२ कोरिन्थि 13 - आठपहरियापावालङाना आखेरि साल्लाह 1 आङा खानि टुब्सिङा आबाङ्ना ना सुम्बोक् खेप् लियुक्॥ धारमाछाप्लाङि नाड्डे छेप्टेसे, “याप्मि बिरुद्दाङिना फाट्टुर इप्पाङ् आथाबा सुम्बाङ् याप्मिचिङा उपिडुना साँचिलाम्मा एडोक् छेम्बाना रिङ् नुङ् ठाराँ लियुक्॥” 2 आङा दोस्रो खेप् खानिङि आबाङ्नाँ डोक् पाप काचोक्चि ओछेक्छेक् चोगुङ्चिङ्गा डागा॥ हाट्ले आङा खानिलाम्मा लाप्माङ् लिङा चा पाइले ओछेक्छेक् चोक्नानि गाड्डे डोक् हिट्नागा हिट्नुङ् आरु सोब्बे फेरि ओछेक्छेक् चोगुङ्चिङ्चिङ्॥ आङा आप्ङानाँ आझै हिट्नागा याप्मिचिङा पाप ओचोगेट्टु भोने, हिट्नागा खोना चा लेट्निङ्चिङ्गा॥ 3 खिरिस्ट आङालोक् चेक्युक्नि चेक्निना इ नुङ् खानिङा पारमान् आटोगुम्टुम्॥ खिरिस्ट खानिलोक् काम चोक्नाँ उन् फेटुलो लिनिना, टरो उन् बोल्लेउना ए॥ 4 छेम्बा डोक्, याप्मिचिङा खिरिस्ट खाप्चेङि उछुडुनाँ फेटुलो डाना, टरो चा माङ्हाङ् ओबोल्ङा उन् उहिङ्ग्वाट् चोगुए॥ हिट्नुङ् आनि चा उन् गाड्डे डोक् फेटुलो लिसेसिए, टरो माङ्हाङ् ओबोललाम्मा खानि माझाङि आन्याँ टोॽवाङि उन्लोक् हिङिटिङा॥ 5 खानि बिस्वासङि दोरो आवासेट्टिगि माइना इ खानि आप्पेङा आप्पेलाउङ्सा जाँच चोगानुमुङ् पुयानुम्॥ येसु खिरिस्ट खानिलोक् युङ्ग्वा नुङ् खानिलाउङ्सा ठाहा युङ्ग्वा, टरो येसु खिरिस्ट वाइना भोने, बिस्वासङाना जाँचङि खानि आसाफाल आलिसिए॥ 6 हिट्नुङ् आन्याँ बेकामे लिसिन्गेट्टिन्नागा नुङ् खानिङा ठाहा आटोगेसुम्मे नुङ् आङा आसा चोगुङ्टुङ्॥ 7 हाट्ले आन्याँ खानिङा पाक्चा ओचाफेम्मा टोॽवा चोक्नेनुम् नुङ् माङ्हाङ्ङि बिन्टि चोगुम्टुम्मा॥ आन्याँ ना बिन्टि आप्पेलाउङ्सा ओचेट्नुना निमेट्मेलाउङ्सा माखाक्, टरो आन्याँ बेकामे गाड्डे ओठेट्टिङा चा खानिङा माहामा टोॽवा चोक्मा हिडानुम् नुङ् बिन्टि चोगुम्टुम्मा॥ 8 पोङ्भोने आन्याँ छेम्बाना रिङ् बिरुद्दाङि पाक्चा चोक्मा हिनिम्माना, टरो आन्याँ छेम्बाना रिङ् लाउङ्सा एडोक् टोॽवा चोक्मा हिडुम्टुम्मा॥ 9 हिट्नुङ् आन्याँ पाक्चा चोक्मा काहिनिबा लिसिङा चा खानिम्बाक् बोलियो आलिसिनाँ आन्याँ चाप् टायुक्॥ हिट्नुङ् बिस्वासङि खानि पारगाति उलियाक् नुङ् बिन्टि चोगुम्टुम्मा॥ 10 हिट्नाड्डेउङ् नागा रिङ् खानिङि आप्मा नुङ्ना पाइले छेप्टुङ्गेट्टुङ्॥ नाड्डेउङ् खानिङि आङा आप्ङानाँ टाङ्बाङा याङ्पिडाना आधिकार खानि टुक्लोक् साजाए पिमाउङ्सा चालाँ चोक्मा ओकोन्नि चा नुङ् आङा आसा चोगुङ्टुङ्॥ ना आधिकारउम्टे खानि बिस्वास बोलियो चोक्माउङ्सा टाङ्बाङा याङ्पिडाना, जाखाम् चोक्माउङ्सा माखाक् ए॥ पावालङाना आखेरि स्या 11 आम्भु-आन्झाचि, हाट्ले नागा रिङ् छेप्टुङुङ् बाबा लोनाँनि, आनान्दा चोगानि, नुना रिङ् चोक्मा निङ्ग्वा पिडानुम्, आङा लोनानिगा रिङ् खेम्सानुम्, ठिक्ए निङ्ग्वा चोगानुम् हिट्नुङ् टोङानिउङ् युङानि॥ हिट्नुङ् माया लोक् हाङ्हाङ् आपिना माङ्हाङ् खानिलोक् लियुक्॥ 12 खानिङा ठिबाङ्ङा आरको माया चोक्सा बाबा चोग्गा चोक् चोगानि॥ 13 सोब्बे बिस्वासिचिङा खानिलोङ्सा बाबा माहाक्टिएसिए॥ 14 टाङ्बा येसु खिरिस्टङाना मायादाया, माङ्हाङ्ङाना ओमाया हिट्नुङ् सेङ्सेङ्ना हाङ्साङाना साङ्गाटि खानि सोब्बेलोक् उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.