कालास्सि 4 - आठपहरिया1 हाउ डाङ्बाचि, खानि कामाराचि टो यो मिचोक्ङे नुलोक् चाट्ला मेट्टानुम्चिम्॥ टोनालोग्ङि खानिगा चा डाङ्बा युङ्ग्वा नुङ् मिट्टानुम्॥ आरु आरति 2 खानि बिन्टि चोगायाक्टानि, हिट्नुङ् बिन्टि आचोगिनाँ ओछेक्छेक् चोक्सा सोरोक् माङ्हाङ् पोए-पोए चोगानुम्॥ 3 हाट्ले खिरिस्टङाना हिट्ना ठोबाना रिङ् बारेङि याप्चि खेम्मेप्माचि लोङ्सा माङ्हाङ्ङा पारचार चोक्माना लाम्बो टेयार आचोक्युबियाक् नुङ् आन्याँ लोङ्सा चा बिन्टि याप्मि ठाङ्साबिडानि॥ ना रिङ् लाउङ्सा डोक् आङा हाट्ले खाम्बाङ्ङि ठाइसाङे॥ 4 आङा माप्मा कोन्ना ना खाबोर पारचिन्दा माप्मा उहिडुङ् नुङ् आङा लाउङ्सा बिन्टि याङ्चोगाबिडानि॥ 5 येसुङि बिस्वास ओचोगुन्गा याप्मिचिलोक् ठोना लिसाना गाड्डे चोगानि हिट्नुङ् खानिङा आटोगुम्ना नाड्डेना बेला आरु घुवार फामाङि डोक् टिसानुम्॥ 6 खानि आचेक्टिनाँ सोरोक् मेयोक् लिसानिउङ् चेक्टानि हिट्नुङ् निङ्ग्वा टाना रिङ् एडोक् माट्टानुम्॥ खानिङा खोड्डे पारिक् याप्मिचि लोमाचि कोन्युक्ना हिट्ना रिङ् निमा कोन्युक्॥ आखेरिङाना स्या 7 आनिना मायालु झान्झा तुखिकासङा डोक् आङाना बारेङि सोब्बे रिङ् खानि मालोडिटि॥ उन् चा आनिलोक् एक्केउ टाङ्बाङाना सेवा काचोक् बिस्वासिलो सेवाक् ए॥ 8 आन्याँ पाक् चोगेट्टिङागा नुङ् खानिङा ठाहा टोगानुम् नुङ् डोक् उन् खानि सोरि आङा पाङ्सुङ्गेट्टुङ्, हिट्नुङ् उन्ङा आन्याँ बारेङि मालोडिउङ् खानि आँट् मापिडिटि॥ 9 आनि मायालु हिट्नुङ् बिस्वासि झान्झा ओनेसिमास चा उन्लोक् एक्केउ पाङ्सुङ्गेट्टुङ्॥ ओनेसिमास खानि याप्मि डोक् ए॥ हिट्नागाचिङा डोक् नाहिना सोब्बे हालखाबोर खानि मालोडिटि॥ 10 आरिस्ताखारसलाम्मा बाबा बो ए॥ उन् आङालोक् नाहि खाम्बाङ्ङि युङ्ग्वा॥ बारनाबासङाना ओनाक्पा मारकुसलाम्मा चा बाबा बो ए॥ मारकुसङाना बारेङि खानिङा पाइले डोक् आखेम्सुएसुम्मे, उन् खानि सोरि आबे भोने, ओचेट्नुलोक् स्वागाट् चोगानुम्॥ 11 युस्तास उनिङ् लिसाना येसुङा चा खानिलोङ्सा बाबा बो ए॥ माङ्हाङ् उमुलुक् लाउङ्सा आङालोक् एक्केउ टोॽवा काचोक् याहुदि बिस्वासिचिङि नागा सुम्बाङ् एगा ए॥ हिट्नागाँ आङा आम्टेप्मा आँट् याङ्उपिडाइसाङे॥ 12 खानि माड्डेङिना ठिबाङ् झान्झा, खिरिस्ट येसुङाना सेवाक् इपाफारसलाम्मा बाबा बो ए॥ उन्ङा खानि आत्मिक् रिङ्ङि बोल्लेउ हिट्नुङ् माङ्हाङ्ङा निङ्ग्वा चोगु गाड्डे डोक् खानि ख्वाप्पा रिङ्ङि ढुक्का लिसानि नुङ् खानि लाउङ्सा सोरोक् बिन्टि चोगुयाक्टुगा॥ 13 हिट्नाङा खानि लोङ्सा हिट्नुङ् लाउडिकियाङिगा हिट्नुङ् हिरापोलिस खालाङ्गाङि उयुङ्गा याप्मिचि घुवार फामा आड्डिक् टुक्लोक् टोॽवा चोगुएसुए॥ आङा ना रिङ्ङाना साँचि वाङेट्ङा॥ 14 आनि माया चोगुम्ना सिडापाङ्ढा काचोक् लुका हिट्नुङ् डेमासङा चा खानि बाबा मालोडेसिए॥ 15 हिट्नुङ् लाउडिकियाङि उलिसागा भुम्भु-झान्झाचि हिट्नुङ् नाना-झान्झाचि, नुम्फास मेन्झेमा हिट्नुङ् ओपाङ्ङि उछुम्गा ख्वाप्पा माङ्पाङ्ङिगा लोङ्सा आङाना बाबा नुङ् खेम्मेट्टानुम्चिम्॥ 16 खानिङा ना चिट्ठि पोढाँ चोग्मा आहिडुमुङ् लाउडिकियाङि उलिसागा माङ्पाङ्ङिगाँ चा ना चिट्ठि पोढाँ ओचोगुवाक् नुङ् लोडानुम्चिम्॥ हिट्नुङ् लाउडिकियाङिगा बिस्वासिलाउङ्सा छेप्टुङ्ना चिट्ठि चा खानिङा पोढाँ चोगानुम्॥ 17 हिट्नुङ् “टाङ्बाङा जिम्मा मापिडाना टोॽवा खान्ङा युमा कोन्युक्” नुङ् आरखिप्पास लोडानुम्॥ 18 आङा पावाललाम्मा खानिलाउङ्सा बाबा ए॥ हाट्ले ना आखेरिङिना रिङ् आङा आप्पे आमुक्ङा छेप्टुएट्टुङ्॥ आङा खाम्बाङ्ङि ठाइसाङे नुङ् खानिङा मुन्नेनुम्॥ खानिलोक् माङ्हाङ्ङाना ओदायामाया उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.