२ कोरिन्थि 3 - आठपहरियाओछोङ्ग्वाट् माङ्हुप्ङाना सेवाक्चि 1 आन्याँ फेरि आप्पे आन्याँ निङ्ला चोन्डुम्माना माखाक्॥ आम्टेप्मा याप्मिचिङा ओचोगु गाड्डे खानि लाउङ्सा आथाबा खानिलाम्मा आन्याँना ओचेट्नुना टोॽवा बारेङि ओमाट्टुङ् छेप्बालाक् चिट्ठि आन्याँ लाउङ्सा चाहाब् लिनिना॥ 2 सोब्बेङा बुजा हिट्नुङ् पोढाँ चोक्मा माहिडिगा खानि आप्पे डोक् आन्याँ निङ्ग्वाङि छेप्बालाक् आन्याँ चिट्ठि ए॥ 3 छेम्बा डोक्, खानि खिरिस्टङा माछेप्टिगा चिट्ठि, हिट्नुङ् ना चिट्ठिम्बाक् आन्याँ चोगुम्माना सेवाङाना पारिनाम् ए॥ ना चिट्ठि कालाम हिट्नुङ् मासिङा छेप्बालाक् माखाक्, टरो उहिङ्ग्वाट् माङ्हाङ्ङाना ओहाङ्साङा छेप्बालाक् ए॥ हिट्नुङ् लुङ्गेॽवाङाना पाटिङि माखाक्, टरो याप्मिङाना निङ्ग्वाङि छेप्बालाक् चिट्ठि ए॥ 4 खानि आन्याँ चिट्ठि नुङ् माप्मा हिडुम्टुम्मा, पोङ्भोने खिरिस्टलाम्मा माङ्हाङ्ङा चोगुना रिङ् आन्याँ बिस्वास लोक् भोरोसा चुगुम्टुम्मा॥ 5 आन्याँ आप्पे खोना चा रिङ् चोक्मा हिडुम्टुम्मा नुङ् माट्निम्माना, टरो माङ्हाङ्ङा डोक् उन्ङाना सेवा चोक्मा पाक् चाहाब् लियुक्ना हिट्ना आनि सोब्बेलाउङ्सा आपियुक्॥ 6 उन्ङा डोक् ओछोङ्ग्वाट् माङ्हुप्ङाना सेवा चोक्मा काहिबा आचोक्युक्॥ नाउम्बाक् छेप्बालाक् धारमाबिधिलाम्मा माखाक्, टरो सेङ्सेङ्ना हाङ्सालाम्मा ए॥ पोङ्भोने छेप्बालाक् धारमाबिधिङा आसेट्युक्, टरो सेङ्सेङ्ना हाङ्साङाम्बाक् चोला आपियुक्॥ 7 टरो सिइना रिङ् टाडुना धारमाबिधि लिङ्गेॽवाङाना पाटिङि छेप्बालाक् डाना॥ हिट्ना धारमाबिधि आड्डिक् ओम्साउङ् काडे, हिट्नुङ् हिट्ना ओसाङ् योक्-योक् योम्सा खाडा चा हिट्ना ओसाङ्ङा चोगुनाँ इस्राइलि याप्मिचिङा मोसाङाना ओनाभाक् पुमा उहिडुवाट्टुन्॥ 8 सिइना रिङ्ङि आठेन्ना धारमाबिधिउम् माहिमाङि ओम्से भोने, सेङ्सेङ्ना हाङ्साङाना सेवा आझै झान् माहिमाङि ओम्मा हिनिनाइ टे? 9 पोङ्भोने याप्मि फाट्टुर लाहाब् आचोक्ना धारमाबिधिङाना टोॽवाउम् आम्टेप्मा याप्मा ओम्साना भोने, झान् याप्मि धारमोति आचोक्नाउम् आम्टेप्मा याप्मा ओम्युक् होला॥ 10 छेम्बा डोक् हाट्लेना ओछोङ्ग्वाट् ओम्साना माहिमालोक् टोङ्सुम्नाँ पाइलेना ओम्साना माहिमाम्बाक् पाक्चा माखाक्॥ 11 हिट्नुङ् धारमाबिधिङाना टोॽवा मासाउङ् खाडानाउम् माहिमालोक् टाए भोने, झान् सोरोक् लियुयाक्नाम् आझै याप्मा माहिमालोक् लियुक्॥ 12 नाड्डेउङ् आन्याँना नाड्डेना आसा लिसानाँ आन्याँ औधि आँटि लिसेसिङे॥ 13 आनिम्टे मोसा गाड्डेना माखाक्, जुन्ङा ओनाभाक्लाम्मा योम्सा खाडागेट्टाना माहिमा इस्राइलि याप्मिचिङा उनिसुन् नुङ् घुम्टोङा उनाभाक् टेप्टुए॥ 14 हिट्ना बेला इस्राइलि याप्मिचिङा बुजा चोक्मा उहिडुवाट्टुन्, हिट्नागाँगा निङ्ग्वा घुम्टोङा टेप्टि गाड्डे डोक् डाना॥ हाट्ले सोम्मा चा पुरानो माङ्हुप् कोइङा पोढाँ ओचोगुङ् ओखेम्सुनाँ उन्चि निङ्ग्वा घुम्टोङा टेप्टि गाड्डे डोक् बुजा ओचोगुन्ना॥ हिट्नुङ् हिट्ना घुम्टो जब ठिबाङ् याप्मिङा खिरिस्टङि बिस्वास चोगुटु हिट्नुङ् एडोक् हाटाँ चोक्मा हिडुटु॥ 15 छेम्बा डोक्, आझै चा हिट्नागाँ मोसाङा छेप्टुना धारमाबिधि कोइङा पोढाँ ओचोगुङ् ओखेम्सुनाँ घुम्टोङा उन्चि निङ्ग्वा टेप्टु गाड्डे डोक् बुजा ओचोगुन्ना॥ 16 टरो जब याप्मिङा टाङ्बाङि बिस्वास चोगुटु, हिट्ना बेला माङ्हाङ्ङा हिट्नाङाना घुम्टो ओङ्सुबिडुटु॥ 17 पोङ्भोने टाङ्बा हाङ्सा ए, हिट्नुङ् टाङ्बाङाना ओहाङ्सा खोनि खोनि लियुक्, हिट्ना हाङ्साङा हिट्ना सोतान्तर चोगुटु॥ 18 टाङ्बाङि बिस्वास काचोक् आनि सोब्बेङा आनि नाभाक् घुम्टोङा मिटेप्मे उन्ङाना माहिमा पारकाट् चोगुम्टुम्॥ टाङ्बा हाङ्सा ए, हिट्नुङ् उन्ङा आनि उन् गाड्डे डोक् आड्डिक् याप्मा फेराँ आचोक्युङ् आझै झान् उन्ङाना माहिमाङि ओम्सिटि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.