२ कोरिन्थि 5 - आठपहरिया1 पोङ्भोने आनिलाउङ्सा ठाहा युङ्ग्वा, ना आनि येम् याक्सा गाड्डेना डोक्, हिट्ना ना नाराङि युङ्ग्वा, ठिक् लेम्बा ना येम् जाखाम् लियुङ् खाट्युक्॥ टरो माङ्हाङ्ङा टोनालोग्ङि आनि लाउङ्सा पाङ् चोगुएसुए, हिट्ना पाङ् याप्मि मुक्ङा चोक्बालाक् माखाक्, हिट्नुङ् ना सोरोक् लियुयाक्युक्॥ 2 छेम्बा डोक्, आन्याँ ना येम्ङि वासिङाना दुखि लिसिएसिङे, हिट्नुङ् टोनालोक्ङि लिना येम् टोक्माउङ्सा औधि आन्याँ निङ्ग्वा लोसेसे॥ 3 पोङ्भोने जब टोनालोगङि लिना येम् टोगुम्टुम्, आनि हाङ्सा येम् मालेना लिनिना॥ 4 पोङ्भोने ना येम्ङि वासिङानाँ याङ्छामाङा आन्याँ सोक्मा ठेक्टाउङ् केना सोक्मा लेडुम्टुम्मा॥ टरो आन्याँ सिमा हिट्नुङ् ना येम् नामाना निङ्ग्वा चोगिङागा माखाक्, टरो हिट्ना ओसाट्टोङि ना जाखाम् लियुङ् खाट्ना येम् खोना बेला चा लाट्निना येम्ङि फेराँ उलियाक् नुङ् टोनालोग्ङि लिना येम् टोक्मा निङ्ग्वा चोगुम्टुम्मा॥ 5 नाड्डेउङ् माङ्हाङ् आप्पेङा आनिलोङ्सा ना लाट्निना चोला टोक्माउङ्सा टेयार आचोगेसे, हिट्नुङ् उन्ङाना चामारसिङा आनि सोब्बेलाउङ्सा पाक्का चोक्मा उन्ङा सेङ्सेङ्ना हाङ्सा बाइनाबाट्टा आनि आपिडेसे॥ 6 नाड्डेउङ् आन्याँ जाइले चा ढुक्का लिसिटिङा॥ हिट्नुङ् आन्याँ ना येम्ङि लिसिङालोक् टाङ्बा लिना ठोङ्ङि आन्याँ लिसिन्नागा नुङ् ठाहा युङ्ग्वा॥ 7 पोङ्भोने आन्याँ मिक्ङा निसुम्मागा थोक्ङि माखाक्, टरो बिस्वासलाम्मा हिङिटिङा॥ 8 आन्याँ ढुक्का वासेट्टिङा नुङ् आङा फेरि माट्टुङ्टुङ्, हिट्नुङ् ना येम्ङि हिङ्मा नुङ्ना टाङ्बालोक् एक्केउ हिङ्माडोक् आन्याँ नुलोक् लोसिटिङा॥ 9 हिड्डेउङ् आन्याँ ना येम्ङि लिसिङा चा, टाङ्बालोक् लिसिङा चा, आन्याँना निङ्ग्वाम्बाक् उन्ङाना ओचाप् टालोक् चोक्मा ए॥ 10 पोङ्भोने आनि सोब्बे ठिक् लेम्बा न्याए लोङ्सा खिरिस्टङाना ओटोकानाङि एप्मा कोन्युक्॥ हिट्डेउङ् आनि सोब्बेङा ना येम्ङि लिसिनाँ चोगुम्ना ओचेट्नुना टोॽवा आथाबा ओचाफेन्ना टोॽवाङाना इनाम टोगुम्टुम्॥ खिरिस्टङा याप्मिचि माङ्हाङ्ङि खाट्टुचिचि 11 नाड्डेउङ् आन्याँ सोरोक् टाङ्बा मान् चोगुम्टुम्मा, हिट्नुङ् याप्मिचि उन्लेङ् ओनोक्याक् नुङ् आँट् पिडुम्चिम्चिम्मा॥ आन्याँ खोड्डेगा याप्मिचि नुङ् माङ्हाङ्ङा ठाहा टोगुटु, हिट्नुङ् खानिङा चा आन्याँ खोड्डे पारिक्गा याप्मिचि नुङ् ठाहा आटोगुम्टुम् नुङ् आङा आसा युङ्सुङ्टुङ्॥ 12 आन्याँ फेरि आप्पेङागा निङ्ला खानि सोरि चोन्निम्मागा, टरो खानिङा आन्याँ निङ् चोन्डानुम् नुङ् मौका पिनाँनि॥ हिड्डेउङ् खानिङा निङ्ग्वाङिगा रिङ्ङि माखाक्, टरो भारा ठेट्गा टोॽवाङि ठेलोक् ओचोक्गालाउङ्सा पाक् लोमाचिगा हिट्ना ठाहा आटोगुम्टुम्॥ 13 आन्याँ ठोना मालेगा गाड्डेगा लिसिटिङा भोनेम्टे माङ्हाङ् लोङ्सा डोक् ठोना मालेना लिसिटिङा॥ हिट्नुङ् आन्याँ ठोना मानिगेट्निना भोनेउम्टे खानिना ओचेट्नुना लोङ्सा डोक् आन्याँ ठोना मानिगेट्निना॥ 14 आन्याँ जे चोगुम्टुम्मा हिट्नाउम्टे खिरिस्टङा आन्याँ माया याप्मि चोगानाँ चोगुम्टुम्मा, पोङ्भोने छेम्बा डोक् आन्याँ ना रिङ् ठाहा टोगुम्टुम्मा सोब्बे याप्मिचि लाउङ्सा ठिबाङ् सिए, हिट्नाड्डेउङ् सोब्बे याप्मिचि उसियागा रिङ् आन्याँ बिस्वास चोगुम्टुम्मा॥ 15 हिट्नुङ् खिरिस्ट आनि सोब्बे लोङ्सा सिए॥ हाट्ले साक् आप्पे लाउङ्सा हिङ्युक्ना हिट्ना हाट्लेउङ् आप्पे लाउङ्सा माखाक्, टरो आनि सोब्बे लाउङ्सा सियाना हिट्नुङ् उहिङ्ग्वाट् लिसा कोबाना लोङ्सा हिङ्मा कोन्युक्॥ 16 हाट्ले नुङ् नाराङिगा याप्मिचिङा ओचोगु गाड्डे आन्याँ साक्चा मिट्निम्चिम्मागा॥ ठिक् बेला आन्याँ चा खिरिस्ट नाराङिगा याप्मिचिङा उमिट्टु गाड्डे मिट्टुम्मे, हाट्ले नुङ् उन् हिड्डे पारा मिट्निम्माना॥ 17 नाड्डेउङ् कोइ याप्मि खिरिस्टङि वाहेट् भोने, हिट्ना ओछोङ्ग्वाट् याप्मि लियुक्॥ पाइलेगा रिङ् मासाउङ् खाडे, पुयानुम्, हाट्ले सोब्बे रिङ् ओछोङ्ग्वाट् उलिसेसे॥ 18 माङ्हाङ्ङा डोक् नागा सोब्बे थोक् चोगुए॥ उन्ङा डोक् खिरिस्टलाम्मा आनिलोङ्सा उन्ङि फेरि आखाट्टे, हिट्नुङ् आरुलाउङ्सा चा उन्लोक् टोङ्माना टोॽवा आनि जिम्मा आपिडेसे॥ 19 आन्याँ माप्मा कोलुम्माना रिङ्उम्बाक् माङ्हाङ्ङा सोब्बे याप्मिचि खिरिस्टलाम्मा टोङ्सुएट्टुचिगा डागा॥ माङ्हाङ्ङा याप्मिङा ओचोगुगा उन्चि पापङाना फाट्टुर लाबुन्चिन्गा॥ हिट्नुङ् उन्ङाना हाङ्हाङ्ङाना हिट्ना खाबोर याप्मिचि लोमाना टोॽवा आनि आपिडेसे॥ 20 नाड्डेउङ् आनिउम्टे खिरिस्ट लाउङ्सा चेक्मा आपाङ्सागा याप्मिचि ए हिट्नुङ् माङ्हाङ् आप्पेङा खानि लाउङ्सा आन्याँलाम्मा बिन्टि चोगुएट्टु॥ माङ्हाङ्लोक् खानि टोङानि नुङ् खिरिस्टङाना उनिङ्ङि आन्याँ बिन्टि चोगुम्टुम्मा॥ 21 पोङ्भोने आनिउम्टे खिरिस्टलाम्मा माङ्हाङ् ओटोकानाङि धारमोति उलिसियाक् नुङ् पाप डोक् चोगुन्गेट्टुन्ना खिरिस्ट माङ्हाङ्ङा आनि पाप लाउङ्सा भोक् ठाङ्मा मेट्टुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.