कालास्सि 2 - आठपहरिया1 छेम्बा डोक्, आङा आम्टेप्मा औधि खानि लाउङ्सा, हिट्नुङ् लाउडिकियाङिगा माङ्हाङ् ओयाप्मिचि, हिट्नुङ् आङा मिसेन् याङ्उनिनिङ्गा आरु याप्मा बिस्वासिचि लोङ्सा दुखे चोगुङुङ् टोॽवा चोगुएट्टुङ्ना रिङ् खानिङा ठाहा टोगानुम् नुङ् आङा मिट्नाँ॥ 2 खानि ख्वाप्पाङा आँट् टोगानुम् हिट्नुङ् खानि खानिङि माया चोगानिउङ् एक्केउ लिसानि नुङ् आङा नाड्डे चोगुङ्ना॥ हिड्डे लिसानाँ खानि निङ्ग्वाङि आड्डिक् बोल्लेउ आलिसिउङ् सोब्बे माङ्हाङ्ङाना रिङ् बुजा चोक्मा आहिडुम्टुम्, हिट्नुङ् माङ्हाङ्ङाना ठोबाना रिङ् डोक् खिरिस्ट ए नुङ् मिसेन् आनिसुम्टुम्॥ 3 हिट्नुङ् खिरिस्टङि डोक् माङ्हाङ्ङाना सोब्बे बुजा चोक्मा हिमाना ठोना टोगुम्टुम्, हिट्नाम्बाक् ठोप्बालाक् माक्फेन्सुबेन् गाड्डेना ए॥ 4 हिड्नाड्डेउङ् आङा खानि लोनाँनि, माङ्जोना रिङ् आम्टेप्मा मोज्जालोक् ओमाट्टु चा खानि साङा चा माटेप्टिन्चा॥ 5 आङा खानिलोक् हिट्नि एक्केउ वानिङ् चा आनिङ्ग्वाउम् खानिलोक् डोक् युङ्ग्वा॥ हिट्नुङ् खानि ठिक्ए निङ्ग्वा आलिसिउङ् आयुङिगा हिट्नुङ् खिरिस्टङि खानि बिस्वास औधि बोल्लेउ लिसाना रिङ् खेम्सुङुङ् आङा हारका लिसाइसाङे॥ खिरिस्टङि टोगुम्ना चोला 6 हिट्नाड्डेउङ् खानिङा खोड्डे पारिक् खिरिस्ट येसु टाङ्बा नुङ् आलाडुम्मे हिड्नाड्डे डोक् उन्ङि खानि वासानि॥ 7 सिङ् उभुङ्माङा खाम्ङि ओजारा ठेन्डु गाड्डे डोक् खानि चा बिस्वासङि बोल्लेउ लिसानिउङ् पोसा खाडानि॥ खानि माहिसिक्टिगा गाड्डे बिस्वासङि बोल्लेउ लिसानि, हिट्नुङ् माङ्हाङ् सोरोक् पोए-पोए ठाङ्सानुम्॥ 8 खानि ओछेक्छेक् लिसानिउङ् युङानि, खोनाङा चा माङ्जोगा हिट्नुङ् खेडोक्गा रिङ्चि ओमाट्टुङ् खानि माबान्डिन्चा॥ नाड्डेगा रिङ् खिरिस्टलाम्मा माखाक्, टरो याप्मिचिङा आप्पे उमिट्टुङ् ओचोगुटाडुगा रिङ् हिट्नुङ् नाराङिगा निति नियामलाम्मा ओटायागा ए॥ 9 पोङ्भोने खिरिस्ट याप्मि लिसा चा, उन् पुरो माङ्हाङ् ए॥ 10 हिट्नुङ् खिरिस्टङि डोक् खानिङा पुरो चोला आटोगुएसुम्मे॥ उन्ङा सोब्बे निनिम्गा ओभेन्गा रिमेट्चि हिट्नुङ् साक्तिचि उठुङ्ङि सासान् चोगुटु॥ 11 खानि खिरिस्टङि आलिसिनाँ डोक् खानि खाताना आलिसिगा डागा॥ ना रिङ्ङा माप्मा कोलुनाम्बाक् याप्मिलाम्मा येम्ङि खाताना चोक्मा माखाक्, टरो खिरिस्टङा खानिगा पापलोक्ना निङ्ग्वा ख्वाप्पा टुगुडिसुए नुङ् माट्टुना ए॥ 12 जब खानिङा बाप्टिस्मा आलाडुमे खानि चा खिरिस्टलोक् डोक् आहुमिए॥ हिट्नुङ् खानि चा उन्लोक् डोक् उहिङ्ग्वाट् आलिसिए, पोङ्भोने खानिङा सियाना खिरिस्टलोङ्सा उहिङ्ग्वाट् काचोक् माङ्हाङ्ङाना बारगाट्ङि बिस्वास आचोगुमे॥ 13 ठिक् बेला खानिङा पाप आचोगुमुङ् हिट्नुङ् आझै खानिगा पापलोक्ना निङ्ग्वा टुक्निगेट्निना डानाउङ् खानि हाङ्साङि आसिएसिगा, टरो हाट्ले माङ्हाङ्ङा खानिगा ख्वाप्पा पापचि छेमा माचोगिबिडिउङ् खानि खिरिस्टलोक् उहिङ्ग्वाट् माचोगेइसे॥ 14 उन्ङा आनि बिरुद्दाङि छेप्बालाक् ख्वाप्पा फाट्टुरचि लोक् हिट्निगा निति नियामचि चा जाखाम् चोगुए हिट्नुङ् उन्ङा हिट्नागा खाप्चेङि किला ठेप्टुङ् टुगुडिसुए॥ 15 हिट्नुङ् खिरिस्टङा हिट्नागा निनिम्गा ओभेन्गा रिमेट्चिगा बोल् लोक् आधिकारचि मेट्टुचिउङ् खाप्चेङि डोक् सोब्बेङा ठाहा ओटोगुलोक् मोम्मासिमा मेट्टुचिउङ् हिट्नागालाम्मा हिट्ना बोल् नाप्टुए॥ 16 हिड्नाड्डेउङ् खोनाङा चा खानि चामा-ठुङ्मा, चाडाबाडा, औंसि आथाबा युङ्माना लेम्बा मानाँ चोक्माना बारेङि फाट्टुर मालाबिन्चा॥ 17 नागा सोब्बे रिङ्चि हान्डेङ् लिना रिङ्ङाना साङ्केट् एडोक् ए, टरो छेम्बाना रिङ्उम्बाक् खिरिस्टङि डोक् टोगुम्टुम्॥ 18 हिट्नागा याप्मिचिङा आन्याँ निमापुमा टोगुएसुम्मे पिक्सा आप्पेलाउङ्सा मेयोक् लिसि गाड्डे ओचोक्युङ् ठेलोक् ओचोग्गा हिट्नुङ् हिट्नागाँ माङ्हाङ् रिङ् काउग्बाचि साम्माङ् ओचोगुचिगा॥ हिट्नागाँ खानिलोङ्सा नाड्डेगा छालि रिङ्ङा फाम्लेङ् माचाट्टिउङ् खानिङा टोक्माना इनाम् मामा पिनेनुम्चिम्॥ नाड्डेगा याप्मिचिगा पापङाना उन्चि निङ्ग्वालाम्मा होन्ना रिङ्लाम्मा बोङ् उलियुक्, टरो छेम्बा डोक् भोने उन्चि ठेलोक् लिमाना रिङ् भोने पाक्चा वाइना॥ 19 नागाङाम्टे खिरिस्टलोक् पाक्चा साम्बान्धा उयुङ्सुन्ना, उन्बाक् येम्ङाना ओखेन् ए, हिट्नाम्बाक् माङ्पाङ् ए॥ खिरिस्टङा डोक् येम् बोल्लेउ चोगुटु, हिट्नुङ् येम्ङिना ख्वाप्पा आङ्गाचि ठिक् मिकिलिक्ङा आरको मिकिलिक् हुप्टुचिचि हिट्नुङ् एक्केउ चोगुचिचि॥ हिट्नुङ् माङ्हाङ्ङा निङ्ग्वा चोगु गाड्डे आनि येम् पोसा खाट्युक्॥ खिरिस्टलोक् सिइ हिट्नुङ् हिङि 20 खानिउम् टे खिरिस्टलोक् डोक् आसिए हिट्नुङ् ना नाराङिगा निति नियाम हाट्लेउङ् खानिङा टेम्मा कोन्निना॥ हिट्डेउङ् पोङ् आझै ना नाराङिगा निति नियामचि नाड्डे पिक्सा, 21 “लाप्नेनुम्, ठोट्नेनुम्, खोट्नेनुम्” नुङ् माप्बालाक् रिङ्चि पालान् आचोगुम्टुम्ना टे? 22 नाड्डेगा माल्माट्टाउम् चालाँ चोगुम्गेट्टुम्लोक् जाखाम् उलियुङ् ओखाट्युक्, पोङ्भोने नागाम्टे याप्मिङा ओचोगुगा हिसिक्मा हिट्नुङ् नियाम एडोक् ए॥ 23 धारमाकारमा काचोक्, मेयोक् गाड्डे काचोक् हिट्नुङ् जोगिबा गाड्डे ओयेम् याङ्छामा कापि गाड्डेगा नियामचिउम् ठोना लिसाना गाड्डे उनिङ्गा॥ टरो नागा रिङ्ङा येम्लाम्मा ओहोन्गा ओभेन्गा रिङ्चि छाक्मा पाक्चा चोक्मा उहिडुन्गा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.