२ तिमोथि 1 - आठपहरिया1 माङ्हाङ् उनिङ्ग्वा गाड्डे आङा पावाल खिरिस्ट येसुङाना मुलिचेला लिमा याङ्सेगे हिट्नुङ् खिरिस्ट येसुङि लिसाना चोलाङाना चामारसिङा बारेङि माप्मा लोङ्सा आङा याङ्पाङ्से॥ 2 आइछा गाड्डेना तिमोथि, ना चिट्ठि खान् लोङ्सा आङा छेप्टुङ्गेट्टुङ्॥ आनि माङ्हाङ् पाबा हिट्नुङ् टाङ्बा खिरिस्ट येसुङाना मायादाया, लुक्माटुक्मा हिट्नुङ् हाङ्हाङ् खान्लोक् उलियाक्॥ पावालङा तिमोथि आँट् पिडुना 3 आटुबाठेबाचिङा सेवा ओचोगु गाड्डे डोक् आङा चा चोखो मिप्माना बोल्ङा माङ्हाङ्ङाना सेवा चोगुङ्टुङ्, हिट्नुङ् सोरोक् आङा लेम्बासेम्बा बिन्टि चोगुङ्नाँ खान् मिट्सा माङ्हाङ्ङि पोए-पोए ठाङ्सुङ्टुङ्॥ 4 खान् आहाबाना मिट्टुङ्नाँ खान् टुब्माना आड्डिक् आनिङ्ग्वा लोसाइसे॥ आन्चि फेरि टुबाचे भोने, आङाना आड्डिक् आचाप् टायुक्॥ 5 खान्ङि लिसाना हिट्ना छेम्बाना बिस्वास आङा मिट्टुङ्टुङ्॥ हिट्ना बिस्वास डोक् पाइले काटुडुमा लोइस लोक् कामा युनिसङि डाना, हिट्नुङ् आझै हिट्ना बिस्वास डोक् खान्ङि चा युङ्ग्वा नुङ् आङा निस्चित लिसाइसाङे॥ 6 हिट्डेउङ् आङा हिट्ना रिङ् मिट्टु नुङ् लोनाँ, आङा खान् उठुङ्ङि आमुक् युङ्सुङुङ् खान्ङा आटोगुना माङ्हाङ्ङा मापिडाना बारदान आहिदुलोक् चालाँ चोगु॥ 7 पोङ्भोने माङ्हाङ्ङा आनिलोङ्सा किट्टिना हाङ्सा माखाक् टरो बोल्, माया हिट्नुङ् आप्पे लोङ्सा आधिन्ङि युङ्माना हाङ्सा आपिडैसे॥ 8 हिट्डेउङ् आनि टाङ्बाङाना बारेङि माप्मा मोन्निसिनेन्, हिट्नुङ् आङा आनि डाङ्बाङाना उनिङ्ङि खाम्बाङ्ङि ठायाङे नुङ् मोन्निसिनेन्॥ टरो खान् चा आङालोक् नुना खाबोर खेम्मेप्मा याङ्छामा फोगु॥ ना चोक्मा लोङ्सा माङ्हाङ्ङा खान् बोल् मापियुक्॥ 9 उन्ङा डोक् आनि आहिङ्ग्मेट्टाउङ् आप्पे उन्ङाना सेङ्सेङ्ना याप्मि लिमा आछेम्डे॥ आन्याँ चोगुम्माना टोॽवाङा माखाक्, टरो आप्पे उनिङ्ग्वा हिट्नुङ् ओमायादायाङा माङ्हाङ्ङा आनि आछेम्डे॥ ना मायादायाउम् टे नारा सिरिस्टि लिमा पाइले डोक् आनिलोङ्सा खिरिस्ट येसुलाम्मा आपिडाइसाना॥ 10 हाटले ना मायादाया आनि काहिङ्मेप्बा डाङ्बा खिरिस्ट येसु उङ्साउङ् माङ्हाङ्ङा आनि सोरि आनिमेट्टाइसे॥ उन्ङा डोक् आसेट्ना बोल् जाखाम् चोगुए हिट्नुङ् नुना खाबोरलाम्मा खोना बेला चा लाट्निना चोला आनिमेट्टे॥ 11 माङ्हाङ्ङा ना नुना खाबोर खेम्मेप्माचि लोङ्सा डोक् आङा पारचार काचोक्बा, मुलिचेला हिट्नुङ् काहिसिक्बा लिमा नियुक्ता याङ्चोगे॥ 12 हिड्डेउङ् आङा याङ्छामा आङ्डुएट्टुङ्॥ टरो आङा मोन्निङ्सिनिङ्ना पोङ्भोने आङा साक्ङि बिस्वास चोगुएसुङेना हिट्ना ठाहा टोगुएसुङे॥ हिट्नुङ् उन्ङा आङा जिम्मा याङ्पिडाना रिङ् उन्ङा डोक् हिट्ना बेला सोम्मा लोङ्सा जागेडा चोगुङ् युङ्सुटु नुङ् आङा ढुक्का वाङेट्ङा॥ 13 खिरिस्ट येसुङि लिसाना बिस्वास लोक् मायाङि खान्ङा आङालाम्मा आखेम्सुगा नागा छेम्बागा रिङ्चिगा नामुनाङाना सिको चोगु॥ 14 काजिम्माङि आटोगुना नुगा-नुगा हिसिक्माचि आनिङि युङ्ना सेङ्सेङ्ना हाङ्साङाना बोल्ङा नुलोक् कुप्टु॥ 15 एसिया छेट्राङि उयुङागा जोम् बिस्वासिचिङा याङ्ओनाडागा रिङ् खान्ङा ठाहा आटोगुएसुए॥ हिट्नागा माध्येङि फुगेलास हिट्नुङ् हारमोगेनास धारिङा याङ्नाडाचे॥ 16 ओनेसिफरस हिट्नुङ् ओपाङ्ठाङ्ङिगा याप्मिचि टाङ्बाङा लुक्मा उटुक्टुचियाक्, पोङ्भोने उन्ङा आङा याप्मा खेप् खाम्बाङ्ङि लिसाङ्ना आङा टुब्सिङा टाए हिट्नुङ् आँट् याङ्पिडे, हिट्नुङ् आङा खाम्बाङ्ङि वासाङ्नाँ चा उन् मोन्निसिनेट्नि॥ 17 टरो जब उन् रोमङि आबे, उन्ङा आङा मिटुप्मे सोम्मा याङ्कोलायाक्टे॥ 18 टाङ्बाङाना लेम्बा उन् टाङ्बाङा लुक्मा उटुक्टुवाक्॥ आङा एफिसासङि वासाङ्ना बेला उन्ङा आम्टेप्मा औधि घुवार याङ्फाडाना रिङ् खान् लाउङ्सा नुलोक् डोक् ठाहा युङ्ग्वा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.