकुब, पाटरुस हिट्नुङ् युहान्नाङा ठाहा ओटोगुए॥ 8 पोङ्भोने माङ्हाङ्ङा याहुदि याप्मिचिङि मुलिचेलाङाना टोॽवा चोक्मा पाटरुस बोल् पिडु गाड्डे डोक्, आङा चा पानिछोङ्बाचिङि हिट्ना टोॽवा चोक्मा माङ्हाङ्ङा बोल् याङ्पिडे॥ 9 हिट्नुङ् माङ्पाङ्ङिगा याप्मिचिङा हिट्नागा ओठेडोङ्चि नुङ् मिसेन् उनिसुचिगा याप्मिचिङा ना टोॽवा माङ्हाङ्ङा आङा याङ्पिडाना रिङ् ठाहा ओटोगुएसुए॥ हिट्नुङ् हिट्नागाँ आङालोक् बारनाबास चा टाङ्बाङाना सेवा चोक्मा लाउङ्सा स्वागाट् याप्मिओचोगे॥ हिट्नागाँ आन्च्याँम्बाक् पानिछोङ्बाचिङि नुना खाबोर पारचार चोक्मा हिट्नुङ् उन्चिम्बाक् याहुदिचिङि नुना खाबोर पारचार चोक्माउङ्सा ओटोङ्सुए॥ 10 हिट्नागाँ पाक्चा ओवानिगालाउङ्सा घुवार फामाचि कोन्युक् पिक्सा आन्याँ याप्मिलोडे॥ नाड्डे चोक्माम्बाक् आङाना चा आनिङ्ग्वा लोसाना डाना॥ पावाल लोक् पाटरुस टोङ्चेट्चिन् 11 टरो जब पाटरुस एन्टिओखिया खालाङ्गाङि होन्डा टाए, आङा उन् सोब्बे बिस्वासिचि सोरि खेमा लाप्टुङे, पोङ्भोने उन्ङा चोगुना चाट्लाम्बाक् नुना लिनेट्निना डाना॥ 12 याकुबङा पाङ्सुचिगा याप्मिचि टामा नुङ्ना पाइले पाटरुसङा पानिछोङ्बा बिस्वासिचिलोक् चोगा डागा॥ टरो जब हिट्नागा याप्मिचि ओटाए, टब उन्ङा पानिछोङ्बा बिस्वासिचिलोक् चामा नाडुए हिट्नुङ् वामा चा नाडुए, पोङ्भोने खानिङा खाताना चोक्मा कोन्युक् नुङ् उपिग्गालोक् पाटरुस किट्टाना डाना॥ 13 हिट्नुङ् बाँकि आरु याहुदि बिस्वासिचिङा चा पाटरुसङा चोगु गाड्डे डोक् ओचोगे॥ हिट्नाडे लिसाउङ् बारनाबासङा चा पानिछोङ्बा बिस्वासिचिलोक् वामा नाडुए॥ 14 टरो जब हिट्नागा छेम्बाना नुना खाबोर गाड्डे लाम्टिमा ओनाडुगा निसुङे, आङा नाड्डे पिक्सा सोब्बे सोरि पाटरुस लोडुङे, “खान् आपोङ्साउङ् डोक् याहुदि आलि चा याहुदिचिगा रितिथिति आनाडुङ् पानिछोङ्बाचि गाड्डे आवाना भोने, पोङ् नागा पानिछोङ्बाचिम्बाक् याहुदिचिगा रितिथिति पालान् चोक्मा आमेट्टुचिचिगा टे?” बिस्वासलाम्मा सोब्बे याहुदिचि लोक् पानिछोङ्बाचि उहिङे 15 आन्याँम्बाक् धारमोति याप्मिचि नुङ् मिट्टिटिङा, पोङ्भोने आन्याँउम्टे पोङ्सिङाउङ् डोक् याहुदिचि टे, हिट्नुङ् मोसाङाना धारमाबिधि पालान् ओचोगुन्गा पानिछोङ्बा याप्मिचि गाड्डे आन्याँ कायाङ्छाबाचि माखाक्॥ 16 टरो खोना चा याप्मि धारमाबिधि पालान् चोगुङ् धारमोति लिनिना नुङ् आन्याँलाउङ्सा ठाहा युङ्ग्वा, टरो खिरिस्ट येसुङि बिस्वास काचोक्बा एरोक् माङ्हाङ्ङा धारमोति चोगुटु॥ नाड्डेउङ् खिरिस्टङि युङ्सुम्ना बिस्वासलाम्मा आनि धारमोति उलिसियाक् नुङ् डोक् खिरिस्ट येसुङि बिस्वास चोगुएसुम्मे, टरो धारमाबिधि पालान् चोगुमुङ् माखाक्, पोङ्भोने धारमाबिधि पालान् चोगुङ् खोना याप्मि चा धारमोति लिनिना॥ 17 टरो आम्टेप्मा याहुदिचिङा आनि पापि लिसिएसिङे नुङ् उमिट्टुगा, पोङ्भोने आनि धारमोति लिमाउङ्सा धारमाबिधि पालान् चोक्मा नाडुमुङ् खिरिस्टङि बिस्वास चोगुम्टुम्॥ हिड्डे भोने धारमाबिधि पालान् चोक्मा नाडुम्नाँ, पाक् खिरिस्टङा पाप चोक्मा आनि आमेट्युक्नि टे? हिट्नाडे लिनिना॥ 18 हाट्ले पाइले डोक् आङा पालान् चोक्मा नाडुङ्ना धारमाबिधि फेरि चोक्मा ठालाँ चोगुङ्टुङ् भोने, आङा आप्पेलाउङ्सा धारमाबिधि पालान् चोक्मा नाडुङुङ् पापि याप्मि नुङ् पारमान् चोगुङ्टुङ्॥ 19 पाइले आङा धारमाबिधि पालान् चोक्मा कोलुङे, टरो ना धारमाबिधिङा आङा फाट्टुर याङ्लाबे॥ हिट्डेउङ् माङ्हाङ् लाउङ्सा हिङ्मा आङा धारमाबिधि पालान् चोक्मा नाडुङे॥ 20 आङा खिरिस्टलोक् खाप्चेङि छुडाइसाङे, हिट्नुङ् हाट्लेलाम्मा आङा आप्पे हिङ्निङ्ना, टरो खिरिस्ट डोक् आङि हिङ्युक्॥ आझै आङा ना येम्ङि हिङ्ङा, टरो आङा माया काचोक् हिट्नुङ् ओचोला कापि माङ्हाङ् छाङि बिस्वास चोगुङुङ् आङा हिङ्ङा॥ 21 आङा माङ्हाङ्ङाना मायादाया खेडोक्ना नुङ् चोक्निङ्ना, पोङ्भोने धारमाबिधि पालान् चोगुमुङ् माङ्हाङ् सोरि धारमोति लिसिटि भोनेउम्टे खिरिस्ट सिमा डोक् कोन्नेयाट्नि बे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.