२ थेसालोनिकि 1 - आठपहरिया1 आन्याँ माङ्हाङ् पाबा हिट्नुङ् टाङ्बा येसु खिरिस्टङि बिस्वास काचोक् थेसालोनिकि माङ्पाङ्ङिगा लाउङ्सा आङा पावाल, सिलास लोक् तिमोथिलाम्मा ना चिट्ठि छेप्टुएट्टुम्मा॥ 2 माङ्हाङ् पाबा लोक् टाङ्बा येसु खिरिस्टङाना मायादाया लोक् हाङ्हाङ् खानिङि उलियाक्॥ खिरिस्टङाना न्याए 3 भुम्बु-झान्झाचि हिट्नुङ् आनो-आन्झाचि, खानि लोङ्सा सोरोक् आन्याँ माङ्हाङ् पोए-पोए पिमा डोक् कोन्युक्, हिट्नुङ् नाड्डे चोक्मा नुयुक्चा, पोङ्भोने खानि बिस्वास माङ्जोम् पोयुगेट्, हिट्नुङ् खानिङा ठिबाङ्ङा आरको औधि जोम् माया चोग्गा चोक् आचोगेट्टि॥ 4 हिट्डेउङ् खानि आरुङा जोम् खेदो माचोगि चा हिट्नुङ् याङ्छामा माचाट्टिचा खानिङाना आङ्माना बोल् लोक् बिस्वास लिसानाँ माङ्हाङ्ङाना माङ्पाङ्ङि आन्याँ नाभुक् ठेना चोगुमाउङ् खानिङाना बारेङि चेक्मा हिडिटिङा॥ 5 माङ्हाङ्ङा सोब्बे याप्मिचि नुलोक् न्याए चोगुचिचि नुङ् नागा रिङ्ङा पारमान् पिडुटु॥ हिट्नुङ् नागा ख्वाप्पा थोक् आङ्डुम्मानाँ माङ्हाङ् उमुलुक्ङिना नुना आलिसिगा याप्मिचि नुङ् खानि उन्ङा मालोडिटि, पोङ्भोने उन्ङाना उमुलुक् लोङ्सा डोक् खानिङा आरुलाम्मा याङ्छामा आङ्डुएट्टुम्॥ 6 माङ्हाङ्ङा खोना चा टो यो मिचोक्ङे न्याए चोगुटु, खानि याङ्छामा काचाट्चि उन्ङा याङ्छामा पिडुचिचि॥ 7 हिट्नुङ् खानि याङ्छामा आटोगुम्गालाउङ्सा उन्ङा छुट्कारा मापिडिटि, हिट्नुङ् उन्ङा आन्याँ चा छुट्कारा याप्मिपियुक्॥ नागा सोब्बे रिङ् टाङ्बा येसु उन्ङाना माङ्बोल्लेउ माङ्हाङ् रिङ् काउग्बाचिलोक् मिङाना ओलाप्कोङि टोनालोग्लाम्मा उङ्ना बेला उन्ङा चोगुटु॥ 8 हिट्नुङ् माङ्हाङ् मिसेन् निमा ओटेन्निगा हिट्नुङ् आनि टाङ्बा येसुङाना नुना खाबोर गाड्डे चोक्मा ओटेन्निगा लोङ्सा उन्ङा साजाए पिडुचिचि॥ 9 हिट्नागाँ खोना बेला चा जाखाम् लिनिना साजाए ओटोगुटु, हिट्नुङ् हिट्नागा टाङ्बाङाना ओटोकानालाम्मा हिट्नुङ् उन्ङाना आड्डिक् बोल्ङाना माहिमालाम्मा ओसाम्युक्॥ 10 जब उन् उङ्युक्, हिट्ना लेम्बा उन्ङाना सेङ्सेङ्ना ओयाप्मिचिलाम्मा उन्ङा माहिमा टोगुटु, हिट्नुङ् उन्ङि बिस्वास काचोक्चि सोब्बे आड्डिक् डोङ् ओठोङ्युक्॥ हिट्नागालोक् खानि चा आलिसिटि, पोङ्भोने आन्याँ उन्ङाना बारेङि लोनानिनाँ खानिङा बिस्वास आचोगुम्मे॥ 11 हिड्डेउङ् माङ्हाङ्ङा जुन् चोला लोङ्सा खानि माछेम्डिए, हिट्ना लोङ्सा उन्ङा योग्ए माचोग्याक्, हिट्नुङ् उन्ङाना बोल्ङा ओचेट्नुना टोॽवा चोक्माना निङ्ग्वा हिट्नुङ् बिस्वासङि सोब्बे थोक् चोक्मा घुवार माफाड्याक् नुङ् आन्याँ खानि सोब्बेलाउङ्सा सोरोक् बिन्टि चोगुम्टुम्मा॥ 12 हिड्डे लिसे भोने खानिलाम्मा आनि टाङ्बा येसुङाना उनिङ् माहिमित लियुक्, हिट्नुङ् उन्लाम्मा खानि चा माहिमित आलिसिटि, पोङ्भोने माङ्हाङ् लोक् टाङ्बा येसु खिरिस्टङाना मायादायाङा चोगुनाँ नागा सोब्बे थोक्चि लियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.