एफिसि 2 - आठपहरियाखिरिस्टङि टोगुम्ना चोला 1 पाइले खानिङा माङ्हाङ् बिरुद्दाङि पाप आचोगुम्मुङ् हाङ्साङि सिमाना साजाए आटोगुम्मे॥ 2 हिट्ना बेला खानि चा भेन्ना टोॽवा ओचोग्गा नाराङिगा आरु याप्मिचि गाड्डे डोक् चोक्सा आयुङिगा डागा, हिट्नुङ् टाङ्साङ्ङि सासान् काचोक् हाङ्साङाना सासाक् मानाँ आचोगुम्ना डाना॥ हाट्ले हिट्ना हाङ्सा डोक् माङ्हाङ् इन्कार काचोक्बा याप्मिचि सोरि टोॽवा चोगुएट्टु॥ 3 ठिक् बेला आनि सोब्बे चा हिट्नागा गाड्डे डोक् आनि येम्ङा कोलुगा ओभेन्गा थोक्चि हिट्नुङ् आनि निङ्ग्वाङा चोक्मा आमेट्टाना रिङ्चि चोक्सा वासिगा डागा॥ आनिलोक् माङ्हाङ्ङाना ओयाक् लेडे हिट्नुङ् आरु याप्मिचि साजाए पिडुचि गाड्डे आनि चा साजाए आपिडालाबाना डाना॥ 4 टरो माङ्हाङ्ङाना दाया औधि जोम्ना ए हिट्नुङ् उन्ङा आनि आड्डिक् माया आचोक्युक्॥ 5 हिट्नाड्डेउङ् आनि पाप चोगुमुङ् सिएसिगा नुङ् चा उन्ङा खिरिस्ट सियानालाम्मा उहिङ्ग्वाट् चोगुङ् आनि चोला आपिडे॥ माङ्हाङ्ङा मायादाया माचोगिनाँ उन्ङा खानि माहिङेसिए॥ 6 हिट्नुङ् माङ्हाङ्ङा आनि खिरिस्टलोक् उहिङ्ग्वाट् आचोगे, हिट्नुङ् टोनालोक्ङिना डेन्ङि खिरिस्ट येसुलोक् एक्केउ आयुङ्से॥ 7 नाड्डेउङ् माङ्हाङ्ङा खिरिस्ट येसुलाम्मा उन्ङाना ओदाया आनि आनिमेट्टे, हिट्डेउङ् हान्डेङ्म्बाक् उन्ङाना ओदाया आम्टेप्मा ठेना नुङ् याप्मिचिङा उनिसुटु॥ 8 पोङ्भोने माङ्हाङ्ङाना ओदायामायाङा हिट्नुङ् खानिङा आचोगुम्ना बिस्वासलाम्मा माङ्हाङ्ङा खानि माहिङेसिए॥ हिट्नुङ् खानि आप्पेङा आचोगुम्ना टोॽवालाम्मा माखाक्, नाम्टे माङ्हाङ्ङाना बारदान ए॥ 9 माङ्हाङ्ङा खानिङा आचोगुम्ना टोॽवाङा माहिङिगा माखाक्, नाड्डेउङ् खोनाङा चा ठेलोक् चोक्माना रिङ् वाइना॥ 10 माङ्हाङ्ङा आनि आचोगाना ए॥ खिरिस्ट येसुलोक् आनिना साम्बान्धा लिसानाँ, आनि चोलाङि नुना टोॽवा चोक्मा लाउङ्सा ओछोङ्ग्वाट् चोला आनि टोगुएसुम्मे॥ आनि हिट्नागा नुगा टोॽवा चोगुम् नुङ् माङ्हाङ्ङा पाइले डोक् टेयार चोगुएसुना॥ खिरिस्टङि ठिक्ए लिमा 11 नाड्डेउङ् खानि आपोङ्सिनालाम्मा डोक् पानिछोङ्बाचि नुङ् मुन्नेनुम्॥ हिट्नुङ् खाताना काचोक्चि नुङ् आप्पेलाउङ्सा कापिक् इस्राएलिचिङा खानि “खाताना मालेगा” नुङ् मालोडिगा॥ (ना खातानाम्बाक् याप्मिचिगा मुक्ङा उन्चि येम्ङि ओचोगुना रिति ए॥) 12 हिट्ना बेला खानिङा खिरिस्ट मिसेन् आनिनिम्गेट्निम्ना डाना, हिट्डेउङ् खानि माङ्हाङ्लाम्मा लाप्माङ् आवासिए॥ खानि माङ्हाङ्ङा सेगुचिगा इस्राइलि याप्मिचि गाड्डे आलिसिन्गेट्टिन्गा डागा॥ हिट्नुङ् माङ्हाङ्ङा हिट्नागा पिडुचिगा माङ्हुप्ङिना खोना चा चामारसिङाङि साहाभागि आलिसिन्गेट्टिन्गा डागा॥ ना नाराङि खानि माङ्हाङ् माले हिट्नुङ् आसा माले आयुङिए॥ 13 टरो हाट्ले खानि खिरिस्ट येसुलोक् एक्केउ आलिसेसिए॥ ठिक् बेला खानि माङ्हाङ्लाम्मा लाप्माङ् आलिसिए, टरो हाट्लेम्बाक् माङ्हाङ् आप्पेङा खिरिस्टङा ओहेलिक्लाम्मा खानि नेट्टाङ् माचोगेसिए॥ 14 पोङ्भोने खिरिस्ट आप्पेङा डोक् आनिङि हाङ्हाङ् टाडुएसुए॥ उन्ङा डोक् याहुदिचि लोक् पानिछोङ्बाचि ठिक्ए आचोगे, हिट्नुङ् आनि आनिङि सिसा हिनिम्ना रिङ्ङा आसाम्ना गारो आहोडाबिडेसे॥ 15 ना रिङ्म्बाक् उन्ङा धारमाबिधिङिगा आग्याँचि हिट्नुङ् नियामचि जाखाम् चोगुङ् चोगुए॥ उन्ङा इप्पाङ् छोङ्बाचिलाम्मा उन् आप्पेङि ठिबाङ् ओछोङ्ग्वाट् याप्मि चोगुङ् याहुदिचि लोक् पानिछोङ्बाचिङि हाङ्हाङ् इस्थापाना चोगुए॥ 16 हिट्नुङ् उन् खाप्चेङि सियाउङ् इप्पोक् छुम्माङिगा याप्मिचि ठिक्ए चोगुचे हिट्नुङ् हिट्नागा सोब्बे माङ्हाङ् ओसाइबाचि चोगुचे॥ हिट्डेडोक् हिट्नागाङि लिसाना साट्टुरता चा जाखाम् चोगुए॥ 17 हिट्नुङ् उन् उङ्साउङ् माङ्हाङ्लाम्मा लाप्माङ् उलिसागा हिट्नुङ् नेट्टाङ् उलिसागालाउङ्सा हाङ्हाङ् आपिना नुना खाबोर पारचार चोगुए॥ 18 हिट्नुङ् उन्लाम्मा डोक् आनि इप्पाङ् छोङ्बा ठिक्ए सेङ्सेङ्ना हाङ्सालाम्मा माङ्हाङ् पाबा ओटोकानाङि खाट्मा टोगुएसुम्मे॥ 19 हिट्नाड्डेउङ् हाट्ले खानि भारागा हिट्नुङ् मिसेन् मिनिबालाक् याप्मिचि माखाक्, टरो खानि माङ्हाङ् ओयाप्मिचिलोक् एक्केउ नागारिक हिट्नुङ् माङ्हाङ् ओपाङ्ठाङ्ङिगा ओयाप्मिचि आलिसेसे॥ 20 आनिम्बाक् मुलिचेलाचि लोक् माङ्काटाचिङा ओचोगुना ओजाग् उठुङ्ङिना पाङ् ए॥ हिट्नुङ् हिट्ना जाग्ङाना उसुरङिना लिङ्गेॽवाम्बाक् खिरिस्ट येसु आप्पे डोक् ए॥ 21 उन्ङा डोक् सोब्बे पाङ् नुलोक् चोगुङ् युङ्सेसुए, हिट्नुङ् टाङ्बा लाउङ्सा सेङ्सेङ्ना माङ्ठाना लियुङ् पोसा खाट्युक्॥ 22 हिट्नुङ् खानि सोब्बे चा उन्लोक् ठिक्ए आलिसियुङ्, खानि हिट्ना सेङ्सेङ्ना माङ्ठाना आलिसेट्टि, हिट्नाडेउङ् माङ्हाङ् उन्ङाना सेङ्सेङ्ना हाङ्सालाम्मा खानिङि युङ्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.