एफिसि 4 - आठपहरियाखिरिस्टङाना येम्ङि ठिक्ए लिमा 1 हाट्ले आङा खाम्बाङ्ङि वाङेट्ङा, पोङ्भोने आङा टाङ्बाङाना सेवा चोगुङ्टुङ्॥ माङ्हाङ्ङा खानिलाउङ्सा ओयाप्मि लिमा मासेगिए, हिट्ना पारा डोक् खानि चोलाङि युङानि नुङ् खानि आनुरोध चोक्नाँनि॥ 2 सोरोक् डोक् नाम्रा हिट्नुङ् सोजो निङ्ग्वाङि युङानि॥ धैइरे चोगानि हिट्नुङ् माया चोग्गा चोग् चोक्सा ठिबाङ्ङा आरको आङ्डानुम्॥ 3 माङ्हाङ्ङाना हाङ्साङा डोक् खानि ठिक्ए माचोगिटि, हिट्डेउङ् ठिबाङ् आरकोलोक् हाङ्हाङ् युङ्माउङ्सा कोसिस चोगानि॥ 4 आनि सोब्बे येसुङि बिस्वास काचोक्चि ठिक्ए येम् गाड्डेगा ए, हिट्नुङ् सेङ्सेङ्ना हाङ्सा चा ठिक् एना ए॥ हिट्नाडेउङ् खानिङा आसा आचोगुम्ना हिट्ना ठिक् एना नुना आसिक् लाउङ्सा माङ्हाङ्ङा खानि माछेम्डिए॥ 5 टाङ्बा ठिबाङ् एना, बिस्वास चा ठिक् एना, हिट्नुङ् बाप्टिस्मा चा ठिक् एना॥ 6 हिट्नुङ् आनि सोब्बेङाना माङ्हाङ् हिट्नुङ् पाबा ठिक् एना॥ उन्ङा सोब्बेङि आधिकार चोगुटु, सोब्बेलोक् टोॽवा काचोक्बा उन् डोक्, हिट्नुङ् उन् सोब्बेङि वाहेट्॥ 7 खिरिस्टङा आनि ठिबाङ् ठिबाङ्लाउङ्सा आत्मिक् बारदान आपिडाइसे॥ हिट्ना बारदान उन्ङा पिमा निङ्ग्वा चोगुचिगा लाउङ्सा पिडुएसुचे॥ 8 ना रिङ्म्बाक् धारमाछाप्लाङि नाड्डे छेप्टि गाड्डेना– “उन् टोनालोग्ङि फोगा खाडानाँ, उन्ङा जोम् खाम्बाङ्ङि ओठायागा उन्लोक् खाट्टुचे, हिट्नुङ् उन्ङा याप्मिचि बारदान पिडुचे॥” 9 हाट्ले “उन् टो फोगाखाडे” नुङ् माप्बालाक् रिङ्उम्बाक् पाइना? ना रिङ्ङाना उटुप्बाक् उन् पाइले नाराङाना यो उछिक्ङि खाडे नुङ् बुजा लियुक्॥ 10 हिट्नुङ् उन् यो ना नारा उछिक्ङिना ओपाटाङि खाडाउङ्, हाट्ले उन् डोक् ख्वाप्पा टोनालोग् नुङ्ना चा आझै टो ठाङाखाडेसे, हिट्डेउङ् उन्ङा डोक् ख्वाप्पा थोक् उमुक्ठुङ्ङि युङ्सुटु॥ 11 उन्ङा डोक् कोइ मुलिचेलाचि, कोइ माङ्काटाचि, कोइ नुना खाबोर कालोचि, कोइ माङ्पाङ्ङिगा गोठाले हिट्नुङ् कोइम्बाक् काहिसिक्बाचि चोगुचे॥ 12 हिट्नुङ् नागा याप्मिचिङा माङ्हाङ् ओयाप्मिचिलाउङ्सा उन्ङाना सेवा चोक्मा टेयार ओचोगुचियाक् हिट्नुङ् खिरिस्टङाना ओयेम्, माङ्पाङ्ङिगा याप्मिचि बोल्लेउ उलियाक् नुङ् हिट्नागा जिम्मा पिडुचे॥ 13 नाड्डेउङ् आनि सोब्बे बिस्वासङि ठिक्ए मिलेए सोम्मा, माङ्हाङ् छा बारेङि ठाहा मिटोक्ङे सोम्मा, बिस्वासङि मिपोङे सोम्मा, हिट्नुङ् खिरिस्ट गाड्डे डोक् पुरो पारिपाक्का याप्मि मिलिए सोम्मा ना टोॽवा चोक्मायाक्मा कोन्युक्॥ 14 हिट्नुङ् आनि खाटिउगा पिच्छाचि गाड्डे लिसिन्गा॥ हिट्नुङ् हिॽवाङा आनि याम्बा-नायाम्बा आमुट्टि गाड्डे छालाँ काचोक् याप्मिचिगा ओचाप्पाङ् हुसिक्माङा आनि आवान्निना॥ 15 हिट्ना ओसाट्टोङि, जब आन्याँ मायाङि छेम्बाना रिङ् चेक्टिटिङा, आझा आन्याँ सोब्बे रिङ्ङि खिरिस्ट गाड्डे डोक् पोसा खाडिटिङा, खिरिस्टम्बाक् माङ्पाङ्ङिगा याप्मिचिगा ओखेन् हिट्नुङ् माङ्पाङ्ङिगाम्बाक् ओयेम् ए॥ 16 उन्ङा ना जाम्मै आनि येम् ठिक्ए टोङ्लोक् मोज्जासाँ चोगुटु॥ जब सोब्बे आङ्गाचिङा ठिबाङ्ङा आरको माया चोक्सा आप्पे-आप्पे उन्चि टोॽवा ओचोगुटु, टब आरु आङ्गाचि पोमा घुवार ओफाडुचिचि, हिट्डेउङ् जाम्मै येम् नुमानिङ् लियुक् हिट्नुङ् पोसा खाड्युक्॥ खिरिस्टङि ओछोङ्ग्वाट् चोला 17 हाट्ले आङा टाङ्बाङाना आधिकारलाम्मा खानि लोनाँनि, खानि माङ्हाङ् मिसेन् उनिसुन्गेट्टुन्गा याप्मिचि गाड्डे लिनेनिन्, पोङ्भोने हिट्नागाँगा मिप्माना निङ्ग्वा डोक् खेडोक्ना॥ 18 हिट्नागाँ पारचिन्दा बुजा ओचोगुन्गा, हिट्नुङ् हिट्नागा माङ्हाङ्ङा आपिना चोलालाम्मा लाप्माङ् उलिसेसे, पोङ्भोने हिट्नागाँ बुजा चोक्माना ठोना उछुप्टुएसुए हिट्नुङ् उन्चि निङ्ग्वा ठुम्ना ओचोगुएसुए॥ 19 हिट्नागाँ माहामाना हिट्नुङ् गाल्ति बारेङि इम्टेप्मा चा यान्दा ओचोगुन्गा, हिट्नुङ् हिट्नागाँ आप्पेलाउङ्सा छाडा लाम्बोलेङ् उटिसुएसुए॥ हिट्नागाँगा चोला सोब्बे खाले आसुद्दो रिङ् हिट्नुङ् लोभाङा इप्टेसेए॥ 20 टरो खानिङाम्टे खिरिस्टङाना बारेङि सिकाँ आलिसिनाँ नाड्डे चोक्मा कोन्युक् नुङ् सिकाँ आलिसेट्टिन्॥ 21 छेम्बा डोक्, खानिङा उन्ङाना बारेङि आखेम्सुम्मे हिट्नुङ् येसुङि डोक् छेम्बाना खाबोर युङ्ग्वा नुङ् सिकाँ आलिसिए॥ 22 हिट्डेउङ् पाइलेना खानिगा उचाफेम्मा चाट्लाङा खानि जाखाम् माचोगिट्टि हिट्नुङ् ना पाइलेना चोलालोक् नाहिगा ख्वाप्पा ओचाफेन्गा रिङ्चि नामा कोन्युक् नुङ् खानिङा सिकाँ आलिसेसिए॥ 23 हाट्ले खानिगा मिप्माना पारा माङ्हाङ्लाउङ्सा फेराँ चोक्मा पिमा कोन्युक्॥ 24 माङ्हाङ्ङा खानि उन्ङाना आप्पे ओचाट्ला गाड्डेना डोक् ओछोङ्ग्वाट् चाट्ला मापिडिएसे॥ हिट्डेउङ् ना ओछोङ्ग्वाट् चाट्ला गाड्डे डोक् चोगानि॥ छेम्बा डोक्, खानि सोजो हिट्नुङ् पापलाम्मा सेङ्सेङ् लिमा कोन्युक्॥ 25 हिट्डेउङ् आनि सोब्बे ठिक्ए येम्ङाना आङ्गाचि लिसिनाँ, आनि माङ्जो रिङ् चेक्मा लिनिना, टरो आनि ठिबाङ् आरको छेम्बाना रिङ् एडोक् चेक्मा कोन्युक्॥ 26 खानि याक्लेट्युक् भोने, खानि याक्लेट्मा रिङ्ङा पापम्बाक् चोक्नेनुम्॥ नाम् ठामा पाइले डोक् खानि याक्लेट्मा उसियाक्॥ 27 हिट्नुङ् सैतानङा खानि निङ्ग्वाङि पाप चोक्मेप्माना रिङ्ङि ठेम्मा मौका टोगुन्ना॥ 28 याङ्काखुट्ङा हाट्ले नुङ् याङ्खुट्मा ओनाडुवाक्, टरो टोॽवा ओचोगुवाक्॥ मिहिनेत ओचोगुङ् आप्पे उमुक्ङा ओचेट्नुना टोॽवा ओचोगुवाक्, हिट्डेउङ् उन्ङा आभोरङि ओठायागालाउङ्सा पिमा हिडुचिचि॥ 29 खानि यासिलाम्मा ओचाफेम्मा रिङ् होट्नेनुम्, टरो चेक्मा लिना रिङ् चेक्टानि, हिट्नुङ् सोब्बेलोङ्सा नुना लिना रिङ् एडोक् चेक्टानि, हिट्डेउङ् खान्ङा आमाट्टुना रिङ् ओखेम्सुगाँ आसिक् ओटोगुटु॥ 30 माङ्हाङ्ङाना सेङ्सेङ्ना हाङ्सा दुखे चाट्नेनुम्, पोङ्भोने सेङ्सेङ्ना ओहाङ्साङा डोक् खानि ठिक् लेम्बा माङ्हाङ्ङा छुट्कारा माचोगिटि नुङ् मापिडिना चिन्ना ए॥ 31 सोब्बे ओचाफेन्ना रिङ्, याक्लेट्मा, खेमाबुङ्मा चोक्मा, खिजेक्पा चाट्मा हिट्नुङ् सोब्बे खाले ओभेन्गा रिङ् चोक्मा नाडानुम्॥ 32 हिट्नुङ् ठिबाङ्ङा आरको नुलोक् चोग्गा चोक् चोगानि हिट्नुङ् माया चोग्गा चोक् चोगानि॥ माङ्हाङ्ङा खिरिस्टलाम्मा खानि छेमा मापिडि गाड्डे खानिङा चा ठिबाङ्ङा आरको छेमा पिडानुम्चिम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.