२ कोरिन्थि 4 - आठपहरियाखाम्ङाना फुङि युङ्बालाक् माक्फेन्सुबेन् 1 माङ्हाङ्ङा आप्पे ओदायाङा आनिलाउङ्सा ना सेवा चोक्मा आपिडेसे॥ हिड्नाड्डेउङ् आन्याँ निङ्ग्वा सेट्निम्माना॥ 2 हिट्ना ओसाट्टोङि आन्याँउम्टे याप्मिचिङा ठोब्सा ओचोगुगा मोन्डिसिइना टोॽवा चोक्मा नाडेएसुम्मे॥ आन्याँ माङ्जो चा माट्निम्मागा, हिट्नुङ् माङ्हाङ् रिङ् चा फेराँ चोक्निम्मागा॥ टरो आन्याँ भोरोसायोगे नुङ् सोब्बे याप्मिचिङा बिस्वास याप्मिओचोक्याक् नुङ् आन्याँ छेम्बाना रिङ् पारचिन्दा माट्टुम्टुम्मा, हिट्नुङ् नाङाना साँचिम्बाक् माङ्हाङ् वाहेट्॥ 3 टरो आन्याँ पारचार चोगुम्माना नुना खाबोर पारचिन्दा वाइना भोने, हिट्नाउम् जाक्खाम् उलिगा याप्मिचि लाउङ्सा एडोक् पारचिन्दा लिनिना॥ 4 ना नाराङिना साम्माङ् ओलोडुना सैतानङा आबिस्वासिचिगा निङ्ग्वा डोम्-डोम् चोगुबिडुएसुचे॥ हिट्डेउङ् हिट्नागाँ खिरिस्टङाना बारेङि नुना खाबोर लोक् उन्ङाना माहिमा बुजा चोक्मा उहिडुन्ना॥ खिरिस्टउम् माङ्हाङ् गाड्डेना डोक्॥ 5 पोङ्भोने आन्याँ आप्पे आन्याँना बारेङि पारचार चोक्निम्माना, टरो येसु खिरिस्ट डोक् टाङ्बा नुङ् पारचार चोगुम्टुम्मा॥ आन्याँम्बाक् येसुङाना लोङ्सा खानिगा डोक् चाकारचि ए॥ 6 पोङ्भोने माङ्हाङ्ङा माट्टुए, “डुम्बारिक् डुम्लाम्मा व्हाङ् ओओम्याक्,” आनि निङ्ग्वाङि चा उन्ङाना व्हाङ् ओम्सेसे, हिट्डेउङ् खिरिस्टङाना ओनाभाक्ङि पारकाट् चोगुना माङ्हाङ्ङाना माहिमा आनि ठाहा टोग्मा हिडुम्टुम्॥ 7 हाट्ले आनि निङ्ग्वाङि ना ओम्ना व्हाङ् युङ्ग्वा, टरो आनिम्बाक् ना आड्डिक् बाहुमुल्ए माक्फेन्सुबेन् युङ्बालाक् खाम्माङाना भाँडा गाड्डेगा ए॥ हिट्डेउङ् ना ठेना साक्तिम्बाक् माङ्हाङ्लाम्मा टायुक्, आनि आप्पेलाम्मा माखाक् ए नुङ् ना रिङ्ङा पारचिन्दा चोगुटु॥ 8 आन्याँ सोब्बे पारिक्गा याङ्छामा आङ्डेट्टुम्मा, टरो चा नागा रिङ्ङा आन्याँ याप्मि मेट्निगेट्निना॥ आन्याँ पाक् चोक्माना नुङ् ठाहा टोक्निम्मा चा आन्याँना आसाम्बाक् सिनिगेट्निना॥ 9 याप्मिचिङा आनि खेदो आचोक्चा माङ्हाङ्ङा काइले आनानिना॥ आनि साट्टुरचिङा औधि आलेम्चा हिट्नागाँ सेप्मा आहिनिगा॥ 10 येसुङाना ओचोला आन्याँ येम्ङि चा पारकाट् उलियाक् नुङ् उन्ङा याङ्छामा आङ्डु गाड्डे हिट्नुङ् उसिमा लेन्सेन् आन्याँना येम्ङि आङ्डेट्टुम्मा॥ 11 पोङ्भोने आनिना ना सियुएट्ना येम्ङि चा येसुङाना चोला ओठेट्याक् नुङ् डोक् आनि सोरोक् येसु लोङ्सा सिइ गाड्डे डोक् लिसेसे॥ 12 नाड्डेउङ् ना रिङ् छेम्बा डोक् आन्याँ चोलाङि याङ्छामा आङ्डेट्टुम्मा हिट्नुङ् सिमा हिडिटिङा, टरो नाङाना ओसाट्टोङि हाट्ले खानिङाम्बाक् लाट्निना चोला आटोगेसुम्मे॥ 13 धारमाछाप्लाङि छेप्टेसे, “आङा माङ्हाङ्ङि बिस्वास चोगुङे, हिड्नाड्डेउङ् आङा चेक्ङा॥” नाड्डेना बिस्वासलाम्मा डोक् आन्याँ चा बिस्वास चोगुम्टुम्मा, हिट्डेउङ् माङ्हाङ्ङाना बारेङि चेक्टिटिङा॥ 14 आनिलाउङ्सा ठाहा युङ्ग्वा, टाङ्बा येसु सियानालाम्मा उहिङ्ग्वाट् काचोक्बा माङ्हाङ्ङा आनि चा येसुलोक् उहिङ्ग्वाट् आचोक्युक्, हिट्नुङ् उन्ङा डोक् आन्याँ चा खानिलोक् एक्केउ उन् सोरि आखाट्युक्॥ 15 नागा सोब्बे रिङ् खानि लोङ्सा नुलोक् उलियाक् नुङ् डोक् लिसागा ए, हिट्नाडे लिसानाँ आम्टेप्मा जोम् याप्मिचिङा माङ्हाङ्ङाना ओदायामाया ओटोगुटु॥ हिट्नालाम्मा याप्मिचिङा जोम् उन् पोए-पोए ओठाङ्सुटु, हिट्नुङ् ना रिङ्ङा माङ्हाङ्ङाना माहिमा लियुक्॥ टाङ्बाङिना बिस्वास 16 हिड्नाड्डेउङ् आन्याँ खोना बेला चा निङ्ग्वा सेट्निम्माना॥ आनि येम् गालाँ लिसा खाट्चा आन्याँना हाङ्साउम्बाक् लेन्सेन् सोरोक् ओछोङ्ग्वाट् लिसा खाट्युक्॥ 17 पोङ्भोने हाट्ले आनि आङ्डुम्ना याङ्छामा टुक्ना वाइना हिट्नुङ् ना याङ्छामा छोप्मोङ् धारि लाउङ्सा एडोक् लियुक्॥ टरो हान्डेङ् टोगुम्ना आड्डिक् ठेना खोना बेला चा लाट्निना माहिमा मिट्टुम्नाँ हिट्ना याङ्छामाङा आनिङि टाडुगा रिङ्उम् पाक्चा माखाक् ए॥ 18 हिड्डेउङ् हाट्ले आन्याँलोक् लिसागा याङ्छामालेङ् आन्याँ पुनिम्याक्निम्मागा, टरो निनिम्गेट्निम्मागा थोक्चि आन्याँ पुयुम्टुम्मा॥ पोङ्भोने आन्याँ निसुम्मागा थोक्चि छोप्मोङ् धारिगा एडोक् ए, टरो आन्याँ निनिम्गेट्निम्मागा रिङ्चि सोरोक् लोङ्सा लियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.