२ कोरिन्थि 7 - आठपहरिया1 मायालु आसाइबाचि, माङ्हाङ्ङा आनि नागा चामारसिङा आचोगानाँ आनि येम् हिट्नुङ् आनि हाङ्सा आसुद्दो चोगुना साब्बे पारिक्गा रिङ् चोक्मा नाडुम्, हिट्नुङ् माङ्हाङ् मान् चोगुमुङ् पुरो सेङ्सेङ् लिसा खाडि॥ पावालङाना ओचाप् 2 खानिङा आन्याँ लाउङ्सा खानि निङ्ग्वाङि युङ्माना ठोङ् चोगानुम्॥ आन्याँ साक्चा ओचाफेन्लोक् मेट्निम्गेट्निम्मागा, हिट्नुङ् खोना चा जाखाम् चोक्निम्गेट्निम्चिम्मागा॥ आन्याँ खोना चा ठागाँ चोक्निम्गेट्निम्चिम्मागा॥ 3 आङा ना रिङ् खानि खेमा लाब्माउङ्सा लोनानिगा माखाक्॥ खानि आन्याँ निङ्ग्वाङिगा याप्मिचि नुङ् आङा पाइले डोक् लोमा हिनेनाँने, हिट्नुङ् आन्याँ खानिलोक् हिङ्मा कोन्चा सिमा कोन्चा टेयार लिसिटिङा॥ 4 खानिङि आङा ठेना भोर युङ्सुएसुङे, हिट्नुङ् खानिङि डोक् आङा आड्डिक् आनाभुक् ठेलोक् चोगुङ्टुङ्॥ आनिना ख्वाप्पा याङ्छामाङि चा आनिङ्ग्वा बोल्लेउ लिसेसे हिट्नुङ् आड्डिक् हारका लिसेसाङे॥ 5 जब आन्याँ माकेडोनिया होन्डिटाइङे आन्याँ येम् हिट्नुङ् निङ्ग्वाङि बिसाँ चोक्मा टोग्नेएट्निम्मा, पोङ्भोने आन्याँ हिट्नि ख्वाप्पालाम्मा याङ्छामा टोगुम्मे, हिट्नुङ् भाराम्बाक् खेमाबुङ्मा हिट्नुङ् आन्याँ निङ्ग्वाङिम्बाक् किप्माडुम् लिसे॥ 6 टरो निङ्ग्वाङि याङ्छामा उलिसागालाउङ्सा आँट् कापिबा माङ्हाङ्ङा तितास आन्याँङि याप्मि पाङ्साबिडाउङ् आँट् याप्मिपिडे॥ 7 हिट्नुङ् उन् आबानाँ एडोक् माखाक्, टरो खानिङा उन् आँट् आपिडुम्ना रिङ् खेम्सुङुङ् आङा चा आँट् टोगुङे॥ आङालोक् टुब्माना खानिङा आड्डिक् निङ्ग्वा आचोगेसुम्मे नुङ् उन्ङा आन्याँ याप्मि खेम्मेट्टे॥ हाट्ले पाइले खानिङा आचोगुम्ना रिङ्ङा खानि निङ्ग्वा टुगेसे, हिट्नुङ् खानि आङालेङ् आकेङिगा रिङ् उन्ङा याङ्लोडे, ना रिङ् खेम्सुङ् आङा आड्डिक् हारका लोसाङे॥ 8 आङा छेप्टुङ्ना चिट्ठिङा खानि निङ्ग्वा टुक्चा आङाम्बाक् ओचाफेन्ना लोनिङ्ना॥ पाइलेम्बाक् ओचाफेन्लोक् लोसाङे, टरो हाट्लेम्बाक् ओचाफेन्लोक् लोनिङ्ना॥ ना चिट्ठिङा छोप्मोङ् धारिम्बाक् खानि निङ्ग्वा टुगे नुङ् आङा ठाहा टोगुङ्टुङ्॥ 9 हाट्ले आङा खानि निङ्ग्वा टुगाउङ् आचाप् टायाना माखाक्, टरो खानि निङ्ग्वा टुगाना रिङ्ङा काएल्-काबु आलिसिउङ् खानि निङ्ग्वा फेराँ आचोगुम्ना रिङ्ङि हारका लिसाङ्ना, पोङ्भोने खानिङा माङ्हाङ् आमिट्टुम्मुङ् सानिङ्ग्वा आलोसिए॥ हिट्नाड्डेउङ् आन्याँलाम्मा खानिलोङ्सा पाक्चा जाखाम् लिनेट्नि॥ 10 पोङ्भोने कोइ याप्मिङा माङ्हाङ् उनिङ्ग्वा गाड्डे निङ्ग्वा सागु चोगुङ् पापलाम्मा काएल्-काबु लियुक् भोने, हिट्ना माङ्हाङ्ङा बाचाँ चोगुटु॥ हिट्डेना याङ्छामाङि सानिङ्ग्वा लोमा कोन्निना॥ टरो याप्मिङाना उनिङ्ग्वा गाड्डे सानिङ्ग्वा लोयुक् भोने, हिट्नाङा सिइना रिङ्लेङ् आखाट्युक्॥ 11 हाट्ले माङ्हाङ् उनिङ्ग्वा गाड्डे आचोगुम्ना सानिङ्ग्वाङा खानिङि पाक् लिसेसेना मिट्टानुम्॥ ना रिङ्ङा खानि छेम्बाना टोॽवा चोक्मा जोस् मापिडिसे, पाक्चा बिराम् वाइना नुङ् पारमान् कापिबा माचोगिसे, पाप ओचोगुगालोक् खानि रेक् कालेड् माचोगिसे, माङ्हाङ् मान् काचोक्बा, आङा टुब्माना निङ्ग्वा, भाक्टि चोक्माना निङ्ग्वा, गाल्ति काचोक्बा साजाए पिमाना निङ्ग्वा मापिडिसे॥ हिट्नुङ् नागा सोब्बे रिङ्ङि खानि आप्पेलाउङ्सा फाट्टुर मालेना नुङ् पारमान् आपिडुम्मे॥ 12 आङा हिट्ना चिट्ठि गाल्ति काचोक् फाट्टुर लाब्मा आथाबा गाल्ति काचोक्बालाम्मा चोट् टोगुना लाउङ्सा छेप्टुङ्ना माखाक्॥ टरो खानिङाउम्टे माङ्हाङ्ङाना ओटोकानाङि आन्याँ लाउङ्सा आम्टेप्मा आँटि आलिसिगा हिट्ना रिङ् ठाहा टोगानुम् नुङ् छेप्टुङ्ना ए॥ 13 हिट्नाड्डेउङ् ना रिङ्ङा आन्याँ आँट् टोगुएसुम्मे॥ आन्याँ आँट् टोगुम्माना नुङ्ना चा याप्मा तितासङाना ओचाप् टायाना निसुमुङ् आन्याँ आझा औधि टुक्लोक् हारका लिसेसिङे, पोङ्भोने खानि सोब्बेङा तितास आँट् आपिडुमे हिट्नुङ् उनिङ्ग्वा चा हाङ्हाङ् आचोगुम्बिडुम्मे॥ 14 हिट्नुङ् आङा खानिलोक् आचाप् टायाना रिङ् तितास लोडुङ्ना डाना, हिट्नुङ् ना रिङ्ङा आङा मोम्मासिमा लिनेट्निङ्॥ आन्याँ खानि सोब्बे रिङ् सोरोक् छेम्बा लोनानि गाड्डे डोक् तितास चा खानि बारेङि लोडुम्माना ओचेट्नुना रिङ् छेम्बा डोक् ठाराँ लिसे॥ 15 खानि सोब्बेङा तितासङाना उरिङ् आखेम्सुम्मे हिट्नुङ् उन् किट्सा हिट्नुङ् आड्डिक् मान् आचोगुमुङ् स्वागाट् आचोगुमे॥ नागा सोब्बे रिङ् मिट्टुउङ् तितासङा खानि पाइले नुङ्ना चा आड्डिक् माया माचोगिटि॥ 16 हाट्ले आङाना आड्डिक् आचाप् टायाइसे, पोङ्भोने आङा खानिङि पुरो भोर चोक्मा हिडुङ्टुङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.