२ पाटरुस 2 - आठपहरियामाङ्जोगा काहिसिक्बाचि बारे 1 आच्छोङि इस्राइलि याप्मिचि माझाङि माङ्जो रिङ् काचेक् माङ्काटाचि ओहोन्डे, हिड्नाड्डे डोक् खानि माझाङि चा माङ्जोगा रिङ् काहिसिक्बाचि ओटायुक्॥ हिट्नागाँ सोगोप् जाखाम् आचोक्ना माङ्जोगा रिङ् उहिसिक्टुचिचि हिट्नुङ् हिट्नागाँ उन्चि आप्पेलोङ्सा छुट्कारा कापिबा डाङ्बा चा इन्कार ओचोगुटु॥ हिट्नुङ् आप्पे उन्चि उठुङ्ङि एला डोक् जाखाम् चोक्माना रिङ् ओटाडुटु॥ 2 जोम् याप्मिचि हिट्नागाँगा चिम्मा फुट्टुम्गा ओचाफेन्गा टोॽवालेङ् लाहाब् उलियुक् हिट्नुङ् हिट्नागाँगा टोॽवाङा चोगुनाँ आरु याप्मिचिङा चा छेम्बाना लाम्बो ओचाफेन्लोक् ओचोगुटु॥ 3 नागा काहिसिक्बाचि आड्डिक् लोभिचि उलियुक्, हिट्नुङ् नागाँ माङ्जोगा छिॽवाक् मुन्डुम्चि मालोडिउङ् खानि मासुबिटि॥ माङ्हाङ्ङा पाइले डोक् हिट्नागा साजाए पिमा निङ्ग्वा चोक्मा हिडुएसुए, हिट्नुङ् हिट्नागा जाखाम् चोक्मा उन् ढिलो चोक्निना॥ 4 माङ्हाङ्ङा पाप काचोक् माङ्हाङ् रिङ् काउग्बाचिउम्टे जाखाम् चोगुचे, हिट्नुङ् हिट्नागा योनालोग्ङि लेप्टुडिसुचे, हिट्नुङ् हिट्नि हिट्नागा न्याएङाना लेम्बा सोम्मा डुम्बारिक् डुम्ङि युङ्सुएसुचे॥ 5 माङ्हाङ्ङा आच्छो बेलाङि नाराङिगा याप्मिचिउम् टे जाखाम् चोगुचे, हिट्नुङ् उन्ङाना रिङ् ओटेन्निगा चा चुवाङाना ओभोलङा लुक्टुचिउङ् फ्याङ् नास् चोगुचे, टरो धारमिक्ताङाना बारेङि पारचार काचोक्बा नोआ लोक् आरु सि जाना याप्मिचिउम्बाक् हिङुचे॥ 6 माङ्हाङ्ङा सादोम लोक् गामोरा ओलोडुचिगा खालाङ्गाचिउम् मिङा टुनुचिउङ् फ्याङ् चोगुए॥ नाड्डेउङ् आधारमोति याप्मिचि साजाए पिडुचिगा रिङ् याप्मिचि निमेट्टुचे॥ 7 हिट्नुङ् उन्ङा धारमोति याप्मि लोत चा जोगाँ चोगुए॥ लोत सादामङिगा ओभेन्गा याप्मिचिगा चिम्मा फुट्टुम्गा चाट्लालाम्मा आड्डिक् याङ्छाडाइसाना॥ 8 लोत हिट्नागा ओभेन्गा याप्मिचिगा माझाइ युङाना डाना, हिट्नुङ् लेन्सेन् हिट्नागाँ ओचाफेम्मा रिङ् ओचोगुगा निसुए हिट्नुङ् खेम्सुए, हिट्नुङ् नागा ख्वाप्पा रिङ्ङा उन्ङाना उनिङ्ग्वा आड्डिक् टुगे, पोङ्भोने उन् धारमोति याप्मि डाना॥ 9 नाड्डेउङ् भाक्ति काचोक् याप्मि याङ्छामालाम्मा जोगाँ चोक्मा हिट्नुङ् ओभेन्गा याप्मिचि साजाए पिमा न्याए चोक्माना लेम्बा सोम्मा युङ्मा टाङ्बाङा निसुटु॥ 10 मुलिगारि माङ्हाङ्ङा चिम्मा फुट्टुम्गा रिङ् काचोक्चिलोक् आधिकारङि युङ्मा ओटेन्निगा याप्मिचि साजाए पिडुचिचि॥ नाड्डेगा याप्मिचि ओठेयुजागा हिट्नुङ् उसिङ्सागा उलियुक्, हिट्नुङ् टोनालोग्ङिना पारानिचि खिजेक्पा चाट्मा उकिट्निगा॥ 11 माङ्हाङ् रिङ् काउग्बाचि नागा माङ्जोगा रिङ् काहिसिक्बाचि नुङ्ना चा आड्डिक् साक्तिसालि लोक् माङ्ओठेगा, टरो चा टाङ्बाङाना ओटोकानाङि हिट्नागा टोनालोग्ङिना पारानिचि खिजेक्पा ओचाट्टुचिउङ् फाट्टुर ओलाबुव्ट्टुन्चिन्॥ 12 टरो नागा याप्मिचि ठोनाबा जिवाट्चि गाड्डेगा, नागा लाबुम्चिमुङ् सेप्मा ओपोङ्सा गाड्डेगा, हिट्नुङ् हिट्नागाँ ठाहा डोक् ओटोगुन्गेट्टुन्गा रिङ्ङाना बारेङि ओचाफेन्लोक् ओमाट्टुगा॥ हिड्नाडेउङ् हिट्नागा चा जाङ्गालि जिवाट्चि गाड्डे डोक् जाखाम् उलियुक्॥ 13 हिट्नागाँ आरु याङ्छामा ओचाट्टुचिनाँ हिट्नागा आप्पेङा चा याङ्छामा आङ्मा कोन्युक्॥ हिट्नागा युसा एरोक् माखाक् लेम्बा डोक् चा आड्डिक् मोज्मोज्जा चोक्माउम्बाक् हारकाङाना रिङ् नुङ् उमिट्टुगा॥ खानिलोक् भातेरङि उयुङ्नाँ हिट्नागा आड्डिक् चासाठुङ्सा मोज्मोज्जाङि उलियुक्, हिट्डेउङ् हिट्नागाँ खानि मोम्मासिमा लोक् नाभाक् ठाना रिङ् ओचोगुटु॥ 14 हिट्नागाँ इम्मेप्माजामा टोॽवा चोक्मा माले पाक्चा उन्चि निङ्ग्वाङि उमिट्टुन्गा, हिट्नुङ् पाप चोक्मा नामा डोक् ओनाडुन्गा॥ हिट्नागाँ बिस्वासङि निम्छारो याप्मिचि ढाँट ओफोक्टुचिगा, हिट्नुङ् पाप चोक्मा ओमेट्टुचिगा॥ हिट्नागाँ आप्पेलाउङ्सा आड्डिक् टोम्जिरिॽवा लिमाना रिङ्ङि एडोक् निङ्ग्वा उपिडुगा॥ माङ्हाङ्ङाना साराप हिट्नागा उठुङ्ङि ठायुक्॥ 15 हिट्नागा सिधा लाम्भो ओनाडुङ् बोआर उइछा बालामङा चोगुना गाड्डे डोक् ओचाफेन्मा टोॽवा चोक्मा लाहाब् उलिसे॥ ना बालामङा ओचाफेम्मा टोॽवालाम्मा ओफाबा कामाँ चोक्मा निङ्ग्वा चोगुना डाना॥ 16 हिट्नाङा पाप चोगुनाँ गाधाङा खेमा लाप्टुए॥ चेक्निना गाधाङा याप्मि गाड्डे चेक्टाउङ् हिट्ना छोमाना माङ्काटाङाना ओटोॽवा छाक्टुबिडुए॥ 17 नागा याप्मिचि चुवा मालेगा उपुन्चि गाड्डेगा, हिट्नुङ् हिॽवा हुन्डारिङा मुट्टुना खिमेमा गाड्डेगा ए॥ नागा लाउङ्सा माङ्हाङ्ङा पातालङि माकुन्धेरेक्ना डेन् टेयार चोगुएसुए॥ 18 हिट्नागाँ खेडोक्गा ठे-ठेगा सिङ्सागा रिङ् ओमाट्टुगा, हिट्नुङ् ओचाफेम्मा टोॽवा चोक्मा ओनाडुङ् लोप्मो बिस्वासि उलिसागा याप्मिचि चा हिट्नागाँ उन्चि येम्ङा चिम्मा फुट्टुम्गा रिङ् ओचोगुङ् वारिक्ङि ओठेन्डुचिगा॥ 19 हिट्नागाँ याप्मिचिलोङ्सा सोतान्तर आलिसिए पिक्सा माङ्हुप् ओचोगुगा, टरो हिट्नागा आप्पेम्बाक् जाखाम् काचोक्बाङाना चाकार उलिगा॥ पोङ्भोने जुन् रिङ्ङा याप्मिङाना उनिङ्ग्वा मेट्टुटु हिट्ना रिङ्ङा डोक् हिट्ना चाकार चोगुटु॥ 20 हिट्नुङ् जब याप्मिचिङा आनि टाङ्बा लोक् काहिङ्मेप्बा डाङ्बा येसु खिरिस्ट मिसेन् उनिसुङ् नाराङिना जाखाम्ङि आठेन्ना रिङ्लाम्मा ओहोन्डाउङ् चा फेरि हिट्ना रिङ्ङि डोक् लाहाब् उलियुक् भोने, हिट्नागाँगा आवास्था पाइले नुङ्ना चा झान् ओचाफेन्लोक् लियुक्॥ 21 माङ्हाङ् ओटोकानाङि धारमिक्ताङाना लाम्बो ठाहा ओटोगुङ् चा हिट्नागाँ ओटोगुना सेङ्सेङ्ना आग्याँ पालान् ओचोगुन्ना भोनेम्टे हिट्नागाँ ना लाम्बोङाना बारेङि खोना बेला चा ठाहा ओटोग्वाट्टुन्नाबे ओचेट्नु लिसे बे॥ 22 हिट्नागा ना इप्पोक् उखानङा माट्टु गाड्डे डोक् उलिसाइसे, “कोछुबाङा आप्पे पेसुना ओपेप्मा चामा ठालाँ चोगुटु,” हिट्नुङ् “एॽवा लोबालाक् फाक् फेरि हिलोङि डोक् काङ्युयाक्युक्॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.