मुलिचेला टोॽवा 16 - आठपहरियातिमोथिङा पावाल लोक् सिलास टुबुचिगा 1 पावाल डारबि हिट्नुङ् लुस्टरा खालाङ्गाङि चा होन्डा टाए॥ हिट्नि तिमोथि उनिङ् लिसाना ठिबाङ् चेला डाना॥ उमाम्बाक् टाङ्बाङि बिस्वास काचोक् याहुदि छोङ्बाङिना डाना, टरो उप्पाम्बाक् गिरिक् छोङ्बा याप्मि डाना॥ 2 लुस्टरा हिट्नुङ् आइकोनियानङिगा ख्वाप्पा बिस्वासि भुम्भु-झान्झाचिङा तिमोथि नुना याप्मि ओलोडुए॥ 3 पावालङा तिमोथि चा उन्लोक् खाप्माना निङ्ग्वा चोगुए, हिट्नुङ् हिट्नि उयुङागा याहुदिचि लोङ्सा पावालङा तिमोथि याहुदि रिति गाड्डे खाताना चोगुबिडुए, पोङ्भोने तिमोथिङाना उप्पा गिरिक् नुङ् सोब्बे याप्मिचिङा ठाहा ओटोगुएसुना॥ 4 हिट्नुङ्ना हिट्नागाचिङा खालाङ्गा-खालाङ्गाङि लिन्डाचुए हिट्नुङ् सोब्बे डेन्ङि उलिसागा बिस्वासिचिलाउङ्सा यरुसलेमङिगा मुलिचेलाचिङा हिट्नुङ् ओठेडोङ्चिङा निरनाए ओचोगुना रिङ् पालान् चोगानुम् पिक्सा माट्टाचुए॥ 5 हिड्नाड्डेउङ् माङ्पाङ्ङिगा याप्मिचिगा बिस्वास बोल्लेउ लिसा खाडे हिट्नुङ् लेम्बासेम्बा टाङ्बाङि बिस्वास काचोक्बा याप्मिचि जोम् लिसा ओखाडे॥ पावालङा तोरआस खालाङ्गाङि निमापुमा टोगुना 6 पावाल हिट्नुङ् ओसाइबाचि फिरगिया लोक् गालातिया छेट्रा उलिसाउङ् ओखाडे, पोङ्भोने हिट्नागा सेङ्सेङ्ना हाङ्साङा एसिया छेट्राङि पारचार चोक्मा छाक्टुचे॥ 7 हिट्नुङ् माइसिया छेट्राङाना साँधेरिङि ओटासुङ् हिट्नागा बिथिनिया छेट्रालेङ् खाप्माना निङ्ग्वा ओचोगुए॥ टरो येसुङाना ओहाङ्साङा हिड्डे चोक्मा पिडुवाट्टुन्चिन्॥ 8 हिड्नाड्डेउङ् हिट्नागा माइसिया छेट्रा उलिसाउङ् यो तोरआस खालाङ्गाङि ओखाडे॥ 9 हिट्ना युसा पावालङा निमापुमा निसुए॥ उन्ङा माकेडोनिया छेट्राङिना ठिबाङ् याप्मि येबाउङ् नाड्डे माट्टुना निसुए, “माकेडोनिया काडा हिट्नुङ् आन्याँ घुवार याप्मि फाडा॥” 10 पावालङा हिट्नाडेना निमापुमा टोगुङ् हिट्ना बेला डोक् आन्याँ माकेडोनियाङि खाप्मा टेयार लिसिङे॥ पोङ्भोने हिट्निगा याप्मिचि नुना खाबोर पारचार चोक्माउङ्सा माङ्हाङ्ङा डोक् याप्मि छेम्डाना रिङ् आन्याँ ठाहा टोगुम्मे॥ लिडियाङा येसुङि बिस्वास चोगुटु 11 टब आन्याँ तोरआसलाम्मा चुवाखोङ्डाङ्ङि ठाङिङाउङ् सिधा याहाँपारा सामोथारके टापुलेङ् खाडिङे, हिट्नुङ् हान्डेङ्लेङ् नियापोलिस ओलोडुना खालाङ्गाङि टासुम्मे॥ 12 हिट्नालाम्मा आन्याँ लाम्टियाँउङ् माकेडोनिया छेट्राङिना मुलि खालाङ्गा फिलिप्पिङि टासुम्मे॥ हिट्ना खालाङ्गाम्बाक् रोमि सासाक्चिगा हालिमुआलि डाना॥ हिट्नि आन्याँ होप्मो लेम्बा सोम्मा युङिङे॥ 13 हिट्नुङ् युङ्माना लेम्बा खालाङ्गाङाना ढुवारिक् भारा होङ्ङाना ओफेराङि बिन्टि चोक्माना डेन् युङ्ग्वा नुङ् मिट्टिङाउङ् आन्याँ हिट्नि खाडिङे, हिट्नुङ् आन्याँ हिट्नि उछुमाइसागा मेच्छेमाचिलोक् रिङ्पान् चोक्सा युङिङे॥ 14 हिट्नि लिडिया उनिङ् लिसाना थिआटिरा खालाङ्गाङिना बाइजानि लोट्लिङ्चि काछोङ्बा ठिबाङ् मेन्झेमा डाना॥ लिडिया माङ्हाङ्ङाना माङ्ध्यान् चोक्ना मेच्छेमा डाना, उन्ङा आन्याँ रिङ् खेम्सुए॥ पावालङा माट्टुना रिङ् टिग्मा लोङ्सा टाङ्बाङा उनिङ्ग्वा ओङ्सुबिडुए हिट्नुङ् बिस्वास चोगुए॥ 15 हिट्नुङ् उन्लोक् ओपाङ्ङिगा ख्वाप्पाङा बाप्टिस्मा ओलाडुए॥ हिट्नुङ् हिट्नाँ ओपाङ्ङि युङ्मा आन्याँ स्या मेट्सा याप्मिलोडे, “खानिङा आङा छेम्बा डोक् बिस्वासि झान्झा आलोडिटिङा भोने, आपाङ्ङि आबानिउङ् युङानि॥” हिट्नुङ् हिट्नाँ आन्याँ ओपाङ्ङि खाप्मा डोक् याप्मि मेट्टे॥ पावाल हिट्नुङ् सिलास खाम्बाङ्ङि ठायाचिगा 16 ठिक् लेम्बा आन्याँ बिन्टि चोक्माना डेन्ङि खाडिगेट्टिङाना बेला ठिबाङ् जोखाना कापुबा ओचाफेन्ना रिमेट् लिसाना चाकारनि मेच्छेमालोक् आन्याँ टुबिङे॥ ना मेन्झेमाङा जोखाना पुयुङ् डोक् जोम् ओफाबा कामाँ चोगुङ् ओडाङ्बाचि पिडुचिगा डागा॥ 17 हिट्ना मेन्झेमाङा पावाल हिट्नुङ् आन्याँ रोक् रिक्सा आबे हिट्नुङ् नाड्डे पिक्सा राट्टे, “नागा माङ्ठेना माङ्हाङ्ङाना ओसेवाक्चि ए॥ नागाँ मुक्टि टोगुम्ना बारेङि खानि पारचार माचोगिटि॥” 18 हिट्ना याप्मा लेम्बा सोम्मा हिट्डे पिक्सा राट्टायाक्टे॥ हिट्नुङ् पावालङाना आसाक्का उनिङ्ग्वा टुगाउङ् हिट्नालेङ् नोक्टाउङ् टोम्गाचिगा रिमेट् लोडुए, “येसु खिरिस्टङाना उनिङ्ङि हिट्ना मेच्छेमालाम्मा खान् टोम्गाचिगा खाडालेट्टा पिक्सा आग्याँ पिनाँ॥” पावालङा हिट्नाडे लोडुनामे हिट्ना होन्डाउङ् खाडालेट्टे॥ 19 टरो हिट्ना मेच्छेमाङाना ओडाङ्बाचिङा उन्लाम्मा ओफाबा कामाँ चोक्माना लाम्बो डोक् मासाना ठाहा ओटोगुङ् पावाल हिट्नुङ् सिलास ओलाबुचिउङ् बाजारङिना चोक्ङि डोरोरो साट्सा सासाक्चि सोरि ओखाट्टुचे॥ 20 हिट्नुङ् पावाल लोक् सिलास खालाङ्गाङि रोमि हाकिमचि टोकानाङि ओखाट्टुचिउङ् हिट्नागा उपिगे, “नागा याहुदि याप्मिचि, हिट्नुङ् नागाँ आनि खालाङ्गाङि याप्मिचि ओबान्डुएट्टुचि॥ 21 नागाँ आनि रोमिचिङा चोक्मा लिनिना चालान् चाल्ति याप्मिचि उहिसिक्टुएटुचि, ना रिङ् आनि लोङ्सा नुना लिनिना॥” 22 हिट्डेउङ् याप्मिचिगा खिमेयाङ्मे ओकोबाउङ् पावाल लोक् सिलास लेम्मा ओपाट्टुचे॥ खालाङ्गाङिगा हाकिमचिङा चा पावाल लोक् सिलास एकिलिपोट् ओचोगुचे हिट्नुङ् लाहुरिक्ङा लेम्सानुम्चिम् पिक्सा हिट्नागा आग्याँ उपिडुचे॥ 23 हिट्नागाँ औधि लाहुरिक्ङा ओलेम्सुचिउङ् पावाल हिट्नुङ् सिलास खाम्बाङ्ङि ओठेन्डुचे, हिट्नुङ् नागाचि होम्मा हिचिन्लोक् छाक्टानुम्चिम् पिक्सा हिट्नागाँ खाम्बाङ्ङिना ओठेडोङ् आग्याँ उपिडुए॥ 24 ना आग्याँ टोगुङ् खाम्बाङ्ङिना हाकिमङा पावाल लोक् सिलास खाम्बाङ् ओहोङिना कोठाङि खाट्टुचिउङ् उन्चि लाङ्ङि ठिङ्गोरो लाहाब् चोगुचिउङ् युङ्सुचे॥ 25 माध्ये युसाना पाका पावाल लोक् सिलास बिन्टि चोक्सा माङ्हाङ्ङाना छाम्लोमा ठाक्टेट्टाचिगा, हिट्नुङ् आरु खाम्बाङ्ङि ओछाक्टुचिगा याप्मिचिङा ओखेम्सुएट्टुगा॥ 26 हिट्ना बेला डोक् माङ्ठेना लुट्लेमा काडे॥ खाम्बाङ्ङिना जाग् वान्डे, हिट्नुङ् सोब्बे ढुवारिक्चि ओङ्से हिट्नुङ् काइदिचि ओरेक्टुचिगा साङ्ला ओफेन्डे॥ 27 खाम्बाङ्ङिना हाकिम मिक्युमालाम्मा चेन्डे, हिट्नुङ् खाम्बाङ्ङिगा ख्वाप्पा ढुवारिक्चि ओङ्साना निसुङ्, सोब्बे काइदिचि उपिन्डेगा रैछो मिट्टाउङ् आप्पे चेप्मा सिमा कोलुङ् चेप्सा होट्टुए॥ 28 टरो पावाल टुक्लोक् राट्टाउङ् नाड्डे लोडुए, “हाउ आडाङ्बा, हिट्डे चोक्नेन्, आन्याँ सोब्बे नेहि डोक् वासेट्टिङा॥” 29 ना रिङ् खेम्सुङ् हिट्ना हाकिमङा कुपि हाप्मा मेट्टुचिउङ् पिन्सा भिट्रा आबे, हिट्नुङ् उकिट्माङा पिलिम् पिलिम् योक्टाउङ् पावाल हिट्नुङ् सिलास उन्चि टोकानाङि हाम्बोम्फोप् चोगे॥ 30 हिट्नुङ् हिट्ना हाकिमङा हिट्नागाचि भारा होट्टुचिउङ् सिलाप्टुचे, “काहिसिक्बाचि, आङा पाक् चोगुङ्ना मुक्टि टोगुङ्टुङ्ना?” 31 हिट्नुङ् हिट्नागाचिङा लोडाचुए, “टाङ्बा येसुङि बिस्वास चोगु, हिट्नुङ् खान् लोक् कापाङ्ठाङ्ङिगा याप्मिचिङा मुक्टि ओटोगुटु॥” 32 हिट्नुङ् पावाल लोक् सिलासङा टाङ्बाङाना रिङ् उन्लोक् हिट्नुङ् ओपाङ्ङि उलिसागा ख्वाप्पा याप्मिचि लोङ्सा पारचार चोगाचुए॥ 33 हिट्नुङुना हिट्ना युसा डोक् हाकिमङा पावाल लोक् सिलासङाना उन्चि खेसिक् वासिडुबिडुचे॥ हिट्नुङ् उन् लोक् ओपाङ्ङिगा जाहान्चिङा बाप्टिस्मा ओलाडुए॥ 34 हिट्नुङ् हाकिमङा पावाल लोक् सिलास ओपाङ्ङि चामा चासिङा खाट्टुचे॥ उन् हिट्नुङ् ओपाङ्ङिगा जाहान्चिङा माङ्हाङ्ङि बिस्वास ओचोगुनाँ हिट्नागा सोब्बे हारका उलिसे॥ 35 हान्डेङ् भेनिक् खालाङ्गाङिगा हाकिमचिङा “पावाल लोक् सिलास लेडानुम्चिम्” पिक्सा आग्याँ उपिडुचिउङ् उन्चि टिलिङ्गाचि ओपाङ्सुचे॥ 36 हिट्नुङ् खाम्बाङ्ङिना हाकिमङा पावाल ना रिङ् लोडुए, “खालाङ्गाङिगा हाकिमचिङा खान्चि होट्टानुम्चिम् पिक्सा खाबोर ओपाङ्सुएसुए॥ हाट्ले खान्चि भारा होन्डाचिउङ् हारका लिसाचिउङ् खाडाचि॥” 37 टरो पावालङा हिट्नागा लोडुचे, “आन्च्याँ रोमि नागारिक लिसाचिउङ् चा पाक् फाट्टुर चा मिटोक्ङे याप्मिचि सोरि आन्याँ याप्मि ओलेम्से, हिट्नुङ् खाम्बाङ्ङि चा याप्मिओछाक्टे॥ हाट्लेम्बाक् सोगोप् आन्याँ लेट्मा ओकोन्येट्गि? नापाराम् लिनिना॥ हिट्नागा आप्पे ओआप्युङ् आन्च्याँ याप्मि ओहोट्याक्॥” 38 पावालङा लोडुचिगा रिङ् टिलिङ्गाचिङा ओखाडाउङ् हाकिमचि ओखेम्मेट्टुचे॥ पावाल लोक् सिलास रोमि नागारिक रैछो नुङ् ओखेम्सुङ् हिट्नागा उकिट्टे॥ 39 हिट्नुङ् हिट्नागा ओआबाउङ् पावाल हिट्नुङ् सिलासलोक् माफ ओनाक्टुचे, हिट्नुङ् हिट्नागाचि खाम्बाङ्लाम्मा भारा ओहोटुचिउङ् “ना खालाङ्गा नाडाचुङ् खाडाचि” नुङ् बिन्टि ओचोगुचे॥ 40 हिट्नुङ् हिट्नागाचि खाम्बाङ्लाम्मा होन्डाचिउङ् लिडिया ओपाङ्ङि खाडाचे॥ हिट्नुङ् हिट्नि बिस्वासिचिलोक् उटुबे हिट्नुङ् हिट्नागा आँट् पिडाचुचिउङ् हिट्नालाम्मा लाम्टियाचे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.