२ कोरिन्थि 12 - आठपहरियापावालङा निसुना निमापुमा 1 आङा ठेलोक् रिङ् चोगुङ्नाँ फाइदा लिनिचा आङा ठेलोक् रिङ् चोक्मा कोन्युक्॥ टरो टाङ्बाङा आङा याङ्निमेट्टाङ्ना निमापुमा हिट्नुङ् पारकासङाना बिसाएङि खानि लोनाँनि॥ 2 ठिबाङ् खिरिस्टङि बिस्वास काचोक् याप्मि टोनालोग्ङि चौधा बारखा पाइले माङ्हाङ्ङा फोगु खाट्टुना आङा ठाहा टोगुङ्टुङ्॥ हिट्ना याप्मि ओयेम्ङि इ ओहाङ्साङि इ आङा ठाहा टोक्निङ्ना, माङ्हाङ्ङा एडोक् ठाहा टोगुटु॥ 3 आङा खानि फेरि लोनाँनि, हिट्ना याप्मि टोनालोग्ङि फोगा खाडाना रिङ् ओयेम्ङि इ ओहाङ्साङि इ आङा ठाहा टोक्निङ्ना, टरो ना रिङ् माङ्हाङ्ङा ठाहा टोगुटु॥ 4 हिट्नुङ् हिट्नि उन्ङा याप्मिङाना रिङ्ङा माप्मा डोक् हिनिना रिङ् खेम्सुए, हिट्ना रिङ् माङ्हाङ्ङा याप्मिचि लोमाउङ्सा आनुमोति चोग्वाट्टुन्॥ 5 आङा हिट्ना याप्मिङाना बिसाएङि आनाभुक् ठेलोक् चोगुङ्टुङ्, टरो आप्पे आङाना रिङ्ङिम्बाक् आङाना निम्छारो माले आरु रिङ्ङि आनाभुक् ठेना चोक्निङ्ना॥ 6 टरो आङा घामान्डि लिमा निङ्ग्वा चोगुङे भोने चा आङा ठोनाबा याप्मिम्बाक् लिनिङ्ना, पोङ्भोने आङा छेम्बाना रिङ् डोक् चेक्ङा॥ टरो आङा घामान्डि लिनिङ्ना, पोङ्भोने कोइङा आङा चोगुङ्ना टोॽवा आथाबा माट्टुङ्ना खाबोर नुङ्ना याप्मा याङ्ओलोयाक् नुङ् आङा निङ्ग्वा चोक्निङ्ना॥ 7 हिट्नाडेउङ् माङ्हाङ्लाम्मा डोङ् ठोङ्डिना पारकास टोगुङ्नाँ आङा घामान्डि उलिनिङ् चा नुङ् ओयेम्ङि टिउँबाङा रोक्बालाक् गाड्डेना याङ्छामा टोगेसुङे॥ नाङा सैतानङाना खाबोर काउग्बा गाड्डे डोक् चोसेक् चोसेक् याङ्रोक्ना हिट्नुङ् घामान्ड चोक्मालाम्मा याङ्छाक्ना॥ 8 ना याङ्छामालाम्मा आङा छुट्कारा ओटोगुङ् नुङ् सुम्बोक् खेप् टाङ्बालोक् बिन्टि ठाङ्सुङे॥ 9 टरो उन्ङा नाड्डे याङ्लोडे, “खान् लाउङ्सा आङाना मायादाया जोम्ना ए, पोङ्भोने खान् निम्छारो आलिना बेला डोक् आङाना साक्ति साक्तिसालि लियुक्॥” हिट्डे लिसाउङ् खिरिस्टङाना ओसाक्ति आङालोक् उलियाक् नुङ् आङा फेतुलो लिङाना बेला झान् हारकाङा घामान्डा चोक्ङा॥ 10 हिट्डेउङ् खिरिस्ट लोङ्सा आङा फेतुलो लिङानाँ, चिम्मा याङ्उफुट्नाँ, आप्ठेरो बेला, खेदो याङ्ओचोक्नाँ हिट्नुङ् याङ्छामा आङ्डुङ्नाँ आङा हारका लिङा॥ पोङ्भोने जब आङा फेतुलो लिङा, टब आङा खिरिस्टङि बोल्लेउ लिङा॥ कारिन्थिङिगा बिस्वासिचि लाउङ्सा पावालङाना यान्दा 11 आङाम्टे ठोनाबा याप्मि लिसेसाङे, टरो खानिङा डोक् हिट्डे चोक्मा आङा कार आमेट्टिङे॥ खानिलाम्मा आङा आरुचि सोरि मान् टोक्मा कोन्ना डाना॥ पोङ्भोने आङा पाक्चा माखाक् नुङ् चा हिट्नागा ठेगा मुलिचेलाचि नुङ् उपिग्गा नुङ्ना आङा खाट्टिउना माखाक्॥ 12 आङा खानिलोक् वासाङ्नाँ आड्डिक् धैइरे चोक्सा, याप्मा चिन्नाचि, डोङ् ठोङ्डिगा टोॽवाचि, हिट्नुङ् ठे-ठेगा टोॽवाचि चोगुङुङ् आङा मुलिचेला नुङ् पारमान् चोगेसुङे॥ 13 खोना रिङ्ङा आरु माङ्पाङ्ङिगा नुङ्ना खानि निङ्ग्वा टुक्युक्ना? पाक् आङा खानि घुवार याङ्फाडानि नुङ् लोनेट्निन्ना रिङ्ङा इ? छेम्बा डोक्, आङा खानि घुवार याङ्फाडानि नुङ् लोनेट्निन्॥ आङा ना गाल्ति डोक् चोगुङे, ना रिङ्ङि माफि याङ्पिडानि ए॥ 14 हाट्ले आङा खानि सोरि सुम्बोक् खेप् आप्माना टेयार चोगेसुङे॥ टरो आङा खानिलाउङ्सा खोना चा खारचा चोक्माउङ्सा दुखे पिनेनिन्गा॥ पोङ्भोने खानिलोक् उलिसागा थोक् माखाक्, टरो खानि निङ्ग्वा गोलो आङा याङ्पिडानि॥ पोङ्भोने छालेट्चिङा पाबा-मामा लोङ्सा माखाक्, टरो छालेट्चि लोङ्सा गोलो पाबा-मामाङा माक्फेन्सुबेन् युङ्माबिमा कोन्युक्॥ 15 हिट्नुङ् आङालोक् लिसागा सोब्बे थोक् आड्डिक् हारकाङा खानि पिनाँनि हिट्नुङ् खानि लाउङ्सा आचोला चा पिडुङ्टुङ्॥ आङा खानि जोम् माया चोग्नानिगा भोने, पाक् आङाम्बाक् खाट्टिप्मा एडोक् माया आचोगिटिङागि टे? 16 आङा ना खारचा लिसाना याङ्पिडानि नुङ् खानि दुखे पिनेट्निन्गा रिङ् खानि सोब्बेलाउङ्सा ठाहा युङ्ग्वा॥ टरो कोइम्बाक् आङा ओचाप्पाङ् चोगुङ् खानि सुप्नाने नुङ् उपिग्गा॥ 17 पाक् आङा खानि सोरि पाङ्सुङ्चिङ्गा माड्डे कोइलाम्मा पालोवालो टोगुङ्टुङ् नुङ् छाल चोगुङेनि टे? 18 आङा खानि सोरि तितास खाडा नुङ् लोडुङे, हिट्नुङ् आरको बिस्वासि उन्लोक् पाङ्सुङे॥ पाक् तितासङा खानिलोक् पालोवालो टोगुङ्टुङ् नुङ् माटेप्टिइगि टे? माइना, पाक् आन्याँ ठिक्ए हाङ्साङि वासेट्टिन्नागि टे? हिट्नुङ् पाक् आन्याँ ठिक्ए लाम्बोङि लाम्टिएटिन्गि टे? छेम्बा डोक् लाम्टिइङे॥ 19 पाक् हाट्ले सोम्मा आन्याँ बाचाउङि खानि सोरि आन्याँ चेक्टेट्टिङा नुङ् खानि आमिट्टिटिगि? माखाक्, आन्याँ माङ्हाङ् ओटोकानाङि खिरिस्टङाना सेवाक् लिसिङाउङ् लोनाँनि॥ मायालु साइबाचि, आन्याँ चोगुम्मागा सोब्बे थोक् खानि ओचेट्नु लाउङ्सा डोक् ए॥ 20 पोङ्भोने आङा हिट्नि खानि टुब्सिङा आप्ङानाँ आङा आसा चोगुङ् गाड्डे टुब्नेनिन्गा हिट्नुङ् खानिङा आसा आचोगुम् गाड्डे आङा आटुबिन्नागा होला नुङ् आङा किट्टेसाङे॥ आङा खानि टुब्सिङा आप्ङानाँ खानि माझाङि खेमाबुङ्मा, रेक् काप्मा, याक्लेप्मा, आप्पे एडोक् नुलोक् लिमा कोम्मा, लोमाजामा, खुसुखुसु चोक्मा, घामान्डि लिमा हिट्नुङ् भाँडभैलो लिसाना रिङ् टोगुङ्टुङ् होला नुङ् आङा किट्टेसाङे॥ 21 आङा फेरि खानि टुब्सिङा आब्ङानाँ खानि सोरि माङ्हाङ्ङा मोम्मासिमा याङ्मेट्युक् नुङ् आङा किट्नाँ॥ हिट्नुङ् आनिङ्ग्वा टुक्युक् होला पोङ्भोने खानि याप्माङा पाइलेना पाप आनानिम्गेट्निम्ना॥ खानिङा आचोगुम्ना आसुद्दो टोॽवा, वालाफेडुबा टोॽवा हिट्नुङ् इम्मेप्माजामा टोॽवा चोक्मायाक्माना रिङ्ङाना निङ्ग्वालाम्मा काएल्-काबु आलिसिन्गेट्टिन्गा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.