२ कोरिन्थि 1 - आठपहरिया1 माङ्हाङ् उनिङ्ग्वालाम्मा खिरिस्ट येसुङाना मुलिचेला आङा पावाल, हिट्नुङ् आनि झान्झा तिमोथिलाम्मा ना चिट्ठि ए॥ आङा ना चिट्ठि कोरिन्थि खालाङ्गाङि उलिसागा माङ्हाङ् माङ्पाङ्ङिगा याप्मिचि हिट्नुङ् आखैया छेट्राङि उयुङ्गा सोब्बे माङ्हाङ् ओयाप्मिचि लोङ्सा छेप्टुएट्टुङ्॥ 2 आनि माङ्हाङ् पाबा हिट्नुङ् टाङ्बा येसु खिरिस्टङा खानि मायादाया लोक् हाङ्हाङ् मापिडियाक्॥ माङ्हाङ्ङा आँट् आपियुक् 3 आनि टाङ्बा येसु खिरिस्टङाना माङ्हाङ् पाबाङाना उनिङ् टो-टो चोन्डुम्॥ माङ्हाङ् आनि दाया काचोक् पाबा ए, हिट्नुङ् उन्ङा सोरोक् आनि आँट् आपियुक्॥ 4 माङ्हाङ्लाम्मा आनि टोगुम्ना आँट्ङा आरु याङ्छामाङि ओठायागालोङ्सा चा आँट् पिमा उहिडुम् नुङ् डोक् उन्ङा आनिलाउङ्सा सोब्बे पारिक्ङागा याङ्छामाङि आँट् आपियुक्॥ 5 पोङ्भोने खिरिस्टङा याङ्छामा आङ्डु गाड्डे आनि चा जोम् याङ्छामा आङ्डेट्टुम्, हिट्डेउङ् खिरिस्टलाम्मा जोम् आँट् टोगुम्टुम्॥ 6 आनि याङ्छामा आङ्डुम्टुम्मा भोने, हिट्ना खानिलाउङ्सा आँट् टोक्माना लोक् माङ्हाङ्लाम्मा हिङ्माना रिङ् लियुक्॥ आन्याँ आँट् टोगुमे भोने हिट्ना खानि लाउङ्सा आँट् लियुक्, हिट्नुङ् ना आँट्लाम्मा आन्याँ आङ्डुम्माना याङ्छामा डोक् खानिङा धैइरे आलिसिउङ् आङ्मा आहिडुम्टुम्॥ 7 हिट्नुङ् खानिङि लिसाना आन्याँ आसा सिनिगेट्निना॥ आन्याँलोङ्सा ठाहा युङ्ग्वा, पोङ्भोने आन्याँ आङ्डुम्माना गाड्डेना याङ्छामा खानिङा चा आआङ्डुम्टुम्, हिट्डेउङ् आन्याँ टोगुम्माना गाड्डेना आँट् खानिङा चा आटोगुम्टुम्॥ 8 आम्भु-आन्झाचि हिट्नुङ् आनो-आन्झोचि, एसिया छेट्राङि आन्याँ आङ्डुम्माना याङ्छामाङाना बारेङि खानिङा ठाहा टोगानुम् नुङ् लोनाँनि॥ हिट्नि आन्याँ आङ्मा डोक् हिनिम्मालोक् आड्डिक् टुक्लोक् याङ्छामा टोगुम्मे, हिट्नुङ् आन्याँना हिङ्माना आसा डोक् मासाडाना डाना॥ 9 हाउ हाट्लेम्टे आन्याँ सिइङे नुङ् मिट्टेसुम्माना॥ टरो नाड्डे लिमाम्बाक् आन्याँना आप्पेङिना बोल्ङि भोर चोक्मा माखाक्, टरो उसियागा उहिङ्ग्वाट् काचोक्बा माङ्हाङ्ङि एडोक् भोरोसा चोक्मा कोन्युक् नुङ् आन्याँङि नाड्डे लिसाना॥ 10 उन्ङा आन्याँ आड्डिक् किप्माडुङ् सिमालाम्मा याप्मि हिङ्मेट्टे, हिट्नुङ् उन्ङा फेरि चा आहिङ्मेट्युक्॥ उन्ङि आनि आसा युङ्सुएसुम्मे, हिट्नुङ् उन्ङा आनि फेरि फेरि चा आहिङ्मेट्युक्॥ 11 हाट्ले खानिङा आन्याँ लाउङ्सा बिन्टि आठाङ्सुमुङ् घुवार याप्मि आफाएट्॥ नाड्डेउङ् याप्मा याप्मिचिङा आन्याँना सुरेक्छे लाउङ्सा बिन्टि ओठाङ्सुना माङ्हाङ्ङा हिट्नागाँ ओचोगुना बिन्टिङाना उत्तार पिडुचिचि, हिट्नुङ् आरु जोम् याप्मिचिङा माङ्हाङ् पोए-पोए ओठाङ्सुटु॥ पावालङा योजाना फेराँ चोगुना 12 ना नाराङि एडोक् माखाक्, खानि ओटोक्माङ्ङि चा माङ्हाङ् उनिङ्ग्वा गाड्डे आन्याँ चाट्ला चोखो हिट्नुङ् सोजो लिसाना रिङ् आन्याँ निङ्ग्वालाम्मा निस्चित लिसिङाउङ् माप्मा हिडुम्टुम्मा॥ आन्याँ नाराङिना याप्मिङाना ओठोनाङि माखाक्, टरो माङ्हाङ्ङाना ओमायादायाङि भोरोसा युङ्सुम्टुम्मा॥ 13-14 आन्याँ खानिङा पोढाँ चोक्मा हिट्नुङ् बुजा चोक्मा आहिडुम्ना रिङ् एडोक् छेप्टुम्टुम्मा॥ टरो चा हाट्ले खानिङा आन्याँ बारेङि खाट्टिप्मा एडोक् बुजा आचोगुम्टुम्, टरो ठिक् लेम्बा खानिङा आन्याँ बारेङि सोब्बे रिङ् बुजा आचोगुम्टुम् नुङ् आङा बिस्वास चोगुङ्टुङ्॥ हिट्नुङ् आनि टाङ्बा येसु नोक्युउङ्ना लेम्बा खानिलोङ्सा आन्याँ नाभुक् ठेलोक् चोगुम्टुम्मा, हिट्डेडोक् खानिङा चा आन्याँलाउङ्सा खानि नाभुक् ठेलोक् आचोगुम्टुम्॥ 15 ना रिङ्ङा आङा ढुक्का लिसाङे, हिट्डेउङ् आङा खानिङा इप्पोक् खेप् याङ्आनिसिङाउङ् आसिक् आटोगुम्टुम् नुङ् खानि टुब्सिङा पाइला आप्माना निङ्ग्वा चोगुङे॥ 16 आङा माकेडोनिया छेट्रा खाट्नाङा चा खानिङि होन्नाँ हिट्नुङ् हिट्निलाम्मा नोक्ङाना चा होन्नाँ, हिट्नुङ् याहुदिया छेट्राङि खाप्माउङ्सा घुवार आफाडिटिङा नुङ् आङा निङ्ग्वा चोगुङे॥ 17 पाक् आङा नुलोक् निङ्ग्वा मिचोक्ङे ना योजाना चोगुङे नुङ् खानि आमिट्टिटिगि? पाक् आङा नाराङिना याप्मिचि गाड्डे हिट्नागाँगा योजाना बारेङि छोप्मोङ् “लियुक्” हिट्नुङ् छोप्मोङ् “लिनिना” नुङ् पिग्ना आमिट्टिटिगि? 18 माङ्हाङ् बिस्वासयोग्ए वाहेट् हिट्नुङ् आन्याँ रिङ् चा बिस्वासिलो ए, हिट्नुङ् आन्याँ “लियुक्” माप्मा कोन्ना रिङ्ङि “लिनिना” नुङ् पिगिन्नागा॥ 19 पोङ्भोने सिलास, तिमोथि हिट्नुङ् आङा खानि माझै माङ्हाङ् छा येसु खिरिस्ट पारचार चोगुम्मानाँ “लियुक् हिट्नुङ् लिनिना” रिङ् वानेट्निना, टरो उन्ङा माट्टुना रिङ् चोगुटु डोक्॥ 20 पोङ्भोने माङ्हाङ्ङाना सोब्बे माङ्हुप्म्बाक् खिरिस्टङि युयुक्॥ हिट्नुङ् उन्लाम्मा डोक् माङ्हाङ्ङाना माहिमा लाउङ्सा आनि “आमेन्” माट्टुम्टुम्॥ 21 हाट्ले माङ्हाङ् आप्पेङा डोक् आन्याँ हिट्नुङ् खानिलोक् खिरिस्टङिना साम्बान्धाङि बोल्लेउ आचोग्युक्, हिट्नुङ् माङ्हाङ्ङा डोक् आनि आसेग्युक् चा॥ 22 हिट्नुङ् आनि उन्ङाना डोक् नुङ् निमेट्माउङ्सा उन्ङा सेङ्सेङ्ना हाङ्साङा उन्ङाना आङ्गुलिङाना छाप् आनि निङ्ग्वाङि आयुङ्साबिडेसे॥ नाड्डेउङ् सेङ्सेङ्ना हाङ्सा आपिडानाँ उन्ङाना ख्वाप्पा चामारसिङा आनि टोगुम्टुम्॥ 23 आनिङ्ग्वा कानिबा माङ्हाङ् साँचि युङ्सुङुङ् आङा आप्पे लोनाँनि, खानिलोङ्सा खेमा लाप्मा ओकोन्नि चा नुङ् डोक् आङा कोरिन्थिङि फेरि आब्नेएट्निङ्॥ 24 खानिङा आचोगुम्ना बिस्वासङि आन्याँ सासान् चोक्मा कोलुम्माना माखाक्, टरो खानि चाप् लाउङ्सा डोक् खानिलोक् ओटोक्माङ् टोॽवा चोगुम्टुम्मा, पोङ्भोने बिस्वासङि खानि बोल्लेउ आवासेट्टि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.