कालास्सि 1 - आठपहरिया1 ना चिट्ठि माङ्हाङ्ङा उनिङ्ग्वालाम्मा याङ्सेगाङ्ना खिरिस्ट येसुङाना मुलिचेला आङा पावाल लोक् आनि झान्झा तिमोथिलाम्मा ए॥ 2 आङा ना चिट्ठि कालास्सि खालाङ्गाङि माङ्हाङ्ङाना सेङ्सेङ्गा ओयाप्मिचि खिरिस्टङि बिस्वासिलो बिस्वासि भुम्बु-झान्झाचिलोङ्सा छेप्टेट्टुङ्॥ माङ्हाङ् आनि पाबाङा खानि मायादाया लोक् हाङ्हाङ् मापिड्याक्॥ पावालङाना पोए-पोएङाना बिन्टि 3 आन्याँ खानिलोङ्सा बिन्टि चोगिङानाँ आनि टाङ्बा येसु खिरिस्टङाना पाबा माङ्हाङ्लाउङ्सा सोरोक् पोए-पोए ठाङ्सुम्टुम्मा॥ 4 पोङ्भोने खिरिस्ट येसुङि लिसाना खानि बिस्वास लोक् माङ्हाङ्ङाना ख्वाप्पा ओयाप्मिचि खानिङा माया आचोगुम्चिम्गा रिङ् आन्याँ खेम्सेसुम्मे॥ 5 खानि लोङ्सा टोनालोग्ङि सुराक्छिट् युङ्बालाक् आसाङा चोगुनाँ खानिङा खिरिस्टङि बिस्वास हिट्नुङ् माङ्हाङ् ओयाप्मिचि माया आचोगुम्चिम्गा ए॥ ना आसाङाना बारेङि खानिङा पाइले डोक् छेम्बाना नुना खाबोरङि आखेम्सेसुम्मे॥ 6 ना खाबोर खानि सोरि टाइसे, हिट्नुङ् ना खाबोर ख्वाप्पा नाराङिगा याप्मिचिङा बिस्वास ओचोगेट्टु, हिट्नुङ् माङ्हाङ्ङाना निङ्ग्वा टाना रिङ् ओचोगेट्टु॥ हिट्नाड्डे डोक् खानिङा माङ्हाङ्ङाना मायादाया बारेङि ना छेम्बाना खाबोर आखेम्सुम्ना हिट्नुङ् बुजा आचोगुम्ना बेलालाम्मा डोक् खानि माझाङि चा हिट्नाड्डे डोक् लिएट्॥ 7 ना रिङ् डोक् आन्याँलोक् एक्के टोॽवा काचोक् आनि मायालु इपाफारसङा खानि माहिसिक्टे॥ उन् खिरिस्टङाना सेवा काचोक् बिस्वासिलो झान्झा ए, हिट्नुङ् उन्ङा आन्याँ घुवार याप्मि फाएट्॥ 8 उन्ङा डोक् खानिङि लिसाना सेङ्सेङ्ना हाङ्साङा आरु माया आचोगुम्चिम्गा रिङ् आन्याँ याप्मिलोडेसे॥ 9 हिड्डेउङ् आन्याँ ना रिङ् खेम्सुम्माना बेलालाम्मा डोक् खानि लोङ्सा सोरोक् बिन्टि चोगुएट्टुम्मा॥ खानिलाउङ्सा माङ्हाङ्ङाना उनिङ्ग्वाङिना रिङ् हाङ्सालाम्मा चालाँ चोक्माना ठोना हिट्नुङ् ठोनाङाना बारेङि ख्वाप्पा थोक् बुजा चोक्मा घुवार माफाड्याक् नुङ् आन्याँ बिन्टि ठाङ्सुम्टुम्मा॥ 10 खानिङा टाङ्बाङाना उनिङ्ग्वा टाना चोला गाड्डे चोगानिउङ् सोरोक् उन् हारका चोगानुम् नुङ् आन्याँ बिन्टि ठाङ्सुम्टुम्मा॥ हिट्नुङ् खानि चोलाङा सोब्बे नुगा टोॽवा हिट्नुङ् माङ्हाङ् आझै नुलोक् मिसेन् आनिसुम्टुम्॥ 11 हिट्नुङ् माङ्हाङ्ङा उन्ङाना माहिमित बोल्ङा खानि बोल्लेउ माचोग्याक् नुङ् चा आन्याँ बिन्टि चोगुम्टुम्मा, हिट्नुङ् एडोक् याङ्छामा टानाँ खानि दोरो आलिसिउङ् आङ्मा आहिडुम्टुम्, हिट्नुङ् हिट्ना बेला खानि हारका आलिसिटि॥ 12 माङ्हाङ् पाबा सोरोक् पोए-पोए ठाङ्सानुम्॥ उन्ङा व्हाङ्ङाना उमुलुक् सेङ्सेङ्गा ओयाप्मिचि पिमाचिलाउङ्सा चामारसिङा चोगुना रिङ् खानिङा चा टोक्मा आहिडुम्लोक् माचोगेसिए॥ 13 माङ्हाङ्ङा डोक् आनि डुम्बारिक्ङिना साक्तिलाम्मा छुट्कारा आपिडे, हिट्नुङ् उन्ङाना ओमायालु छाङाना उमुलुक्ङि आसोन्डाइसे॥ 14 उइछाङा आनि छुट्कारा आपिडाइसे हिट्नुङ् आनि पाप माफ आचोगाबिडाइसे॥ खिरिस्ट काट्टिकुट्टि माङ्हाङ् गाड्डेना ए 15 माङ्हाङ् आनि निमा हिनिम्ना, टरो खिरिस्टउम्बाक् निमा हिनिम्ना माङ्हाङ्ङाना उरुप् ए॥ सिरिस्टि चोक्बालाक् थोक्चि नुङ्ना उन् पाइले डोक् डाना, हिट्नुङ् सिरिस्टि चोक्बालाक् थोक्चिङि उन् ख्वाप्पा नुङ्ना माङ्ठेना ए॥ 16 पोङ्भोने टोनालोग् हिट्नुङ् नाराङिगा सोब्बे थोक् माङ्हाङ्ङा खिरिस्टलाम्मा सिरिस्टि चोगुए॥ निमा हिडुम्गा हिट्नुङ् निमा हिनिम्गा थोक्चि, निनिम्गा सिङासान्चि आथाबा साक्तिचि उलियाक्, निनिम्गा ओभेन्गा रिमेट्चिगा आथाबा आधिकारचि उलियाक्, नागा सोब्बे रिङ्चि उन्लाम्मा डोक् हिट्नुङ् उन् लोङ्सा डोक् सिरिस्टि उलिसे॥ 17 सोब्बे रिङ् नुङ्ना पाइले उन् डोक् वासेट्टाना, हिट्नुङ् सोब्बे रिङ् एक्केउ उन्ङा डोक् युङ्सुएसुए॥ 18 हिट्नुङ् उन्बाक् माङ्पाङ्ङाना ओखेन् ए हिट्नुङ् माङ्पाङ्म्बाक् उन्ङाना ओयेम् ए॥ उन्बाक् ओछोङ्ग्वाट् चोलाङाना उपुन् ए॥ हिट्नुङ् खिरिस्ट सोब्बे रिङ् नुङ्ना ठेना सासाक् उलियाक् नुङ् माङ्हाङ्ङा उसियागालाम्मा पाइले उहिङ्ग्वाट् चोगुङ् फोगुए॥ 19 पोङ्भोने माङ्हाङ्ङा उन्ङाना ख्वाप्पा ओचाट्ला उइछाङि युङ्मा डोक् निङ्ग्वा लोसे॥ 20 हिट्नुङ् माङ्हाङ् उइछालाम्मा सोब्बे थोक्चि फेरि उन्ङाना चोगुचे॥ जब उइछा खाप्चेङि सिए हिट्ना उइछाङाना ओहेलिक्लाम्मा डोक् टोनालोग् हिट्नुङ् नाराङि उलिसागा सोब्बे थोक् उन्ङा टोङ्सुचे॥ 21 ठिक् बेला खानि माङ्हाङ्लाम्मा लाप्माङ् आलिसिए॥ हिट्नुङ् खानिङा ओचाफेन्गा निङ्ग्वा हिट्नुङ् ओभेन्गा टोॽवा आचोगिउङ् खानि माङ्हाङ् ओसाट्टुर आलिसिए॥ 22 टरो हाट्ले माङ्हाङ्ङा आप्पे उइछा याप्मि चोगुए, हिट्नुङ् उन् सियाउङ् खानि फेरि उन्ङाना माचोगिए, हिट्नाड्डेउङ् जब खानि माङ्हाङ्ङाना ओटोकानाङि आयेबिटि, उन्ङा खानि सेङ्सेङ्, चोखो हिट्नुङ् फाट्टुर मालेना माचोगिटि॥ 23 टरो खानिङा ना छेम्बाना रिङ्ङि बिस्वास चोगायाक्टानुम् हिट्नुङ् ना रिङ्ङि डोक् बोलियो लिसानिउङ् युङानि॥ खानिङा आखेम्सुम्ना नुना खाबोरङि आटोगुम्ना आसालाम्मा खोनालेङ् चा निङ्ग्वा पिनेनुम्॥ ना खाबोर डोक् नारा टेप्गा याप्मिचिलोङ्सा पारचार चोगाइसे॥ हिट्नुङ् आङा पावाल चा ना रिङ् पारचार चोक्माउङ्सा डोक् माङ्हाङ्ङाना ओसेवाक् लिसाइसाङे॥ माङ्पाङ्ङि पावालङाना टोॽवा 24 ना बेला आङा खानि ओचेट्नुना लाउङ्सा याङ्छामा आङ्मा हारका लिसाइसाङे॥ हिट्नुङ् खिरिस्टङा याङ्छामा आङ्डु गाड्डे डोक् खिरिस्टङाना ओयेम् लाउङ्सा उन्ङा आङ्मा बाँकि उलिसागा याङ्छामा आयेम्ङि आङ्डुङ्टुङ्, हिट्नाम्बाक् माङ्पाङ् ए॥ 25 माङ्हाङ्ङा डोक् आङा माङ्पाङ्ङि सेवा काचोक् याङ्चोगे हिट्नुङ् खानिलाउङ्सा उन्ङाना ख्वाप्पा खाबोर खेम्मेप्माउङ्सा जिम्मा याङ्पिडाइसे॥ 26 ना ठोबाना खाबोर जुगा-जुगा हिट्नुङ् टाला-टालालाम्मा खोनाङा चा ठाहा ओटोगुन्गेट्टुन्ना डाना, टरो हाट्ले माङ्हाङ्ङा ना रिङ् ओयाप्मिचिलाउङ्सा पारचिन्दा चोगुबिडुएसुचे॥ 27 माङ्हाङ्ङा ओयाप्मिचिलाउङ्सा ना माहिमित ठोबाना रिङ् पानिछोङ्बाचि लाउङ्सा आड्डिक् चाहाब् लिना रिङ् नुङ् निमेट्माचिगा निङ्ग्वा चोगुए॥ ना ठोबाना रिङ्उम्बाक् खिरिस्ट खानिङि लिमा ए, ना रिङ्ङा खानि उन्ङाना माहिमा टोक्माना रिङ्ङाना निस्चाएता मापिडिटि॥ 28 हिड्नाड्डेउङ् सोब्बे याप्मि लोङ्सा खिरिस्टङाना बारेङि आन्याँ पारचार चोगुम्टुम्मा॥ हिट्नुङ् हिट्नागा ख्वाप्पा याप्मिचि माङ्हाङ्ङा आन्याँ याप्मिपिडाना ठोनालाम्मा ओछेक्छेक् चोक्सा हिसिक्टुम्चिम्चिम्मा॥ हिट्नुङ् खिरिस्टङाना साम्बान्धाङि बोल्लेउ लिमा ख्वाप्पा याप्मिचि उन्ङाना ओटोकानाङि टाप्माचिलाउङ्सा आन्याँ नाड्डे चोगुम्टुम्मा॥ 29 हिट्नाड्डेउङ् खिरिस्टङा आनिङ्ग्वाङि याङ्पिडाना ठेना ओबोल्लाम्मा आङा ना टोॽवा आड्डिक् मिहिनेत चोगुङुङ् चोगुङ्टुङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.