मुलिचेला टोॽवा 9 - आठपहरियासावालङा येसु बिस्वास चोगुना ( मुलिचेला टोॽवा २२:६-१६ ; २६:१२-१८ ) 1 सावालङा आझै चा येसु डाङ्बाङि बिस्वास काचोक्चि सेप्माचि लोङ्सा मुसिक्पा चाट्टुएट्टुचिगा॥ हिट्नुङ् सावाल सानिङ्डाङ्बा सोरि खाडे, 2 हिट्नुङ् टाङ्बाङाना लाम्बो कारिक्बा ख्वाप्पा मेन्झेमाचि लोक् येम्बेछाचि लाबुचियुङ् यरुसलेमङि आप्माचि ओटोगुङ् नुङ् दामास्कासङिना याहुदि छुम्मापाङ्ङिगा सासाक्चि लोङ्सा चिट्ठि याङ्छेप्टाबिडा पिक्सा उन् लोडुए॥ 3 जब सावाल दामास्कास खालाङ्गा खाडागेट्टाना, उन् हिट्ना खालाङ्गा नेहेटाङ् टासुनाँ हिट्ना बेला डोक् टोनालोग्लाम्मा व्हाङ् उन् याम्बा-नायाम्बा ओम्से॥ 4 हिट्नुङ् उन् खाम्ङि भुट्लुक्क् कोसे हिट्नुङ् नाड्डे मुक्टाना ठिक् सोरा खेम्सुए, “हाउ सावाल, सावाल, पोङ् खान्ङा आङा याङ्छामा आचाट्नाँना?” 5 सावालङा सिलाप्टुए, “आटाङ्बा, खान् साइना?” नाड्डेना रिङ् मुक्टे, “खान्ङा याङ्छामा आपिङेट्ङाना, आङा येसु॥ 6 हाट्ले खान् कोबाउङ् खालाङ्गाङि खाडा हिट्नि खान्ङा पाक् चोक्मा कोन्युक्ना खान् मालोयुक्॥” 7 सावाललोक् ओखाडागा याप्मिचि उन्चि किप्माङा पाक्चा मिचेक्ङे ओयेबे, पोङ्भोने हिट्नागाँ सोरा मुक्टानाम् ओखेम्सुए, टरो साक्चा हिट्नागाँ उनिस्वाट्टुन्चिन्॥ 8 सावाल खाम्लाम् कोबे, टरो उमिक् ओङ्सुनाँ पाक्चा निस्वाट्टुन्॥ हिड्डेउङ् उन्लोक् ओखाडागा याप्मिचिङा उमुक्ङि ओलाबुङ् दामास्कासङि ओखाट्टुए॥ 9 हिट्नुङ् उन्ङा सुम्बोक् लेम्बा सोम्मा पाक्चा निस्वाट्टुन् हिट्नुङ् पाक्चा च्वाट्टुन्, ठुङुवाट्टुन्॥ 10 दामास्कासङि हानानिया ओलोडुना ठिबाङ् चेला वासेट्टाना॥ हिट्नाङा निमापुमाङि टाङ्बाङा नाड्डे लोडुना रिङ् खेम्सुए, “हाउ हानानिया॥” हानानियाङा लोडुए, “पाक् हाउ आटाङ्बा॥” 11 टाङ्बाङा उन् लोडुए, “कोबा हिट्नुङ् सिधा ओलोडुना लाम्बोङि खाडा, हिट्नुङ् हिट्नि याहुदाङाना ओपाङ्ङि टारसास खालाङ्गालाम्मा आबाना सावाल ओलोडुना याप्मि कोलु॥ ना बेला उन् बिन्टि चोक्येट्॥ 12 सावालङा उन्ङा निसुना निमापुमाङि उन्ङा फेरि निमा उहिडुङ् नुङ् हानानिया ओलोडुना याप्मिङा उमुक्चि युङ्सुना निसुएसुए॥” 13 टरो हानानियाङा लोडुए, “हाउ आडाङ्बा, हिट्नाँम्टे यरुसलेमङिगा बिस्वासि याप्मिचि जोम् याङ्छामा चाट्टुचिगा याप्मा याप्मिचिलाम्मा आङा खेम्सुएसुङे॥ 14 हिट्नुङ् हाट्ले गाडुवाडाङ्बाचिलाम्मा आधिकार टोगुङ् खान्ङि बिस्वास काचोक्बा याप्मिचि लाप्मा लोङ्सा नेहि चा आबाइसे॥” 15 टरो टाङ्बाङा हानानिया लोडुए, “खान् खाडा, पोङ्भोने हिट्ना याप्मि लोङ्सा पानिछोङ्बाचि, हाङ्बाचि हिट्नुङ् इस्राएलि याप्मिचि सोरि आनिङ् पारचार चोक्मा लोङ्सा आङा सेगुएसुङे॥ 16 आङालोङ्सा हिट्नाङा आम्टेप्मा याङ्छामा आङ्मा कोन्युक्ना हिट्ना आङा निमेट्टुङ्टुङ्॥” 17 हिट्नुङ् हानानिया खाडाउङ् सावाल युङाना पाङ् भिट्रा लिगे, हिट्नुङ् सावाल उठुङ्ङि उमुक्चि युङ्सुङ् नाड्डे लोडुए, “हाउ आन्झा सावाल, खान् नेहि आबागेट्टाना बेला लाम्बोङि येसु डाङ्बा खान्लोक् ठेट्टे, उन्ङा डोक् खान्ङा फेरि निमा आहिडु हिट्नुङ् सेङ्सेङ्ना हाङ्साङा माइप्याक् नुङ् आङा याङ्पाङ्साइसे॥” 18 हिट्ना बेला डोक् सावालङाना उमिक्लाम्मा मिक्चिबा गाड्डेना पालोवालो ठाए हिट्नुङ् उन् फेरि निमा काहिबा लिसे हिट्नुङ् उन् कोबे हिट्नुङ् बाप्टिस्मा लाडुए॥ 19 हिट्नुङ् उन्ङा चामा चोउङ् ओसोक्मा टाए॥ सावाल आम्टेप्मा लेम्बा सोम्मा चेलाचिलोक् दामास्कास ओलोडुना डेन्ङि युङे॥ सावालङा दामास्कासङि नुना खाबोर पारचार चोगुना 20 सावाल याहुदि छुम्मापाङ्चिङि खाडाउङ् “येसु माङ्हाङ् छा ए” पिक्सा पारचार चोक्मा ठालाँ चोगुएट्टुए॥ 21 हिट्नुङ् उन्ङा माट्टुना रिङ् ओखेम्सुगा ख्वाप्पा याप्मिचि डोङ् ओठोङ्डाउङ् नाड्डे उपिगे, “यरुसलेमङि येसुङा उनिङ्ङि काचेक् याप्मिचि जाखाम् काचोक्बा याप्मि ना डोक् माहि? हिट्नुङ् नाहि चा याप्मिचि लाप्माउङ् गाडुवाडाङ्बाचि सोरि खाप्माचि लोङ्सा आबाना माहि टे?” 22 टरो सावालङा चोगुना पारचार झान् बोल्लेउ लिसा खाडे हिट्नुङ् दामास्कासङि उलिसागा याहुदिचि “येसु डोक् खिरिस्ट ए” पिक्सा पारमान् पिडुचे॥ हिड्डेउङ् हिट्नागाँ उन् पाक्चा लोमा उहिडुवाट्टुन्॥ 23 हिट्नुङ् याप्मा लेम्बा ओएङ्स्वालेङ् याहुदिचिङा सावाल सेडुम् पिक्सा निङ्ग्वा ओचोगुए, 24 टरो ना रिङ् सावालङा ठाहा टोगुए॥ हिट्नागा याप्मिचिङा लेम्बासेम्बा उन् लाप्माउङ् सेप्माउङ्सा खालाङ्गाङिगा ढुवारिक्चिङि हिट्नागाँ मिछो ओमेट्टुए॥ 25 टरो ठिक् युसा सावाल ओचेलाचिङा उन् डोकोङि ओठेन्डुङ् हिट्ना खालाङ्गाङाना गारोलाम्मा भारा ओहोट्टुडिसुए॥ 26 जब सावाल यरुसलेमङि होन्डा टाए, हिट्नि चेलाचिलोक् उन् एक्केउ युङ्माना निङ्ग्वा चोगुए, टरो हिट्नागा ख्वाप्पा उन्लोक् आड्डिक् उकिट्टे, पोङ्भोने उन् येसुङाना चेला नुङ् बिस्वास डोक् चोक्मा उहिडुवाट्टुन्॥ 27 टरो बारनाबास ओलोडुना आबाउङ् सावाल मुलिचेलाचिङि खाट्टुए॥ हिट्नुङ् सावाल खोड्डे पारिक् दामास्कासङि खाडाना बेला लाम्बोङि येसु डाङ्बा टुबुएना हिट्नुङ् येसु डाङ्बा उन्लोक् चेक्टेना हिट्नुङ् खोड्डे पारिक् दामास्कासङि मिकिट्ङे येसुङाना बारेङि सावालङा पारचार चोगुएना हिट्ना रिङ् ख्वाप्पा खेम्मेटुचे॥ 28 हिट्नुङ् सावाल हिट्नागालोक् सोरोक् वासे हिट्नुङ् टाङ्बाङाना उनिङ् मिकिट्ङे ख्वाप्पालोङ्सा यरुसलेमङि पारचार चोगुए॥ 29 हिट्नुङ् उन् गिरिक् रिङ् ओचेग्गा याहुदिचिलोक् रिङ्पान् हिट्नुङ् बादबिबाद चोगाना डाना, टरो हिट्नागाँ उन् सेप्मा ओकोलुए॥ 30 ना रिङ् बिस्वासिचिङा ठाहा ओटोगुए॥ हिट्नुङ् सावाल कैसारिया खालाङ्गाङि ओखाट्टुए, हिट्नुङ् हिट्नालाम्मा उन् टारसासङि ओपाङ्सुए॥ 31 हिट्नुङ् याहुदिया, गालिलि हिट्नुङ् सामारिया छेट्राङि लिसागा सोब्बे माङ्पाङ्ङि हाङ्हाङ् लिसे॥ हिट्नागाँ टाङ्बा आड्डिक् आदार उपिडुए, हिट्नुङ् सेङ्सेङ्ना हाङ्साङा हिट्नागा बोल् हिट्नुङ् आँट् पिडुचे हिट्नुङ् जोम् लिसा ओखाडे॥ एनियास याप्मि नुमानिङ् लिसाना 32 पाटरुस याम्बा-नायाम्बा ख्वाप्पा डेन्ङि खाडे हिट्नुङ् लुड्डा डेन्ङिगा बिस्वासिचि चा टुब्सिङा खाडे॥ 33 उन्ङा हिट्नि एनियास उनिङ् लिसाना ठिबाङ् याप्मि टुबुए, उन् साङ् बारखा पाइलेलाम्मा लाङ्मुक् चालाँ लिनिना रोगाङा टुगाउङ् डोलेन्चालाम्मा कोप्मा हिनिगेट्निना डाना॥ 34 पाटरुसङा हिट्ना लोडुए, “हाउ एनियास येसु खिरिस्टङा खान् नुमानिङ् माचोक्युक्, कोबा हिट्नुङ् काडोलेन्चा फोगु॥” हिट्ना बेला डोक् हिट्ना नुयाउङ् कोबे॥ 35 हिट्नुङ् लुड्डा खालाङ्गा हिट्नुङ् सारोन ओलोडुना डेन्डुना डेन्ङि उयुङागा याप्मिचिङा एनियास नुयाना उनिसुङ् हिट्नागाँ येसु डाङ्बाङि बिस्वास ओचोगुए॥ ताबिता मेन्झेमा नुयाना 36 योप्पा खालाङ्गाङि ताबिता उनिङ् लिसाना ठिबाङ् मेन्झेमा बिस्वासि डाना॥ (हिट्नाङाना उनिङ् गिरिक् रिङ्ङि डोरकास ओलोडुए, नाङाना उटुप् हारिनि लियुक्॥) हिट्नाँ आरु लोङ्सा ओचेट्नुना टोॽवा चोगुगा डागा हिट्नुङ् पाक्चा ओवानिगालोङ्सा घुवार फाडुचिगा डागा॥ 37 हिट्ना बेला डोरकासङाना ओयेम् टुगे हिट्नुङ् ठायाडे हिट्नुङ् याप्मिचिङा ओयेम् हुम्मा लोङ्सा ओवासिडुङ् उठुङ्ङिना टालाङि ओखाट्टुङ् ठिक् कोठाङि उयुङ्सुए॥ 38 लुड्डा खालाङ्गा योप्पा खालाङ्गालाम्मा नेहेट्टाङ् डोक् डाना, चेलाचिङा पाटरुस लुड्डाङि वाहेट् नुङ् ओखेम्सुङ् इप्पाङ् याप्मिचि “आन्याँङि एला आबा” पिक्सा लोहोट्सिङा ओपाङ्सुचे॥ 39 हिड्डेउङ् पाटरुस चा टेयार लिसाउङ् हिट्नागालोक् योप्पाङि खाडे हिट्नुङ् हिट्नि ओटासुङ् हिट्नागाँ उठुङ्ङिना टालाङि उन् ओखाट्टुए॥ हिट्नि लाङ्लेप्माचि पाटरुसङाना याम्बा-नायाम्बा ओयेबाउङ् डोरकास उहिङ्ग्वाट् बेला फुयुगा लोट्लिङ्चि निमेट्सा हिट्नागा ओहाबे॥ 40 टरो पाटरुसङा ख्वाप्पा याप्मिचि कोठालाम्मा भारा पाङ्सुचे हिट्नुङ् उटुम्बुट्ङि युङाउङ् बिन्टि चोक्मा ठालाँ चोगुए॥ हिट्नुङ् हिट्ना सियाना याप्मिलेङ् नोक्टाउङ् लोडुए, “हाउ ताबिता, कोबा!” हिट्नुङ् हिट्नाँ उमिक् ओङ्सुए हिट्नुङ् पाटरुस निसुङ् कोबाउङ् युङे॥ 41 पाटरुसङा उमुक्ङि लाबुङ् मुच्चोक् फोगुए॥ हिट्नुङ् बिस्वासिचि, लाङ्लेप्माचि छेम्डुचिउङ् हिङाना ताबिता उन्चि मुक्ङि पिडुचे॥ 42 हिट्नुङ् ना रिङ् ख्वाप्पा योप्पा खालाङ्गा टेप् छिन्डे हिट्नुङ् जोम् याप्मिचिङा टाङ्बाङि बिस्वास ओचोगुए॥ 43 पाटरुस योप्पाङि याप्मा लेम्बा सोम्मा ओहोॽवाङाना टोॽवा काचोक्बा सिमोन उनिङ् लिसाना ओपाङ्ङि युङे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.