मुलिचेला टोॽवा 27 - आठपहरियापावाल रोम खाड्युक् 1 आन्याँ इटालिया देसङि चुवाखोङ्डाङ्लाम्मा सामुन्दरा लिसा खाप्माना निधो लिसे॥ हिट्नुङ् टिलिङ्गाचिङा पावाल हिट्नुङ् आरु आम्टेप्मा काइदिचि साम्राट आगास्टासङाना टिलिङ्गा युलियास ओलोडुना काप्तान उमुक्ङि ओपोक्टुढोचे॥ 2 हिट्नुङ् आन्याँ एड्रामिटेनोस ओलोडुना खालाङ्गालाम्मा आप्ना एसिया छेट्राङिना जोम् बान्दारगाहाचि लिसाउङ् खाट्ना ठिक् चुवाखोङ्डाङ्ङि ठाङिङाउङ् खाडिङे॥ आन्याँलोक् माकेडोनिया छेट्राङि लिसाना थेसालोनिके खालाङ्गालाम्मा आबाना आरिस्ताखारस ओलोडुना याप्मि चा वासेट्टाना॥ 3 हान्डेङ्लेङ् आन्याँ सिदोन खालाङ्गाङि टासुम्मे॥ हिट्ना डेन्ङि काप्तान युलियासङा पावाल लुक्मा टुक्टुङ् ओसाइबाचि टुब्सिङा खाप्मा हिट्नुङ् चाहाब् लिगा थोक्चि टोङ्सुजो पिक्सा आनुमोति पिडुए॥ 4 हिट्निलाम्मा आन्याँ फेरि सामुन्दराङाना लाम्बो रिक्टुम्मे॥ टरो हिॽवा फेन्डानाँ आन्याँ साइपारस टापुङाना ओफेरो ओफेरो लिसा खाडिङे॥ 5 हिट्नुङ् किलिकिया लोक् पामफिलिया छेट्राङि लिसाना सामुन्दरा खोक्टुमुङ् आन्याँ लुकिया छेट्राङि लिसाना माइरा खालाङ्गाङि टासुम्मे॥ 6 हिट्नि काप्तान युलियासङा आलेक्जेन्डरिया खालाङ्गालाम्मा इटालिया देसङि खाड्ना चुवाखोङ्डाङ् टुबुए, हिट्नुङ् आन्याँ हिट्ना चुवाखोङ्डाङ्ङि ठाङिङे॥ 7 याप्मा लेम्बा सोम्मा योक्-योक् खाडिङाउङ् बोल्लेङा क्निडास खालाङ्गा सोरि टासुम्मे॥ हिट्नि टासुम्मानाँ हिॽवा होन्डारिङा आन्याँ आगाडि खाप्मा आखेरिङि ठायिङे, हिट्नुङ् केरेट टापु लिसिङाउङ् आन्याँ सालमोने ओलोडुना डेन् ओफेरा ओफेरा लिसिङाउङ् खाडिङे॥ 8 हिट्नुङ् याप्मा याङ्छामा चासा आन्याँ हिट्ना टापु ओफेरा लिसा सुन्दार बान्दारगाह ओलोडुना ठोङ्ङि होन्डिटाइङे॥ हिट्निलाम्मा लासिया ओलोडुना खालाङ्गा नेहेट्टाँ डोक् डाना॥ 9 आन्याँ नाहि टामा चा याप्मा लेम्बा लाहाब् लिसे, हिट्नुङ् सामुन्दराङाना लाम्बो चा आड्डिक् टुगे हिट्नुङ् याहुदिचिगा सालिने उपासा युङ्माना बेला चा लाट्मा हिडेइसाना॥ हिड्डे लिसानाँ पावालङा याप्मिचि ओछेक्छेक् चोक्सा नाड्डे लोडुचे, 10 “आसाइबाचि, हाट्ले आनि चुवाखोङ्डाङ्ङि नाहिलाम्मा खाडिए भोने, चुवाखोङ्डाङ् हिट्नुङ् नेहि लिसागा मालमाट्टा एडोक् माखाक्, टरो आनि चा जाखाम् लिमाहिडिटि नुङ् आङा ठाहा टोगुएसुङे॥” 11 काप्तानङा पावालङा माट्टुना रिङ् खेम्गेन् लाप्टुव्ट्टुन्, टरो चुवाखोङ्डाङ् ख्याबा काचोक्बा हिट्नुङ् चुवाखोङ्डाङ् ओडाङ्बाङाना रिङ् डोक् औधि बिस्वास चोगुए॥ 12 ना बान्दारगाहङि चुङ्ग्वामा बेला युङ्मा टुक्ना लिसानाँ याप्मा याप्मिचि फोनिक्स खालाङ्गाङि डोक् खाप्माउङ् चुङ्ग्वामा खोक्माना पिक्सा जोसोङ् चा हिट्निलाम्मा खाप्मा कोन्युक् पिक्सा उमुन्डुप्टे॥ फोनिक्सम्बाक् केरेट टापुङाना ठिक् बान्दारगाह, ना दाछिन् पास्चिमलेङ् हिट्नुङ् उत्तार पास्चिमलेङ् नोक्टाइसे॥ सामुन्दराङि हिॽवा-हुन्डारि 13 पारघानलाम्मा योक्-योक् हिॽवा फेने॥ हिट्नुङ् सोब्बे याप्मिचिङा “हाट्ले आनि खाप्मा हिडिटि” नुङ् उमिट्टे॥ हिट्नुङ् हिट्नागाँ लाङ्गार ओहेप्टुचिगा ओहोट्टुचे हिट्नुङ् चुवाखोङ्डाङ् केरेट टापुङाना ओफेरो ओफेरो लिसा ओखाट्टुए॥ 14 टरो आम्टेप्मा बेला एङ्स्वालेङ् हिट्ना टापुलाम्मा ठेना हिॽवा-हुन्डारि उरलाँ लिसाउङ् टाए॥ हिट्नाम्बाक् उत्तार पुरबा ओलोडुना हिॽवा डाना॥ 15 हिट्ना हिॽवा-हुन्डारिङा चुवाखोङ्डाङ् लेम्सुए हिट्नुङ् हिट्ना हिॽवा-हुन्डारि फेना आबानालेङ् चुवाखोङ्डाङ् खाप्मा हिनेट्नि, हिट्नुङ् आन्याँ चुवाखोङ्डाङ् हिॽवाङा खोल्लेङ् खाट्टुटुना हिट्नालेङ् डोक् ओखाट्टुवाक् नुङ् लेडुम्मे॥ 16 हिट्नुङ् आन्याँ क्लौडा ओलोडुना खाट्टिना टापु सोरि टासुम्मे, हिट्नुङ् हिट्नि चा आन्याँ बोल्लेङा चुवाखोङ्डाङ् ओएङ्स्वालेङ् रेक्टुम्माना खाट्टिउना नाउ चुवालाम्मा टो साडुमुङ् रेक्टुम्मे, हिट्नुङ् बोल्लेङा जोगाँ चोक्मा हिडुम्मे॥ 17 हिट्नुङ् हिट्ना नाउ साडुम्माउङ् चुवाखोङ्डाङ् भिट्रा युङ्सुम्मे हिट्नुङ् चुवाखोङ्डाङ् ख्याबा काचोक्चिङा चुवाखोङ्डाङ् उछिक्ङि याम्बा-नायाम्बा रिप्माङा बोल्लेउ ओरेक्टुए॥ हिट्नुङ् चुवाखोङ्डाङ् ख्याबा काचोक्चिङा चुवाखोङ्डाङ् लिबियाङाना सिरटिस ओलोडुना खाम्सेरेक्ङाना धापङि लुम्युक् नुङ् उकिट्टाउङ् हिट्नागाँ तिरपाल ओठेन्डुए, हिट्नुङ् चुवाखोङ्डाङ् हिॽवाङाना भोरङि डोक् लेडुम्मे॥ 18 हिॽवा-हुन्डारि फेनायाक्टाउङ् चुवाखोङ्डाङ् आड्डिक् ओचाफेन्लोक् लेम्सुए हिट्नुङ् हान्डेङ् गाड्डे चुवाखोङ्डाङ् ख्याबा काचोक्चिङा चुवाखोङ्डाङ्ङि लिसागा माल्माट्टाचि सामुन्दराङि लेप्मा ठालाँ ओचोगुए॥ 19 छिन्डेङ् गाड्डे चुवाखोङ्डाङ् ख्याबा चोक्मा चाहाब् लिगा आम्टेप्मा माल्माट्टाचि चुवाखोङ्डाङ् ख्याबा काचोक्चिङा आप्पे सामुन्दराङि ओलेप्टुचे॥ 20 याप्मा लेम्बा सोम्मा आन्याँ नाम्, चोक्चिङ्गेट्चि निनेट्निम्मा॥ हिॽवा-हुन्डारि आड्डिक् टुक्लोक् फेना याक्टे, हिट्नुङ् आखेरिङि हिङ्माना निङ्ग्वा चा आन्याँना मासे॥ 21 याप्मिचिङा चामा ओचोन्गेट्टुन्गा याप्मा लेम्बा लिमा हिडेइसाना॥ हिट्नुङ् पावालङा सोब्बे याप्मिचि सोरि येबाउङ् लोडुचे, “भुम्बु-झान्झाचि, खानिङा आरिङ् आखेम्नेयाट्निम्, हिट्नुङ् केरेटलाम्मा आलाम्टिए हिट्नुङ् नाड्डेना याङ्छामा लोक् जाखाम् आङ्मा कोले॥ 22 हाट्ले आङा खानि लोनाँनि, खानि निङ्ग्वा सेट्नेनुम्, आनि पाक्चा लिसिन्गा टरो चुवाखोङ्डाङ्म्बाक् जाखाम् लियुक्॥ 23 पोङ्भोने आङा माङ्ध्यान् चोगुङ्ना माङ्हाङ्ङाना माङ्हाङ् रिङ् काउग्बा हाट्ले युसा आङा सोरि टायाउङ् नाड्डे याङ्लोडे, 24 ‘हाउ पावाल, किट्नेन्, खान् रोमि हाङ्बाङाना ओटोकानाङि खाप्मा डोक् कोन्युक्, हिट्नुङ् खेम्सु, खान् माङ्हाङ्ङा दाया माचोगानाँ खान्लोक् चुवाखोङ्डाङ्ङि ओखाट्गा सोब्बे याप्मिचि उन्ङा हिङुचिचि’॥ 25 नाड्डेउङ् आम्भु-आन्झाचि, आँटि लिसानि, पोङ्भोने माङ्हाङ्ङा माट्टुना रिङ् युयुक् नुङ् उन् बिस्वास आङा चोगुङ्टुङ्॥ 26 टरो हाट्ले आनि ठिक् टापुङाना ओफेरोङि टोक्टिटि॥” चुवाखोङ्डाङ् जाखाम् लिसाना 27 एड्रियास सामुन्दराङि आन्याँ चुवाखोङ्डाङ् हिॽवा-हुन्डारिङा लेम्सुना चौधो लेम्बा लिमाहिडैसाना॥ माध्य युसाना पाका चुवाखोङ्डाङ् ख्याबा काचोक्चिङा ठिक् स्वाँरा नेहेट्टाङ् टासुम् लाबुम्मे नुङ् उमिट्टे॥ 28 हिड्डे लिसानाँ हिट्नागाँ चुवा खोट्टेप् गाइरो रैछो नुङ् उछिक्टुनाँ साइतिस मिटार टेप्मा गाइरो लिसाना उटुबुए, हिट्नुङ् होप्मो याम्बा ओफेनाउङ् फेरि उछिक्टुनाँ छोब्बिस मिटार गाइरो लिसाना उटुबुए॥ 29 हिट्नुङ् चुवाखोङ्डाङ् लुङ्गेॽवाङि टोक्युक्नि नुङ् उकिट्टाउङ् हिट्नागाँ चुवाखोङ्डाङ्ङाना ओएङ्स्वाङिना टेम्बोक् गोटा लाङ्गार ओठेन्डुङ् चुवाखोङ्डाङ् ओटोक्टुए, हिट्नुङ् हाट्ले एला भ्यानिक् उलियाक् नुङ् बिन्टि चोक्मा ठालाँ ओचोगुए॥ 30 हिट्नुङ् चुवाखोङ्डाङ् ख्याबा काचोक्चिङा चुवाखोङ्डाङ् ओटोकानाङिना लाङ्गार ठेम्माना निङ्ग्वा ओचोगुङ् खाट्टिउना नाउ चुवाखोङ्डाङ्लाम्मा ओहोट्टुए हिट्नुङ् पिम्मा ओकोन्डे॥ 31 टरो पावालङा काप्तान लोक् टिलिङ्गाचि लोडुचे, “नागा चुवाखोङ्डाङ् ख्याबा काचोक्चि ओखाडे भोने, खानि साक्चा हिङ्मा आहिङिन्गा॥” 32 ना रिङ् ओखेम्सुङ् टिलिङ्गाचिङा चुवाखोङ्डाङ्ङि ओरेक्टुना खाट्टिउना नाउङाना रिप्मा ओखोक्टुचे, हिट्नुङ् नाउ बागाँ ओचोगुडिसुए॥ 33 कुरिक्वारिक् लिसागेट्टाना बेला पावालङा सोब्बे याप्मिचि पालोवालो चामा कोन्युक् पिक्सा नाड्डे लोडुचे, “खानि निङ्ग्वा टुगाउङ् पाक्चा मिचाए आयुङिगा हाट्ले चौधो लेम्बा लिमा हिडे॥ 34 हिड्डेउङ् हाट्ले खानिङा पालोवालो चायानुम् पिक्सा आङा लोनाँनि॥ पालोवालो चामागा थोक्चि चायानुम्, पोङ्भोने हिङ्मा लोङ्सा चामा डोक् कोन्युक्॥ खानि किट्नेनिन्, खानि साङाना चा टेहेक्ङिना ठिक् फ्याक् चा पाक्चा लिनिना॥” 35 नाट्टेप्मा लोडुचिउङ् उन्ङा चालेप्पा कोबुए, हिट्नुङ् सोब्बे सोरि माङ्हाङ्ङि पोए-पोए ठाङ्सुङ् चामा ठालाँ चोगुए॥ 36 हिट्नुङ् आरुङा चा आँट् ओटोगुङ् पालोवालो चामागा थोक्चि ओचोए॥ 37 हिट्ना चुवाखोङ्डाङ्ङि आन्याँ सोब्बे इप्पोक् साए छायाहत्तार जाना याप्मिचि वासेट्टियाँगा॥ 38 सोब्बेङा फोक् इप्टालोक् चामा उहिडुङ् चुवाखोङ्डाङ् याङ्-याङ् चोक्मा लोङ्सा हिट्नागाँ सोब्बे गाहुँ सामुन्दराङि ओलेप्टुए॥ 39 व्हाङ् लिसाउङ् खाम्सेरेॽवा एडोक् लिसाना ठिक् ठोङ् ठेट्टे, टरो हिट्ना डेन् हिट्नागाँ मिसेन् निमा उहिडुवाट्टुन्॥ हिट्नुङ् हिट्नागाँ हिट्ना छेउङि चुवाखोङ्डाङ् ख्याबा चोक्माउङ् खाप्माना निङ्ग्वा ओचोगुए॥ 40 हिट्नागाँ लाङ्गारचि ओरेक्टुचिगा रिप्माचि ओखोक्टुचिउङ् लाङ्गारचि सामुन्दराङि डोक् ओपोक्टुढोचे॥ हिट्ना बेला चुवाखोङ्डाङ् वाजाक्माना डाबिलाचि ओरेक्टुचिगा रिप्माचि चा ओफेन्डुए, हिट्नुङ् चुवाखोङ्डाङ्ङाना टोकानालेङ्ना पाल टो ओफोगुङ् हिॽवा फेन्नालेङ् ओनोक्टुए, हिट्नुङ् चुवाखोङ्डाङ् सामुन्दरा ओछेउलेङ् ख्याबा चोक्सा ओखाट्टुए॥ 41 टरो चुवाखोङ्डाङ् चुवा उछिक्ङि लिसानाँ खाम्सेरेॽवाङाना फुङ्जोम्ङि टोक्टाउङ् चुवाखोङ्डाङ्ङाना ओटाकानाङिना पाटा लुमे हिट्नुङ् वान्नेएट्नि॥ हिट्नुङ् एङ्स्वालेङ्ना ओपाटा चुवाङाना ओभेट्लेॽवाङा हेट्मा ठालाँ चोगुए॥ 42 हिट्ना बेला काइदिचि पौडि ओचायुङ् उपिन्युओखाट्युक् नुङ् टिलिङ्गाचि उमिट्टाउङ् हिट्नागा सेप्माचिगा निङ्ग्वा ओचोगुए॥ 43 टरो काप्तानङा पावाल जोगाँ चोक्माना निङ्ग्वा चोगुङ् खोना चा सेप्मा पिडुवाट्टुन्चिन्॥ उन्ङा डोक् “वाजाक्मा काहिबा टेप्मा चुवाखोङ्डाङ्लाम्मा पाइले आम्सानिउङ् पाखाङि होन्डानि, 44 हिट्नुङ् आरुम्बाक् चुवाखोङ्डाङ्ङिगा फाल्याक्चि हिट्नुङ् चुवाखोङ्डाङ्ङाना टुक्रा टुक्राङि लाबानुम् याहाँपारा होन्डानि” पिक्सा आग्याँ पिडुचे॥ नाड्डेउङ् आन्याँ सोब्बे नुमानिङ् डोक् छेउङि टासुम्मे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.