२ कोरिन्थि 9 - आठपहरिया1 याहुदियाङिगा माङ्हाङ् ओयाप्मिचि हिट्नागा खिरिस्टङि बिस्वास ओचोगुगा लाउङ्सा भेटि पैसा पिडुम्चिम्ना बारेङि आङा खानिलाउङ्सा छेप्मायाक्मा कोन्निना॥ 2 पोङ्भोने खानिङा आड्डिक् घुवार फामाना निङ्ग्वा आचोगुम्ना रिङ् आङा ठाहा टोगुङ्टुङ्॥ हिट्नुङ् खानि आखैयाङि आलिसिगा नाम्निङ् नुङ्ना डोक् घुवार फामाउङ्सा टेयार आलिसिगा रिङ् माकेडोनियाङि उलिसागा याप्मिचि आनाभुक् ठेलोक् चोक्सा लोडुङ्चिङे॥ हाट्ले खानिङा पिमाना निङ्ग्वा आचोगुम्नाँ हिट्नागाँ चा घुवार फामाना निङ्ग्वा ओचोगेसे॥ 3 टरो ना बिसाएङि खानिगा बारे आन्याँ चोगुम्माना घामान्ड खेरो उखाट्नेयाक्, हिट्नुङ् आङा लोनानिगा गाड्डे डोक् आरु घुवार फामा खानि टेयार आलिसिटि नुङ् आङा तितास लोक् आरु इप्पाङ् बिस्वासिचि पाङ्सुङ्गेट्टुङ्चिङ्॥ 4 कोइ माकेडोनियाङिगा बिस्वासिचि आङालोक् ओआबे भोने, हिट्नुङ् खानि टेयार आलिसिन्गेट्टिन्गा माटुबिए भोने आन्याँ मोन्डिसिइटिङा, हिट्नुङ् खानि चा आड्डिक् मोम्मासिमा आलिसिटि, पोङ्भोने आन्याँ खानिङि औधि भोरोसा युङ्सेसुम्मे॥ 5 नाड्डेउङ् खानिङा काबुल आचोगुम्ना भेटि टेयार चोग्मा घुवार माफाड्याक् नुङ् आङा आप्मा नुङ्ना पाइला डोक् नागा झान्झाचि खानि सोरि पाङ्मा ओचेट्नुयुक् नुङ् मिट्टाङे॥ हिड्डेउङ् हिट्ना भेटि पैसा निङ्ग्वा टुक्सा माखाक्, टरो निङ्ग्वालाम्मा डोक् पिमा कोन्युक्॥ 6 टरो ना रिङ् खानिङा मुन्नेनुम्, “जुन्ङा खाट्टिप्मा एडोक् लालिक् हिसुटु, हिट्नाँ खाट्टिप्मा एरोक् चासोङ् छुम्सुटु, हिट्नुङ् जुन्ङा जोम् लालिक् हिसुटु, उन्ङा याप्मा डोक् चासोङ् छुम्सुटु॥” 7 जुन् याप्मिङा उनिङ्ग्वाङि आम्टेप्मा पिमाना निङ्ग्वा चोगेसुएना, हिट्नाङा मिट्टु टेप्मा डोक् उपिडुवाक्॥ टरो निङ्ग्वा टुग्सा निङ्ग्वा मिटाए मिटाए आथाबा कोइङा पिमा कोन्युक् पिक्सा पिमा ओचेटुनुना लिनिना॥ पोङ्भोने माङ्हाङ्ङा आप्पे उनिङ्ग्वालाम्मा कापिबालाउङ्सा माया चोगुचिचि॥ 8 हिट्नुङ् माङ्हाङ्ङा खानि चाहाब् आलिसिगा नुङ्ना चा याप्मा डोक् आसिक् पिमा माहिडिटि॥ हिट्डेउङ् खोना थोक्ङि चा खानि खोना बेला चा आभोर आलिसिन्गा हिट्नुङ् खानिङा ख्वाप्पा नुना टोॽवा लोङ्सा जोम् पिमा आहिडुम्टुम्॥ 9 धारमाछाप्लाङि नाड्डे छेप्टेसे, “जुन्ङा पाक्चा ओवानिगा लोङ्सा उनिङ्ग्वालाम्मा डोक् घुवार फाडुचिचि, हिट्नाँ चोगुना नुगा टोॽवा हान्डेङ् सोम्मा लियुयाक्युक्॥” 10 माङ्हाङ्ङा टोॽवालासि काचोक् हिमाउङ्सा लालिक् हिट्नुङ् चामाउङ्सा चामागा थोक् पिडुटु॥ हिट्नाड्डे डोक् उन्ङा खानिलाउङ्सा चाहाब् लिना ख्वाप्पा थोक् मापिडिटि हिट्नुङ् जोम् जोम् माचोगिबिडिटि, हिट्नुङ् खानिङा आचोगुम्ना ओचेट्नुना टोॽवा आड्डिक् खुल्ला निङ्ग्वालाम्मा जोम् मापोइबिडिटि॥ 11 खानिङा सोरोक् खानि मुक् फेन्डानुमुङ् पिमा काहिबा लिसानि नुङ् माङ्हाङ्ङा सोब्बे पाराङा जोम् आसिक् मापिडिटि॥ हिट्नुङ् खानिङा आछुम्सुम्ना भेटि चाहाब् उलिसागा आन्याँ पिडुम्चिम्माना हिट्नागाँ माङ्हाङ् पोए-पोए ओठाङ्सुटु॥ 12 खानिङा आछुम्सुम्ना भेटिङा माङ्हाङ् ओयाप्मिचिगा आभोर युमा एडोक् माखाक्, टरो ना सेवालाम्मा जोम् याप्मिचिङा माङ्हाङ्ङि आड्डिक् पोए-पोए ओठाङ्सुटु॥ 13 ना टोॽवालाम्मा खानिङा आप्पेलाउङ्सा आरु पारमान् आपिडेसुम्मे॥ खानिङा खिरिस्टङाना नुना खाबोर बिस्वास आचोगुम्ना रिङ् हिट्नुङ् पालान् आचोगुमुङ् खानि मुक् आफेन्डुमुङ् हिट्नागा हिट्नुङ् सोब्बे बिस्वासिचि घुवार आफासुम्चिम्गा उनिसुङ् हिट्नागाँ माङ्हाङ् उनिङ् ओचोन्डुटु॥ 14 हिट्नुङ् माङ्हाङ्ङाना आड्डिक् याप्मा ओमायादाया खानिङि लिसानाँ हिट्नागाँ आड्डिक् माया माचोगिउङ् खानि लोङ्सा बिन्टि ओचोगुटु॥ 15 माङ्हाङ्ङा आपिडाना माप्मा डोक् हिनिम्ना आड्डिक् बाहुमुल्ये बारदान लाउङ्सा उन्ङाना पोए-पोए उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.