मुलिचेला टोॽवा 19 - आठपहरियापावाल एफिसास खालाङ्गाङि 1 आपोल्लोस कोरिन्थि खालाङ्गाङि लिसाना बेला पावाल हिट्ना एसिया छेट्राङाना भिट्राङिना लाम्बो लिसाउङ् एफिसास खालाङ्गाङि होन्डाडाए॥ हिट्नि पावालङा इम्टेप्मा बिस्वासिचि टुबुचे॥ 2 उन्ङा हिट्नागा सिलाप्टुचे, “पाक् खानिङा टाङ्बाङि बिस्वास आचोगुमुङ् सेङ्सेङ्ना हाङ्सा आटोगुम्मेनि?” हिट्नागाँ उन् ओलोडुए, “सेङ्सेङ्ना हाङ्सा युङ्ग्वा नुङ् आन्याँ खेम्निम्गेट्निम्मागा॥” 3 फेरि पावालङा सिलाप्टुचे, “हिट्नाडे भोने खान्याँ खोट्डेना बाप्टिस्मा आलाडुम्मेना टे?” हिट्नागाँ ओलोडुए, “युहान्नाङा पिडुचिगा बाप्टिस्मा लाडुम्मे॥” 4 पावालङा लोडुचे, “युहान्नाङा पिडुचिगा बाप्टिस्माम्बाक् पापलाम्मा काएल्-काबु लिमाना बाप्टिस्मा डाना॥ उन्ङाम्टे ‘आङा नुङ्ना एङ्स्वाङि टाना बिस्वास चोगानुम्’ पिक्सा याप्मिचि लोडुचे॥” 5 ना रिङ् ओखेम्सुङ् हिट्नागाँ येसु डाङ्बा उनिङ्ङि बाप्टिस्मा ओलाडुए॥ 6 पावालङा हिट्नागा उठुङ्ङि उमुक् युङ्सुनाँ सेङ्सेङ्ना हाङ्सा उन्चिङि टाए॥ हिट्नुङ् हिट्नागा आरु रिङ्ङि ओचेक्टे हिट्नुङ् माङ्हाङ्लाम्माना रिङ् ओमाट्टुए॥ 7 हिट्नि जाम्मा बारो जाना टेप्मा याप्मिचि ओवासेट्टागा॥ 8 पावाल याहुदिचिगा छुम्मापाङ्ङि खाडे हिट्नुङ् सुम्बोक् माइना सोम्मा मिकिट्ङे याप्मिचिलोक् माङ्हाङ् उमुलुक् बारेङि रिङ्पान् चोगे, हिट्नुङ् याप्मिचिङा उन्चि निङ्ग्वाङि नुलोक् उटिगुवाक् नुङ् उन्ङा माङ्हाङ् उमुलुक् बारेङि लोडुयाक्टुचे॥ 9 टरो आम्टेप्माङा उन्चि निङ्ग्वा काठोर ओचोगुङ् बिस्वास ओचोग्वाट्टुन्, हिट्नुङ् बिस्वास चोक्मा ओनाडुङ् टाङ्बाङाना लाम्बोङाना बिरुद्दाङि याप्मिचि सोरि डोक् नानाभाँटि चेक्मा ठालाँ ओचोगुए॥ नाड्डेउङ् पावालङा हिट्नागा नाडुचिउङ् चेलाचि खाट्टुचिउङ् आरको डेन्ङि खाडे॥ हिट्नुङ् टुरान्नास ओलोडुना याप्मिङाना इस्कुलङि लेन्सेन् याप्मिचिलोक् रिङ्पान् चोगे॥ 10 पावालङा हिट्नि इप्पोक् बारखा सोम्मा हिसिक्टुचे, हिट्नुङ् एसिया छेट्राङि उयुङागा सोब्बे याहुदिचि हिट्नुङ् गिरिक् याप्मिचिङा टाङ्बाङाना रिङ् ओखेम्सुए॥ 11 हिट्नुङ् माङ्हाङ्ङा पावालङाना उमुक्लाम्मा ठे-ठेगा डोङ् ठोङ्डिना टोॽवा चोगुए॥ 12 याप्मिचिङा रुमाल लोक् टाखुम्बि धारि ओयेम्ङि ओखोट्टुङ् उटुग्गा याप्मिचि सोरि ओखाट्टुगा डागा॥ हिट्नुङ् टुखुमाङ्चि नुमानिङ् उलिसे, हिट्नुङ् टोम्गाचिगा लाहाब् उलिसागालाम्मा टोम्गाचिगा चा ओहोन्डागा॥ 13 हिट्ना डेन्ङि याम्बा-नायाम्बा वासा ओचाफेन्ना रिमेट्चि काहोट्बा याहुदिचि चा ओडागा॥ हिट्नागाँ टाङ्बा येसुङा उनिङ् लाट्सा ओचाफेन्ना रिमेट् लाहाब् उलिसागा नाड्डे ओलोडुचे, “पावालङा पारचार चोगुना येसुङा उनिङ्ङि आङा खान् होन्डारा नुङ् आग्याँ पिनाँ॥” 14 हिट्नि ठिबाङ् इस्केवास उनिङ् लिसाना याहुदि सानिङ्डाङ्बाङाना सि जना येम्बेछा छाचिङा नाट्डेना टोॽवा ओचोगुएट्टुगा॥ 15 टरो ठिक् बेला ओचाफेन्ना रिमेट्ङा हिट्नागा नाड्डे लोडुचे, “येसु आङा मिसेन् निसुङ्ना, पावाल चा मिसेन् निसुङ्ना, टरो खानिम्बाक् साइगा?” 16 हिट्नुङ् हिट्ना ओचाफेन्ना रिमेट् लाहाब् लिसाना याप्मि हिट्नागाँङि आम्सा आबे, हिट्नुङ् हिट्नागा सोब्बे उठुङ्ङि भाब् आबाजाउङ् हिट्नागा कोसुचे, हिट्नुङ् हिट्नागा एकिलिपोट् चोगुचे हिट्नुङ् उन्चि येम्नेप् खेसिक् ए खेसिक् उलिसाउङ् हिट्ना पाङ्लाम्मा उपिन्डाडे॥ 17 ना रिङ् एफिसासङि उयुङागा याहुदि हिट्नुङ् पानिछोङ्बाचिङा ओखेम्सुए हिट्नुङ् हिट्नागा सोब्बे उकिट्टे॥ हिट्नुङ् हिट्नागाँ टाङ्बा येसुङाना उनिङ् ओचोन्डुए॥ 18 जोम् बिस्वास काचोक्चि हिट्नि ओटायाउङ् ओचाफेन्गा टोॽवा चोक्निम्गा नुङ् सोब्बे सोरि काएल्-काबु उलिसे॥ 19 हिट्नागा माड्डेङि जोम् याप्मिचिङा चाटाके हिट्नुङ् जानाबा चोक्माना बारेङि छेप्बालाक् छाप्लाचि ओवाप्टुङ् सोब्बेङागा टोकानाङि उटुनुडिसुए॥ हिट्ना उटुनुडिसुगा छाप्लाङाना डाम् ओचोगुनाँ पाचास हाजार रुपा राङ् टेप्मा लिसे॥ 20 नाड्डेउङ् टाङ्बाङाना रिङ् सोब्बेलेङ् साक्तिलोक् छिन्डे हिट्नुङ् बिस्वास काचोक् याप्मिचि जोम् लिसा ओखाडे॥ 21 नाड्डेना घाट्ना लिमाहिडाउङ् सेङ्सेङ्ना हाङ्साङाना आगुवाइङि पावाल माकेडोनिया हिट्नुङ् आखैया छेट्रा लिसाउङ् यरुसलेम खाप्माना निङ्ग्वा चोगुए॥ उन्ङा लोडुचे, “यरुसलेम टासुङुङ् आङा रोम खालाङ्गा चा खाप्मा डोक् कोन्युक्॥” 22 उन् घुवार काफाबाचि तिमोथि लोक् इरास्तस इप्पाङ् डोक् माकेडोनियालेङ् पाङ्सुचे, टरो उन्बाक् इम्टेप्मा लेम्बा सोम्मा एसिया छेट्राङि डोक् युङे॥ एफिसासङिना खालाङ्बालाङ् 23 हिट्ना बेला टाङ्बाङाना लाम्बो बारे एफिसासङि ठेना खालाङ्बालाङ् लिसे॥ 24 ठिबाङ् डेमेतेरियास ओलोडुना रुपाङाना टोॽवा काचोक्बा याप्मि डाना॥ हिट्नाङा आरतेमिस साम्माङ्ङाना रुपाङाना खाटिटिउगा माङ्ठानाचि चोगुचिगा डागा॥ ना टोॽवालाम्मा उन् हिट्नुङ् उन्लोक् टोॽवा काचोक्चिङा जोम् ओफाबा कामाँ ओचोगुगा डागा॥ 25 डेमेतेरियासङा उन्लोक् टोॽवा काचोक्चि हिट्नुङ् उन्चि गाड्डे डोक् आरु टोॽवा काचोक्चि छुम्सुचिउङ् नाड्डे लोडुचे, “साइबाचि, ना टोॽवालाम्मा डोक् जोम् ओफाबा कामाँ चोगुम्ना खानिङा ठाहा आटोगुएसुम्मे॥ 26 टरो ना पावाल पाक् पिक्येट्ना, खानिङा आप्पे आखेम्सुएट्टुम्, आनिसुएट्टुम्, नाङा याप्मिचिगा मुक्ङा चोगुम्गा साम्माङ्चिम्बाक् साम्माङ् डोक् माखाक् नुङ् माट्टुएट्टु॥ हिट्नाँ नाहि एफिसासङि एडोक् माखाक्, सोब्बे एसिया छेट्राङि उयुङागा जोम् याप्मिचि उरिङ् हिसिक्टुचिउङ् बान्डुएट्टुचि॥ 27 नाड्डेउङ् आनि टोॽवा एडोक् माखाक्, टरो ठेना साम्माङ् आरतेमिसङाना माङ्ठाना लोङ्सा चा ओचाफेन्ना लियुक्, हिट्नुङ् एसिया छेट्रा लोक् नारा टेप्गा याप्मिचिङा मानाँ ओचोगुना आरतेमिसङाना मान् चोक्मा चा ओनाडुटु॥” 28 नाड्डेना रिङ् ओखेम्सुङ् हिट्नि उछुमागा याप्मिचिगा आड्डिक् उन्चि याग्लेडे हिट्नुङ् नाड्डे पिक्सा ओराट्टे, “एफिसासङिना आरतेमिस साम्माङ् माङ्ठेना ए॥” 29 ख्वाप्पा खालाङ्गाङि खालाङ्बालाङ् लिसे हिट्नुङ् याप्मिचि ठिक्ए उलिसाउङ् पावाललोक् वासाचिगा माकेडोनिया युङाचिगा ओसाइबाचि गायास लोक् आरिस्ताखारस उलाबुचिउङ् डोरोरो साट्सा खालाङ्गाङिना काचाहारि-कुन्डाल उयुङ्ना डेन्ङि ओखाट्टुचे॥ 30 पावाल याप्मिचिगा खिमेयाङ्मेङि खाप्मा कोले, टरो बिस्वासिचिङा उन् खाप्मा उपिडुवाट्टुन्॥ 31 एसियाङि उलिसागा आम्टेप्मा मुलि याप्मिचि पावालङा ओसाइबाचि ओडागा॥ हिट्नागाँ चा खालाङ्गाङिना काचाहारि-कुन्डाल चोक्माना डेन्ङि खाट्नेन् पिक्सा खाबोर ओपाङ्सुए॥ 32 काचाहारि-कुन्डालङिगा याप्मिचि फाङ्लेङ् उलिसाइसागा, पोङ्भोने हिट्नि जोम् याप्मिचिगा खिमेयाङ्मेङि आम्टेप्माङा ठिक् रिङ् पिक्सा ओराट्टेट्टागा, इम्टेप्मा याप्मिचिङा आरको रिङ् माट्सा ओराट्टेट्टागा॥ टरो हिट्नागा माड्डे जोम् याप्मिचिङा हिट्नागा नेहि पोङ् उछुमाइसे नुङ् ठाहा डोक् ओटोग्वाट्टुन्॥ 33 हिट्ना बेला ठिबाङ् आलेक्जेन्डर ओलोडुना याप्मि हिट्ना बेला लिसागेट्टाना रिङ्ङाना बारेङि लोमाचि लोङ्सा याप्मिचिगा टोकानाङि ओसोन्डुए॥ याप्मिचिगा खिमेयाङ्मेलाम्मा इम्टेप्मा याप्मिचिङा राट्सा हिट्नि लिसाना घाट्ना बारेङि उन् ओलोडुए॥ हिट्नुङ् आलेक्जेन्डारङा उमुक् फोगुङ् याप्मिचि स्वाग् चोगुचिउङ् पाक्चा ओचाफेन्लोक् लिनिगेट्निना नुङ् याप्मिचि लोमाचिगा निङ्गुवा चोगुए॥ 34 टरो याप्मिचिङा उन् याहुदि नुङ् मिसेन् उनिसुङ् हिट्नागा याप्मिचि सोब्बेङा ठिक्ए सोरा ओचोगुङ् “एफिसासङि लिसाना आरतेमिस साम्माङ् माङ्ठेना, एफिसासङि लिसाना आरतेमिस साम्माङ् माङ्ठेना” पिक्सा इप्पोक् घान्टा टेप् हिट्नागा ओराट्टे॥ 35 हिट्नुङ् आखेरिङि खालाङ्गाङिना हाकिमङा ख्वाप्पा याप्मिचि स्वाग् मेट्टुचिउङ् लोडुचे, “हाउ एफिसासङिगा याप्मिचि, ना एफिसास खालाङ्गाम्बाक् ठेना साम्माङ् आरतेमिसङाना माङ्ठाना हिट्नुङ् टाङ्साङ्लाम्मा ठायाना आरतेमिसङाना मुरति सुराक्छे काचोक्बा नुङ् ख्वाप्पा याप्मिचि लोङ्सा ठाहा युङ्ग्वा॥ 36 ना रिङ् छेम्बा डोक्, साक्चा माखाक् पिग्मा उहिनिगा॥ हिट्डेउङ् खानिङा नुलोक् निङ्ग्वा डोक् मिचोक्ङे पाक्चा ओचाफेन्ना टोॽवा चोक्नेनिन्॥ 37 खानिङा आलाबुम्चिमुङ् आटाडुम्चिम्गा याप्मिचिङा आनि माङ्ठाना हिट्नुङ् आनि साम्माङ् आरतेमिस चिम्मा डोक् उफुट्टुन्गेट्टुन्ना॥ 38 हिड्डेउङ् डेमेतेरियास ओलोडुना याप्मि हिट्नुङ् उन्लोक् मुरति काठुब्बाचि बिरुद्दाङिना रिङ् भोने, आदालातङि मुद्दा ठेम्मा उहिडुटु हिट्नुङ् हिट्नागाचि मुद्दा ठेन्गा ठेन्गा ओचोक्याक्॥ 39 टरो ना रिङ् माखाक् आरु डोक् रिङ्ङाना बारेङि भोने, काचाहारि-कुन्डाल युङिउङ् हिट्ना रिङ् छिनोफानो चोक्मा हिडुम्टुम्॥ 40 हिट्डेउङ् हाट्ले लिसाना खालाङ्बालाङ्ङाना फाट्टुर आन्याँ सोरि ठायुक् नुङ् किट्टेएसिङे॥ पोङ्भोने ना बिथाङि लिसाना खालाङ्बालाङ्ङाना बारेङि आन्याँ पाक्चा माप्मा हिनिम्माना॥” 41 उन्ङा नाड्डे लोडुचिउङ् याप्मिचिगा खिमेयाङ्मे ओसेन्डे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.