२ पाटरुस 3 - आठपहरियाटाङ्बा उङ्ना लेम्बा बारे 1 मायालु आसाइबाचि, ना खानिलोङ्सा आङा दोस्रो खेप् छेप्टुङ्ना चिट्ठि ए, ना इप्पोक् चिट्ठिङि डोक् आम्टेप्मा रिङ्चि मिप्माउङ्सा खानिगा चोखो निङ्ग्वालोङ्सा आँट् पिमा कोलुएसुङे॥ 2 आच्छो बेला सेङ्सेङ्गा माङ्काटाचिङा ओमाट्टुगा रिङ् हिट्नुङ् मुलिचेलाचिङा माहिसिक्टिगा टाङ्बाङाना आग्याँ खानिङा मिट्टानुम् नुङ् लोनाँनि॥ 3 सोब्बे नुङ्ना पाइले खानिङा ना रिङ् ठाहा टोक्मा कोन्युक्, आखेरि लेम्बा खिजेक्पा काचाट्चि खिजेक्पा चाट्सा हिट्नुङ् आप्पे उन्चिगा ओभेन्गा निङ्ग्वाङि वासा ओटायुक्॥ 4 हिट्नागाँ उमाट्टुटु, “पाक् खिरिस्टङा उङ्ङा पिक्सा चामारसिङा चोगुना माखाइ टे? आनि टुबाठेबाचि उसियाउङ् ओखाडे, टरो नाराङाना सिरिस्टि लिसाना बेलालाम्मा लिसागा सोब्बे रिङ् पाइले गाड्डे डोक् हाट्ले चा युङ्ग्वा॥” 5 हिट्नागाँ सिरिस्टि चोग्बालाक् रिङ् ठाहा ओटोगु चा ओटोगुन्गेट्टुन्गा गाड्डे ओचोग्गा॥ आच्छो बेला डोक् माङ्हाङ्ङा उरिङ्लाम्मा डोक् टोनालोग् चोगुए, हिट्नुङ् उन्ङा नाराम्बाक् चुवालाम्मा चोगुए हिट्नुङ् चुवालाम्मा साम्डुए॥ 6 हिट्नुङ् चुवा ओभेल्ङा डोक् हिट्ना बेलाङिना नारा लुक्टुङ् जाखाम् लिसे॥ 7 हिट्नाड्डे डोक् ना बेला लिसाना टाङ्साङ् लोक् नारा चा मिलाम्मा जाखाम् चोक्माउङ्सा माङ्हाङ् उरिङ्ङा डोक् जोगाँ चोगुङ् युङ्सुएसुए॥ उन्ङा आधारमोति याप्मिचि जाखाम् चोक्माउङ्सा न्याए चोक्माना लेम्बा सोम्मा टाङ्साङ् लोक् नारा युङ्सुएसुए॥ 8 टरो मायालु आसाइबाचि, ना ठिक् रिङ् खानिङा मुन्नेनुम्॥ टाङ्बा लाउङ्सा ठिक् लेम्बा हाजार बारखा गाड्डे हिट्नुङ् हाजार बारखा ठिक् लेम्बा गाड्डे लियुक्॥ 9 कोइ-कोइङा टाङ्बाङा उन्ङाना चामारसिङा पुरो चोक्मा आबेला चोक्युक् नुङ् उमिट्टा गाड्डे उन् आबेला चोक्निना, टरो कोइ चा जाखाम् उलिनेयाट्, टरो ख्वाप्पा काएल्-काबु उलियाक् नुङ् निङ्ग्वा चोगुङ् टाङ्बाङा खानि माहाङ्सेट्टि॥ 10 टरो टाङ्बाङाना लेम्बाउम् टे खोनाङा चा ठाहा ओटोगुन्लोक् याङ्काखुट् गाड्डे डोक् टायुक्॥ हिट्ना बेला टाङ्साङ्ङि ठेना सोरा मुक्युक्, हिट्नुङ् टाङ्साङ्म्बाक् मायुक्॥ टाङ्साङ्ङिगा सोब्बे थोक्चि मिङि टुन्युङ् जाखाम् उलियुक्, हिट्नुङ् नारा हिट्नुङ् नाराङि उलिसागा सोब्बे थोक् जाखाम् उलियुक्॥ 11 नागा सोब्बे रिङ् जाखाम् उलियुक् नुङ् ठाहा आटोगुमुङ् खानिङा आचोगुम्गा ख्वाप्पा थोक्ङि सोजो हिट्नुङ् माङ्हाङ् हारका चोक्माना रिङ्ङि निङ्ग्वा पिमा कोन्युक् नुङ् मिट्टानुम्॥ 12 खानिङा माङ्हाङ्ङाना लेम्बा आहाङ्सुम्नाँ ना एला उलि पिक्सा चोक्माना टोॽवा चोगानुम्॥ हिट्ना बेला टाङ्साङ् मिङि टुन्युङ् जाखाम् लियुक् हिट्नुङ् टाङ्साङ्ङि उलिसागा सोब्बे थोक् मिङा गालाङ् उलियुङ् ओखाट्युक्॥ 13 टरो माङ्हाङ्ङा चामारसिङा चोगुना ओछोङ्ग्वाट् टोनालोग् हिट्नुङ् ओछोङ्ग्वाट् नाराङाना लाम्बो आनि पुयेट्टुम्॥ हिट्नि ख्वाप्पा याप्मिचिङा पाक् नुना हिट्ना एरोक् ओचोगुटु॥ 14 नाड्डेउङ् मायालु आसाइबाचि, खानि नागा रिङ् उलियुक् नुङ् आहाङ्सेट्टुम्नाँ, उन्ङाना ओटोकानाङि खानि सेङ्सेङ्, ओखायोप् माले हिट्नुङ् उन्लोक् हाङ्हाङ्ङि युङ्मा बोल् चोगानि॥ 15 आनि टाङ्बाङा खानि पापलाम्मा हिङ्माना मौका मापिडिनाँ उन्ङा आम्टेप्मा धैइरे चोगेना हिट्ना रिङ् मुन्नेनुम्॥ आनि मायालु झान्झा पावालङा चा माङ्हाङ्लाम्मा टोगुना ठोनालाम्मा ना रिङ् डोक् खानिलोङ्सा छेप्टुए॥ 16 पावालङा उन्ङा छेप्टुगा ख्वाप्पा चिट्ठिङि नागा रिङ् बारेङि डोक् माट्टुए, टरो उन्ङा छेप्टुगा चिट्ठिङिना आम्टेप्मा रिङ्म्बाक् बुजा चोक्मा टुक्ना॥ आम्टेप्मा याप्मिचि जुन् नुलोक् पोढाँ उलिनिगेट्निगा हिट्नुङ् खोना रिङ् बिस्वास चोगुएसुङे हिट्ना रिङ्ङि निस्चित उलिनिगा याप्मिचिङा नागा रिङ् आरु धारमाछाप्ला गाड्डे डोक् हिट्ना रिङ्ङाना उटुप् एकेलेङ् चोकेलेङ् ओमाट्टुटु, हिट्नुङ् नाड्डे ओचोगुङ् उन्चिङा आप्पेलोङ्सा जाखाम्ङि ओठेन्डुटु॥ 17 टरो मायालु आसाइबाचि, खानिङा नागा सोब्बे रिङ् पाइले डोक् ठाहा आटोक्माइडुम्मे॥ हिट्नाड्डेउङ् ओेछेक्छेक् चोगानि, हिड्नाड्डे लिसे भोने ओभेन्गाचिङा फाम्लेङ् चाट्मा माहिडिन्गा, नाभाँम्टे खानिङा माङ्हाङ्ङाना ओलाम्बो आनाडुम्टुम् हिट्नुङ् आमासिटि॥ 18 टरो सोरोक् आनि टाङ्बा हिट्नुङ् काहिङ्मेप्बा डाङ्बा येसु खिरिस्टङाना ओठोना हिट्नुङ् ओमायादायाङि पोसा खाडानि॥ हाट्ले हिट्नुङ् सोरोक् टाङ्बाङाना डोक् उनिङ् टो-टो उलियाक्॥ आमेन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.