२ तिमोथि 3 - आठपहरियाआन्ते बेलाङाना बारे 1 आखेरि लेम्बाङि किप्माडुङ् लिगा बेला टायुक् नुङ् खान्ङा कानिङ्ग्वाङि मिट्टु॥ 2 पोङ्भोने हिट्ना बेलागा याप्मिचि आप्पेलोङ्सा एडोक् माया काचोक्बा, ओफाबा एरोक् कामाँ चोक्मा निङ्ग्वा कापिबा, ओठेयुजागा, धामास कापिबा, आरु खिजेक्पा काचाट्, मामा-पाबाचिगा रिङ् ओटेन्निगा, आधान्याबादि हिट्नुङ् आधारमोति उलियुक्॥ 3 माया ओचोक्निगा, छेमा पिमा ओटेन्निगा, आरुङागा बिरुद्दाङि ओचाफेन्लोक् रिङ् काचोक्, वालाफेडुबा, आप्पेलोङ्सा आधिन्ङि उयुङ्निगा, आरु दुखे कापिबा, ओचेट्नुगा रिङ् चिम्मा काफुट्बा, 4 धोका कापिबा, फेलेवाले चोक्सा वाना, होप्मो-होप्मो चोक्सा लाम्टिना, माङ्हाङ् माया चोक्मा ओसाट्टोङि मोज्मोज्जाङि निङ्ग्वा टिसुना, 5 हिट्नुङ् धारमाकारमा चोगि गाड्डे काचोक्बा, टरो हिट्निना साक्तिम्बाक् लाट्मा इन्कार ओचोगुगा॥ नाड्डेगा याप्मिचिलाम्मा खान् लाम्माङ् डोक् युङा॥ 6 पोङ्भोने हिट्नागा माड्डेङि कोइ-कोइ पाङ्-पाङ्ङि लिक्सा पापङा काङुचिगा हिट्नुङ् सोब्बे पारिक्ङागा ओचाफेन्ना निङ्ग्वाङा एरोक् इप्टुचिगा मुरखा मेन्झेमाचि उन्चि मुठिङि उयुङ्सुचिगा॥ 7 हिट्नागा मेन्झेमाचि सिकाँम्बाक् सोरोक् सिकाँ उलिगा, टरो छेम्बाना रिङ्उम्बाक् पाइना हिट्ना साम्मा डोक् उहिडुन्गा॥ 8 यान्नेस लोक् याम्बेरसङा मोसाङाना बिरोध चोगाचु गाड्डे डोक्, नागा याप्मिचिङा चा छेम्बाना रिङ् बिरोध ओचोगुगा॥ नागाँगा ठोना डोक् जाखाम् लिसाइसे हिट्नुङ् हिट्नागागाँ बिस्वास डोक् छेम्बाना माखाक्॥ 9 टरो हिट्नागाँ सोरोक् हिट्नाडे चोक्मा उहिडुन्ना, पोङ्भोने यान्नेस लोक् याम्बेरस गाड्डे डोक् हिट्नागा मुरखा नुङ् सोब्बेङा ठाहा ओटोगुटु॥ तिमोथिलोङ्सा पावालङाना हिसिक्मा 10 हाट्लेम्बाक् खान्ङा आहिसिक्मा, आङाना चाट्ला, आचोलाङाना योजाना, आङाना बिस्वास, आङाना माया, आङाना आङ्माना बोल् खान्ङा आनिसुएसुए॥ 11 हिट्नुङ् एन्टिओखियाङि, आइकोनियानङि हिट्नुङ् लुस्टराङि खाड्डे पारिक् याङ्छामा हिट्नुङ् आरुलाम्मा याङ्छामा आङ्डुङेना हिट्ना रिङ् खान्ङा नुलोक् बुझा आचोगुएसुए॥ टरोचा टाङ्बाङा हिट्नागा सोब्बे याङ्छामालाम्मा याङ्हिङ्मेट्टे॥ 12 खिरिस्ट येसुङि धारमोति लिमा निङ्ग्वा काचोक्बाङा आरुलाम्मा याङ्छामाउङ् आङ्मा डोक् कोन्युक्॥ 13 टरो ओभेन्गा याप्मिचि हिट्नुङ् कासुप्बाचिङा आरु उसुबुचिगा हिट्नुङ् आप्पे चा आरुङा उसुबुचिचि, हिट्नुङ् हिट्नागा झान् झान् ओभेन्गा लिसा ओखाट्युक्॥ 14 टरो खान्उम्बाक् खान्ङा सिकाँ आलिसाना हिट्नुङ् छेम्बाना ए नुङ् बिस्वास आचोगुना रिङ्ङि लाहाब् लिसायाक्टा॥ हिट्नागा रिङ् खान्ङा साक् साक्लाम्मा सिकाँ आलिसेना हिट्ना खान्ङा ठाहा आटोगुएसुए॥ 15 हिट्नुङ् कापिच्छा बेलालाम्मा डोक् खान्ङा सेङ्सेङ्ना धारमाछाप्ला बारेङि ठाहा आटोगुएसुए॥ नागा रिङ्ङा डोक् खान् खिरिस्ट येसुङि लिसाना बिस्वासलाम्मा टोगुम्ना मुक्टि बारेङि बुजा चोक्माना ठोना मापियुक्॥ 16 सोब्बे धारमाछाप्ला माङ्हाङ्लाम्मा टायाना ए, हिट्नुङ् ना हिसिक्मा, आरति पिमा, सोज्याँ चोक्मा, हिट्नुङ् धारमोति याप्मि लिमा तालिम पिमाउङ्सा आड्डिक् नुना ए॥ 17 हिट्नुङ् माङ्हाङ्ङाना ओयाप्मिचिङा सोब्बे पारिग्गा नुगा टोॽवाचि चोक्मा उहिडुवाक् नुङ् डोक् धारमाछाप्ला पिबालाक् ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.