२ कोरिन्थि 8 - आठपहरियानिङ्ग्वालाम्मा डोक् पिमा 1 मायालु बिस्वासि भुम्भु-झान्झाचि हिट्नुङ् नाना-झान्झाचि, माङ्हाङ्ङा माकेडोनियाङिगा माङ्पाङ्ङिगा मायादाया चोगुचिगा रिङ् खानिङा चा ठाहा टोगानुम् नुङ् लोनाँनि॥ 2 हिट्नागाँ औधि याङ्छामा ओआङ्डुनाँ हिट्नागा आड्डिक् हारका उलिसे॥ हिट्नागा पाक्चा ओवानिगा उलिसा चा उन्चि निङ्ग्वालाम्मा डोक् बिस्वासिचि घुवार ओफाडुचे॥ 3 पोङ्भोने हिट्नागाँ उन्चिङा उहिडुलोक् एडोक् माखाक्, टरो हिट्ना नुङ्ना चा याप्मा उन्चि चाप् टायाउङ् उन्चि निङ्ग्वालाम्मा डोक् उपिडुचे नुङ् आङा लोनाँनि॥ 4 हिट्नागाँ यरुसलेमङि उलिसागा बिस्वासिचि चा घुवार फामा ओटोगुम् नुङ् फेरि फेरि आन्याँलाउङ्सा औधि बिन्टि ओचोगुए॥ 5 हिट्नुङ् आन्याँ मिप्मा डोक् मिट्नेट्निम्माना रिङ् हिट्नागाँ ओचोगुए॥ पाइले हिट्नागाँ आप्पेलाउङ्सा टाङ्बाङाना सेवा चोक्मा निङ्ग्वा ओचोगुए, हिट्नुङ् माङ्हाङ्ङाना निङ्ग्वा गाड्डे चोक्मा हिट्नागाँ आन्याँ मुक्ङि चा याप्मि उपिडे॥ 6 नाड्डेउङ् तितासङा पाइलेलाम्मा डोक् खानिगा माझाइ भेटि फोक्माना टोॽवा उटुम् चोगुनाँ हिट्ना पिमाना टोॽवा पुरो चोक्मा खानि घुवार माफाडियाक् नुङ् आन्याँ उन् बिन्टि चोगुम्मे॥ 7 खानिङा पाइले डोक् सोब्बे रिङ् ओचेट्नुलोक् आचोगुएसुम्मे॥ बिस्वासङि खानि बोल्लेउ आवासेट्टि, खानि नुलोक् आचेक्टिगा हिट्नुङ् जोम् आनिसुम्गा॥ खानि सोरोक् पाक् नुना हिट्ना चोक्मा निङ्ग्वा आचोगुम्गा, हिट्नुङ् आन्याँ खानि खोड्डे पारिक् माया चोक्नानेगा हिट्डे पारा डोक् याप्मिचि चोगानुम्चिम्॥ नाड्डेउङ् ओफाबा पिमाना रिङ्ङि चा खानि निङ्ग्वालाम्मा डोक् चोगानुम् नुङ् आन्याँ निङ्ग्वा चोगिटिङा॥ 8 ना रिङ् चोगानुम् नुङ् आङा खानि आग्याँ पिनानिगा माखाक्, टरो आरुङा घुवार फामा आम्टेप्मा निङ्ग्वा ओचोगेट्टुना हिट्ना रिङ् टोङ्सुङुङ् खानि माया छेम्बाना इ माखाक् हिट्ना ठाहा टोग्मा कोलोङ्टुङ्॥ 9 पोङ्भोने आनि टाङ्बा येसु खिरिस्टङाना मायादाया खानिङा ठाहा आटोगुम्टुम्॥ उन् वागाठागा लिसा चा खानि लोङ्सा पाक्चा मालेना लिसे॥ उन् पाक्चा मालेना लिसाउङ् खानि वागाठागा चोक्मा उन्ङा नाड्डे चोगुए॥ 10 हिट्नुङ् खानिङा नाम्निङ् नुङ् ओफाबा पिमाना उटुम् आचोगुम्ना टोॽवा हिडानुम् नुङ् ना साल्लाह खानिगा ओचेट्नु लाउङ्सा पिनाँनि॥ खानिङा पाइले पिमाना रिङ् उटुम् आचोगुम्ना एडोक् माखाक्, टरो हिट्डेना घुवार फामाना रिङ्ङि आड्डिक् निङ्ग्वा आपिडुम्मे॥ 11 हाट्ले खानिङा उटुम् आचोगुम्ना टोॽवा पुरो चोगानुम्॥ पाइले खानिङा पिमाउङ्सा आड्डिक् निङ्ग्वा आचोगुम् गाड्डे डोक् हाट्ले खानिलोक् युङ्ग्वानालाम्मा ना टोॽवा युडानुम्॥ 12 पोङ्भोने खानिङा जे निङ्ग्वालाम्मा पिमा टेयार आलिसिटि हिट्ना माङ्हाङ्ङा लाडुटु॥ हिट्नुङ् खानिलोक् जे युङ्ग्वा हिट्नालाम्मा पिडानुम्, टरो खानिलोक् वानिना थोक् उन्ङा कोलुन्ना॥ 13 खानिङाम्बाक् जोम् याङ्छामा फोगानुम् हिट्नुङ् आरुलोङ्साम्बाक् याङ्-याङ् उलियाक् नुङ् आनिङ्ग्वा माखाक्, टरो सोब्बेलाउङ्सा बोरोबोर उलियाक् नुङ् आनिङ्ग्वा ए॥ 14 ना बेला खानिलोक् जोम् युङ्ग्वा हिट्नुङ् चाहाब् उलिसागा खानिङा घुवार फासानुम्चिम्॥ हान्डेङ् खानिलोक् वानिना बेला हिट्नागाँ उन्चिलोक् लिसागालाम्मा खानि घुवार माफाडिटि॥ नाड्डेउङ् सोब्बेलोक् बोरोबोर लियुक्॥ 15 धारमाछाप्लाङि छेप्टेसे, “याप्मा उछुम्सुगालाउङ्सा औधि याप्मा लिनेएट्नि, हिट्नुङ् खाट्टिप्मा उछुम्सुगालाउङ्सा आड्डिक् खाट्टिप्मा लिनेएट्नि॥” तितास हिट्नुङ् ओसाइबाचि 16 आङा माङ्हाङ् पोए-पोए ठाङ्सुङ्टुङ्, पोङ्भोने आन्याँ निङ्ग्वा गाड्डे डोक् माङ्हाङ्ङा तितासङाना उनिङ्ग्वाङि चा खानि घुवार फामाना निङ्ग्वा पिडुए॥ 17 पोङ्भोने उन्ङा आन्याँ बिन्टि खेम्सुङ् एडोक् माखाक्, टरो उन्ङाना आड्डिक् ओचाप् टायाउङ् आप्पे खानि टुब्सिङा आब्युगेट्॥ 18 हिट्नुङ् सोब्बे बिस्वासिचिङा मान् ओचोगुना नुना खाबोर पारचार काचोक्बा ठिबाङ् बिस्वासि झान्झा आन्याँ उन्लोक् पाङ्सुम्गेट्टुम्मा॥ 19 हिट्नुङ् नाट्टेप्मा एडोक् माखाक्, बिस्वासिचिङा फोक्बालाक् ओफाबा यरुसलेमङि आन्याँलोक् खाप्मा लाउङ्सा हिट्ना झान्झा ओसेगुना ए॥ ना टोॽवा टाङ्बाङाना मान् लोङ्सा हिट्नुङ् आरु घुवार फामाना निङ्ग्वा आन्याँलोक् युङ्ग्वा नुङ् निमेट्मा चोगुम्माना ए॥ 20 हिड्नाड्डेउङ् निङ्ग्वालाम्मा डोक् पिबालाक् ना भेटि खाट्टुमुङ् याप्मिचि पिडुम्चिम्माना साङा चा फाट्टुर ठेम्माना रिङ् ओचोगुन्चा नुङ् आन्याँ मिट्टुम्टुम्मा॥ 21 पोङ्भोने आन्याँ टाङ्बाङाना ओटोकानाङि एडोक् माखाक्, टरो याप्मिचिगा टोकानाङि चा नुना टोॽवा चोक्मा निङ्ग्वा टिसुम्टुम्मा॥ 22 हिट्नाड्डेउङ् हिट्नागालोक् आरको आन्याँ झान्झा चा पाङ्सुम्गेट्टुम्मा॥ ना झान्झाङा पाइले डोक् याप्मा खेप् घुवार फामाना आड्डिक् निङ्ग्वा चोगुना रिङ् आन्याँ याप्मि निमेट्टेसे॥ हिट्नुङ् हाट्ले ना झान्झाङा खानि आड्डिक् भोरोसा माचोगिनाँ आझै याप्मा घुवार फामाना निङ्ग्वा चोगेसे॥ 23 तितासउम्बाक् आसाइबा ए हिट्नुङ् खानि घुवार फामा आङालोक् एक्केउ टोॽवा चोक्ना याप्मि ए॥ हिट्नुङ् उन्लोक् ओआब्युगेट्गा आरु झान्झाचिम्बाक् माङ्पाङ्ङिगाँ ओपाङ्सुचिगा खाबोर कालोचि ए॥ हिट्नागा झान्झाचिङा खिरिस्टङाना माहिमा ओचोगुटु॥ 24 हिड्नाड्डेउङ् हिट्नागा खानिङा आरु माया आचोगुम्चिम्गा रिङ् निमेट्टानुम्चिम्, हिट्नुङ् खानि बारेङि पोङ् आन्याँ सोरोक् ओचेट्नुना रिङ् माट्टुम् याक्टुम्टुम्माना हिट्ना रिङ्ङाना पारमान् सोब्बे माङ्पाङ्ङिगा पिडानुम्चिम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.