मुलिचेला टोॽवा 14 - आठपहरियाआइकोनियान खालाङ्गाङि पावाल लोक् बारनाबास 1 एन्टिओखिया खालाङ्गा गाड्डे डोक् आइकोनियान खालाङ्गाङि चा पावाल लोक् बारनाबास साडे गाड्डे याहुदिचिगा छुम्मापाङ्ङि खाडाचे॥ हिट्नागाचि छुम्मापाङ्ङि लिगाचिउङ् आड्डिक् निङ्ग्वा डोक् खोट्टुलोक् चेक्टाचे हिट्नुङ् हिट्नि उलिसागा जोम् याहुदिचि हिट्नुङ् गिरिक् याप्मिचिङा चा टाङ्बा येसु खिरिस्टङि बिस्वास ओचोगुए॥ 2 टरो आबिस्वासि याहुदिचिङा पानिछोङ्बाचि मुसिक्पा ओचाट्टुचिउङ् बिस्वास काचोक्बा भुम्भु-झान्झाचिगा बिरुद्दाङि ओकोबे॥ 3 हिट्नुङ् चा पावाल लोक् बारनाबास हिट्ना खालाङ्गाङि याप्मा लेन् सोम्मा युङाचे॥ हिट्नागाचि टाङ्बाङाना बारेङि मिकिट्ने चेक्टाचे॥ टाङ्बाङा उन्चि मुक्लाम्मा डोङ् ठोङ्डिना टोॽवाचि हिट्नुङ् चिन्ना चोक्माना बोल् पिडुचिउङ् हिट्नागाचिङा माट्टाचुना दायाङाना खाबोर छेम्बाना ए पिक्सा पारमान् चोगुए॥ 4 टरो हिट्ना खालाङ्गाङिगा याप्मिचि आ-आप्पे ओसाम्डे॥ इम्टेप्मा मुलिचेलाचिलेङ्, इम्टेप्मा याहुदिचिलेङ् ओखाडे॥ 5 हिट्नुङ् आम्टेप्मा पानिछोङ्बाचि हिट्नुङ् याहुदिचिगा उन्चि ओठेडोङ्चि ओटोङाउङ् पावाल लोक् बारनाबास बिरुद्दाङि ओकोबाउङ् लिङ्गेॽवाङा लेप्माचिगा योजाना ओचोगुए॥ 6 टरो पावाल हिट्नुङ् बारनाबासङा ना रिङ् ठाहा टोगाचुए, हिट्नुङ् हिट्निलाम्मा लुकोनिया खालाङ्गाङिना लुस्टरा लोक् डारबि हिट्नुङ् याम्बा-नाआम्बागा छेट्रालेङ् पिन्डाड्डाचे॥ 7 हिट्नि चा हिट्नागाचिङा नुना खाबोर पारचार चोगाचुए॥ लुस्टरा लोक् डारबि खालाङ्गा 8 लुस्टरा खालाङ्गाङि लाम्टिमा हिनिना ठिबाङ् याप्मि डाना॥ हिट्ना पोङ्सानामे डोक् खोट्लेङ्ना हिट्नुङ् खोना बेला चा लाम्टिनिगेट्न्याट्निना॥ 9 हिट्नि हिट्नाङा पावालङा माट्टुगा रिङ् खेम्सा युङेसाना॥ पावालङा हिट्ना नुलोक् पुयुए हिट्नुङ् हिट्ना याप्मिङि नुमानिङ् लिना बिस्वास लिसाना उन्ङा निसुए, 10 हिट्नुङ् टुक्लोक् राट्टुङ् लोडुए, “कोबा हिट्नुङ् कालाङ्ङा येप्टु॥” हिट्नुङ् हिट्ना याप्मि मुक्चोप् कोबे हिट्नुङ् लाम्टिमा ठालाँ चोगुए॥ 11 हिट्नुङ् याप्मिचिङा पावालङा नाड्डेना टोॽवा चोगुना उनिसुङ् हिट्नागाँ उन्चि लुकोनिया रिङ्ङि नाट्डे पिक्सा उराट्टाउङ् उपिगे, “साम्माङ्चि याप्मिचि उलिसाउङ् आनि सोरि ओटाएगा रैछो॥” 12 हिट्नागाँ बारनाबास लोङ्सा जिउस साम्माङ् हिट्नुङ् पावालम्बाक् मुलि रिङ् कामाप्बा लिसानाँ हारमेस साम्माङ् ओलोडुचे॥ 13 खालाङ्गा सोरि जिउस साम्माङ्ङाना माङ्ठाना डाना॥ हिट्ना माङ्ठानाङिना पुजारिङा फुङ्चि हिट्नुङ् भोक् पिमा बोहोरचि आप्टुचिउङ् खालाङ्गाङाना ढुवारिक्ङि आबे॥ हिट्नुङ् हिट्ना पुजारि हिट्नुङ् याप्मिचिङा बारनाबास लोक् पावालङि भोक् ठाङ्माना निङ्ग्वा ओचोगुए॥ 14 ना रिङ् मुलिचेलाचि पावाल लोक् बारनाबासङा ठाहा टोगाचुनामे निङ्ग्वा सागु लिसाचिउङ् उन्चि लोट्लिङ् सेङ्साचुङ् याप्मिचि सोरि पिन्सा खाडाचिउङ् राट्सा पिगाचे, 15 “हाउ भुम्भु-झान्झाचि, पोङ् खानि नाड्डे ओचोगिटिगा? आन्च्याँ चा खानि गाड्डे डोक् दुखेसुखे टोॽवा काचोक्बा याप्मि डोक्॥ आन्च्याँम्टे नाड्डेगा टोॽवा लाहाब् लिनिगा रिङ्चि नाडानुमुङ् उहिङ्ग्वाट् माङ्हाङ्लेङ् नोक्टानि नुङ् नुना खाबोर पारचार चोक्सिङा नाहि आबाचिङागा॥ उन्ङा डोक् टाङ्साङ्, नारा, सामुन्दरा हिट्नुङ् हिट्नि लिसागा ख्वाप्पा थोक्चि सिरिस्टि चोगुचे॥ 16 आच्छो बेलाङि सोब्बे याप्मिचि माङ्हाङ्ङा उन्चि रितितिथि गाड्डे आपुङ्गे चोक्मा पिडुचे॥ 17 टरो उन्ङा याप्मिचिङि ओचेट्नुना टोॽवा चोगुङ् उन् लिसाना रिङ् निमेट्टुचे॥ उन्ङा टाङ्साङ्लाम्मा व्हेट् ठेन्डुङ् ठिक्का बेलाङि डोक् चासोङ् आपियुक् हिट्नुङ् खानि औधि डोक् चामा-ठुङ्मागा थोक्चि मापिडिउङ् खानि निङ्ग्वा हारका माचोगिबिडिटि॥ नागा सोब्बे टोॽवाङा डोक् उन्ङाना साँचि पिडुटु॥” 18 नागा सोब्बे रिङ्चि माट्टाचुङ् पावाल लोक् बारनाबासङा हिट्नागा याप्मिचि भोक् ठाङ्मा लोङ्सा बोल्लेङा छाक्टाचुए॥ 19 हिट्नुङ् हिट्नि आम्टेप्मा याहुदिचि एन्टिओखिया हिट्नुङ् आइकोनियान खालाङ्गालाम्मा ओटाए॥ हिट्नागाँ जोम् याप्मिचि मुसिक्पा ओचाट्टुचिउङ् पावाल लुङ्गेॽवाङा ओलेप्टुए, हिट्नुङ् हिट्नागाँ पावाल सिए नुङ् उमिट्टाउङ् खालाङ्गालाम्मा डोरोरो साट्सा ओखाट्टुङ् भारा ओलेप्टुए॥ 20 टरो जब येसु डाङ्बाङा ओचेलाचि ओटायाउङ् पावालङाना याम्बा-नाआम्बा उछुमे, हिट्नुङ् पावाल कोबे हिट्नुङ् हिट्ना खालाङ्गालेङ् डोक् नोक्टा खाडे॥ हिट्नुङ् हान्डेङ् फेरा उन् बारनाबासलोक् डारबि खालाङ्गाङि खाडे॥ पावाल लोक् बारनाबास एन्टिओखियाङिना सिरियाङि 21 पावाल हिट्नुङ् बारनाबासङा डारबि खालाङ्गाङि नुना खाबोर पारचार चोगाचुङ् जोम् याप्मिचिङा येसु डाङ्बाङि बिस्वास ओचोगुए॥ हिट्नुङ्ना हिट्नागाचि लुस्टरा, आइकोनियान हिट्नुङ् पिसिदियाङिना एन्टिओखियाङि नोक्टाचे॥ 22 हिट्नागाचिङा येसु डाङ्बाङि बिस्वास काचोक्बाचि बिस्वासङि बोलियो लिसानि पिक्सा आँट् पिडाचुए, हिट्नुङ् “माङ्हाङ् उमुलुक्ङि खाप्मा नुङ्ना उटुम्ङि आनि याङ्छामा, निङ्गुवा सागु हिट्नुङ् खेदो आङ्मा डोक् कोन्युक्” पिक्सा हिट्नागा लोडाचुचे॥ 23 हिट्नागाचिङा सोरोक् माङ्पाङ्ङि ओठेडोङ्चि सेगाचुए हिट्नुङ् उपासा युङाचिउङ् बिन्टि चोक्सा हिट्नागालोङ्सा उन्चिङा आप्पे बिस्वास ओचोगुना येसु डाङ्बाङाना उमुक्ङि सामारपान् चोगाचुए॥ 24 हिट्नुङ् पावाल लोक् बारनाबास पिसिदिया छेट्रा लिसाचिउङ् पामफिलिया छेट्राङि टायाचे॥ 25 हिट्नागाचिङा पारगा खालाङ्गाङि चा नुना खाबोर पारचार चोगाचुए, हिट्नुङ् आटालिया खालाङ्गालेङ् खाडाचे॥ 26 हिट्नुङ् हिट्नागाचि आटालियालाम्मा चुवाखोङ्डाङ्ङि ठाङाचिउङ् एन्टिओखिया खालाङ्गाङि नोक्टाचे॥ ना सिरियाङिना एन्टिओखिया खालाङ्गाङिगा बिस्वासि भुम्भु-झान्झाचिङा पावाल हिट्नुङ् बारनाबास लोङ्सा माङ्हाङ्ङाना ओदायाङि ओटोॽवा चोक्मालोङ्सा ओसेगुचिउङ् ओपाङ्सुएसुचिगा डागा हिट्नुङ् हिट्ना टोॽवा चोग्मा हिडाचुङ् हिट्नागाचि हिट्नि डोक् नोक्टा टायाचे॥ 27 एन्टिओखियाङि नोक्टा टायाचिउङ् हिट्नागाचिङा माङ्पाङ्ङिगा सोब्बे याप्मिचि छेम्डाचुचे॥ हिट्नुङ् माङ्हाङ्ङा उन्चिलाम्मा चोगुना टोॽवा बारेङि ख्वाप्पा रिङ् माट्टाचुए, हिट्नुङ् खोड्डे पारिक् पानिछोङ्बाचि लोङ्सा चा उन्ङा बिस्वास चोक्माना लाम्बो टेयार चोगुएना हिट्ना रिङ् चा माट्टाचुए॥ 28 हिट्नुङ् हिट्नागाचि एन्टिओखियाङिना माङ्पाङ्ङिगा भुम्भु-झान्झाचिलोक् याप्मा लेम्बा सोम्मा युङाचे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.