मुलिचेला टोॽवा 17 - आठपहरियाथेसालोनिके खालाङ्गा 1 पावाल लोक् सिलास आम्फिपोलिस हिट्नुङ् आपोल्लोनिया खालाङ्गालाम्मा लिसाचिउङ् थेसालोनिके खालाङ्गाङि टासाचुए॥ हिट्नि याहुदि छुम्मापाङ् डाना॥ 2 साडे गाड्डे डोक् पावाल हिट्ना छुम्मापाङ्ङि चा खाडे॥ हिट्नुङ् पावाल सुम्बोक् साता याहुदिचिगा युङ्माना लेम्बा खाडाउङ् धारमाछाप्लालाम्मा हिट्नागालोक् नुलोक् रिङ्पान् चोगे॥ 3 पावालङा हिट्निगा याप्मिचि खिरिस्टङा याङ्छामा आङ्मा हिट्नुङ् सियानालाम्मा उहिङ्ग्वाट् लिमा कोन्ना रिङ् धारमाछाप्लालाम्मा पारमान् पिडुचिउङ् पारचिन्दा चोगुचे॥ हिट्नुङ् उन्ङा “आङा पारचार चोगुङ्ना येसु डोक् खिरिस्ट ए” पिक्सा लोडुचे॥ 4 हिट्डेउङ् आम्टेप्मा याहुदिचिङा उन्चि रिङ् ओलाडुङ् टाङ्बाङि बिस्वास ओचोगुए हिट्नुङ् पावाल हिट्नुङ् सिलासलोक् ओकेङे॥ माङ्हाङ्ङाना माङ्ध्यान् काचोक्चि जोम् गिरिक् याप्मिचि हिट्नुङ् आम्टेप्मा उन्चि निङ्ला मुक्टागा मेन्झेमाचि चा पावाल हिट्नुङ् सिलासलोक् ओकेङे॥ 5 टरो आरु याहुदिचिगा हिट्नागालोक् उन्चि याक्लेडे हिट्नुङ् बाजारङिगा ओचाफेन्गा टोॽवा काचोक्चि उछुमुचिउङ् खालाङ्गाङि ओरियाँ चोक्मा ओमेट्टुचे॥ हिट्नागाँ पावाल लोक् सिलास जोम् याप्मिचि सोरि आप्माचिगा निङ्ग्वा ओचोगुङ् यासोन ओलोडुना याप्मिङाना ओपाङ्ङि खेमाबुङ्मा चोक्ङा उलिगे॥ 6 टरो पावाल लोक् सिलास हिट्नागाँ हिट्नि उटुबुवाट्टुन्चिन्॥ हिट्डे लिसानाँ हिट्नागाँ यासोन लोक् आम्टेप्मा आरु बिस्वासि भुम्बु-झान्झाचि डोक् साट्सा खालाङ्गाङिना सासाक्चि सोरि ओआप्टुचे हिट्नुङ् नाड्डे पिक्सा ओराट्टे, “नारा टेप् याङ्छामा काचाट् याप्मिचि आनि खालाङ्गाङि चा ओटाइसे॥ 7 यासोनङा हिट्नागा ओपाङ्ङि युङ्सुएसुचे॥ हिट्नागा सोब्बे याप्मिचिङा ‘आरको येसु ओलोडुना हाङ्बा युङ्ग्वा’ पिक्सा रोमि ठेना हाङ्बाङाना बिरुद्दाङि नागा सोब्बे टोॽवाचि ओचोगुएट्टु॥” 8 हिट्ना रिङ् ओखेम्सुङ् जोम् खालाङ्गाङिगा याप्मिचि लोक् सासाक्चि फाम्लेङ् उलिसे॥ 9 हिट्नुङ् हिट्नागाँ यासोन लोक् आरु याप्मिचि जारिमाना हुङ्मा ओमेट्टुचिउङ् ओलेडुचे॥ पावाल लोक् सिलास बेरिया खालाङ्गाङि खाडाचिगा 10 युसा लिसानामे बिस्वासि भुम्भु-झान्झाचिङा पावाल लोक् सिलास बेरिया खालाङ्गाङि ओपाङ्सुचे॥ हिट्नागाचि हिट्नि टासाचुङ् याहुदि छुम्मापाङ्ङि खाडाचे॥ 11 हिट्ना डेन्ङिगा याप्मिचि थेसालोनिकेङिगा याप्मिचि नुङ्ना याप्मा नुगा ओडागा॥ हिट्नागाँ पावालङा पारचार चोगुना येसुङाना बारेङि नुना खाबोर निङ्ग्वा उपिडुङ् ओखेम्सुए हिट्नुङ् उन्ङा पारचार चोगुना रिङ् छेम्बाना इ माखाक् पिक्सा लेम्बासेम्बा धारमाछाप्ला पोढाँ ओचोगुङ् ओकोलुए॥ 12 हिट्डेउङ् जोम् याहुदिचिङा येसु डाङ्बाङि बिस्वास ओचोगुए हिट्नुङ् निङ्ला मुक्टागा जोम् गिरिक् मेन्झेमाचिङा हिट्नुङ् गिरिक् येम्बेछाचिङा चा बिस्वास ओचोगुए॥ 13 टरो थेसालोनिकेङि उलिसागा याहुदिचिङा पावालङा बेरियाङि चा माङ्हाङ्ङाना रिङ् पारचार चोगुना ओखेम्सुए, हिट्नि चा हिट्नागा ओखाडाउङ् जोम् याप्मिचि मुसिक्पा ओचाट्टुचिउङ् पावालङाना बिरुद्दाङि ओफोगुचे॥ 14 हिट्डेउङ् बिस्वासि भुम्भु-झान्झाचिङा हिट्ना बेला डोक् पावाल सामुन्दरा ओफेरालेङ् ओपाङ्सुए॥ टरो सिलास हिट्नुङ् तिमोथिम्बाक् बेरियाङि डोक् युङाचे॥ 15 पावाल सामाढामा ओखाडागाँ एथेन्स ओलोडुना खालाङ्गा सोम्मा उन् ओसायुढोए॥ हिट्नुङ् पावालङा सिलास लोक् तिमोथि एला डोक् ओआप्च्याक् पिक्सा हिट्नागा लोडुचे हिट्नुङ् हिट्नागा बेरियाङि ओनोक्टे॥ पावालङा एथेन्स खालाङ्गाङि पारचार चोगुटु 16 पावालङा एथेन्स खालाङ्गाङि सिलास लोक् तिमोथि हाङ्सुएट्टुचिगा बेला खालाङ्गा टेप् जोम् मुरतिचि एडोक् निसुङ् उनिङ्ग्वा आड्डिक् टुगे॥ 17 हिट्नाडेउङ् उन् याहुदि छुम्मापाङ्ङि खाडाउङ् याहुदिचि हिट्नुङ् माङ्हाङ्ङाना माङ्ध्यान् काचोक् गिरिक् याप्मिचिलोक् बादबिबाद चोगे॥ हिट्नुङ् बाजारङि चा खाडाउङ् हिट्नि उलिसागा याप्मिचिलोक् सोरोक् बादबिबाद चोगे॥ 18 आम्टेप्मा इपिक्युरि लोक् इस्तोइकि दारसानिक्चिङा पावाललोक् बादबिबाद ओचोगे॥ हिट्नागा माड्डे आम्टेप्माङा ओलोडुए, “ना ङाङ्सुबाङ् गाड्डे पाक् माप्मा कोन्येट्ना?” आरु याप्मिचिङा ओमाट्टुए, “नाङाउम्टे आरु डोक् साम्माङ्चिगा रिङ् पारचार चोगुएट्टु॥” पोङ्भोने पावालङा येसुङाना बारेङि हिट्नुङ् उसियागा उहिङ्ग्वाट् लिना नुना खाबोर पारचार चोगुनाँ हिट्नागाँ नाट्डे ओलोडुए॥ 19 हिट्नाडे लिसानाँ हिट्नागाँ पावाल आरियोपागास ओलोडुना काचाहारि-कुन्डालङि ओखाट्टुङ् उसिलाप्टुए, “खान्ङा पारचार आचोगुना ना ओछोङ्ग्वाट् हिसिक्मा पाइना? आन्याँ याप्मिलोडा॥ 20 आन्याँ काइले चा खेम्निम्गेट्निम्मागा रिङ्चि खान्ङा आमाट्टुएट्टु, मुलि रिङ् पाक् माप्मा आइट्टुएना? माट्टुवाक्॥” 21 (एथेन्सङिगा ख्वाप्पा याप्मिचि हिट्नुङ् हिट्नि भारालाम्मा ओटायाउङ् उयुङागा याप्मिचिङा आरु टोॽवा मिचोक्ङे ओछोङ्ग्वाट् ओछोङ्ग्वाट् रिङ्चि माप्मा हिट्नुङ् खेम्मा एरोक् उन्चि बेला उटिसुए॥) 22 हिट्डेउङ् आरियोपागास ओलोडुना काचाहारि-कुन्डाल सोरि पावाल येबाउङ् हिट्नागा लोडुचे, “हाउ एथेन्स खालाङ्गाङिगा याप्मिचि, खानि सोब्बे रिङ्ङि आड्डिक् धारमोति याप्मिचि आलिसिगा ठाहा टोगुङे॥ 23 आङा खानि खालाङ्गा टेप् लिन्डुङे हिट्नुङ् खानिङा माङ्ध्यान् आचोगुम्ना डेन्चि चा निसुङे॥ पुसा खाडाङ्नाँ ‘मिसेन् निनिम्गेट्निम्ना माङ्हाङ् लोङ्सा’ छेप्बालाक् साम्माङ् ठाना चा टुबुङे॥ हिट्ना मिसेन् मिनिङे माङ्ध्यान् आचोगुम्ना माङ्हाङ्ङाना बारे खानि सोरि आङा पारचार चोगुएट्टुङ्॥ 24 “नारा हिट्नुङ् हिट्नि लिसागा सोब्बे थोक्चि काचोक्बा माङ्हाङ् डोक् टाङ्साङ् हिट्नुङ् नाराङिना टाङ्बा ए॥ उन् याप्मिचिङा ओचोगुना माङ्ठानाङि युङ्निना॥ 25 हिट्नुङ् याप्मिचिगा घुवार उन् लोङ्सा चाहाब् लिनिना, पोङ्भोने उन्ङा डोक् ख्वाप्पालोङ्सा चोला, सोक्मा हिट्नुङ् ख्वाप्पा थोक्चि पिडुचिचि॥ 26 याप्मिचि नारा टेप् उयुङ्याक् नुङ् माङ्हाङ्ङा ठिबाङ् याप्मिलाम्मा ख्वाप्पा छोङ्बाचि चोगुचे, हिट्नुङ् खोना बेला सोम्मा हिङ्ग्माना हिट्नुङ् युङ्माडेन् चा उन्ङा पाइले डोक् टोङ्सुबिडुचे॥ 27 याप्मिचिङा माङ्हाङ् ओकोलु हिट्नुङ् उन् साइना नुङ् ओकोलु उटुबु नुङ् उन्ङा नाट्डे चोगुए॥ हिट्नुङ् चा माङ्हाङ् आनि सोब्बेलाम्मा लाप्माङ् वाइना॥ 28 पोङ्भोने ठिबाङ् याप्मिङा नाड्डे माट्टुएसुए, ‘आनि उन्ङि हिङिटि, पालोवालो चोगुम्टुम् हिट्नुङ् उहिङ्ग्वाट् वासेट्टि॥’ “खानि माड्डे ठिबाङ् काबिता काछेप्बाङा नाट्डे माट्टुएसुए, ‘आनि ओछालेट्चि डोक्॥’ 29 “हिट्डेउङ् आनि माङ्हाङ्ङाना छालेट्चि लिसिउङ् याप्मिचिगा ठोना लोक् उन्चि मुक्ङाना सिपलाम्मा उठुबुगा लुङ्गेॽवा, रुपा हिट्नुङ् साम्याङ्ङाना मुर्ति नुङ् माङ्हाङ् मिप्मा लिनिना॥ 30 आच्छो बेला माङ्हाङ्ङा याप्मिचि आप्पे पारा चोक्मा पिडुचे, पोङ्भोने हिट्नागाँ उन्ङि खाप्माना लाम्बो ठाहा ओटोग्वाट्टुन्॥ टरो हाट्ले उन्ङा सोब्बे डेन्ङि ख्वाप्पा याप्मिचि काएल्-काबु लिसानि नुङ् आग्याँ आपिएट्॥ 31 पोङ्भोने नाराङिगा ख्वाप्पा याप्मिचि न्याए चोक्माना लेम्बा माङ्हाङ्ङा सेक्मा हिडुएसुए हिट्नुङ् हिट्ना लेम्बा उन्ङा आप्पेङा सेगुनाँ ठिबाङ् याप्मिलाम्मा न्याए चोगुटु॥ हिट्ना याप्मि सियानालाम्मा उहिङ्ग्वाट् चोगुना सोब्बे याप्मिचि उन्ङा पारचिन्दा निमेट्टुचे॥” 32 जब याप्मिचिङा उसियागा उहिङ्ग्वाट् उलियुक् नुङ् ओखेम्सुङ् इम्टेप्मा याप्मिचिङा पावाल खिसि चोक्सा ओरेट्टुजोए॥ टरो आरुङाम्बाक् नाङाना बारेङि आरको खेप् आन्याँ कारिङ् खेम्सुम्टुम्मा पिक्सा ओलोडुए॥ 33 हिट्नुङ्ना पावाल हिट्नागालाम्मा खाडे॥ 34 टरो इम्टेप्मा याप्मिचि पावाललोक् लाहाब् उलिसे हिट्नुङ् येसुङि बिस्वास ओचोगुए॥ नागा माड्डेङि आरियोपागास काचाहारि-कुन्डालङिना सादास्से ठिबाङ् डियनुसियस ओलोडुना याप्मि हिट्नुङ् दामारिस उनिङ् लिसाना ठिबाङ् मेच्छेमा, हिट्नुङ् आरु याप्मिचि चा ओडागा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.