२ कोरिन्थि 10 - आठपहरिया1 आङा खानिलोक् लिङाना मेयोक् लिङाना बो, टरो लाप्माङ् वाङानाँम्बाक् आँटि लिङाना बो नुङ् खानिङि आम्टेप्माङा आमाट्टुम्गा बो॥ हाट्ले आङा पावाल खिरिस्टङाना नाम्रा हिट्नुङ् दायाङाना आधिकारलाम्मा खानिलाउङ्सा बिन्टि चोग्नाँनि, 2 आङा खानि सोरि आप्ङानाँ आबिस्वासि गाड्डे टोॽवा चोग्याँगा नुङ् आन्याँ याप्मिओलोगा माङ्जोगा रिङ् ओचेक्गालाउङ्सा हिडेट्निङ्ना रिङ् लोडुङ्चिङ् गाड्डे चोक्मा आङा कार याङ्मेट्नेनिन्॥ 3 पोङ्भोने आनि नाराङि युङि चा नाराङिगा याप्मिचि खेमाबुङ्मा ओचोग्गा गाड्डेम्बाक् चोगिन्गा॥ 4 आनि चालाँ चोगुम्गा हातियारम्बाक् नाराङिगा याप्मिचिङा चालाँ ओचोगुना हातियार माखाक्, टरो माङ्हाङ् बिरुद्दाङि ओकोब्गा माङ्जोगा रिङ् हिट्नुङ् साट्टुरचिगा बोल्लेउ ठोङ्चि जाखाम् चोक्माना माङ्हाङ् ओबोल्ङाना हातियारम्बाक् आनिलोक् युङ्ग्वा॥ 5 हिट्नुङ् ना हातियारलाम्मा याप्मिचिङा उमिट्टुना माङ्जोना रिङ् लोक् माङ्हाङ् मिसेन् निमा आबान्ना रिङ् ख्वाप्पा जाक्खाम् चोगुम्टुम्॥ हिट्नुङ् याप्मिङा उमिट्टुगा ख्वाप्पा रिङ् आधिन्ङि युङ्सुम्टुम्, हिट्नुङ् नागा रिङ् चोक्माउङ्सा खिरिस्टङाना उनिङ्ग्वाङि युङ्सुम्टुम्॥ 6 जब खानिङा पुरो आग्याँ पालान् आचोगुम्टुम्, टब आग्याँ पालान् ओचोगुन्गा ख्वाप्पा लाउङ्सा आन्याँ साजाए पिडुम्चिम्चिम्मा॥ 7 खानिङा आनिसुम्गा छेम्बाना रिङ्चि बिस्वास चोगानुम्॥ कोइङा उन् खिरिस्टङाना ओयाप्मि नुङ् आप्पेलाउङ्सा बिस्वास चोगुटु भोने, हिट्नाङा उन् गाड्डे डोक् आन्याँ चा खिरिस्टङाना ओयाप्मिचि नुङ् बुजा चोक्मा कोन्युक्॥ 8 टाङ्बाङा आन्याँ ना आधिकार याप्मिपिडाना बारेङि माट्टुङ्ना आड्डिक् घामान्डि चोगाङे भोने चा आङा मोन्निङ्सिनिङ्ना, पोङ्भोने ना आधिकार खानि बिस्वास छाकाछिल्ला चोक्मा माखाक्, टरो बिस्वासङि खानि बोल्लेउ चोक्माउङ्सा ए॥ 9 आङा खानि चिट्ठि छेप्टुङुङ् किप्मालाप्मा कोन्नानिगा माखाक्॥ 10 कोइङा नाड्डे ओमाट्टुगा, “हिट्नाङाना चिट्ठि आड्डिक् लुम्भोक् लोना हिट्नुङ् साक्तिसालि लिना, टरो हिट्ना आप्पे खानिलोक् लिनाम्बाक् निम्छारो लिना, हिट्नुङ् हिट्नाङा चेक्मा पारा डोक् टाडुन्ना॥” 11 हिड्डेगा याप्मिचिङा आन्याँ चिट्ठिङि छेप्टुम्मा गाड्डे डोक् खानिलोक् एक्केउ वासिङानाँ चा, लाप्माङ् वासिङानाँ चा हिट्डेडोक् चोगिटिङा नुङ् हिट्नागाँ बुजा चोक्मा कोन्युक्॥ 12 आप्पेलाउङ्सा ठेलोक् काचोक् कोइ-कोइ याप्मिचिलोक् आन्याँ आप्पेलाउङ्सा टोङ्मा आँट् चोक्निम्मागा आथाबा हिट्नागा याप्मिचि पारागा डोक् नुङ् आप्पेलाउङ्सा ठिक्ए ठोङ्ङि युङ्निम्मागा॥ टरो हिट्नागाँ बुजा डोक् मिचोक्ए आप्पेलाउङ्सा ठिबाङ्ङा आरकोलोक् उछिक्टुजोगा हिट्नुङ् ठिबाङ्ङा आरकोलोक् ओटोङ्सुगा॥ 13 माङ्हाङ्ङा टोॽवा चोक्मा नुङ् याप्मि पाङ्साना ठोङ् नुङ्ना या भारा खाडिङाउङ् टोॽवा चोगुमे नुङ् ठेलोक् रिङ् चोगिन्नागा॥ टरो माङ्हाङ्ङा टोॽवा चोक्मा नुङ् याप्मिपिडाना ठोङ्ङि एडोक् चोगुम्टुम्मा नुङ् ठेलोक् रिङ् चेक्टिटिङा॥ हिट्नुङ् माङ्हाङ्ङा खानि ठोङ्ङि टोॽवा चोक्मा याप्मिपिडेसे॥ 14 माङ्हाङ्ङा आन्याँ चोक्मा नुङ् याप्मिपिडाना टोॽवा नुङ् याप्मा चोक्मा कोन्निम्गेट्निम्मागा, हिट्नुङ् ना टोॽवाम्बाक् खानिङि टायुगेट्॥ छेम्बा डोक्, पाइले आन्याँ डोक् खानि सोरि खिरिस्टङाना बारेङि नुना खाबोर आप्टुमुङ् आबिङे॥ 15 आन्याँ आरुङा ओचोगुना टोॽवाङाना माखाक्, टरो आन्याँ चोगुम्माना टोॽवाङाना एडोक् ठेना रिङ् माट्टुम्टुम्मा॥ खानि बिस्वासङि बोल्लेउ लिसा आखाडिनाँ आन्याँना खानिङि टोॽवा चोक्माना ठोङ् चा ठेना लिसा खाट्युक् नुङ् आसा युङ्सेसुम्मे॥ 16 हिट्नुङ् खानिलाम्मा चा लाप्माङ् आरु ठोङ् आन्याँ खाडिङाउङ् नुना खाबोर पारचार चोक्मा हिडुम्टुम्मा॥ हिट्नुङ् पाइले डोक् आरु कोइङा उन्चि ठोङ्ङि ओचोगुना टोॽवाङाना बारेङि आन्याँ ठेना रिङ् चेक्टिन्नागा॥ 17 धारमाछाप्लाङि नाड्डे छेप्टेसे, “कोइङा ओनाभुक् ठेलोक् चोगुटु भोने, टाङ्बाङा चोगुना टोॽवाङि एडोक् ठेलोक् ओचोगुवाक्॥” 18 पोङ्भोने कोइङा आप्पेलाउङ्सा ठेलोक् चोगुटु भोने हिट्ना लाउङ्सा ओचेट्नुना लिनिना, टरो टाङ्बाङा डोक् ठेलोक् चोगुटु भोने, हिट्ना लाउङ्सा ओचेट्नुना लियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.