२ थेसालोनिकि 3 - आठपहरियाबिन्टि बारे 1 आन्तेङि भुम्बु-झान्झाचि हिट्नुङ् आनो-आन्झाचि, आन्याँ लोङ्सा बिन्टि चोगानि नुङ् लोनाँनि॥ हिट्नुङ् टाङ्बाङाना खाबोर खानि माझाङि टाया गाड्डे डोक् ख्वाप्पालेङ् एला डोक् उछिन्याक् हिट्नुङ् मान् ओचोगुवाक् नुङ् बिन्टि चोगानि॥ 2 हिट्नुङ् आड्डिक् ओभेन्गा याप्मिचिलाम्मा माङ्हाङ्ङा छुट्कारा याप्मि उपियाक् नुङ् बिन्टि याप्मिचोगाबिडा, पोङ्भोने याप्मा याप्मिचिङा नुना खाबोरङि बिस्वास ओचोगुन्गा॥ 3 टरो टाङ्बाउम् बिस्वासिलो वाहेट्॥ उन्ङा डोक् खानि बोल्लेउ माचोगिटि हिट्नुङ् सैतानलाम्मा जोगाँ माचोगिटि॥ 4 आन्याँ लोनानिगा नागा रिङ् खानिङा आचोगुएट्टुम् हिट्नुङ् सोरोक् आचोगुम्टुम् नुङ् टाङ्बाङि आन्याँ ढुक्का लिसिएसिङे॥ 5 माङ्हाङ्ङा खानि माया माचोगिगा रिङ् बुझा चोक्माना लोक् खिरिस्टलाम्मा टोगुम्ना आङ्माना बोल् टाङ्बाङा डोक् खानि मानिमेट्टेयाक्॥ सोब्बेङा टोॽवा चोक्मा कोन्युक् 6 भुम्भु-झान्झाचि हिट्नुङ् आनो-आन्झाचि, आनि टाङ्बा येसु खिरिस्टङाना उनिङ्ङि आन्याँ खानि आग्याँ पिनाँनि, टोॽवा ओचोक्निगा स्वाकायु हिट्नुङ् आन्याँ हिसिक्टुम्चिम्मागा रिङ् ओटेन्निगा ख्वाप्पा बिस्वासिचिलाम्मा लाप्माङ् युङानि॥ 7 पोङ्भोने आन्याँना सिको खोड्डे पारिक् चोक्मा कोन्युक्ना नुङ् खानि आप्पेङा डोक् ठाहा आटोगुएसुम्मे॥ आन्याँ खानिलोक् वासिङानाँ टोॽवा चोक्मा आन्याँ स्वा युनेट्नि॥ 8 आन्याँ साङागा चा ओफाबा मिहुङ्ङे पाक्चा चानेट्निम्मा ठुङ्नेट्निम्मा॥ टरो खानि खोनालाउङ्सा चा दुखा उलिन्याक् नुङ् आन्याँ लेन्सेन् निङ्ग्वा पिडुम्मुङ् टोॽवा चोगिङे॥ 9 खानिलाम्मा आन्याँ घुवार टोक्मा कोन्ना आधिकार वानेट्निउङ् माखाक्, टरो आन्याँ चाट्ला खानि लोङ्सा सिको चोक्माना रिङ् उलियाक् नुङ् हिट्डे चोगिङे॥ 10 आन्याँ खानिलोक् वासिङाना बेला खानि नाड्डे लोनाने, “कोइङा टोॽवा चोगुन्ना भोने हिट्नाँ ओचोन्चा॥” 11 पोङ्भोने खानि माड्डे आम्टेप्मा टोॽवा डोक् मिचोक्ङे स्वाकाट्सा आयुङिएसे, हिट्नुङ् हिट्नागा आप्पेम्बाक् पाक्चा ओचोक्निगा, टरो आरुङागा टोॽवाङि ओबान्डुचिगा रिङ् आन्याँ खेम्सुएसुम्मे॥ 12 हाट्ले नाड्डेगा याप्मिचि लाउङ्सा टाङ्बा येसु खिरिस्ट उनिङ्ङि आन्याँ नाड्डेना आग्याँ हिट्नुङ् आरति पिडुम्चिम्चिम्मा, हिट्नागा स्वाक् मिचेक्ङे उन्चि टोॽवा ओचोगुवाक् हिट्नुङ् आप्पे टोॽवा ओचोगुङ् कामाँ ओचोगुङ् ओच्वाक्॥ 13 टरो भुम्भु-झान्झाचि हिट्नुङ् आनो-आन्झाचि, खानिम्बाक् नुलोक् चोक्माङि खोना बेला चा पोप्नेनिन्॥ 14 खानिङि कोइङा ना चिट्ठिङि छेप्टुम्माना रिङ् पालान् चोक्मा टेन्निना भोने, हिट्ना साइना नुङ् मिसेन् निसानुम्, हिट्नुङ् हिट्ना खेम्गेन्डोक् लाप्नेनुम्, हिट्नाड्डेउङ् हिट्ना आप्पे मोन्युसियुक्॥ 15 हिट्नुङ्चा हिट्ना खानि साट्टुरचि गाड्डे चाट्ला मेट्नेनुम्, टरो खानि आप्पे झान्झा मिटानुमुङ् ओछेक्छेक् चोगानुम्॥ आखेरि रिङ् 16 हाट्ले आनि हाङ्हाङ् कापिबा टाङ्बा आप्पे उन्ङा डोक् सोरोक् हिट्नुङ् सोब्बे बेला खानि हाङ्हाङ् मापिड्याक्॥ हिट्नुङ् खानि सोब्बेलोक् टाङ्बा उलियाक्॥ 17 आङा पावालङा आप्पे आमुक्ङा डोक् बाबा ए पिक्सा छेप्टुएट्टुङ्॥ आङा छेप्टुङ्ना चिट्ठि नुङ् सोब्बेङा ठाहा टोग्माना पाराम्बाक् ना डोक् ए॥ आङा सोब्बे चिट्ठि ना पारा डोक् छेप्टुङ्गा॥ 18 आनि टाङ्बा येसु खिरिस्टङाना मायादाया खानि सोब्बेलोक् उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.