मुलिचेला टोॽवा 6 - आठपहरियासि टेप्मा याप्मिचि ओसेगुचिगा 1 हिट्ना बेला जोम् याप्मिचि बिस्वासि उलिसे॥ सोरोक् बिस्वासिचि पोसा ओखाडाना बेला गिरिक् रिङ् ओचेग्गा याहुदिचि हिट्नुङ् हिब्रु रिङ् ओचेग्गा याहुदिचि माझाङि खेमाबुङ्मा कोबे॥ पोङ्भोने गिरिक् रिङ् काचेक्बाचिङा “लेम्बासेम्बाङाना चामा-ठुङ्मागा हिब्रु रिङ् काचेक्बाचिङा ओहान्डुनाँ आनि लाङ्लेप्माचि नुलोक् उपिडुन्चिन्गा” पिक्सा हिट्नागाँ ओमाट्टुए॥ 2 हिड्डेउङ् बारो मुलिचेलाचिङा यरुसलेमङिगा ख्वाप्पा बिस्वासिचि ओछेम्डुचिउङ् नाड्डे ओलोडुचे, “आम्भु-आन्झाचि, आनिलोङ्सा माङ्हाङ्ङाना रिङ् हिसिक्मा नासा नासा चामा-ठुङ्माना रिङ्ङि एडोक् बाम्मा आखान्निना॥ 3 हिड्डेउङ् खानि माझालाम्मा सि जाना उन्चि निङ्ला मुक्टागा सेङ्सेङ्ना हाङ्साङाना बोल् हिट्नुङ् कानिबा उलिसागा याप्मिचि सेगानुम्चिम्॥ हिट्नागा नागा टोॽवा जिम्मा पिडुम्चिम्॥ 4 टरो आनिम्बाक् सोरोक् बिन्टि चोक्मा हिट्नुङ् माङ्हाङ्ङाना रिङ् पारचार चोक्माना टोॽवाङि लाहाब् लिसि॥” 5 मुलिचेलाचिगा ना रिङ्ङा ख्वाप्पा चेलाचिगा निङ्ग्वा लोसे॥ हिट्नुङ् हिट्नागाँ बिस्वास हिट्नुङ् सेङ्सेङ्ना हाङ्साङा इप्टुचिगा इस्तिफानास, फिलिप, पारखारास, निकानोर, तिमोन, पारमिनास, हिट्नुङ् बिस्वासि लिमा पाइले याहुदि धारमाङि बिस्वास काचोक्बा एन्टिओखियाङिना पानिछोङ्बा निकोलाउस हिट्नागाँ ओसेगुचे॥ 6 हिट्नुङ् हिट्नागाँ मुलिचेलाचिङि ओआप्टुचे हिट्नुङ् मुलिचेलाचिङा उन्चि उठुङ्ङि उन्चि मुक् उयुङ्सुङ् माङ्हाङ्ङा आसिक् उपिडुच्याक् पिक्सा बिन्टि ओचोगुए॥ 7 माङ्हाङ्ङाना रिङ् सोरोक् छिन्सा खाडे॥ हिट्नुङ् यरुसलेमङि जोम् याप्मिचि बिस्वासि लिसा ओखाडे हिट्नुङ् जोम् पुजारिचिङा चा ना नुना खाबोर बिस्वास ओचोगुए॥ इस्तिफानास ओलाबुना 8 हाट्ले माङ्हाङ्ङाना दाया हिट्नुङ् बोल्ङा इप्टुना इस्तिफानासङा याप्मिचिगा माझाङि माङ्ठेगा ठेगा चिन्नाचि हिट्नुङ् डोङ् ठोङ्डिना टोॽवाचि चोगुए॥ 9 टरो ठिक् लेम्बा याहुदि छुम्मापाङ्ङिगा सोतान्तर याप्मिचिइस्तिफानासङाना बिरोधङि ओकोबे॥ नागा याहुदि याप्मिचि आलेक्जेन्डरिया खालाङ्गा लोक् कुरेनि, किलिकिया छेट्रा हिट्नुङ् एसिया छेट्रालाम्मा ओआबागा डागा॥ 10 टरो इस्तिफानासङा सेङ्सेङ्ना हाङ्सालाम्मा बोल् हिट्नुङ् ठोना टोगुङ् चेक्टानाँ हिट्नागा उन्ङाना बिरुद्दाङि चेक्मा उहिनेट्नि॥ 11 हिट्नुङ् हिट्नागाँ सोगोप् याप्मिचि नाड्डे पिक्मा मुसिक्पा ओचाट्टुचे, “आन्याँम्टे मोसा हिट्नुङ् माङ्हाङ्ङाना बिरुद्दाङि ओचाफेन्लोक् ना याप्मि चेक्टाना रिङ् खेम्सुमे॥” 12 हिट्डेउङ् हिट्नागाँ याप्मिचि हिट्नुङ् ओठेडोङ्चि हिट्नुङ् धारमाबिधि काहिसिक्बाचि ओफोगुचे॥ हिट्नुङ् हिट्नागा ओआबाउङ् इस्तिफानास ओलाबुङ् याहुदिचिगा काचाहारि-कुन्डालङि ओखाट्टुए॥ 13 हिट्नुङ् इस्तिफानास बिरुद्दाङि माङ्जोना रिङ् कामाप्बाचि चा ओआब्टुचे हिट्नुङ् हिट्नागाँ नाड्डे ओमाट्टुए, “ना याप्मिउम्टे सोरोक् सेङ्सेङ्ना माङ्ठाना हिट्नुङ् धारमाबिधिङाना बिरुद्दाङि चेक्ना॥ 14 हिट्नुङ् नाङाम्टे, ‘नासारातङिना येसुङा ना माङ्ठाना चा जाखाम् चोगुटु हिट्नुङ् मोसाङा आनि आपिडाना रितिथिति ख्वाप्पा आनि लोङ्सा पारिबारतान चोगुटु बो’ पिक्सा माट्टुना रिङ् आन्याँ खेम्सुएसुम्मे॥” 15 जब हिट्ना काचाहारि-कुन्डालङि उयुङागा सोब्बेङा इस्तिफानास उपुयुए हिट्नुङ् उन्ङाना ओनाभाक् माङ्हाङ् रिङ् काउग्बाङाना गाड्डे ओम्साना हिट्नागाँ उनिसुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.