२ कोरिन्थि 6 - आठपहरिया1 पोङ्भोने आन्याँ माङ्हाङ्लोक् एक्केउ टोॽवा काचोक्बा लिसिङानाँ खानिङा आटोगुम्ना माङ्हाङ्ङाना मायादायाङाना बारदान खेरोक् लिमा पिनेनुम् नुङ् बिन्टि चोक्नानि॥ 2 पोङ्भोने माङ्हाङ्ङा माट्टुटु, “खान्ङा आठाङ्सुना बिन्टि ठिक्का बेलाङि खेम्सुङे, हिट्नुङ् मुक्टि टोग्माना लेम्बा खान्लोङ्सा घुवार फाने॥” खेम्सानुम्, माङ्हाङ्ङाना ओमायादाया टोग्मा बेला हाट्ले डोक् हिट्नुङ् मुक्टि टोग्माना लेम्बा हाट्ले डोक् ए॥ 3 आन्याँ चोगुम्माना टोॽवा साङा चा फाट्टुर लाब्मा ओटोगुन्चा नुङ् आन्याँ खोना चा फाम्माना माङ्हाङ्ङाना टोॽवा चोक्निम्मागा॥ 4 टरो सोब्बे रिङ्ङि आन्याँ माङ्हाङ्ङाना ओसेवाक् नुङ् याप्मिचि निमेट्टुम्चिम्चिम्मा॥ आन्याँ याङ्छामा टोगुम्मानाँ, आप्ठेरोङि ठाइङानाँ, हिट्नुङ् टुक्लोक् लिसिङाना सोब्बे रिङ् धैइरे लिसिङाउङ् आङ्डुम्टुम्मा॥ 5 आन्याँ याप्मि ओलेम्सेसे, खाम्बाङ्ङि ठाइसिङे, आन्याँ बिरुद्दाङि जोम् ओकोबेसे॥ औधि टुक्लोक् टोॽवा चा चोगुम्मे॥ चामा-ठुङ्मा हिट्नुङ् इम्मा चा टोक्निम्गेट्निम्मागा॥ 6 आन्याँ फाकाट्ना लिसिङाउङ्, आन्याँ ठोनाङा, आङ्मा हिमाना हिट्नुङ् दायाङा, सेङ्सेङ्ना हाङ्साङा, हिट्नुङ् छेम्बाना मायाङा, 7 छेम्बाना खाबोर पारचार चोगुमुङ् हिट्नुङ् माङ्हाङ्ङाना ओबोल्लाम्मा माङ्हाङ् ओटोॽवा काचोक्चि नुङ् आप्पेलाउङ्सा निमेट्टुम्टुम्मा॥ हिट्नुङ् धारमिक्ताङाना हातियारम्बाक् इप्पोक् मुक्ङा डोक् चुङ्माउङ्सा हिट्नुङ् सुरेक्छे चोक्मा याङुम्टुम्मा॥ 8 याप्मिचिङा आन्याँ मान् याप्मि चोक्चा, चिम्मा याप्मि फुट्चा, ओचाफेन्लोक् याप्मि मेट्चा, आन्याँ निङ् टो-टो ओचोन्डु चा माङ्हाङ्ङाना सेवा आन्याँ चोगुम्टुम्मा॥ आन्याँ सोझो लिसिङा चा, हिट्नागाँ माङ्जो रिङ् ओमाट्टुगा नुङ् याप्मिओलोगा॥ 9 आन्याँ नुलोक् मिसेन् याप्मि उनिचा मिसेन् याप्मि उनिनिगेट्निगा गाड्डे ओचोग्गा॥ याप्मिचिङा आन्याँ सेप्मा ओकोन्चा आन्याँ हिङेइसिङे॥ याप्मि ओलेम्चा आन्याँ सिइन्गेट्टिन्नागा॥ 10 आन्याँ निङ्ग्वा टुक्चा, सोरोक् हारका लिसिटिङा॥ आन्याँ पाक्चा वानिगा याप्मि लिसिङा चा आरुलाउङ्सा जोम् आसिक् टाप्मा हिडुम्टुम्मा॥ आन्याँ पाक्चा मालेगा गाड्डेगा ठेट्टिङा चा आन्याँलोक् सोब्बे थोक् युङ्ग्वा॥ 11 हाउ कोरिन्थिङिगा बिस्वासिचि, आन्याँ खानिलाउङ्सा सोब्बे रिङ् पारचिन्दा लोनेनाँने, हिट्नुङ् आन्याँ निङ्ग्वा खानिलाउङ्सा ठेना चोगुम्टुम्मा॥ 12 आन्याँ खानि माया चोक्मा नानानिगा माखाक्, टरो खानिङा गोलो आन्याँ माया चोक्मा आनाडेट्टुम्॥ 13 हाट्ले आङा खानि आप्पे आइछाचि गाड्डे मिट्नानिउङ् लोनाँनि, खानिङा चा आन्याँ लाउङ्सा युङ्माना ठोङ् खानि निङ्ग्वाङि चोगानुम्॥ उहिङ्ग्वाट् माङ्हाङ् युङ्ना डेन् 14 येसुङि बिस्वास ओचोगुन्गालोक् एक्केउ नाराँ लिनेनिन्॥ पाक् ठिबाङ् याप्मि माङ्हाङ् उनिङ्ग्वा गाड्डे चोक्ना हिट्नुङ् माङ्हाङ् उनिङ्ग्वा गाड्डे चोक्निना एक्केउ लिचिचि नुङ् आमिट्टिटिगि? हिट्डेडोक् डुम् लोक् व्हाङ् एक्केउ ठोङ्ङि लिमा डोक् लिनिना॥ 15 खिरिस्ट लोक् बेलिआल खोड्डेउङ् टोङ्चिचिगा टे? हिट्डेडोक् बिस्वास काचोक्चि हिट्नुङ् बिस्वास ओचोक्निगालोक् एक्केउ लिमा उहिनिगा॥ 16 हिट्नुङ् माङ्हाङ्ङाना माङ्ठाना लोक् साम्माङ्ङाना मुरति खोड्डेउङ् टोङ्चिचिगा? पोङ्भोने आनिउम्टे उहिङ्ग्वाट् माङ्हाङ्ङाना माङ्ठाना ए॥ माङ्हाङ् आप्पेङा माट्टुए, “आङा आयाप्मिचिलोक् युङ्ङा हिट्नुङ् हिट्नागालोक् लाम्टिङा॥ आङा हिट्नागाँगा माङ्हाङ् लिङा हिट्नुङ् हिट्नागा आयाप्मिचि उलियुक्॥” 17 नाड्डेउङ्, “हिट्नागाँगा माझालाम्मा होन्डानि, हिट्नुङ् हिट्नागालाम्मा साम्डानिउङ् युङानि नुङ् टाङ्बाङा माट्टुटु॥ आसुद्दो थोक् पाक्चा खोट्नेनुम्, हिट्नुङ् आङा खानि लाट्नाँनि॥” 18 हिट्नुङ्, “आङा खानि पाबा लिङा, हिट्नुङ् खानि आछालेट्चि आलिसिटि नुङ् सोब्बे नुङ्ना माङ्बोल्लेउ टाङ्बाङा माट्टुटु॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.