२ कोरिन्थि 2 - आठपहरिया1 हिट्डेउङ् खानि याङ्छामा पिमा लाउङ्सा आङा फेरि मिआप्माना निङ्ग्वा चोगुङे॥ 2 पोङ्भोने खानि माले साङाम्बाक् आङाना आचाप् टालोक् याङ्चोक्युक्ना टे? हिट्नुङ् पाइले डोक् आङा खानि निङ्ग्वा टुक्लोक् चोगुएसुङे भोने, खोड्डेउङ् आङा आचाप् टालोक् चोक्मा आहिडिटिङागा टे? 3 हिट्नुङ् आङा आप्ङानाँ आङाना आचाप् टालोक् चोक्मा ओकोन्गा याप्मिचिलाम्मा आनिङ्ग्वा उटुक्नियाक् नुङ् आङा हिट्ना चिट्ठि छेप्टुङे॥ पोङ्भोने आङा मोज्जा लोङाना खानि सोब्बे चा मोज्जा आलोसिटि नुङ् छेम्बा डोक् आङा खानि सोब्बेङि बिस्वास चोगुङ्टुङ्॥ 4 आङा आड्डिक् टुक्लोक् आनिङ्ग्वा टुक्सा हिट्नुङ् आड्डिक् हाब्सा हिट्ना चिट्ठि खानिलाउङ्सा छेप्टुङ्ना डाना॥ खानि निङ्ग्वा उटुक्याक् नुङ् माखाक्, टरो आङा खानि आम्टेप्मा माया चोक्नानिगा ठाहा टोगानुम् नुङ् हिट्ना चिट्ठि छेप्टुङे॥ छेमा बारे 5 आङा खानिङाना आड्डिक् निङ्ग्वा टुक्ना रिङ् चोक्माना आनिङ्ग्वा वाइना, टरो खानिङि कोइङा खानि निङ्ग्वा टुक्लोक् माचोगिबिडेसे भोने हिट्नाङा आङाना नुङ्ना चा चिपा याप्मा खानि निङ्ग्वा माटुग्मेट्टेसे॥ 6 खानि माड्डे याप्माङा हिट्ना साजाए आपिडेसुम्मे हिट्नुङ् हिट्ना आपिडुम्ना साजाए हिट्नालोङ्सा याप्मा लिसेसे॥ 7 टरो हाट्ले हिट्ना याप्मि खानिङा छेमा पिमा कोन्युक्, हिट्नुङ् उनिङ्ग्वा दोरो चोक्माबिमा कोन्युक्, नाभाम्टे हिट्नाङाना टुक्लोक् उनिङ्ग्वा टुक्युक् हिट्नुङ् सानिङ्ग्वाङि ठायुक्॥ 8 नाड्डेउङ् हाट्ले हिट्ना खानिङा माया ओचोगुम्ना रिङ् निमेट्टानुम् नुङ् आङा खानि बिन्टि चोक्नाँनि॥ 9 हिट्डेडोक् आङा लोनानिगा सोब्बे रिङ् खानिङा आचोगुएट्टुम्नि माइनै नुङ् खानि निङ्ग्वा कोम्मा हिट्नुङ् ठाहा टोक्माउङ्सा आङा हिट्ना चिट्ठि छेप्टुङ्ना डाना॥ 10 खानिङा कोइ छेमा आपिडुम्टुम् भोने, आङा चा छेमा पिडुङ्टुङ्॥ आङा कोइ छेमा पिमा कोन्ना रिङ् युङ्ग्वा भोने, खिरिस्ट साँचि युङ्सुङ् खानिगा ओचेट्नु लाउङ्सा छेमा चोगुङ्टुङ्॥ 11 हिड्डेउङ् सैतानङा आनि झुक्याङ् आचोक्नेयाक् नुङ् हिड्डे चोगुङ्ना, पोङ्भोने फाम्लेङ् आचोक्ना हिट्नाङाना ओटोॽवा आनिलाउङ्सा ठाहा युङ्ग्वा॥ पावाल तोरआस खालाङ्गाङि खाडाना 12 जब आङा तोरआस खालाङ्गाङि खिरिस्टङाना बिसाएङि नुना खाबोर खेम्मेप्मा खाडाङे हिट्नि टाङ्बाङा डोक् आङा ओटोॽवा चोक्माना छेक् याङ्पिडे॥ 13 टरो आनिङ्ग्वा हाङ्हाङ् लिनेट्नि, पोङ्भोने हिट्नि खानि बारेङि खाबोर टाडुना बिस्वासि तितास टुब्नेट्निङ्॥ हिट्डेउङ् हिट्नागालाम्मा सेन्डाउङ् आङा माकेडोनियालेङ् खाडाङे॥ खिरिस्टलाम्मा बिजाए टोगुम्टुम् 14 टरो आङा माङ्हाङ् पोए-पोए ठाङ्सुङ्टुङ्, पोङ्भोने उन्ङा आनि सोरोक् खिरिस्टङि बिजाएङाना लाम्भोङि आलाम्टिमेट्युक्॥ माङ्हाङ्ङा ख्वाप्पालेङ् खिरिस्टङाना ठोना बारेङि छिन्मा लाउङ्सा चा आनि घुवार आफायुक्, हिट्नुङ् ना ठोनाम्बाक् बुङ्बुङ् नाम्ना आट्टार गाड्डेना ए॥ 15 पोङ्भोने आनि चोलाम्बाक् उहिङ्येट्गा लोक् जाखाम् उलेट्गा याप्मिचि माझाङि माङ्हाङ्ङि खिरिस्टङा आप्पेलाउङ्सा भोक् ठाङ्सुना बुङ्बुङ् नाम्ना आट्टार गाड्डेना ए॥ 16 जाक्खाम् उलियुगेट्गा लोङ्साम्बाक् हिट्ना नाम्ना आट्टारङा सिमानालेङ् खाट्टुटु हिट्नुङ् उहिङ्गा लाउङ्साम्बाक् हिट्ना बुङ्बुङ् नाम्ना आट्टारङा चोला टोक्माना रिङ्लेङ् खाट्टुटु॥ नाड्डे पारिग्ना टोॽवाम्बाक् साङा चा चोक्मा हिडुन्ना॥ 17 पोङ्भोने माङ्हाङ्ङाना खाबोर ओफाबा टोक्मा लाउङ्सा एडोक् पारचार काचोक् आरु याप्मिचि गाड्डेगा आन्याँ माखाक्॥ कोइङा माङ्हाङ्ङाना खाबोर बेपार गाड्डे डोक् ओचोगुएसुए॥ टरो आन्याँ माङ्हाङ्ङाना रिङ् इमान्जामान्ङि हिट्नुङ् खिरिस्टङाना आधिकारलोक् माङ्हाङ् ओटोकानाङि पारचार चोगुम्टुम्मा पोङ्भोने माङ्हाङ्ङा आन्याँ याप्मि पाङ्साना ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.